Amosu4
1«Aganba huméi katei le würiña wéirigutiña Samaria, ha dibunebaña kei bágasu Basanna, huguya le íchugubei lidere dan houn gudemetiña, óuseragua humaña ha mégeihabubaña, huguya ha ariñagubaña houn heyeritegu lun hanügün diwéin hun lun hatun.2Fiñuti Aburemei luagu liri le sándubei: Anitebei dan lun haduruuhóun huguya hama hisaanigu lau günwi bóugudin luéi uburugu, kamá hamuga úduraü, mesefubei ni aban hídangiñe.3Háfuriduba aban lárigi aban, luéigiñe líhunren baríeiru ábame hagurún luagun wübü le Erümón». Aburemei ariñagubalin.
Lumahan Ísüraeli lun lasakürihan
4«Heiba Beteli luma Gilügáli; hafigouha gánwoungüda huméi huriban! Barǘ huméi hadagaragüdün binaafin, Ru humeime diisi murusun lídangiñe le húmati sagü ǘrüwa weyu.5Hágudaha fein maganatu lébini keisi idewesei lánina eteingiruni, lárigiñeme ábame hidin ariñaga luagu rúhadün lan idewesei lau hugundan, kei ligía lan aubei hagundaara». Aburemei ariñagubalin.6«Áfagagüda numutün ilamaü lidan burí sun huburugute; adügatina lun lemegeirun éigini lidan sun hageira, Gama lumoun magiribudúntün nun!» Aburemei ariñagubalin.7«Adügatina giñe lun hemegeirun huya ǘrüwa hati lubaragiñe alubahani. Áhuyagüdatina huya lidan aban uburugu máhuyunti lidan le aban; áhuyati lidan aban áraabu máhuyunti lidan le aban, aba lamabeidun ladüga lúan duna;8éibugatiña gürigia lídangiñe aban uburugu lidoun burí amu áluaha duna, madaritiña le buídurügüti lun lagalumadun hamagürabu, Gama lumoun huguya magiribudúntün nun!» Aburemei ariñagubalin.9«Bei numutün lau garabali süti luma hau igei, sáügüda numuti hinadürigu, hou hamuti chagagaru hinadürigu, Gama lumoun magiribudúntün nun!» Aburemei ariñagubalin.10«Óunahatina igei huagun hibe ha nóunahabaña luagun Ehiptu, adügatina lun hóunwegun wügüriña nibureintiña wuriburugu, ígira au lun hanügüniña háganiñu hilügüniña gabayu; hirimichagüda numuti hingin hilaaña kianpu-ágeirugu hun, gama lumoun huguya magiribudúntün nun!» Aburemei ariñagubalin.11«Günringua numutün lau aban katei hanarimeti luriban kei le nóunahabei luagun Sodoma luma Gomora; ítara liña kei leñegura watu le sun liña lasagarun wáturugugiñe, gama lumoun huguya magiribudúntün nun!» Aburemei ariñagubalin.12«Ligía lubeiti, Ísüraeli, ligiamémeba giñe nadüga bun. Ani kei nadügübei lubéi, aransebá lun bagagibudagun luma Bubungiute!»13Aburemei, le adügübalin burí áraabu luma garabali, le asubudiragüdübalin laritagun houn gürigia, le asansiragubalin larugounga lidoun luburiga, le éibugubalin liñun-agei múa, Aburemei Suntigabafu, ligía líribei.Bible Society of Honduras