2 Manguüa12
1Juda pren kowi Joas chowm mang mih dow Israel pren kowi Jehu chowm mang mih ranit ning khe chekhai. Now Joas dow 40 ning mowr Jerusalem marow kowi chowmla mang khai. A-u dow Ber-Seba marow hownia kowh Zibia chekhai.2Joas kowi dow aia kowh prengia pek mih uamow Jehoiada tüngsangah reng chekhai. Naiawng rakowi Joas dow aia sing uowi mowr CHAKRAMANG mik kowi aiungma mih lup chang reng chekhai.3Nachenganchepaw arah kroma mih kowi kowh chupiiara dow aia krawi piakta dowi chekhai. Naiawngün arah kowi dow maru kawmuüa mih tawncher hown chang phuchua reng chekhai, now nam iungma mih maikhük paw towk reng chekhai.4Akat khe mang Joas tek pe uamowuüa mih, “Chimsaima mih uanap iawng hai CHAKRAMANG kim kowi maru kawmuüa uang pawla mih tangka pawisa maten hawt krümah büa diah. Naiawngün tangka pawisa dow rüa maru iun khe kowh, kowmatia takhamta mih rakowi kowh hai kowmatia sak nau hown kowh uang pawla mih chekhai.5Naiawngün tangka pawisa maten dow enni uamowuüa mih enni kowh maru-uüa hownia enni nahawt paw kown. Now naiawngün tangka pawisa dow CHAKRAMANG kim rawk müa kowi enni natawngah kown,” pakhai.6Tawkche Joas chowm mang mih 23 ning khowk chepaw uamowuüa dow CHAKRAMANG kim mih krawi raw dowi tak chekhai.7Naiawng rakowi mang Joas dow uamow Jehoiada hai akeng mih uamowuüa kowi nauang hawla kownkow kowkrawi chin maru khai. Now naiawngün uamowuüa kowi aia lüntaah mih, “Tawngplawng kowchow CHAKRAMANG kim enni raw dowi rereng? Enni chowlowkkow maru-uüa hownia kowh enni kaah mih tangka pawisa mih enni rut kowi hangkow tow büah tham bowt. Naiawngün dow CHAKRAMANG kim rawk müa kowi sunah büah bowt,” pakhai.8Now uamowuüa dow maru kawmuüa hownia kowh hawt pawah mih tangka pawisa amatni rut kowi natow dowi bowt kown mih nauta khai. Nami klen kowi CHAKRAMANG kim amatni matia naraw dowi kown mih paw nauta büah khai.9Now uamow Jehoiada dow uang pawla tawkpla lowk hanow aluk hownia iu pruaah parah khai. Now nami tawkpla dow CHAKRAMANG kimplawt hawmlawm prakowi phuchuara re-e towah khai. Kimplawt chawng mih uamowuüa dow CHAKRAMANG kim kowi maru kawmuüa uang pawla mih tangka pawisa maten nami tawkpla kowi towah büah reng chekhai.10Now CHAKRAMANG kim kowi uang pawla mih tangka pawisa dow tawkpla kowi tek khowk hanow mang kowh maru iuk hai Uamow Lang kri Mih iüah rüaah reng, now im kowi phangah reng chekhai.11Nami kung kowi dow naiawngün tangka pawisa mih CHAKRAMANG kim chang miuüa luk kowi kowh towah mih aluchowuüa rut kowi ap pe reng chekhai. Now amatni dow naiawngün tangka pawisa mih CHAKRAMANG kim rawk mih — singh hown kowh uanh thawp sarauüa, kim chang sarauüa,12hua hown kowh uanh thawp sarauüa hai hua bawp sarauüa — kowi peah reng chekhai. Nami klen kowi paw CHAKRAMANG kim rawk müa singh, arisang bawpah mih hua hai kim chang müa lakke mih ran müa kowi sunah reng chekhai.13Tawkche CHAKRAMANG kim kowi kowh uang pawla mih tangka pawisa hown dow CHAKRAMANG kim kowi tawngah kown mih tai bia ün, bawthi kep müa kaingkep ün, biatum ün, baw ün hai kuh tai hown kowh tawng iawng mih puh bia aikam paw thawpla dowi chekhai.14Nami dow naia rawla CHAKRAMANG kim kownkow naiawngün tangka dow aluchowuüa mih kim chang sarauüa kowi peah reng chekhai.15CHAKRAMANG kim chang miuüa luk kowi towah mih aluchowuüa dow achinawmma chekhai. Naiawng rakowi naiawngün aluchowuüa tut-e dow tangka pawisa ingsap pawk takla dowi chekhai.16Tawkche aprek sung uanap hai angak lawt lük müa uanap chang müa kowi kowh uang pawla mih tangka pawisa dow CHAKRAMANG kim kowi kowh tawkpla kowi atowk takla dowi chekhai. Tawngplawng kowchow panow naiawngün tangka dow uamowuüa kowh kakbak chekhai.17Nami khin khe Siria pren mang Hazael dow Gat marow kowi kowkowiah now kowsenah khai, now marow dow powngta pe khai. Nami kung kowi amatni dow Jerusalem marow nauang sen kownkow uang tarü khai.18Naiawng rakowi Juda pren mang Joas dow CHAKRAMANG kowi kowh aia peah mih dawngthawnguan hai aia kowh pipu Jehosafat, Jehoram hai Ahazia büah CHAKRAMANG vüi lang kraah mih dawngthawnguan maten Siria pren mang Hazael kowi krawi sata pe khai. Nami klen kowi CHAKRAMANG kim kowi kowh kuh hai mang kim kowi kowh kuh maten paw Hazael kowi aia krawi sata pe bowk khai. Nahanow Hazael dow Jerusalem marow kowi senla dowi kowi powt khai bowt.19Mang Joas kowh akeng mih lup lawnguan maten dow “Juda Manguüa Lawnguan” pami bowih kowi arui uowi chekhai.20Mang Joas kowh maru iuk pre ia dow aia kowi kingküaah hanow Silla pra kowh mangla mih tiama Bet-Milo pami arah kowi saita khai.21Nami maru iuk pre ia dow Simeat kowh chapa Jozakar hai Somer kowh chapa Jehozabad iüah chekhai. Joas kowi dow apipu-uüa tadupra David marow kowi maru dupah khai. Aia takcha kowi dow achapa Amazia mih ta chowm mang khai.
The Seed Company