Áfuriduni26
Sanduariu
1—Ariñagabá houn Ísüraelina lun hadügün aban sanduariu nun tau diisi korutína to linu giñuriwatu, gamisa koloru guchu, koloru guchu héretimati tuma funatu; haborudarame bián kátaña garünatiña tuagu.2Ábanbei labu tuéinamun sun korutína tuguya: Duusu méturu dimí timigifen, bián méturu tidabuberen.3Háhüchame seingü korutína lidan aban, aban tigibuagu aban, kéigubeirügü to tíbiri seingü,4híchigame átiri uhali lau gúrudu koloru guchu luagu tedebugiñe furumiñetu korutína to lídanboun furumiñeti sétanu, luma luagu tedebugiñe tagumuhóun korutína to lídanboun le libiaman sétanu.5Hadügüba dimí-san uhali dandu tuagu korutína to lani furumiñeti sétanu kei tuagu to lani libiaman sétanu, terederame aban tigibugiñe aban.6Adüga humá giñe dimí-san pini golu lun tadahirúniwa furumiñeti sétanu korutína luagu le libiaman sétanu lun ábanmeme tan sanduariu.7—Adüga humá giñe unsu korutína lauti liyu gábara lun tadügǘniwa aban kianpu lun tadouragun tau sanduariu.8Ábanbei labu tuéinamun sun korutína tuguya: Tareisi méturu dimí timigifen, bián méturu tidabuberen.9Háhüchame seingü korutína lidan aban luéigiñe aban oubaü, sisi luéigiñe le aban, habaruchaguounme tisisin korutína tigibugiñe kianpu.10Hadügame dimí-san uhali luagu tedebugiñe tagumuhóun korutína lídangiñe furumiñeti sétanu, luma ábanya dimí-san uhali luagu tedebugiñe korutína to lani libiaman sétanu.11Hadügame giñe dimí-san pini lauti buronse, hadibiragüdeime luagu burí uhali; lun ábanmeme tan kianpu.12Kei miginagutima tan tikorutinan kianpu, tamidan to ígiraguboun terederuba dibiñu tanagangiñe sanduariu.13Ítara luba terederun sanduariu darugu lau le ígiragubei lídangiñe timigifen korutína luéigiñe biángubei oubaü bián-wein-seingü sentimeturu luéigiñe kada aban oubaü.14—Hadügame tidáü kianpu lau lura mudún le féindiwati lau funati, luma aban idáü lauti uraü fínuti lun íñugiñe tibiti.15—Hadügame fiu fulansu lauti akasia tun sanduariu, hígireime suruñu buidu buidu.16Gádürübei méturu dimí limigifen kada fulansu, ǘrüwa-wein-seingü sentimeturu lidabuberen,17lau bián pini lun lárügüdün aban fulansu luagu le aban. Ítara luba hadügüni sun fulansu tun sanduariu.18Danme hadügüni hadügame wein fulansu lun oubaü le suru,19híchigame bián wein ebu pülata lábugiñe. Ñeinbei bián ebu lábugiñe kada fulansu, lun bián lipinin.20—Hadügüba giñe wein fulansu lun oubaü le nórute tibiti sanduariu.21Lau bián-wein lebu lauti pülata, ñein láamuga bián ebu lábugiñe kada fulansu.22Lun oubaü le ñéingiñe lubéi lálüda weyu tibiti sanduariu, hadügame sisi fulansu,23lúmaya bián fulansu lun lagumuhóun tarigei sanduariu le tanagangiñebei.24Fulansu burí le, gasu gouba lan kada aban, lerederame ragüñu luougua íñugiñe libiti chülǘ lumoun furumiñeti bagü. Ítara luba ladügǘniwa lau bián fulansu le lúntibei tarigei sanduariu.25Ñeinbei lubeiti widü fulansu lau disisi ebu lauti pülata, bián ebu lábugiñe kada fulansu.26—Hadügame seingü ebu lauti akasia lun fulansu burí le tóubawagubei sanduariu,27seingü ebu lun fulansu burí le luéigiñebei le aban oubaü, lúmaya seingü ebu lun fulansu le tanagangiñebei le luágunbei oubaü le ñéingiñe lubéi lálüda weyu.28Ebu le amidanibei, lánhiñuraguba luéigiñe aban oubaü lun luagun le aban lásügürame lamidanguagiñe fulansu.29Hafurareime fulansu burí lau golu, hadügame bángüli golu lun lacharúniwa ebu le afurarúaali lau golu lidoun.30Adüga humóun sanduariu kei tarufudúniwa bun luagu wübü.31—Adüga humá aban belu tau gamisa koloru díngutu, gamisa koloru guchu, funatu tuma linu to giñuriwatu, baborudarame bián kátaña garünatiña tuagu.32Hadibiragüdeime lau fiu pini lauti golu luéigiñe gádürü wagabu le lauti akasia le afurarúati lau golu, lichugúame luagu gádürü ebu le lauti pülata.33Ábame hadibiragüdünu belu lábugiñe pini, híchigounme bágüsi to lánina daradu ñein tanagangiñe belu. Ítara luba teseriwidun korutína hun lun tadüraaguni fulasu le Sándubei luma fulasu le Sándutimabei.34Lárigiñeme híchigeime idáü tuagu lubagüsina daradu lidan fulasu le Sándutimabei.35Híchigeime dábula bóugudi tibiti belu luéigiñe nórute tibiti sanduariu, híchigeime lebu sanudelu luéigiñe suru, ligibugiñe dábula.36—Hadügame aban korutína tau gamisa díngutu, koloru guchu, funatu tuma linu giñuriwatu, aborudahóuatu, híchigounme luagu tebelaagüle kianpu.37Hadügame giñe seingü wagabu lauti akasia tun korutína, hafurareime lau golu, lau lipinin golu, hadügame seingü ebu lauti buronse lun wagabu.Bible Society of Honduras