Isaíasi2
Larúeihan Bungiu haganagua néchanigu
1Anihán uganu le leresibirubei Isaíasi le liráü Amosu lúmagiñe Wabungiute libügürü Hudá luma Herusalén:2Lidoun burime lagumuhóun dan lederebuguduba wübü le ñein tubéi litenpulun Wabureme. Ligíaba wübü íñutima, íñutimabei sügǘ lau furumiñeguarügü amu wübü. Sun néchanigu hayabiba lumoun;3hayabiba saragu gürigia ariñageina: «Higougu, warí wamá luagun luwübüri Wabureme, tidoun litenpulun Lubungiute Hakobu, arufuda láamugei lémeri woun, gayara láamuga wéibugun lidan lémeri. Ladüga Sióngiñeba láfurida larufudahan Wabungiute, Herusaléngiñeme lererun».4Laguseragüdüba Wabureme hadan néchanigu, ladeinhaba giñe houn saragu gürigia. Ábame hadaagun hu tídangiñe hefeinte, adüga hagíame líbaaha sagadi lau harufunte. Mageindagunhalime aban néchani luma ábanya, mibihin hagíame arufudahani lun wuribu.5Higougu lumutuniña Hakobu, éibuga wamá lidan lilanpun Wabureme!Laguseragüdün Wabureme
6Wabureme, ígira baaña bumutuniña ha lílana Ísüraeli, buin liña fulasu hau garíaahatiña ha ñǘbuinbaña luéigiñe oubaü le ñéingiñe lubéi laboucha weyu buin liña hau búyeigu kei hadan Filistéana, aba hadaagun daradu hama terencha.7Buin liña fulasu lau golu luma pülata, lau saragu irisini buin liña fulasu hau gabayu tuma saragu karü.8Gama lumoun buin liña giñe hau guáriuagu! Huduguatiña gürigia houn búngiugu ha hadüga lau háhabu, ha hadüga lau hafinga guánarügü.9Ǘnabudaguagüdaaña houngua. Ualá ferudunabániña!10Hebeluruba burí gürigia labadinaguóun dübü, lábugiñoun múa; haramudaguba luéi harihini lanarime ligañi Wabureme, luéi lámirihan luéirigun.11Ha barüguabaña houngua, habuluchaguba, ha íñugubei hanaagun houngua, hǘnabudawagüdüba. Waburemerügüba arufudei luéirigun lidan weyu ligía.12Danme le lachülürün luéyuri Wabureme Suntigabafu kóntürabei sun ha barüguabaña houngua, ha íñugubei hanaagun houngua lun lǘnabudagüdüniña;13kóntüra sun ha íñugubei hasandiragun houngua kei hibúari le Líwanuna, odi kei lan tídibu ensina le Basanna;14kóntüra sun ha asandiragubaña houngua kei wübü burí íñuti,15kóntüra sun ha asandiragubaña houngua kei wáyelesi íñuti o baríeiru lauti dübü le derebuguti.16Kóntüra sun ha asandiragubaña houngua kei ugunei Tárüsisina o waporu buíduburitu.17Sun ha barüguabaña houngua, háünabudawagüdüba sunsuinagubei. Waburemerügübei arufudei luéirigun lídanme weyu ligía,18ábame lagumuchun hau sun guáriua.19Danme liabin Wabureme lun labuinchagüdüni ubóu lau anufudei, hebeluruba burí gürigia lagadábugiñoun dübü, lidoun burí huyu le múarugubei; haramudaguba luéi lanarime ligañi Wabureme, luéi lámirihan luéirigun.20Lídanme weyu ligía, hachagarubaña gürigia habungiutegu houn garadun luma houn búriri, habungiute ha pülata luma golu, ha hadügübaña lau háhabu guánarügü lun háhuduragun houn,21ábame burí hádaragun houngua lidoun luhuyun dübü, luma lagadábugiñoun dübü wéinamuti, lun haramudagun luéi lanarime ligañi Wabureme, luéi laruni luéirigun, danme liabin lun labuinchagüdüni ubóu lau anufudei.22Hebé hemenigidun hawagu gürigia, ladüga ni kata hagía. Ítara liña habagari gürigia kei aban awaraguni.Bible Society of Honduras