Amosu5
Agúaruni lun lagiribudúniwa lun Bungiu
1Aganba huméi nererun, Ísüraelina; aganba huméi uremu híruti le neremuhabei huagu:2«Ábürüha Ísüraeli le wéndebei ani haruma kei aban würi to mámarigiru; ábürüha lun másaarunhali lan, ábürüha lumúanrugu guánarügü, ani úati kaba lan ásaaragüdei».3Ítara liña lariñagun Wabungiute houn Ísüraelina: «Anhein óunaha aban uburugu milu wügüriña wuriburugun, sánrügübaña agiribuda wínwanñu; anhein óunaha san, díisirügübaña agiribuda».4Ítara liña lariñagun Wabureme houn Ísüraelina: «Ñübuin humá numoun, gabagari humaamuga.5Midin humá Betelin, midin humá Gilügálin másügürün huguyame Bérüsewagiñe, ladüga chóuruti lanügǘn Gilügáli adaürǘwa luma lagünrinchawagun Beteli».6Ñübuin humá lun Wabureme, ábame gabagari humá; anhein madügün humá ítara, lóunahaba watu gemeti luagun Ísüraeli, ani úabei ni aban lun léñeguchuni watu ligía Beteli.7Fugiabugu huguya ha agifidagüdübalin irichaü, huguya ha águrubalin irichaü múarugun!8Wabureme le adügübaliña waruguma ha siélubaña ligía adügübalin áriebu lun wéyuagume, adügaléi wéyuagu lun áriebume le búrigati; ligía agúarubei lun lidunari barana aba láturuni luagun múa; ligía óunahabei günringuaü luagun uburugu derebuguti gumuguagüda laaña gabafutiña. Aburemei, ligía líribei.10Fugiabugu huguya le iyereehabúbei lun le adügübei irichaü, mínsiñe ligía gefenti le úaraguabei hun!11Kei dügügua hubalin gudemeti, aguburaha huguya liseinsun lúrudu lúmagiñe tuagu türigu, maganóunbadün tidan burí muna lautu dübü to hábunaguboun, matun huguyame diwéin tídangiñe beibei to hábunaguboun.12Subudi numuti liibe hifigoun luma huriban: Rutün lidere dan lun le richaguabei, resibitün seinsu lun madügün humá irichaü tidan lúbaana aguseruni, féridigüda humuti likesin gudemeti lun lidan guséi.13Ligía lubeiti le chubei aau maniti ladüga wuribaali dan le ídanbei waganawa.14Áluaha huméi buiti, mama wuribati, ábame gabagari humá; ítara luba inarüni lan le hariñagubei: Luagu anihein lan Wabureme Suntigabafu huma.15Iyereegulá wuribani hun! Hínsiñela le buídubei hun! Chóurugua humá hungua luagu rúa lan liricha gürigia lun lidan aguseruni; háfuga ítara luba gudemehabu lan Wabureme Suntigabafu houn lánigu Ísüraeli ha wínwangiñabaña.16Ítara liña lariñagun Wabureme Suntigabafu: «Ñeinbei ayahuni lidan sun burí párüke, ñeinbei agúarahani lánina igarigu ǘmadarugu. Laguarúba lun nadagimeinti áraabu lun lamuiserun, laguarúba houn gayahuahaditiña hilaaña lun hayahun.17Hayahuba lidan sun beibei-agei danme niabin abeichaün». Aburemei ariñagubalin.Luéyuri Wabureme
18Fugiabugu ha óurabahoubaña lubá lachülürün luéyuri Wabureme! Subudi humuti ida luba lan weyu ligía hun? Luéyuribei luburiga, mama larugounga.19Ítara luba kei dan le léibaagun gürigia luéi aban liñún aba ladunragun luma aban osu, o kei lan dan le lebelurun gürigia lúbiñoun aba labalachun touba muna, aba tágürüni hewe.20Ítara luba, búrigabei luéyuri Wabureme, marugounganbéi, búrigabei sunsuinagubei.Irichaü labusenrubei Bungiu mama adagaragüdüni
21«Iyereeguti fedu burí le hadügübei nun; magundantina lau burí hóundaragun.22Mabusenrun numuti burí adagaragüdüni le hadügübei lidan niri, ni hidewese le fulúaruauti; meresibirun nubaña burí bágasu dibunetiña lánina arandaruni ha hadagaragüdübaña.23Dise humá nuéi lau lamuri heremuhan! Mabusenruntina naganbunu hani árüpa!24Láwiyuha irichaü kei duna, luma arumani kei lísensen duna madararaditi.25«Huguya Ísüraelina, rutün funagia adagaragüdüni luma idewesei nun lidan bián-wein irumu le haubei lidan fulasu mageirawati?26Guentoti gasu hóuyuahani Sikutu le hurúeite tau Kiyún, to luaruguman, guáriuagu ha guánarügü hadügübaña.27Nígiruba lun hanügǘn keisi adaürǘtiña, yagürounmeme luéi Damasüku». Aburemei ariñagubalin. Bungiu Suntigabafu, ligía líribei.Bible Society of Honduras