ရှင်မာကုကျမ်းစာအုပ်4
1နောက်သယ်ကာပ်ဝါ ကိုယ်တော်ယေရှုကော ဂါလိလဲအိုင်နောက် ထံပါအာလာမ်ကဲ့အယ် တီတ်ဆာလာပ်သယ် စားလောကဲ့အယ် ဟောပြောသွန်သင်နောကဲ့လင်းငါးချိန်နယ် တီတ်ဆာလာပ်ကော ကိုယ်တော်ပါအာ စုလောကဲ့အယ် ထုတ်ချီးရီမာ။ အင်းသယ် ကိုယ်တော်ကော အင်းမာအိုင်စပ်လားမာ့ လှေစုတ်အား ဟေကဲ့အယ် ထောင်းစီးရာမ်စန်နော် လှေလည် ဝေးပါအာ လှော်လောစီမ်းမာ့။ တီတ်ဆာဖူမ်ငေါ ကမ်းစုတ်အား ငါဟီးမာ့။2ကိုယ်တော်ကော တီတ်ဆာလာပ်သယ် နံတင်းငါးကာ အကြောင်းအရာဖူမ်နယ် ပုံဥပမာဖူမ်နောက် ဟောပြောသွန်သင်နောမာ့။ ကိုယ်တော်သွန်သင်နောကား ပုံဥပမာကြအာကော3"သပ်ချီးလိတ်၊ ရာပ်အာလည် လယ်သမားဟော်ဝါကော မျိုးစေ့ဖူမ်နယ် ဆာဒ်တီမ် လက်ပါးလာမ်မာ့။4ဟီမ်ငေါ မျိုးစေ့ဖူမ်နယ် ဆာဒ်လာမ်စန်နော် မျိုးစေ့ကြအာကော တီတ်ဆာလာပ် ဟာကား လမ်းတုန်းငါ ထုတ်အာမ်ကယ်မာ့ နူစ်နူပစူန်ဖူမ်ငေါ လီကဲ့အယ် ရောက်အာမ်မာ့။5မျိုးစေ့ကြအာကော မြေဆီလွှာနည်းလောကားကာ့ သလောင်ဆီခံနောပေးကားကာ ကာစုတ်အား လက်လာမ်ကယ်အယ် မြေဆီလွှာ နည်းလောကယ်မာ့ တွန်မြန်မြန်တူရီမာ့။6အင်းညယ်ငေါဝမ်ရီ စမီစ်ပူကားရီကယ်အယ် ဟလာမ်းကားဒဏ်နယ် ခံနောထော်ကာအခါလည် အင်းမာတွန်ဖူမ်ငေါ သရှန်းအမြဲလောကယ်မာ့ ရှီးလော့ပ်ဆူမ်မာန်မာ့။7မျိုးစေ့ကြအာကော စူပ်ခါးတွန် ကြာပ်ကြား လက်ဆာမ်ငါမ်ကယ်မာ့ တွန်ဆဟာဖူမ် တူရီရား စူပ်ခါးတွန်ဖူမ်ရီး တွန်တုန်ရီကယ်အယ် အင်းမာစူပ်ခါးတွန်ဖူမ်ငေါ အုပ်တန်ကယ်မာ ရှီစ်ရှီ ရှီရင်နိုး၊8အခြားမျိုးစေ့ဖူမ်ငေါ် မြေဆီလွှာကလန်ငါကာနေရား လက်လာမ်ကယ်မာ့ တွန်ဖူမ်တူရီကဲ့အယ် တွန်တုန်ရီစန်နော် ကြအာကော အဆသုံးဆယ် ၊ ခြောက်ဆယ် ၊တစ်ရာအထိ ရှီစ်ရှီပရှီဖူမ် ထာရီမာ့" ငေါကဲ့အယ် မိန့်နောမာ။9အင်းမာနောက်သယ် ကိုယ်တော်ကော "ကနားငါကဲ့အယ် သပ်မူရင်ဟီးကားဟီမ်နာပ် နားလည်လော်ကွန်နယ် ကြိုးစားလောဟီးထော်ပ်ကား" ငေါကဲ့အယ် မိန့်နောမာ့။10အင်းမာစီးရာပ်သော ကိုယ်တော်ယေရှုနောက် သာဝက ဆယ့်နှစ်ယောက်နောက် တခြားတပည့်ဖူမ်ဟာ ကိုယ်တော်နောက်တူတူ ငါကဲ့လင်းငါးအချိန်နယ် ဟီမ်နာပ်ကော ကိုယ်တော်လည် ပုံဥပမာကာ့ အဓိပ္ပာယ်လည် စီမ်ညူမာ့။11အင်းမာချိန်နယ် ကိုယ်တော်ကော “ဘုရားရှင်ငါ သာသနာတော် နက်နဲလောကားအကြောင်းဖူမ်နယ် နီမ်နယ် ငါငေါစီးရာပ် ထာမာ့။ အင်းညယ်ငေါဝမ်ရီ တခြားတီတ်ဆာလာပ်သယ်ငေါက်သော် အင်းမာအကြောင်းအရာဖူမ်အားလုံးနယ် ပုံဥပမာနဲ့အယ်ဟာ ဟောပြောသွန်သင်နောထော်မာ့။12အင်းသယ် 'ဟီမ်နာပ်ကော ငါအောမ်ငါးကာဖူမ်နယ် ယူပ်မူဟီးရား မီမ်းဟော်ဟီယို၊ ငါဟောလောကားကာလည် သာပ်မူဟီးရား နားလည်လော်ဟီယို။ တကယ်လို့ ဟီမ်နာပ်ကော နားလည်လော်ဟီရင်မန်နော် ဟီမ်နာပ်ကာ ဒုစရိုက်ဖူမ်နယ် နောင်တသံဝေဂ လူကဲ့အယ် ဘုရားရှင် ခွင့်လွှတ်သောကားလည်ရီး ခံနောထော်ပ်ကား' ရယ် ကျမ်းစာပါအာ ရေးလောပေးကားဖူမ်ငေါ ပြည့်စုံမှန်ကန်နိကား” ငေါကဲ့အယ် မိန့်နောမာ့။13အင်းမာစီးရာပ်သော် ကိုယ်တော်ကော “နီမ်ငေါအင်းကာ့ ပုံဥပမာလည်နားလည်လော်ဟီရင်နိုလေး။ အင်းညယ်ငေါက်သော် တခြားဥပမာဖူမ်အားလုံးနယ် မညယ် နားလည်လော်ဟီရင်ဟပ်ကာသယ်။14ပုံဥပမာက ဆိုလိုချက်ကော လယ်သမားဆာဒ်လာကာ့ မျိုးစေ့ဖူမ်ငေါ် ဘုရားရှင်ငါ နှုတ်ကပါတ်တော်လည် ငေါကာပ်ကာ ထာမာ့။15ကြအာတီတ်ဆာဖူမ်ငေါ တီတ်ဆာလာပ် ဟာကား လမ်းတုန်းငါး ထုတ်အားကာ့ မျိုးစေ့နောက် တူလောမာ့။ ဟီမ်နာပ်ကော ဘုရားရှင်ငါ နှုတ်ကပါတ်တော်လည် သာပ်လာပ်ချီးရီး မာရ်နတ်ကော ချက်ချင်း လီကဲ့အယ် ဟီမ်နာပ်ကာ စိတ်နားမာ့ ဘုရားရှင်ငါ နှုတ်ကပါတ်တော်ဖူမ်နယ် လာဟူမ်မာန်မာ့။16တခြားတီတ်ဆာဖူမ်ငေါ သလောင်ဆီခံနောပေးကားကာ့ ကာပါအာ ထုတ်အားကာ့ မျိုးစေ့ဖူမ်နောက် တူလောမာ့။ ဟီမ်နာပ်ကော ဘုရားရှင်ငါ နှုတ်ကပါတ်တော်လည် သပ်ကားကာ့ အချိန်နယ်ကော ချက်ချင်းရယ် ပျော်လောကဲ့အယ် လက်ခံနောဟီးမာ။17အင်းညယ်ငေါဝမ်ညီ ဘုရားရှင်ငါ နှုတ်ကပါတ်တော်ဖူမ်ငေါ ဟီမ်နာပ်ကာ နှလုံးသားပါအာ နက်နက်ရှိုင်းရှိုင်းညယ် သရှန်းတွယ်လော်ပေယိုသယ်မာ့ တအောင်းဟာ ယုံကြည် လက်ခံနောကားထာမာ။ အင်းညယ်ငေါဝမ်ညီ အင်းညယ် ယုံကြည်လက်ခံနောကားကာ့ အတွက်ကြောင့် ဟီမ်နာပ်ပါအာ အခက်ခဲ ကြအာကြအာပေါ်လီကာ အချိန် အင်းညယ်အဟီပ်ရီ နှိပ်စာပ်သောကား ခံနောထော်ကာ အချိန်ဖူမ်ငေါက်သော် ဟီမ်နာပ်ကာ ယုံကြည်လောကားကော ချက်ချင်း မီမ်ဟာကားဟီမ်နာပ်ထာမာ့။18ကြအာတီတ်ဆာဖူမ်ငေါ စူပ်ခါးတွန် ကြာပ်ကြားနား ထုတ်အားကာ့ မျိုးစေ့ဖူမ်နောက် တူလောမာ့။ ဟီမ်နာပ်ကော ဘုရားရှင်ငါ နှုတ်ကပါတ်တော်ဖူမ်နယ် သပ်လာပ်ချီးမူရာ၊19ဘဝကာ့ စိုးရိမ်ပူပန်နောကားဖူမ်၊ လောကီစည်းစိမ်ချမ်းသာဖူမ်ငါ လှည့်စားလောကားဖူမ်၊ အခြား လာကာပ်ကားဖူမ်ငေါ ဘုရားရှင်ငါ နှုတ်ကပါတ်တော်ဖူမ်နယ် ကာလောကဲ့အယ် ပီပ်သောပေးရာမ်ကယ်မာ့ ဘုရားရှင်ငါ နှုတ်ကပါတ်တော်နောက် ညီလောကွန်းနယ် အလင်းငါးဟီမ်နာပ် ထာမာ့။ 20တခြားတီတ်ဆာဖူမ်ငေါ မြေဆီလွှာ ကလန်ငါနေရား ထုတ်အားကာ့ မျိုးစေ့နောက် တူလောမာ့။ ဟီမ်နာပ်ကော ဘုရားရှင်ငါ နှုတ်ကပါတ်တော်ဖူမ်နယ် သပ်ကဲ့အယ် ယုံကြည်လက်ခံနောဟီးမာ့။ အင်းသယ် ဟီမ်နာပ်ကာ ဘဝကော အဆသုံးဆယ် ၊ခြောက်ဆယ် ၊တစ်ရာထုတ်ကွန်းနယ် ရှီစ်ရှီရှီကား တွန်ညယ် ကလန်ငါကာ အကျိုးကျေးဇူးဖူမ် လူဟီးမာ့” ငေါကဲ့အယ် ရှင်းပြလောမာ့။21အင်းမာစီးရာပ်သော် ကိုယ်တော်ကော ဟီမ်နာပ်သယ် တခြားပုံဥပမာကြအာ မိန့်နောဟာမ်းငါးကော “ဟင်ဟာမ်း မီးအိမ်နယ် ဝမ်သပ်ကအယ် ကောမ်ဟာမ်း နောက် အောပ်ကဲ့အယ်ဟာမ် ထာဂါက်ထာ ၊ ခုတင်တောမ်နားဟာမ်း ထာဂါက်ထာ၊ သိမ်းနောပေ့ကာလေး။ အင်းမာအစား မီးအိမ်နယ် မီးတိုင်ငါ ချိတ်သောပေ့ကာနယ်။22မဟာအောမ်ကယ်လိုးငေါနော ပီးကူစ်ကယ်အယ် ပေးကားကာ့ အရာဖူမ်ငေါ ပေါ်လီထော်ပ်ကား။ လျှို့ဝှက်သောပေးကား အရာဖူမ်ရီး တီတ်ဆာတိုင်း မီမ်းဟော်ရီထော်ပ်ကား။23ကနားငါကဲ့အယ် သာပ်မူဟီးရင်ငါကာ့ဟီမ်နာပ် နားလည်လော်ရင်ကွန်နယ် ကြိုးလောဟီးထော်ပ်ကား" ငေါကဲ့အယ် မိန့်နောမာ့။24အင်းမာနောက်သယ် ကိုယ်တော်ကော ဆက်သောကဲ့အယ် "ငါသပေါက်ကလဲကလန်မယ်သတ်ချီလိတ် ။ နီမ်သတ်မူကားတိုင်း ဘုရာရှင်ငေါ နီမ်နယ် နားလည်နိုင်စွမ်း အီရီကား။ နားလည်လော်ရင်ငါက အစွမ်းဖူမ်နယ်ပိုလောကဲ့အယ်ဟာမ် အီရီကား။25မဟာအောမ်ကယ်လိုးငေါနော ငါကသွန်သင်ချက်ဖူမ်နယ် သတ်ကအယ် နားလည်လောကာကဟီမ်နယ် ဘုရားရှင်းကောနားလည်နိုင်စွမ်းပိုလောကဲ့အယ်အီရီကား ။ အင်းညယ်ငေါဝမ်ရီ ကလန်မယ်အသပ်ကားကဟီမ်နယ် အင်းမှာဟီမ်နာတ် နားလည်လောပေကါက အရာဖူမ်နယ် သိမ်းနောကား ခံနောထော်ပ်ကား” ငေါကဲ့အယ် မိန့်နီမာ့။26ကိုယ်တော်ကော ထပ်သောကဲ့အယ် မိန့်နောဟာမ်းငါးကော “ဘုရားရှင်ငါ သာသနာတော်ကော လယ်သမားဟော်ဝါ ဟီမ်ငါလက်ပါး ဆာဒ်လာမ်ငါ မျိုးစေ့ဖူမ်နယ် နောက် တူလောမာ့။27အင်းမာ လယ်သမားကော နာန်ကြည်တိုင်း ပုံမှန်အက်ကဲ့အယ် နီပ်ခူတိုင်း ဟီမ်ငါ အလုပ်သယ် ပုံမှန် အောမ်မာ့။ အင်းညယ်ငေါဝမ်ညီ မျိုးစေ့ဖူမ်ငေါ် မညယ် အညောက် ပူရီကဲ့အယ် တွန်တုန်ရီမာငေါကားလည် ဟီမ်ကိုယ်တိုင်ဟာမ်း မီမ်းဟို။28ကာကော မျိုးစေ့လည် အလိုလိုရယ် တုန်းညီကွန်နယ် အောမ်ကဲ့အီမာ့။ မျိုးစေ့ပါအာအယ် အညှောက်ပူရီ၊ အဖူးဖူးလောကဲ့အယ် ရှီစ်ရှီပရှီဖူမ် ထာရီမာ့။29ရှီစ်ရှီဖူမ် မီမ်းကဲ့အယ် လှပ်ကားကာ့အချိန် ထုတ်အာမ်စန်းနော လယ်သမားကော ဟီမ်ငါတီတ်ဆာဖူမ်နောက်ရှီစ်ရှီစ်ပရှီဖူမ်နယ် တာမ်ဟက်နောက် လှပ်လာမ်တီမ် သာပ်လာမ်ဟနာပ် ငေါကဲ့အယ်” မိန်နီမာ့။30အင်းမာစီးရာပ်သော် ကိုယ်တော်ကော “ ဘုရားရှင်ငါ သာသနာတော်ကော မဟာနောက် တူလောမာ့ရယ် ငေါထော်ပ်ကားသယ်။ မဟာ ပုံဥပမာလည် သုံးနောကဲ့အယ် ရှင်းပြလောထော်ပ်ကားသယ်။31အင်းမာကော ကမူမ်းတူထူမ်းနောက် တူလောမာ့။ တီတ်ဆာဟော်ဝါကော တအား တူစီစ်တင်းငါးကာ ကမူမ်းတူထူမ်း နယ် လာကဲ့အယ် ကာပါအာ စောက်အာမ်မာ့။32အင်းမာ အစေ့ကော တုန်းညီစန်နော် ဥယျာဉ်ပါအာမာ့ တခြားတွန်ဖူမ်အားလုံးထက်သယ် တွန်တုန်ဟန်ဆုံး ထာကယ်အယ် အင်းမာတွန်ငါ အရီပ်ကော နူစ်နူဖူမ်ညီး အင်းမာတွန်ပါအာ ဆလက်စာကဲ့အယ် လင်းဟီးရင်စာပ်အာမ်ကွန်းနယ်အထိ အကိုင်းဟာဖူမ်ညီး တုန်းတင်းနီမာ့” ငေါကဲ့အယ် မိန့်နောမာ့။33ကိုယ်တော်ကော အင်းမာညယ်ကာ ပုံဥပမာဖူမ်နောက် တီတ်ဆာပရိသတ်သာပ် နားလည်လော်ဟီရင်ကနေ ဘုရားရှင်ငါ နှုတ်ကပါတ်တော်ဖူမ်နယ် ဟောပြောသွန်သင်နောမာ့။34ကိုယ်တော်ယေရှုကော အင်းမာ့ ပုံဥပမာနောက်ဟီမ်ငါတပည့်တော်ဖူမ်နောက် ရှင်းပြလီမာ့။35အင်းမာမာန်းရာပ် စမီစ်ဆါမ်ငါချိန် နယ် ကိုယ်တော်ယေရှုကော ဟီမ်ငါတပည့်လာပ်သယ် “အင်းကာအိုင် အိုးပါကမ်းမာ လာပ်ချီးရာမ်မယ်” ငေါကဲ့အယ် မိန့်နောမာ့။36အင်းသယ် တပည့်လာပ်ကော် တီတ်ဆာကန်ဖူန်လူန်နယ် သက်ပေးကဲ့အယ် ကိုယ်တော် ထောင်းကဲ့လင်းငါးကာ လှေစုတ်အား ဟေကဲ့အယ် အိုးပါကမ်းမာ လာပ်ချီးရာမ်မာ။ တီတ်ဆာလာပ်ရီး တခြားလှေဖူမ်နောက် ကိုယ်တော်နောက်အား ရာပ်ချီးမာ။37အင်းမာချိန်နယ် ရုတ်တရာပ် ဟလာမ်းမူမ်တုန်းဆော်လောကဲ့အယ် ဝေးလှိုင်းတုန်းရီကယ်မာ့ ဟီမ်နာပ်စီးလောကားကာ့ လှေနား ဝေးဖူမ် ဖိန်းကဲ့အယ် လှေလူမ်ဟပ်လာမ်မာ့။38အင်းမာအချိန်နယ် ကိုယ်တော်ကော လှေအနောက်ဖက်ဘက်လာ မောမ်(န)ဟူ မောမ်ကဲ့အယ် အက်လီးကဲ့လင်းကယ်မာ့ ဟီမ်ငါတပည့်လာပ်ကော “ဆရာ အလေဆူလာပ် ဝေးလူမ်ကဲ့အယ် ရှီးထော်ပ်ကားလည် လေးအအောမ်ရယ် လင်းငါးနာန်” ငေါကဲ့အယ် ကိုယ်တော်လည် ဆော်ကယ်အယ် လျှောက်တင်နော်မာ။39အင်းမာအချိန်နယ် ကိုယ်တော်ကော ယုတ်ကဲ့အယ် ဝေးလှိူင်းနောက် လေလှိုင်းဖူမ်နယ် “ငြိမ်နောစာ့၊ ရပ်သောစာ့” ငေါကဲ့အယ် အမိန့်အီရာမ်စန်းနော လှိုင်းနောက် လေဖူမ်ငေါ ရပ်သောကဲ့အယ် အရာအားလုံးရီး ငြီမ်နာန်မာ့။40အင်းမာစီးရာပ်သော် ကိုယ်တော်ကော တပည့်လာပ်သယ် “နီမ်ငေါ မဟာအောမ်ကယ် ကစာပ်ချီကာသယ် ၊ နီမ်ပါအာ ယုံကြည်မှု အပိုနာန်” ငေါကဲ့အယ် မိန့်နာန်မာ။41အင်းမာအချိန်နယ် တပည့်လာပ်ကော် ကစာပ်တင်ကယ်အယ် “အင်းကာဟီမ်ငေါ ဟင်သယ်၊ လှိုင်းနောက် လေလာပ်ချန်း ဟီမ်ငါအမိန့်နယ် နာခံနောဟီးထော်ကာတော်ဟေး” ငေါကဲ့အယ် အချန်းချန်း သပေါက်ချီးမာ့။
Empower Asia Bible Translation Movement