Áfuriduni27
Latarü le lauti buronse
1—Adüga humá aban latarü le lunbei ábanbei lan labu limigifen luma lidabuberen, láutibei akasia, bián méturu wein-seingü sentimeturu luéigiñe kada louba, aban méturu wein-seingü sentimeturu liñun.2Hadügame gádürü pini luagu lun gádürü larigei hafurareime latarü lau buronse.3Sun katei le lunbei layusurun luagu latarü, láutibei buronse: Lagei baligi, chóbuli, kopu wéinamuti, fígiedu, luma lagei leñegura watu.4Hadügame giñe aban ayarawaguni lauti buronse, híchigame gádürü bángüli lauti buronse luagu gádürü larigei ayarawaguni.5Lárigiñeme ábame híchuguni ayarawaguni lábugiñe laru latarü, lun lerederun lamidangua liñun latarü.6Hadügame giñe fiu ebu lun latarü le lauti akasia, hafurareime lau buronse.7Lásügürame ebu ligía labadinaguagiñe bángüli, lerederame luagu bián louba latarü lun gayara lan liñurawagun.8Láutibei wewe latarü, hunren lurageirugun, ítara kei le barihubei luagu wübü.Tibürürün Sanduariu
9—Hadügame aban bürürü tun sanduariu. Ñeinboun korutína tautu linu giñuriwatu luéigiñe suru tibiti tuleñu luagu, timigifen bián-wen-seingü méturu.10Wein tuágaburi luma wein tebu, láutibei buronse, tipinin luma tubagün lau pülata.11Luéigiñe nórute tibiti, ñeinboun korutína luagu timigifen bián wein seingü méturu, lau wein tuágaburi lau wein tebu buronse, tipinin luma tubagün pülata.12Luéigiñe oubaü le ñéingiñe lubéi lálüda weyu, ñeinboun wein-biama méturu dimí korutína, tuleñu luagu lidabuberen bürürü, lau diisi wagabu luma diisi ebu.13Luéigiñe oubaü le ñéingiñe lubéi laboucha weyu, ñeinboun giñe wein bián méturu dimí korutína luagu lítulen bürürü.14Luéigiñe aban oubaü le ebelaagülei, ñeinboun sedü méturu korutína lau ǘrüwa wagabu luma ǘrüwa ebu.15Luéigiñe le aban oubaü, ñeinboun giñe sedü méturu korutína lau ǘrüwa wagabu luma ǘrüwa ebu.16Luagu ebelaagülei lidoun bürürü, ñeinboun nefu méturu korutína tautu gamisa koloru díngutu, koloru guchu, funatu, tuma linu giñuriwatu, aborudahóuatu, lau gádürü wagabu luma gádürü ebu.17Sun wagabu le geyegubei lau bürürü, ñeinbei bagü lauti pülata luagu, pini lauti pülata luma ebu lauti buronse.18Bián wein séingübei méturu limigifen bürürü wein bián méturu dimí lidabuberen luéigiñe biángubei oubaü, bián méturu wein-seingü sentimeturu liñun. Táutuboun linu giñuriwatu korutína, ebu láutibei buronse.19Sun katei le ayusurubei lun kultu tidan sanduariu láutibei buronse, sun giñe tugudina luma lugudina bürürü láutibei giñe buronse.Garaba lun lanpu
20—Bariñagame houn Ísüraelina lun hanügün lagüle oliwu bun, lun durungu lan lanpu súnwandan.21Aarón hau lirahüñü hagíaba aransehei lanpu lun durungu lan ligibugiñe Bungiu sun áriebu tidan kianpu to lánina óundaruni luma Bungiu, bóugudi tuéi belu to tubaduboun bágüsi to lagei daradu. Lúrudu lunti sun dan le, houn Ísüraelina luma houn hadügawagun.Bible Society of Honduras