Wos Ananun2
Fandun ro firnanem
1Romawa yedi, wakin epen farkarkor yenane, ma waswarepen navye ananun yavuk faro au.2Faduru pyum firnanemya ma sweref fa wafawi navye kaku.3Sye, romawa yedi au, sweref insa wasmai swaruser vesar ma wor insa wasmai swarnanemya.4Swewari raris swewar brawen, ma wayomi raris wayom nana vevayek.5Rarirya nari wafawi mnuk vekur araryof faro Manseren Allah I ma nari wasmai fawawi nanem vekur Allah I.6Manseren Allah I vevuk firnanemya; ro I monda snonkaku sya sismai fawawi ma swarnanem.7Faro snonkaku venapes ma eve pusmarva, Vyuk fanfnovek ma kadaun.8Manseren Allah iwaren warek snonkaku vena rari veyavyover, ma kyadiren snonkaku veswar Insya.9Romawa yedi, wasoyuser ayanido, nari wafawi kenem veyavyover, venapes ma vekakuya. Nari wafawi kako mov risai wakenem raya.10Nari wasmai firnanemya ma fawawi bena nafrur raryav snembri.11Swarnanem ma fawawi nanem bena nari nakadaun au,12ma nadwarek au insa waso awer rari vevyevaya, ma kako nun au fa vinkwanbur snonkaku veyankarkarsya.13Simewer siso rari kenem vepyumya ndi; siso neyan pampan ma vefo kuker vavyevaya.14Siryav rodo frur varvor sena.15Sifo kuker ankarkar ma rari kenem sena nabyaser.16Romawa yedi au, nari kwurpum sambrav vin veknonba sya wos ponsasye sena ma eve sewar fa veyaw ninyan au kuker wos vemarnden sena.17Vin evesya ansi sve syowi swa sesyava ma svefnder rosai skaremkwar ro varpon Allah I.18Rwave rum vyeja ido, irya wambran yov marmari. Rwamura ido irya imnis rwa ve mun aivuiya.19Snonkaku vera yov insya ono fa skaver ve nyan vesoyov kankenemyava.20Rarirya, romawa yedi, waso rari vepyum na ma wakenem raris Allah marisen Vyena.21Snar snonkaku vekenem raris Allah marisen vyena, isoine snonkaku sne venapes, sikada nari sikenem ro sup Manseren Allah fyasos kwar.22Imboi snonkaku vevarvor ma vesasar nari Allah isawen si vinkwan bur sup ani, imnis raris avris knam vepas bur sapropya bori.The Seed Company