ရှင်မာကုကျမ်းစာအုပ်2
1မာန်းရာပ်နည်းနည်းဟာ မာပ်အာမ်စန်းနော ကိုယ်တော်ယေရှုကော ကပေရနောင်မြို့ဝါ လာမ်ဟာမ်းမာ့။ အင်းမာမြို့ဝါးကာ တီတ်ဆာဖူမ်ညီး ကိုယ်တော် ကျဉ်းမာလီဟာမ်းငါးသတင်းနယ် သာပ်မူဟီးကယ်မာ့။2တီတ်ဆာကန်ဖူမ်လူန်ငေါ ကိုယ်တော်ယေရှုပါအာ ထုတ်ချီးရီကယ်မာ့။ အင်းမှာချိန်နယ် ကျဉ်းကျဉ်မာလုံး တီတ်ဆာဖူမ် ဖိန်းကဲ့အယ် ကျဉ်းကဖာန်ဆာမ်ပြာန်ငါ ထုတ်ကွန်းနယ်ဟာမ် စာပ်ကဲ့အယ်လင်းတီမ် နေရာဟာမ်းအပေါ်စော်မန်။ ကိုယ်တော်ရီး အင်းမာတီတ်ဆာဖူမ်နယ် ဘုရားရှင်ငါ နှုတ်ကပါတ်တော်ဖူမ်နယ် ဟောပြောလောမာ့။3အင်းမာအချိန်နယ် တီတ်ဆာလေးယောက်ကော လေဖြတ်သောကား တီတ်ဆာဟော်ဝါလည် ဖေးကဲ့အယ် ကိုယ်တော်ပါအာ လီဟီးရီမာ့။4အင်းမာတီတ်ဆာလာပ်ကော တီတ်ဆာကန်ဖူန်လူန်ငါကယ်မာ့ အင်းမာ လေဖြတ်သောကားဟီမ်နယ် ကိုယ်တော်ပါအာ အသယ်လော်ရင်ညယ်လင်းကယ် ကိုယ်တော်ငါကားကာနေရာ စုတ်အားမာ့ ကျဉ်းခေါင်မိုးလည် အပေါက်ဖောက်သောကဲ့အယ် အင်းမာ လေဖြတ်သောကားဟီမ်နယ် ဆလောင်းနောက်တူတူ ကိုယ်တော်ကာ မန်းနားချလောလက်လာမ်မာ့။5ကိုယ်တော်ယေရှုကော အင်းမာဟီမ်နာပ်ကာ့ ယုံကြည်မှုလည် ယူပ်မူဝမ်စန်းနော အင်းမာ လေဖြတ်သောကားဟီမ်နယ် “ မိတ်ဆွေ၊ နာန်ငါ ဒုစရိုက်အပြစ်ဖူမ်နယ် ခွင့်လွှတ်သောကဲ့အီရာပ်” ငေါကဲ့အယ် မိန့်နာန်မာ့။6အင်းညယ်ငေါဝမ်ညီ အင်းမာနေရား ထောင်းကဲ့လင်းဟီးကားကာ ကျမ်းထောကား ဆရာကြအာကော7“မဟာအောမ်ကယ် ဟီမ်ငေါ အင်းမာညယ် ငေါထော်ကာသယ်။ ဘုရားရှင်နယ် စော်ကားလောကား။ ဘုရားရှင် တစ်ပါးဟာနိုက် ဒုစရိုက်အပြစ်ဖူမ်နယ် ခွင့်လွှတ်သောကဲ့အီရင်ငါး” ငေါကဲ့အယ် ဟီမ်နာပ်ကာစိတ်နား တွေးလောဟီးမာ့။8ကိုယ်တော်ယေရှုကော ဟီမ်နာပ်ကာ စိတ်နားမညယ်တွေးလောကဲ့လင်းမာငေါကားကာလည် ချက်ချင်းရယ် မီမ်းဟော်ကယ်မာ့ ဟီမ်နာပ်သယ် “နီမ်ငေါ မဟာအောမ်ကယ် အင်းညယ် တွေးလောကဲ့လင်းဟီးကားသယ်၊9လေဖြတ်သောကားဟီမ်နယ် 'နာန်ငါ ဒုစရိုက်အပြစ်ဖူမ်နယ် ခွင့်လွှတ်သောကဲ့အီရာပ်' ရယ် ငေါကားနာန် အင်းညယ်အဟီပ်ရယ် ‘ယုတ်တိတ်၊ နာန်ငါ ဆလောင်းနယ် လာကဲ့အယ် လမ်းဟာလိတ်’ ရယ် ငေါကားနာန်။ သမာ့ လွယ်လောဟန်သယ်။10အင်းညယ်ငေါဝမ်ညီ ကမ္ဘာပေါ်ဝါး ငါကားကာ ဒုစရိုက်အပြစ်ဖူမ်နယ် ခွင့်လွှတ်သောကဲ့အီရင်ငါးကာ အခွင့်အာဏာကော တီတ်ဆာကာ့ဆာပါအာ ငါမာ့ ငေါကားကာလည် နီမ်နယ် ငါပြလောနာပ်” ငေါကဲ့အယ် မိန့်နောစီးကဲ့အယ် ကိုယ်တော်ယေရှုကော လေဖြတ်သောကားကာဟီမ်နယ်11“နာန်နယ် ငါငေါနာပ် ၊ ယုတ်စာ့ နာန်ငါ ဆလောင်းနယ် လာကဲ့အယ် ကျဉ်းမာ လာမ်ဟာမ်းစာ့” ငေါကဲ့အယ် မိန့်နောမာ့။12အင်းမာတီတ်ဆာကော ချက်ချင်းယုတ်စီးရာမ်စန်နော် ဆလောင်းနယ် လာကဲ့အယ် တီတ်ဆာအားလုံးနာပ်ကာ မန်းနားဟာ ကျဉ်းမာလာမ်ဟာမ်းကယ်မာ့ ယူပ်မူကားတီတ်ဆာဖူမ်ငေါ တအား အန်းနောဟီးစာပ်ရယ် “အလေကော် အင်းကာညယ် ကာပ်ဝါဟာမ်း ယူပ်မူမာန်ငိုး” ရယ် ငေါကဲ့အယ် ဘုရားရှင်ကို ချီးမွမ်းနောဟီးမာ့။13ကိုယ်တော်ယေရှုကော ကပေရနောင်မြို့ပါအာနယ်ပူကအယ်ငေါ်် ဂါလိလဲအိုင်နောက် ထံငါးနေရား နောက်သယ်ကာပ်ဝါ ပြန်နောကဲ့အယ် ကြွဟေကာအချိန်နယ် တီတ်ဆာကန်ဖူမ်လူန်ငေါ ကိုယ်တော်ပါအာ စုလောကဲ့အယ် လင်းဟီးရီကယ်မာ့ ကိုယ်တော်ကော ဟီမ်နာပ်သယ် ဘုရားရှင်ငါ နှုတ်ကပါတ်တော်ဖူမ်နယ် ဟောပြောသွန်သင်နောမာ့။14ကိုယ်တော်ကော ဆက်သောကဲ့အယ် လမ်းလျှောက်သောကဲ့ လီကားအချိန်နယ် အခွန်ကောက်သောကားနေရား ထောင်းကဲ့လင်းငါးကာ အာလဖဲ ကာဆာ ထာကာကာ့ လေဝိလည် ယူပ်မူဝမ်စန်းနော အင်းမာဟီမ်နယ် “ငါကာနောက်အား ရာပ်စာ့” ငေါကဲ့အယ် မိန့်နောမာ။ အင်းမာအချိန်နယ်လေဝိကော ယုတ်ကဲ့အယ် ကိုယ်တော်ကာ နောက်အာ လာပ်မာ့။15အင်းမာစီးရာပ်သော် ကိုယ်တော်ယေရှုနောက် တပည့်တော်ဖူမ် လေဝိကာကျဉ်းမား ရောက်ကဲ့လင်းဟီးကား အချိန်နယ် နံတင်းငါးကာ အခွန်ကောက်သမားဖူမ်၊ အပြစ်ဒုစရိုက်သမားဖူမ်ငေါ် ကိုယ်တော်နောက် တပည့်တော်လာပ်နောက်တူတူ အင်းမာနေရား ရောက်မောက်ချီးမာ့။16ကိုယ်တော်ယေရှုကော အခွန်ကောက်သမားဖူမ်၊ အပြစ်ဒုစရိုက်သမားလာပ်နောက် တူတူ ရောက်မောက်ကဲ့လင်းငါးကာလည် ဖာရိရှဲလာပ်ပါအာမာ့ ကျမ်းထောကား ဆရာကြအာကော ယူပ်မူဝမ်စန်းနော ကိုယ်တော်ကာ တပည့်လာပ်သယ် “မဟာအောမ်ကယ် ဟီမ်ငေါ အခွန်ကောက်သမားဖူမ်၊ အပြစ်ဒုစရိုက်သမားဖူမ်နောက် ရောက်မောက်ချီးကားသယ်” ငေါကဲ့အယ် စီမ်ညူဟီးမာ။17ကိုယ်တော်ယေရှုကော အင်းမာလည် သာပ်မူဝါမ်စန်းနော ဟီမ်နာပ်သယ် “ ဇလားကားတီတ်ဆာလာပ်ကော ရှီပ်ဆရာ လိုလောကာ့ယို၊ အဇလာကာ ဟီမ်နာပ်မားလည် ရှီပ်ဆရာလိုလောကား။ အင်းမာတိုင်းမန်း ဖြောင့်မတ်သောကားဟီမ်နာပ်နောင်တသံဝေဂ လူကွန်းနယ် ငါလီကားဟီပ်ယို အင်းညယ်ငေါဝမ်ရီ အပြစ်ဒုစရိုက်သမားလာပ်သယ် နောင်တသံဝေဂ လူကွန်းနယ်အောမ်တီမ် ငါလီကား” ငေါကဲ့အယ် မိန့်နောမာ့။18ဝေးငဟူပ်ကာ ဆရာယောဟန်ငါ တပည့်ဖူမ်နောက် ဖာရိရှဲလာပ်ကော် အမာပ်စာပ်ရယ် အစာရှောင်နောကဲ့အယ် အူန်းပူစ်လင်းဟီးမာ။ အင်းမာနောက်သယ် တီတ်ဆာကြအာကော ကိုယ်တော်ယေရှုပါအာ လီကဲ့အယ် “ယောဟန်ငါတပည့်ဖူမ်နောက် ဖာရိရှဲကာ တပည့်ဖူမ်ငေါ် ရောက်ကားရှာင်နောကဲ့အယ် အုန်းပူစ်စောင့်နောဟီးရီး ကိုယ်တော်ကာ တပည့်လာပ်ကော် မဟာအောမ်ကယ် ရောက်ကားရှောင်နောကဲ့အယ် အူန်းပူစ်အစောင့်နောဟီးကားသယ်” ငေါကဲ့အယ် စီမ်ညူဟီးစန်းနော19ကိုယ်တော်ကော “မင်္ဂလာဆောင်ပွဲရား လီဟီးကားကာ သတိုးသားကာ မိတ်ဆွေဖူမ်ငေါ သတိုးသားနောက်တူတူ လင်းငါးကာ အချိန်နယ် ရောက်ကားရှောင်နောဟိကာရယ် မသပ်ချီးကားလေး။ သတိုးသားနောက် အတူတူ လင်းငါးကာ အချိန်နယ် ဟီမ်နာပ်ကော ရောက်ကား ရှောင်နောဟိကာယို။20အင်းညယ်ငေါဝမ်ညီ ဟီမ်နာပ်ပါအာအယ် သတိုးသားလည် ကော်ဝမ်ကား မာန်းရာပ်ထုတ်ပါပ်သော် ဟီမ်နာပ်ကော ရောက်ကားရှောင်နောဟီးနာပ်။21အဝတ်ကာမ်ငါ အပေါက်သယ် ပိတ်စညားနောက် ဟင်ဟာမ်း ကဖောက်အို ၊ အင်းမာညယ် အောမ်မန်းနော ပိတ်စအသစ်ကော အဝတ်ကာမ်နယ် ဆိတ်စိမ်းကယ်မာ့ ဆိတ်ကားနေရာကော ပိုဆိုးလိကား။22စပျစ်ဝိုင်ညားလည် သရေဗူးကာမ်ပါအာ ဟင်ဟာမ်းစာန်းငိုး၊ အင်းမာညယ် စာန်းပါတ်သော် စပျစ်ဝိုင်က သရေဗူးဟော်ပ်ခါကယ်မာ့ စပျစ်ဝိုင်ရီး မာဟူမ်မာန်ကဲ့အယ် သရေဗူးရီး ပျက်စီးလာမ်ကား။ စပျစ်ဝိုင်ညားလည် သရေဗူးညားပါအာဟာ စာန်းထော်ပ်ကား” ငေါကဲ့အယ် မိန့်နောမာ့။23အင်းမာပြာန်နယ် အူန်းပူစ်မာန်းရာပ် ရာပ်အာလည် ကိုယ်တော်ယေရှုနောက် ဟီမ်ငါတပည့်လာပ်ကော အန်တွန်ငါကား အခင်းနယ် ပလာပ်ကဲ့အယ် လာမ်ငါးအချိန်နယ် တပည့်တော်လာပ်ကော လမ်းလျှောက်သောစာပ်ရယ် အန်ရှီဖူမ်နယ် ကူမ်ဟီးရာမ်မာ့။24အင်းမာချိန်နယ် ဖာရိရှဲလာပ်ကော် ကိုယ်တော်လည် “ယူလိတ်။ နာန်ငါ တပည့်လာပ်ကော် အူန်းပူစ်မာန်းရာပ်သယ် ပညတ်တော်နောက် အညီလော်ကာလည် မဟာအောမ်ကယ် အောမ်ဟီးကားသယ်” ငေါကဲ့အယ် စီမ်ညူဟီးမာ့။25အင်းမာအချိန်နယ် ကိုယ်တော်ယေရှုကော ဖာရိရှဲလာပ်သယ် ကျမ်းစာပါအာ ဘုရင်ဒါဝိဒ်နောက် ဟီမ်ငါအပေါင်းအပါဖူမ် အားကြီစ်ရယ် သားရောက်ခေါပ်တင်းငါးအချိန်နယ် မဟာအောမ်ဟီးရီမာငေါကားကာလည် နီမ်ကြေဟီမာန်ငိုနာန် ၊26တုန်းဟန်ဆုံး ပုရောဟိတ် အဗျာသာကာလက်ထက်လား ဘုရင်ဒါဝိဒ်ကော ဘုရားရှင်ငါ ကျဉ်းနား ဆာမ်ကဲ့အယ် ပုရောဟိတ်သာပ်ချာ ရောက်ခွင့်လူကဲ့အယ် ဘုရားရှင်နန်း ကပ်သောပေးကား ဟမူမ်ဖူမ်နယ် ဟီမ်ကိုယ်တိုင် ရောက်ကားပြာန်နယ် ဟီမ်ငါအပေါင်းအပါလာပ်သယ်ရီး အီနောပ်လာမ်တူမ်" ငေါကဲ့အယ် မိန့်နောမာ့။27အင်းမာနောက်သယ် ကိုယ်တော်ကော ဖာရိရှဲလာပ်သယ် “တီတ်ဆာလာပ်ကော အုန်းပူစ်မာန်းရာပ်ခနန်း ဟီပ်ယို။ အူန်းပူစ်မာန်းရာပ်သယ် တီတ်ဆာလာပ်ခနန်း သတ်မှတ်သောပေးကား ထာမာ့။28အင်းသယ်မာ့ တီတ်ဆာကာ့ဆာ အူန်းပူစ်မာန်းရာပ်ကာ အရှင်သခင်ထာမာ့” ငေါ်ကလည် မီမ်းဟောထောန ငေါကဲ့အယ် မိန့်နောမာ့။
Empower Asia Bible Translation Movement