Wos Ananun1
Fandun ro wos ananun nane
1Nane kada wos ananun ro Salomo rumkun Daud, wairek Israel.2Fandun ro wos ananun nane isoine insa nfarkor snonkakusya fa sifawi firnanem, sifawi sikenem pyum ma svavirpyum kaku wos vararyar.3Wos ananun nane nfarkor mov risai snonkakusya sikenem kuker swaruser veknon, napnapes, kenem veyavyover ma vavekakaku.4Snonkaku vefawi karyonbasya sfarkor insa siwasen nanem, ma romawa-inai babo sismai fawawi insa sifawi navye ma skara vevarpon.5Kuker wos ananun nane, snonkaku vena firnanemsya fawawi sena nevefanfon, ma snonkaku vefawi nanem kwar sya sismai farkankin.6Rarirya sifawi sper wos vararyar ro wos ananun na ma sifawi mnis wawos ro snonkaku swaruser veknonsya ro fafisu sawos yov si.Wos farkarkor faro romawa inai babo
7Insa sismai fawawi vekakur, veponya snonkakusya ivye skunem ma siraryof faro Manseren Allah I. Snonkaku vefawi nanembasya simewer firnanem ma farkarkor ri.8Romawa yedi, wamnaf pyum farkarkor kmami ma snami suvena.9Snar farkarkor suvena nfanfon rari vepyum bena imnis raris afyamankor ro vrumri ma irai vefamankor ro sasukor bedi.10Ne, romawa yedi, snonkaku vesasarsya sidif au ve nyan sasar ido waso awer si.11Waso awer, fafisu sikofen ve au radine, “Indo, rwama koseref snonkakuno ma koryur koprer si. Mkorama kofarmun snonkaku vesasarva siwa infa nafrur doryav monda ko.12Kur ine sikenem kuker andeidi ma pararei, vape nari sfarsyoar ma sive simar namuk kaku.13Kofasyar nana eve maeja sena insa rumrido kovena nafo kuker nana kofasyar anna.14Rwama waso! Nari roi kofasyar anna korwasna ra namnisko!”15Romawa yedi! Waso awer snonkaku veradiryansya, vinkwan bur si.16Sifrur roi vevyeva vaim ido, nari skain fasisva. Imboi sisawsaw kaku fa smamun.17Man risai nari vesawer ro pamya fafisu myam snonkakuyo nyap pamya ro varpon vyedi?18Imbape snonkaku vevarvor ansyama snap denem fa nfor mankunsi, denem nari eve ninyan si.19Kakuvavoi, snonkaku vesasewar faro kenem ine kuker nyan pakakrek nari vyak kuker rur ma kenem vyedi.Mkarem firnanemya
20Wamnaf navye! Firnanemya isya dor ro nyan swafna ma ifyow ro buvesna!21Kyaru kako ro kerwa veba vebor vero kota ma mov kawasa sibor siraryur ro:22“Ne snonkaku venawnower mkoiya! Mkoswar kaker kenem veradinenya? Ras risai nari mkomnai mkokorwef fawawiya ma mkokurpum farkarkorna nya?23Mkomnaf ve aya fafisu yasonek mko, rarirya nari yakofen vadir faro mko sneri dori ma yafarkor ve mko fawawi yena.24Yor mko kwar, vape mkokurpum ma mkaser ayava.25Wos ananun yenakam mkove rer na ma wos sansonek ayena mkokurpum na.26Rarirya fafis mkosma marindi nari yambrif mko. Makakakya inyanem mkonido na yave aiswos mko.27Kakudam, nari yave aiswos mko ro fafis mkove virvar ma mkove kandera snar marindi nari venyanem mko imnis raris wam dover vemun.28Fafis evesya anya mkor aya mbape yakaremba. Mkoseref aya ro mov nakam vape mkosrow ayava.29Mkomnis raris snonkaku vemewer vesmai fawawi nanemya ma vemewer vesoyuser faro Manseren Allah indi.30Iyawer ido mkomewer kaku mkomnaf wos ananun yena ndi mboi mkokurpum wos sansonek vebor ayena.31Inja, nari roi vevyeva nanyanem mko snar frur ma aw vebor vekarfiva mkovena.32Snonkaku vefawi karyonbasya nari simar snar saser ayava, ma snonkaku venawnowersya nari semompraf kaku snar sefandun ayava.33Mbape mundiri vemnaf aya nari vyevefaduru. Nari ikenem kuker kananon ma ipokfa imkakva.”The Seed Company