ရှင်မာကုကျမ်းစာအုပ်3
1နောက်သယ်ကာပ်ဝါ အုန်းပူစ်မာန်းရာပ် ရာပ်အာလည် ကိုယ်တော်ကော ဓမ္မာရုံငါး လီစန်းနော အင်းမာနေရား ထော်ပိစ်နုန် လေဖြတ်သောကားကာ တီတ်ဆာဟော်ဝါရီးငါမာ့။2ဖာရိရှဲလာပ်ကော် ကိုယ်တော်လည်ဂျုးလာပ်ကပညတ်တော်လည် လိုက်အနာလောရယ်လင်းကယ်မှ အပြစ်သာမ်တီမ် အူန်းပူစ်မာန်းရာပ်သယ် အင်းမာဟီမ်ငါ အနာရောဂါလည် မီမ်ဟာမ်းကွန်းနယ် ကုလောကဲ့အယ် အိကားသာ ငေါကားလည် မီမ်းဟော်မူကွန်းနယ် ထံပါအာအယ် ယူကဲ့လင်းမာပ်ချီးမာ့။3ကိုယ်တော်ယေရှုကော ထော်ပိစ်နူန်လေဖြတ်သောကားဟီမ်နယ် “ တီတ်ဆာလာပ်အားလုံးငါမန်းနား စာပ်လာမ်နိတ်” ငေါကဲ့အယ် မိန့်နောမာ့။4အင်းမာနောက်သယ် ကိုယ်တော်ကော ဖာရှိရှဲလာပ်သယ် “အူန်းပူစ်မာန်းရာပ်သယ် မဟာအောမ်ငါးကော ပညတ်တော်နောက် ညီလောကားသယ်။ အလေကော် ကလန်ငါလည် အောမ်ငါးနာန် အင်းညယ်အဟီပ်ရယ် အကလန်ငါလည် အောမ်ငါးနာန်။ တီတ်ဆာလာပ်ကာ အဆာဒ်သယ် ကယ်တင်နောကားနာန် အင်းညယ်အဟီပ်ရယ် ကက်ရှီးကားနာန်” ငေါကဲ့အယ် စီမ်ညူရီမာ့။ ကိုယ်တော် အင်းညယ် စီမ်ညူကားအချိန်နယ် ဟီမ်နာပ်ကော ဆီမ်ရှင်းရှင်းညယ် လင်းဟီးမာ့။5ကိုယ်တော်ယေရှုကော ဟီမ်နာပ်သယ် ရှေရှောကဲ့အယ် မန်းကဲ့ယူညာပ်စီရာမ်စန်နော် ဟီမ်နာပ်ငါ စိတ်နှလုံးငေါ ပြောင်းလဲလောရင်နိုသယ်မာ့ ကိုယ်တော်ကော ဝမ်းနည်းလောကဲ့လင်းမာ။ စီးရာပ်သော် ကိုယ်တော်ကော အင်းမာထော်ပိစ်နူန်လေဖြတ်သောကားကာဟီမ်နယ် “နာန်ငါထော်လည် လာရာမ်းငါမ်နိတ်” ငေါကဲ့အယ် မိန့်နောကယ်မာ့ အင်းမာတီတ်ဆာကော ဟီမ်ငါထော်လည် လာရာမ်းငါမ်စန်နော် ဟီမ်ငါထော်ကော ကလန်ဟာမ်မာ့။6အင်းမာစီးရာပ်သော် ဖာရိရှဲလာပ်ကော် အင်းမာနေရားအယ် ချက်ချင်း ပူရီကဲ့အယ် အုပ်ချုပ်သောကားဟီမ် ဟေရုဒ်ကာ့ နောက်လိုက်ဖူမ်နောက် ဟောပ်တောကဲ့အယ် ကိုယ်တော်လည် ကတ်ရှီးတီမ် ချက်ချင်း တိုင်ပင်နောဟီးမာ။7ကိုယ်တော်ယေရှုကော ဟီမ်ငါတပည့်လာပ်နောက်တူတူ အင်းမာနေရားအယ် ပူကဲ့အယ် ဂါလိလဲအိုင်ပါအာ ကြွလာမ်မာ့။8ကိုယ်တော် အောမ်ငါးမှန်သမျှဖူမ်နယ် သာပ်မူကဲ့မီမ်းဟော်ဟီရာမ်စန်နော် ယုဒပြည်၊ ဂျေရုဆလင်မြို့၊ ဣဒုမပြည်၊ ဂျော်ဒန်မြစ် တစ်ဖက်ကမ်းပါအာမာ့ ဒေသဖူမ်၊ တုရုမြို့နောက် ဇိဒုန်မြို့နောက် ထံပါအာ ငါကားကာ တီတ်ဆာလာပ်ကော ကိုယ်တော်ကာနောက်အား လီရာပ်ချီးမာ့။9ကိုယ်တော်ကော နံတင်းငါးကာ တီတ်ဆာကြောင့်နယ် ဟီမ်နယ် အထိုလော်ပါတ်ရယ်လင်းကွန်နယ် ဟီမ်ငါတပည့်လာပ်သယ် ဟီမ်ဟနန်း လှေဆဟာဟူပ်အာ ပြင်ဆင်နောကဲ့အီတီမ် မိန့်နောမာ။10မဟာအောမ်ကယ်လိုးငေါနော ကိုယ်တော်ကော တီတ်ဆာကန်ဖူန်လူန်ငါ အနာရောဂါဖူမ်နယ် ကုလောကဲ့အယ် အီကယ်မာ့ အနာရောဂါခံစားလောထော်ကယ်လင်းငါးကာ တီတ်ဆာဖူမ်ငေါ ကိုယ်တော်ယေရှုလည် ထာတီမ် ဟီမ်ပါအာ ကပ်သောဟီးရီမာ့။11စိတ်ဆလား လာပ်ကော ကိုယ်တော်လည် ယူပ်မူဝမ်စန်းနော စိတ်ဆလားပူးလောကားခံနောထောကာဟီမ်ငေါ ကိုယ်တော်ကာမန်းနား ဝပ်သောကဲ့အယ် “ကိုယ်တော်ကော ဘုရားရှင်ငါ ဆာထာမာ့” ငေါကဲ့အယ် ရမ်းဟီးမာ့။12အင်းညယ်ငေါဝမ်ညီ ကိုယ်တော်ယေရှု ဟင်ထာမာ့ငေါကားကာလည် အငေါရယ်လင်းတီမ် စိတ်ဆလားလာပ်သယ် တအားတုန်းညယ် သတိအီမာ့။13အင်းမာစီးရာပ်သော် ကိုယ်တော်ယေရှုကော တောင်စုတ်အား ကြွလောကဲ့အယ် ဟီမ်အလိုငါကားတပည့်ဖူမ်နယ် ကော်ဝမ်စန်းနော ဟီမ်နာပ်ကော ကိုယ်တော်ပါအာ လီဟီးမာ့။14အင်းမာစီးရာပ်သော် ကိုယ်တော်ကော အင်းမာတပည့်ဖူမ်ပါအာမာ့ တစ်ဆယ့်နှစ်ယောက်သယ် ရွေးလောကဲ့အယ် ဟီမ်နာပ်သယ် သာဝကအဖြစ် ခန့်နာန်မာ့။ ကိုယ်တော် အင်းညယ် အောမ်ထော်ကားကော ဟီမ်နာပ်သယ် ကိုယ်တော်နောက်တူတူ ငါဟီးကွန်းနယ်နောက် သတင်းကလန်ဖူမ်နယ် ဟောလောတီမ် သာပ်တီမ် ထာမာ့။15ကိုယ်တော်ကော ဟီမ်နာပ်သယ် စိတ်ဆလားဖူမ်တီတ်ဆာလာပ်အားပူးလောကားခံနော်ထောကာက လည် ငါပ်ပူရင်ငါးကာ အခွင့်အာဏာအီမာ့။16ကိုယ်တော်ယေရှု ခန့်နောပေးကား သာဝက တစ်ဆယ့်နှစ်ယောက်ကာ့ နံမယ်ဖူမ်ငေါ ပေတရုရယ် ကိုယ်တော်နာမယ်အီပေးကားကာ့ ရှိမုန်၊17မိုးကြိုးကာ ဆာဖူမ်ရယ် အဓိပ္ပာယ်လူကားကာ ဗောနေရဂက်ရယ် ကိုယ်တော် နံမယ်အီပေးကားကာ ဇေဗေဒဲကာ ဆာ ယာကုပ်နောက် ယောဟန် ၊18အန္ဒြေ၊ ဖိလိပ္ပု၊ ဗာသောလမဲ၊ မဿဲ၊ သောမ ၊ အာလဖဲကာ ဆာ ယာကုပ်၊ သဒ္ဒဲ၊ အမျိုးလည်မူမ်းငါးကာ ရှိမုန်နောက်၊19နောင်တစ်ချိန်ငါ ကိုယ်တော်ယေရှုလည် သစ္စာဖောက်သော့ကာကာ့ ယုဒရှကာရုတ်သာပ် ထာမာ့။20အင်းမာစီးရာပ်သော် ကိုယ်တော်ကော တပည့်ဖူမ်နောက်အတူတူရယ် ကပေရနောင်မြို့ပါအာက ကျဉ်းမား ကြွလာမ်စန်နော် တီတ်ဆာကန်ဖူန်လူန်ငေါ ရာကာပ်ဝါ့ စုလောကဲအယ် ထုတ်ချီးရီကယ်မာ့ ကိုယ်တော်နောက် တပည့်တော်လာပ်ကော အစာရောက်တီမ်ဟာမ်း အချိန်လူရီယိုး။21ကိုယ်တော်ယေရှုကာ ကျဉ်းရှိတ်သာပ်ကော အင်းမာအကြောင်းနယ် သာပ်မူဝမ်စန်းနော တီတ်ဆာကြအကော ကိုယ်တော်လည် စိတ်မှန်နော်စော်မန် မသပ်ကယ်မာ့ ကျဉ်းမာ ကော်ဟာမ်းတီမ် လီရာပ်ချီးမာ့။22ကိုယ်တော်ယေရှုအောမ်ပေးကားကအကြောင်းဖူမ်နယ် ဂျေရုဆလင်မြို့ပါအာမာ့ ကျမ်းထောကား ဆရာဖူမ်ညီး “ကိုယ်တော်လည် စိတ်ဆလားဖူမ်ငါဘုရင် ဗေလဇေဗုလကော ထိန်းချုပ်သောပေးမာ့။ အင်းသယ်မာ့ စိတ်ဆလားလာပ်ကာ့ဘုရင် ဗေလဇေဗုလကာ့ တန်ခိုးနောက် စိတ်ဆလားလာပ်သယ် ငါပ်ပူကားထာမာ့” ငေါကဲ့အယ် ငေါဟီးမာ့။23အင်းသယ် ကိုယ်တော်ကော ဟီမ်နာပ်သယ် ကော်ကဲ့အယ် ပုံဥပမာနောက် မိန့်နောကားကော “မာရ်နတ်ကော မာရ်နတ်သယ် မညယ်ငါပ်ပူရင်ဟပ်ကားသယ်။24နိုင်ငံတစ်နိုင်ငံပါအာမာ့ တီတ်ဆာဖူမ်ငေါ အချန်းချန်းတိုက်ခိုက်သောကဲ့လင်းဟီးရာမ်းနော အင်းမာနိုင်ငံငေါ ပျက်စီးလာမ်ကား။25အင်းမာတိုင်းမန်း မိသားစုတစ်စုပါအာမာ့ တီတ်ဆာအချန်းချန်း တိုက်ခိုက်သောကဲ့လင်းမန်းနော အင်းမာမိသားစုကော ပြိုကွဲလာမ်ကား။26အင်းသယ်မာ့ မာရ်နတ်ရီး ဟီမ်ငါ စိတ်ဆလားဖူမ်နောက် အချန်းချန်း ဆန့်ကျင်နော်ကယ်အယ် လင်းမန်းနော ဟီမ်ငေါ အတည်မြဲလောရင်ညယ် ပျက်စီးလောဟီးထော်ပ်ကား။27ဟင်ဟာမ်း သန်မာလောကားကာ တီတ်ဆာဟော်ဝါကာ့ ကျဉ်းနား ဆာမ်ကဲ့အယ် ပစ္စည်းဖူမ်နယ် လာဆနန်ရင်ဟပ်ကားယို။ ဟီမ်နယ် အရာမ်ဆုံး လင်(မ်)ပေးစီးရာမ်မာလည်ဟာ ဟီမ်ပိုင်နောကားကာ ပစ္စည်းဖူမ်နယ် လာဆနန်ကယ်အယ် လူရင်ဟပ်ကား။28နီမ်နယ် ငါအမှန်ငေါထော်ဝမ်နော် တီတ်ဆာလာပ်အချန်းချန်း အောမ်ပါတ်ကားကာ ဒုစရိုက်အပြစ်ဖူမ်နယ်နောက် စော်ကားလောကဲ့အယ် သပေါက်ကားဖူမ်နယ်ကော ခွင့်လွှတ်သောကား လူရင်ဟပ်နာ့။29အင်းညယ်ငေါဝမ်ညီ ဘုရားရှင်က ဉာဏ်အလင်းတော်လည် ပြစ်မှားလောကားဟီမ်ငေါ တိုက်မာဟာမ်း အခွင့်လွှတ်သောရင်ညယ် ထာဝရရယ် အပြစ်စီရင်နောကားလည် ခံနောထော်ပ်ကား” ငေါကဲ့အယ် မိန့်နောမာ့။30ကိုယ်တော်ကော အင်းကာညယ် မိန့်နောထော်ကာကော် ဟီမ်နာပ်ကော “ကိုယ်တော်ပါအာ စိတ်ဆလား ဆာမ်ကဲ့လင်းငါး” ငေါကဲ့အယ် ငေါဟီးကယ် ထာမာ့။31အင်းမာနောက်သယ် ကိုယ်တော်ယေရှုကာ အမေနောက် ဟီမ်ငါ့ အန်းချန်နရှီဖူမ်ငေါ ကိုယ်တော်ငါကား နေရား ထုပ်အာပ်ချီးရီကယ်အယ် ပြာန်ငါ့သယ် စာပ်ကဲ့အယ် တီတ်ဆာဟော်ဝါလည် ကိုယ်တော်ပြာန်ငါပူရီတီမ် ကော်ဝါစီမ်းမာ့။32ကိုယ်တော်နောက် ထံပါအာ ထောင်းကဲ့လင်းဟီးကားဟီမ်နာပ်ကော ကိုယ်တော်လည် “ကိုယ်တော်ကာအမေနောက် အန်းချန်နရှီလာပ်ကော ကိုယ်တော်လည် ဟော့ပ်သောကာပ်ကယ် ပြာန်ငါ ထက်ကဲ့လင်းဟီးမာ့” ငေါကဲ့အယ် လျှောက်တင်နာန်မာ။33အင်းမာချိန်နယ် ကိုယ်တော်ကော “ငါကာအမေနောက် ငါကာ အန်းချန်နရှီလာပ်ကော ဟင်နာပ်သယ်” ငေါကဲ့အယ် စီမ်ညူဝမ်မာ။34အင်းမာစီးရာပ်သော် ကိုယ်တော်ကော ဟီမ်ငါပတ်ပတ်လည်ရာ ထောင်းကဲ့လင်းငါးကာ့ တီတ်ဆာလာပ်သယ် ယူကဲ့အယ် “အင်းကာ့တီတ်ဆာဖူမ်ငေါ ငါကာအမေနောက် အန်းချန်နရှီဖူမ်ဟဲ။35မဟာအောမ်ကယ်လိုးငေါနော ဘုရားရှင်ငါ အလိုတော်အတိုင်း အောမ်မတ်ချီးကားကာ့ တီတ်ဆာတိုင်း ငါကာ စစ်မှန်နော်ကာ အမေ၊ အန်းချန်နရှီဖူမ်ထာမာ့” ငေါကဲ့အယ် မိန့်နာန်မာ။
Empower Asia Bible Translation Movement