ရှင်မာကုကျမ်းစာအုပ်5
1စီးရာပ်သော် ကိုယ်တော်ယေရှုနောက် တပည့်လာပ်ကော် ဂါလိလဲအိုင်နယ် ပလာပ်ကယ်အယ် တစ်ဖက်ကမ်းနာ ငါကားကာ့ ဂါရစပြည်ရာ ထုတ်ချီးရာမာ့။2ကိုယ်တော်ကော လှေစုတ်အားအယ် ဆာပ်ကဲ့အယ် ကမ်းစုတ်အား ဟေရာမ်ငါးနောက် စိတ်ဆလားဆာမ်ငါး ခံနောထော်ကာ တီတ်ဆာဟော်ဝါကော ဆိုင်းကြဥ်းသာ ဂူပါအာအယ် ပူရီကဲ့အယ် ကိုယ်တော်နော် ဟောပ်တီမာ့ ။3အင်းမာဟီမ်ငေါ ဆိုင်းကြဥ်းသာ ဂူဖူမ်ပါအာလင်းကဲ့အယ် ဟီမ်နယ် ဟင်ဟာမ်း သံကြိုးနောက်ချာန်း ဟော်ပ်ပေဟီရင်နို။4အရင်နာရီ တီတ်ဆာလာပ်ကော ဟီမ်ငါ ထော်၊ သာဖူမ်နယ် သံကြိုးဖူမ်နောက် အကြိမ်ကြိမ် ဟော်ပ်ကဲ့အယ် လင်(မ်)ပေးရီး ဟီမ်ငေါ သံကြိုးဖူမ်နယ် လာဖြုတ်သောဟူမ်မာန်မာ့။ ဟီမ်ငေါ တအား သန်မာလောတင်းကယ်မာ့ ဟင်ဟာမ်း ဟီမ်နယ် ထိန်းချုပ်သောရင်နို။5ဟီမ်ငေါ နီတ်ခူတိုင်း၊ နာန်ကြည်တိုင်း ဆိုင်းကြဉ်းသာဂူဖူမ်နောက် တောင်ကုန်းဖူမ်ပါအာ ရမ်းကဲ့အယ် ဟီမ်ငါကိုယ်နောက်ဟီမ်ရီး ချွန်နောတင်းငါးကာ့ သလောင်ဆီဖူမ်နောက် ယက်ညာပ်ကယ်အယ် လင်းဟာမာ့။6အင်းမာဟီမ်ငေါ ကိုယ်တော်လည် စာပါအာအယ် ယူပ်မူဝမ်စန်းနော ချက်ချင်း ကာပ်လီကဲ့အယ် ကိုယ်တော်ကာမန်းနား ဝပ်သောကဲ့အယ် လင်းမီမာ့။7စီးရာပ်သော် ဟီမ်ငေါ ကိုယ်တော်လည် “တန်ခိုးကြီးလောဟန်ဆုံး ဘုရားရှင်ငါဆာ ယေရှု၊ ငါလည် မဟာအောမ်ကယ်နောက်ရှုက်သောကားတယ်။ ငါဆူလည် နှိပ်စာပ်တော့လို ငေါကားလည် ဘုရားရှင်ငါ နံမယ်လည် တိုင်တည်လောကဲ့အယ် ကတိအီလိတ် ဆွမ်” ငေါကဲ့အယ် ကလုပ်တင်းငါး အသံနောက် ရမ်းစာပ်ရယ် သပေါက်မာ့။8အင်းမာဟီမ်ငေါ အင်းကာညယ် လျှောက်သောထော်ကာကော် ကိုယ်တော်ကော “စိတ်ဆလား၊ အင်းကာ တီတ်ဆာပါအာအယ် ပူဝမ်နိတ်” ငေါကဲ့အယ် ဟီမ်နယ် မိန့်နာန်ကယ် ထာမာ့။9စီးရာပ်သော် ကိုယ်တော်ကော အင်းမာဟီမ်နယ် “နာန်ငါ နံမယ်ကော မညယ်ကော်ကားသယ်” ငေါကာအယ် စီမ်ညူဝမ်စန်းနော “အင်းမာ့ စိတ်ဆလာကော ဟီမ်ငါခန္ဓာကိုယ်နား အလေစိတ်ဆာလားဖူမ် ငါကယ်မာ့ လေဂေါင် ထာမာ့” ငေါကဲ့အယ် ဖြေလောဟာမ်းမာ့။10စီးရာပ်သော် ဟီမ်နယ် အင်းကာနေရာပါအာအယ် အငါပ်ပူရယ် လင်းကွန်းနယ် ကိုယ်တော်လည် အကြိမ်ကြိမ်တောင်းပန်နော်မာ့။11အင်းမာချိန်ငါ ဝါပ်သာမ်းတုန်းငေါ အင်းမာနေရာနောက် ထံငါးကာ တောင်ကုန်းစုတ်အား သမ်ရောက်ကဲ့လင်းဟီးကယ်12အင်းမာစိတ်ဆလားလာပ်ကော် “အလေဆူလာပ်သယ် ဝါပ်သာပ်ပါအာ ဆာမ်တီမ် ခွင့်ပြုလောကဲ့အယ် ဆွမ်” ငေါကဲ့အယ် တောင်းပန်နော်ဟီမာ့။13အင်းမာချိန်နယ် ကိုယ်တော်ယေရှုကော ခွင့်ပြုလာမ်ကယ်မာ့ စိတ်ဆလားလာပ်ကော် အင်းမာတီတ်ဆာပါအာအယ် ပူကဲ့အယ် ဝါပ်ဖူမ်ပါအာ ပူးလာမ်မာ့။ အင်းမာ့ချိန်နယ် ဝါပ်အကောင်ရေနှစ်ထောင်ခန့်ငါမာ့။အင်းမာ့ ဝါပ်သာမ်းကြီးကော တအား စုတ်တင်းငါးကာ့ ကမ်းပါးတောင်စုတ်အားအယ် ဝေးအိုင်ငါ မြန်မြန်ကာပ်ဆာပ်ချီးရီကယ်အယ် ဝေးလူမ်ဟူမ်မာန်မာ့။14အင်းမာနေရားမာ့ ဝါပ်သာမ်းနယ် ထိန်းနောကားဟီမ်နာပ်ကော ကပ်ပူဟီးရန်ကအယ် အင်းမာ့ အဖြစ်ပျက်သယ် ထံပါအာမာ့ မြို့ဖူမ်၊ ထိန်ဖူမ်ပါအာ သပေါက်ညာပ်ချီမာ့။ တီတ်ဆာဖူမ်ငေါ အင်းမာအဖြစ်အပျက်ဖူမ်နယ် ယူဟီးတီမ် အင်းမာနေရား ပူဟီးရီမာ့။15တီတ်ဆာဖူမ်ငေါ ကိုယ်တော်ငါပါအာ ထုတ်ချီးရီစန်နော် အင်းမာစိတ်ဆလားဆာမ်ငါး ခံနောထော်ကာကာ့ ဟီမ်ငေါ အကောင်းပကတိအတိုင်းညယ် ဆာမ်ဆူမ် ဖူမ်ကဲ့အယ် ထောင်းကဲ့လင်းငါးကာလည် ယူပ်မူဟီးရာမ်စန်နော် ကစာပ်ကယ်အယ် ဆန်နောကဲ့လင်းဟီးရာမ်မာ့။16အင်းမာအဖြစ်အပျက်သယ် ယူပ်မူဝါပ်ချီးကားကာ တီတ်ဆာဖူမ်ငေါ အင်းမာစိတ်ဆလားဆာမ်ငါးခံနောထော်ကာ ဟီမ်နောက် ဝါပ်ဖူမ်ပါအာ မညယ်ထာရီမာ့ငေါကားကာလည် ထုတ်အီကား တီတ်ဆာလာပ်သယ် ဆောမ်းကဲ့အယ် လင်းဟီးမာ့။17အင်းသယ် တီတ်ဆာဖူမ်ငေါ ကိုယ်တော်လည် ဟီမ်နာပ်ကာ့ အရပ်ဒေသပါအာအယ် ပူဟာမ်းတီမ် တောင်းပန်နော်ဟီမာ့။18စီးရာပ်သော် ကိုယ်တော်ယေရှုကောအင့်မာ့နေရာပါအာနယ် ပူကဲ့အယ် လှေစုတ်အားဟေရာမ်ငါးကာအချိန်နယ် အင်းမာစိတ်ဆလားဆာမ်ငါးခံနောထော်ကာဟီမ်ငေါ ကိုယ်တော်နောက်တူတူ ရာပ်မူတီမ် ကိုယ်တော်လည် စိမ်မာ့။19အင်းညယ်ငေါဝမ်ညီ ကိုယ်တော်ကော ဟီမ်နယ် အရာပ်စီမ်ညယ် “နာန်ငါကျဉ်းမာ လာမ်ဟာမ်းကဲ့အယ် ဘုရားရှင်ငေါ် နာန်နန်းမညယ်အောမ်ကဲ့အီရီမာ့နောက် မညယ်စာန်ကယ်အယ်ကြင်နာလောကဲ့အယ်အီမာ့ ငေါကဲ့အယ် နာန်ငါမိသားစုလည် ဆောမ်းနာန်နိတ်” ငေါကဲ့အယ် မိန့်နောမာ့။20အင်းသယ်မာ့ အင်းမာဟီမ်ငေါ အင်းမာနေရားအယ် ပူရီကဲ့အယ် ကိုယ်တော်ကော ဟီမ်ဟနန်း အောမ်ကဲ့အယ် အီရီကား ကလန်ငါအရာဖူမ်နယ် ဒေဂါပေါလိပြည် ပါအာမာ့ တီတ်ဆာဖူမ်အားလုံးနယ် ဆောမ်းဟူမ်မာန်မာ့။ အင်းမာအကြောင်းနယ် သပ်မူဝါပ်ကား တီတ်ဆာဖူမ်ငေါ အန်းနောကဲ့ လင်းဟီးရာမ်မာ့။21အင်းမာနောက်သယ် ကိုယ်တော်ယေရှုနောက် တပည့်တော်လာပ်ကော ဂါလိလဲအိုင် တစ်ဖက်ကမ်းနာ လှေနောက် လာမ်ဟာမ်းဟီးမာ့။ ဟီမ်နာပ် အိုင်ကမ်းစပ်လား ထုတ်အာစန်းနော တီတ်ဆာကန်ဖူန်လူန်ငေါ ကိုယ်တော်ပါအာ စုလောကဲ့အယ် ထုတ်ချီးရီမာ့။22အင်းမာချိန်ငါ ယာဣရုကော်ကားကာ့ ဓမ္မာရုံတာဝန်ခံ တီတ်ဆာဟော်ဝါကော အင်းမာနေရား ထုတ်အီကဲ့အယ် ကိုယ်တော်လည် ယူပ်မူဝမ်စန်းနော ကိုယ်တော်ကာ တာပဲရား ဝပ်သောကဲ့အယ်23ကိုယ်တော်လည် “ငါဆူကာ ရှိတ်ကော တအားကြီးအစလာရယ်လင်းကယ်အယ် ရှီးဟပ်ကဲ့အယ် လင်းငါးဆွမ်။ ကိုယ်တော်ကာ ထော်နောက် ဟီမ်နယ်ထာကဲ့အယ် အီတီမ် ငါဆူကာကျဥ်းမာ ကြွလီကယ်အယ်ဆွမ်။ အင်းညယ်မားလည် ဟီမ်ငါရောဂါ မီမ်ဟာမ်းကဲ့အယ် အဆာဒ်ဆိုင်းဟပ်ကာဆွမ်” ငေါကဲ့အယ် အကြိမ်ကြိမ် လျှောက်တင်နော်မာ့။24အင်းသယ်မာ့ ကိုယ်တော်ကော ယာဣရုကာနောက်အား လာပ်ကားသယ်မာ့ တီတ်ဆာကန်ဖူမ်လူန်ရီး ကိုယ်တော်ပါအာ လီရာပ်ချီးကဲ့အယ် ကိုယ်တော်လည် ထိုလောပါတ်ကဲ့အယ် တိုက်သောပါတ်ဆူမ်မာန်မာ့။25အင်းမာ့ တီတ်ဆာဖူမ်ပါအာ ဆယ့်နှစ်နှစ်မာပ်ကွန်းနယ် ရှေကစောလက်ကား ရောဂါလည် ခံစားလောကဲ့လင်းထော်ကာကာ့ ယာပ်ရှီဟော်ဝါ ပါလောမာ့။ 26ဟီမ်ငေါ ဟီမ်ငါ ဖူးအားလုံး ဆွန်ငါးအထိ ရှီပ်ဆရာဖူမ်နောက် ကုလီရီ ကနာတင်ငါဖူမ်နယ်ဟာ ဝေဒနာလည်ဟာ ခံစားလီထော်မာ့။ ဟီမ်ငါရောဂါကော် အမီမ်ဟာမ်ငါပြာန်နယ် ပိုလောကဲ့အယ် ဆိုးလီမာ့။27အင်းမာ့ ရာပ်ဆီကော ကိုယ်တော်ကောတိတ်ဆာဖူမ်နယ်ကုလောကအယ် အီကား အကြောင်းနယ် သာပ်မူဝါမ်စန်းနော တီတ်ဆာသာမ်းတုန်းနောက်တူတူ ကိုယ်တော်ကာ နောက်အား လီရာပ်ကဲ့အယ် ကိုယ်တော်ကာ ဝတ်ရုံနယ် ထာဝါမ်မာ့။28မဟာအောမ်ကယ်လိုးငေါနော ဟီမ်ငေါ “ကိုယ်တော်ကာ ဝတ်ရုံနယ် ထာမူဝါပ်သော်ချက်ချင်း ငါကာ ရောဂါကော် မီမ်ဟာမ်းဟူမ်မန်ကား” ရယ် ဟီမ်ငါစိတ်အား တွေးလောကဲ့အယ် လင်းကယ်ထာမာ့။29အင်းမာညယ် ထာဝါမ်ငါးနောက်ချက်ချင်း ရှေလက်ကားကာ့ ရောဂါကော် ရပ်သာမ်ကယ်မာ့ ဟီမ်ငါ ခန္ဓာကိုယ်နား ခံစားလောထော်ကာ ရောဂါကော် မီမ်းဟာမ်းငါမ်ငါလည် မီမ်းဟော်ဝမ်မာ့။30အင်းမာချိန်ငါ ကိုယ်တော်ယေရှုကောတစ်စုံတစ်ယောက်တယ်ဟီမ်ငါတန်ခိုးတော်နောက် ကုလောကအယ်အီရမ်စနော ချက်ချင်းမီမ်းဟောဝမ်မာ့ ။အင်းမာချန်နယ် ကိုယ်တော်ကော တီတ်ဆာလာပ်ကဘက်လာ မန်းကအယ် ငါကဝတ်ရုံနယ် ဟင်ထာကာတယ် ငေါကဲ့အယ် စီမ်ညူဝမ်မာ့။31အင်းမာချိန်နယ် တပည့်လာပ်ကော် “ကိုယ်တော်လည် တီတ်ဆာဖူမ် တိုးလောညာပ်ချီကဲ့အယ် လင်းငါးလည် ယူပ်မူစာပ်သယ် ကိုယ်တော်လည် ဟင်ထာရီကားသယ် ငေါကဲ့အယ် စီမ်ညူထော်ကားသယ်” ငေါကဲ့အယ် လျှောက်တင်နော်မာ့။32အင်းညယ်ငေါရီး ကိုယ်တော်ကော ဟီမ်နယ် ဟင်ထာရီမာ့ ငေါကားကာလည် မီမ်းဟော်ကွန်နယ် တီတ်ဆာဖူမ်ပါအာ မန်းကဲ့အယ် ယူညာပ်အာမ်မာ့။33အင်းမာယာပ်ရှီရီး ဟီမ်ပါအာ မညယ်ထာရီမာ့ငေါကားကာလည် မီမ်းဟော်ကယ်မာ့ ကစာပ်ကယ်အယ် ဆိုင်ဆန်နောကဲ့အယ် ကိုယ်တော်ပါအာ လီကဲ့အယ် ကိုယ်တော်ကာမန်းနား ဒူးထောက်သောကဲ့အယ် အဖြစ်ပျက်ဖူမ် အကုန်လုံးနယ် အမှန်တိုင်း လျှောက်တင်နာန်မာ့။34အင်းမာချိန်နယ် ကိုယ်တော်ကော အင်းမာ ယာပ်ရှီလည် “ငါကာရှိတ်၊ နာန်ယုံကြည်မှုကြောင့်နယ် နာန်ငါရောဂါ မီမ်ဟာမ်းပါပ်။ နာန်ခံစားလောထော်ကာ ရောဂါဝေဒနာပါအာအယ် လော်ပ်သော်ဝါပ်သယ်မာ့ ငြိမ်းငြိမ်းချမ်းချမ်းရယ် လာမ်စာပ်” ငေါကဲ့အယ် မိန့်နောမာ့။35ကိုယ်တော်ကော အင်းမာ ယာပ်ရှီလည် အင်းညယ် မိန့်နောကဲ့လင်းငါးအချိန်နယ် ယာဣရုကာကျဥ်းမားကာ တီတ်ဆာကြအာကော ထုတ်အီကဲ့အယ် ယာဣရုလည် “နာန်ငါ ရှိတ်ကော ရှီးရာပ်။ ဆရာလည် နောက်ယှက်တောစောမ်းသာပ်” ငေါကဲ့အယ် ငေါဟီးရီမာ့။36အင်းညယ်ငေါဝမ်ရီ ကိုယ်တော်ယေရှုကော အင်းမာလည် သာပ်မူဝမ်စန်းနော ယာဣရုလည် “စိုးရိမ်နော်ဝါ့။ ယုံကြည်မှုငါလိတ်” ငေါကဲ့အယ် မိန့်နာန်မာ့။37စီးရာပ်သော် ကိုယ်တော်ကော ပေတရု၊ ယာကုပ်နောက် ယာကုပ်ကာ့နရှီ ယောဟန် နာပ်သယ်ပန်းနယ် ဟင်နယ်ဟာမ်းကိုယ်တော်ကာနောက်အား လီရာပ်တီမ် ခွင့်အီယို။38ဟီမ်နာပ်ကော ယာဣရု ကာကျဉ်းမား ထုတ်ချီးရာစန်နော် တီတ်ဆာလာပ်ကော ကလူပ်ကဲ့အယ် ဟပ်ချီးကားကာလည် ယူပ်မူဝမ်မာ့။39အင်းသယ် ကိုယ်တော်ကော အင်းမာကျဥ်းမာ ဆာမ်ကဲ့အယ် ဟီမ်နာပ်သယ် “နီမ်ငေါ မဟာအောမ်ကယ် ဟပ်ချီးထော်ကာသယ်။ အယ်ဟာဆဟာကော ရှီးရာဟီပ်အို အက်လီးကဲ့လင်းငါး” ငေါကဲ့အယ် မိန့်နောမာ့။40အင်းညယ်ငေါဝမ်ရီ ဟီမ်နာပ်ကော ကိုယ်တော်လည် လှောင်ပြောင်နောဟီးမာ့။ အင်းညယ်ငေါဝမ်ရီ ကိုယ်တော်ကော အင်းမာဟီမ်နာပ်သယ် ပြာန်ငါပူစီမ်းကဲ့အယ် ဆဟာကာ အော်ပ်ဝါလာပ်နောက် ကိုယ်တော်နောက်တူတူ ပါလီကာကာ့ တပည့်ဆွန်းဟောလည်ဟာ ကော်ကဲ့အယ် အင်းမာရှီးရာက ယာပ်ရှီဆဟာပါအာ လာမ်ဟီးမာ့။41စီးရာပ်သော် ကိုယ်တော်ကော ယာပ်ရှီဆဟာကာ့ ထော်လည်အော့မ်းကဲ့အယ် “တလိသကုမိ” ငေါကဲ့အယ် မိန့်နောမာ့။ အဓိပ္ပာယ်ကော် “ယာပ်ရှီဆဟာ၊ နာန်နယ် ငါငေါနာ့ ယုတ်အီစာ့” ငေါကဲ့အယ် ထာမာ့။42ချက်ချင်း အင်းမာ ယာပ်ရှီဆဟာကော ယုတ်ကဲ့အယ် လမ်းဟာမာ့။ အင်းမာ့ ယာပ်ရှီဆဟာကာ့ အဆာဒ်ကော ဆယ့်နှစ်နှစ်ဟာနိုက်စနူမ်း။ အင်းမာအဖြစ်ပျက်သယ် ယူပ်မူမူကားတီတ်ဆာဖူမ်ငေါ တအားတုန်းရယ် အန်းနောဟီးတင်းနာန်မာ့။43စီးရာပ်သော် ကိုယ်တော်ကော အင်းမာဟီမ်နာပ်သယ် အင်းကာ အဖြစ်ပျက်သယ် ဟင်နယ်ဟာမ်း အငေါရယ်လင်းတီမ် တင်းတင်းကြပ်ကြပ်ရယ် အမိန့်အီရာမ်မာ့။ စီးရာပ်သော် အင်းမာဆဟာကာ့ အော်ပ်ဝါလာပ်သယ် ဆဟာနန်း ရောက်တီမ်ဖူမ်ကြအာ အီတီမ် မိန့်နာန်မာ့။
Empower Asia Bible Translation Movement