Wos Ananun3
Wos ananun faro romawa-inai babo
1Romawa yedi, befnder awer rosai yafarkor kwar faro au, waswar epen vesyakwar rosai yanunkwar faro au,2insa ras kenem bedi ikwan ma wakenem kuker aski.3Ivyekada wakyar nako ma waso asuser faro Allah ma faro min besi. Waswarepen kakuna ma wakramna ro snembrido,4insa wasmai marasrisen ma syowi ro Allah I ma snonkakusya.5Wakyar faro Manseren Allah kuker snembri kasiper, ma wakansandenm faro swaruser mankundaw bena awer.6Waswarepen monda faro Manseren Allah I ro roi vebor wafrur na, rarirya nari Kyur fasna ve au neyan kankenem vepyumya.7Kwara mankundaw ve snonkaku vefawi nanem syadi awer; wararyof faro Manseren Allah I ma vinkwan bur vavyevaya.8Frur banna nari namnis aryawin vevuk pararei faro baken bedi ma nbuk andeidi faro rur bedi.9Buk som faro Manseren Allah I, farser faro I roi vepyum kaku ro nana bena kam ma roi wasmai ro yaf bena,10rarirya sar adadu bena nari nafo kuker pokem, ma war anggur besya nari sifo ra sisaravriv isof rosaser bena naser napakpok siva.11Romawa yedi, rofyor Manseren Allah isonek au, nwana ve swarapepen, ma snembri fyafayaf awer faro farkarkor Vyena.12Manseren Allah isonek snonkaku Iswarsya, imnis sinan kma veprer romawa iswarya.13Fainda isya faro snonkaku vesma firnanem ma swarnanemya.14Fainda vyedi iba syadi ro rosai kosmai ro sarak, ma vye maeja syadi ro brawen.15Firnanem kyakur syadi ro kerui vesnaper, roi snembri pyoser faro nakam namnis kuker iva.16Firnanemya vyuk ve au ras kenem vekwan, nana ma snonsnon vesmai som.17Firnanem ifrur fa kenem bedi ifo kuker marisen ma aski.18Snonkaku veserepen kaku faro firnanemya nari ismai vok ma ras kenem vekwan.19Kuker firnanem, Manseren Allah syarmur supswan ine;ma kuker kakara Vyena iryer sansorenya ro mov Vyedi.20Kuker fawawi Vyena ifrur war mkamor vero sapropya bavdi narvaren ma nadafma kako mandif vero mandep nasabu mekem ve supya bori.21Inja romawa yedi, wakifepen nako faro firnanemya ma faro kakara vepyum, wapok rwir awerna,22rarirya kenem bedi nari ismai fadaduru, ipyum bos kaku ma ifrur marisen.23Nari wambran kuker kananon, ma wapok kwarkarva.24Nari wenef kuker makakakva, ma wenef moser kaku ro rovna rao isof meser.25Wapok wamkak awer marindi nari verama kuker kanandor imnis dover veriref snonkaku vevarvorsya.26Manseren Allah nari Iwaren warek au. Nari Myam monda au fa wasbu ro denemba.27Rofyor wasmai fafisu fa wafrur pyum yov snonkaku eve fandun frur pyum bena ido, kwurpum awer imboi wafrurna.28Wawan fa min bedi iwaf awer ra meser, roi vye fandunya isya ro au ido fafisuya wafnoveki veri.29Kwara awer aw vevyeva faro snonkaku min besya vekain so au ma vekyar au.30Famfavri waworek awer kuker snonkaku vefrur sasarva yov au.31Snembri fyawe awer snonkaku vefrur pakakreksya, ma waso awer rari sena.32Snar, snonkaku vefrur varvorsya Manseren Allah imarisen siva, imboi ikenem fanam snonkaku kenem venapes sya.33Fras roManseren Allah isya ro rumrido snonkaku vevarvorsya, imboi Vye vok rum snonkaku venapessya.34Manseren Allah vye mbrov snonkaku veyow mankunsya, imboi vye vok snonkaku verun mankunsya.35Snonkaku swaruser veknonsya nari snonsnon sena nadiref pyum, imboi snonkaku venawnowersya sismai anonef.The Seed Company