ရှင်မာကုကျမ်းစာအုပ်1
1ဘုရားရှင်ငါ ဆာ မေရှိယ ထာကာကာ့ ကိုယ်တော်ယေရှုကာအကြောင်း သတင်းကလန် အစကော အင်းကာညယ်ထာမာ့။2ပရောဖက်ဟေရှာယကျမ်းပါအာ“ယူလိပ် ၊ နာန်ငါ လမ်းနယ် အရာမ်သင့် ပြာန်နောကဲ့အီတီမ် ငါကာ ဟမန်းနယ် နာန်နယ်အရာမ် ငါသာပ်ခပ်ကား။3ဟီမ်ငေါ တီတ်ဆာလာပ် အပေါ်ကာကာ့ ပေါက်ခါသာတုန်းငါး ရမ်းငါးကော ၊2 'အရှင်ကြွလိကားလမ်းနယ် အရာမ်သင့် ပြာန်နောဟီးစာ့၊ဟီမ်ငါလမ်းနယ် ရာမ်းစီမ်းနိတ်'”ငေါကဲ့အယ် ရေးလောပေးကယ်ညယ်4ဝေးငဟူပ်ကာမင်္ဂလာ ဆရာယောဟန်ငေါ် တီတ်ဆာလာပ် အပေါ်ကာကာ့ ပေါက်ခါသာတုန်းငါး ဟီမ်ငါ အမူတော်စတင်ထမ်းဆောင်နောကာအယ် ဒုစရိုက်အပြစ်ဖူမ်နယ် ခွင့်လွှတ်သောကားလူကွန်းမယ် နောင်တသံဝေဂ လူကဲ့အယ် ဝေးငဟူပ်ကာမင်္ဂလာ ခံနောဟီးတီမ် ဟောပြောလောမာ့။5ဂျေရုဆလင်မြို့နောက် ယုဒပြည်ပါအာမာ့ တီတ်ဆာဖူမ်အားလုံးငေါ ယောဟန်ပါအာ လီကဲ့အယ် ဟီမ်နာပ်ကာ့ အကလန်ငါကာ ဒုစရိုက်အပြစ်ဖူမ်နယ်ဝန်ခံနောဟီးကဲ့အယ် ဂျော်ဒန်မြစ်လား ယောဟန်ပါအာ ဝေးငဟူပ်ကာမင်္ဂလာ လာဟီးမာ့။6ယောဟန်ငေါ် ကုလားအုတ်မီမ်ကူနောက် အောမ်ပေးကားကာ ဝတ်ရုံနယ် ဖူမ်ကဲ့အယ် ခါးပါအာကော် သားရေနောက်အောမ်ပေးကားကာ ဖောက်ကမ်နယ် ဟော်ပ်ကဲ့အယ် ကုပ်ကျဲနောက် ပေါက်ခါသာက တမူမ်းဝေးလည်ဟာ ရောက်မာ့။7ယောဟန်ငေါ် တီတ်ဆာလာပ်သယ် “ငါကာထက်သယ် ပိုလောကဲ့အယ် ကြီးမြတ်သောကားကာဟီမ် အမာပ်စာပ်ရယ် ထုတ်အိကား ငါကော ဆူညယ် ဟီမ်ငါ ဟက်တီမ်းဆည်လည် ငေါပ်ကယ်အယ် ဟပ်ကဲ့အီတီမ်ဟာမ်း ထိုက်တန်နို။8ငါကော နီမ်နယ် ဝေးနောက် ငဟူပ်ကာမင်္ဂလာ အီမာ့ငေါဝမ်ညီ ဟီမ်ငေါနီမ်နယ် ဉာဏ်အလင်းတော်နောက် ဝေးငဟူပ်ကာမင်္ဂလာအိကား” ငေါကဲ့အယ် ယောဟန် ဟောလောမာ့။9အင်းမာမာန်းရာပ်ဖူမ်ငါး ကိုယ်တော်ယေရှုကော ဂါလိလဲပြည်ပါအာ ငါကားကာ့ နာဇရက်မြို့ပါအာအယ် လီကဲ့အယ် ဂျော်ဒန်မြစ်လား ယောဟန်ပါအာ ဝေးငဟူပ်ကာမင်္ဂလာ ခံနောမာ့။10ကိုယ်တော်ယေရှု ဝေးရားအယ် ဟေရီကားနောက် ဟမောက်ကော် ဟင်းလင်းပွင့်နောကဲ့အယ် ဉာဏ်အလင်းတော်ကော် တကူးကူးနူစ်နူပုံစံညယ် ကိုယ်တော်ပါအာ ဆာပ်လက်လီကားလည် ယူပ်မူဝါမ်မာ့။11အင်းမာစီးရာပ်တော် “နာန်ငေါ ငါမူမ်းငါးကာ့ ငါကာဆာ ထာမာ့ ၊ ငါကော နာန်နယ် ကုန်းကျီ့ နှစ်သက်သောမာ့” ငေါကဲ့အယ် ရွှေမြို့တော်ပါအာအယ် ဘုရားရှင်ငါအသံ ပူရီမာ့။12အင်းမာစီးရာပ်သော် ချက်ချင်း ဉာဏ်အလင်းတော်ကော် ကိုယ်တော်ယေရှုလည် တီတ်ဆာလာပ် အပေါ်ကာကာ့ ပေါက်ခါသာတုန်းငါး လာမ်စီမ်းမာ့။13ကိုယ်တော်ကော တီတ်ဆာလာပ် အပေါ်ကာကာ့ ပေါက်ခါသာတုန်းငါး မာန်းရာပ်ပေါင်း လေးဆယ် လင်းမီကယ်အယ် အင်းမာ မာန်းရာပ်ဖူမ်ပါအာ မာရ်နတ်ကာ ဖြားယောင်းသွေးဆောင်နော်ကာလည်ရား ခံနောထော်ရီမာ့။ အင်းမာနေရား ပေါက်ခါပါအာ ရိုင်းနောကား နူစ်နူပစူန်ဖူမ်ဟာ ငါမာငေါဝမ်ညီ ဘုရားရှင်ငါ ဟမန်းနာပ်ကော် လီကဲ့အယ် ကိုယ်တော်လည် စောင့်ရှောက်သောပေးမာ့။14ဝေးငဟူပ်ကာမင်္ဂလာ ဆရာယောဟန် လင်(မ်)ကဲ့အယ် ထောင်ငါးစာန်းငါး ခံနောထော်စီးရာနောက် ကိုယ်တော်ယေရှုကော ဂါလိလဲပြည်ပါအာ လာမ်ကဲ့အယ် ဘုရားရှင်ငါ မင်္ဂလာသတင်းကလန်နယ် ဟောလောမာ့။15ကိုယ်တော်ကော “ အချိန်ထုတ်ပီစ်။ ဘုရားရှင်ငါ သာသနာတော် ပေါ်လီကာ အချိန်ထံပိစ်သယ်မာ့ နောင်တသံဝေဂ လူကဲ့အယ် မင်္ဂလာသတင်းကလန်နယ် ယုံကြည်လောဟီးစာ့” ငေါကဲ့အယ် ဟောလောမာ့။16ရာပ်အာလည် ကိုယ်တော်ကော ဂါလိလဲအိုင်ကမ်းခြေပါအာ လမ်းလျှောက်သောကဲ့လင်းငါးချိန်နယ် သမ်းငါလင်ငါး အလုပ်အောမ်ငါးဟီမ်နာပ် ထာကာကာ့ ရှိမုန်နောက် ဟီမ်ငါနဆီ အန္ဒြေလာပ်ကော အိုင်နား သမ်းငါလင်(မ်)တီမ် ပိုက်ချလောကဲ့ လင်းဟီးကားလည် ယူပ်မူဝမ်မာ့။17အင်းမာအချိန်နယ် ကိုယ်တော်ယေရှုကော “ လီဟီးလိတ်၊ ငါကာနောက်အား ရာပ်ချီးလိတ်။ နီမ်ငေါ သမ်းငါလင်(မ်)ဟပ်ကားအစား တီတ်ဆာဖူမ်နယ် မညယ်စုလောထော်ပ်ကား ငေါကားလည် ဆောမ်နောကဲ့အယ် အီနာပ်” ငေါကဲ့အယ် ဟီမ်နာပ်သယ် ငေါမာ့။18ချက်ချင်း ဟီမ်နာပ်ကော ဟီမ်နာပ်ကာ သမ်းငါးလင်(မ်)ငါး အလုပ်သယ် စွန့်လွှတ်သောကဲ့အယ် ကိုယ်တော်ကာ နောက်အား လီရာပ်ချီးမာ့။19စီးရာပ်သော် ကိုယ်တော်ကော အင်းမာနေရားအယ် နည်းနည်းဟာ ဆက်သောကဲ့လာမ်စန်းနော ဇေဗေဒဲကာ ဆာဖူမ်ထာကာကာ့ ယာကုပ်နောက် ဟီမ်ငါနရှီ ယောဟန်နယ် လှေစုတ်အား သမ်းငါလင်(မ်)ငါးပိုက်တယ် ပြာန်နော်ကအယ် လင်းငါးလည် ယူပ်မူဝမ်မာ့။20ကိုယ်တော်ကော ချက်ချင်း ဟီမ်နာပ်သယ် ဟီမ်ငါတပည့်အဖြစ် ရာပ်တီမ် ကော်ဝါမ်စန်းနော ဟီမ်နာပ်ကော ဟီမ်နာပ်ကာ အဝါဇေဗေဒဲနောက် ငှားလောပေးကားကာ တီတ်ဆာဖူမ်နယ် လှေစုတ်အား သက်ပေးကဲ့အယ် ကိုယ်တော်ကာ နောက်အာ လာပ်ချီးမာ့။21အင်းမာစီးရာပ်သော် ကိုယ်တော်ယေရှုကော တပည့်ဖူမ်နောက် ကပေရနောင်မြို့ဝါး လာမ်ဟီးမာ့။ အူန်းပူစ်မာန်းရာပ် ထုတ်အာမ်စန်းနော ကိုယ်တော်ကော ဓမ္မာရုံပါအာ လာမ်ကဲ့အယ် တီတ်ဆာလာပ်သယ် ဟောပြောသွန်သင်နောမာ့။22ကိုယ်တော်ယေရှုကော ကျမ်းထောကား ဆရာဖူမ်ညယ် အဟီပ်ရယ်စစ်မှန်နောကာကာ့ အခွင့်အာဏာငါကား တီတ်ဆာဟော်ဝါညယ် ဟောပြောသွန်သင်နောကယ်မာ့ ကိုယ်တော်ကာ ဟောပြောသွန်သင်ချက်ဖူမ်နယ် တီတ်ဆာတိုင်းငေါ အားကြီစ်ရယ် အန်းနောတင်းဟီးရာမ်မာ့။23ရှတ်တရက် ကိုယ်တော်သွန်သင်နောကအယ်လင်းငါချိန်နယ် စိတ်ဆလားဆာမ်ငါး ခံနောထော်ကာ တီတ်ဆာဟော်ဝါကော ဓမ္မာရုံပါအာ ငါကယ်မာ့ အင်းမာဟီမ်ငေါ24“နာဇရက်မြို့သား ယေရှု၊ ကိုယ်တော်ကော အလေဆူလည် မဟာအောမ်ကာပ်ကယ်သယ်။ အလေဆူလည် ဖျက်ဆီးလောတီမ် လီကားနာန် ၊ကိုယ်တော် ဟင်သယ် ငေါကားလည် အလေဆူမီမ်းဟော်မာ့။ ကိုယ်တော်ကော ဘုရားရှင်ပါအာအယ် လီကားကာ မြင့်မြတ်သောကားဟီမ် ထာမာ့” ငေါကဲ့အယ် ရမ်းကဲ့သပေါက်မာ့။25ကိုယ်တော်ရီး စိတ်ဆလားလည် “ဆီမ်ရှင်းရှင်းရယ် ဟီမ်ပါအာအယ် ပူဝမ်စာ့” ငေါကဲ့အယ် အမိန့်အီရာမ်မာ့။26အင်းမာအချိန်နယ် စိတ်ဆလားကော အင်းမာဟီမ်နယ် တအားဆိုင်ဆန်နောညာပ်စီကယ်အယ် ရမ်းကဲ့အယ် အင်းမာဟီမ်ပါအာအယ် ပူဝမ်မာ့။27အင်းမာစီးရာပ်သော် တီတ်ဆာဖူမ်အားလုံးငေါ အန်းနောတင်းဟီးစာပ်ရယ် “အင်းကာကော မညယ် ဆောမ်နောကဲ့အယ်အီကား နည်းသယ်။ ဟီမ်ငေါ စိတ်ဆလားလည် အခွင့်အာဏာအပြည့်နောက် အမိန့်အီရာမ်စန်းနော အင်းမာစိတ်ဆလားကော ဟီမ်ငါအမိန့်နယ် သပ်ထော်မာ့တော်ဟေး” ငေါကဲ့အယ် ဟော်ဝါနောက်ဟော်ဝါ သပေါက်ချီးမာ့။28ကိုယ်တော်ယေရှုကာ သတင်းငေါ ဂါလိလဲပြည် ကြအာလုံး ချက်ချင်း ပျံ့နောဟူမ်မာန်မာ့။29အင်းမာနောက်သယ် ကိုယ်တော်နောက်တပည့်တော်ဖူမ်ငေါ ဓမ္မာရုံပါအာအယ် ပူရီကဲ့အယ် ယာကုပ်၊ ယောဟန်နာပ်နောက်တူတူ ရှိမုန်နောက် အန္ဒြေလာပ်ကာ့ ကျဉ်းမာ ချက်ချင်း လာမ်ဟီးမာ့။30အင်းမာကျဉ်းမားထုတ်အာမ်စန်းနော ရှိမုန်ငါ နီကော ကနာဟာကယ် အက်ဆက်ဝါး အက်တလေးကဲ့အယ် လင်းငါးအကြောင်းနယ် အင်းမာနေရားမာ့ တီတ်ဆာလာပ်ကော ကိုယ်တော်လည် ရာဟာမ်းရာ လျှောက်သောဟီးမာ့။31အင်းသယ် ကိုယ်တော်ကော အင်းမာယာပ်ရှီပါအာ လာမ်ကဲ့အယ် အင်းမာယာပ်ရှီကာ ထော်လည် အောမ်းကဲ့အယ် လာယုတ်အာမ်စန်နော် ကနာဟာကားဖူမ် မီမ်ဟာမ်းငါမ်ကယ်မာ့ ဟီမ်ကိုယ်တိုင် ကိုယ်တော်နောက် တပည့်တော်လာပ်သယ် ရောက်တီမ်အူတီမ်ဖူမ်နောက် ဧည့်ခံနောမာ့။32အင်းမာ့ စမီပ်ဆာမ်ငါးကာ့အချိန် ထုတ်အာမ်စန်းနော တီတ်ဆာလာပ်ကော ကနာဟာကားကာ့တီတ်ဆာဖူမ်နောက် စိတ်ဆလားဆာမ်ငါး ခံနောထော်ကာကာ့ တီတ်ဆာဖူမ်နယ် ကိုယ်တော်ပါအာ ကော်ဟီးရီမာ့။ 33အင်းမာမြို့ပါအာမာ့ တီတ်ဆာအားလုံးညီ ရှိမုန်ငါ ကျဉ်းကဖာန်ပေါက်မန်းနား စုလောကဲ့အယ် ထုတ်ချီးရီမာ့။34ကိုယ်တော်ကော တီတ်ဆာလာပ်ကာ ရောဂါအမျိုးမျိုးဖူမ်နယ် မီမ်ဟာမ်းစီမ်းငါးပြာန်နယ် တီတ်ဆာလာပ်ပါအာ ဆာမ်ငါးက စိတ်ဆလားဖူမ်နယ်ရီး ငါပ်ပူမာ့။ အင်းညယ်ငေါဝမ်ရီ စိတ်ဆလားဖူမ်ငေါ် ကိုယ်တော်ကော ဘုရားရှင်ငါ ဆာထာမာ့ ငေါကားလည် မီမ်းဟော်ကယ်မာ့ ကိုယ်တော်ကော စိတ်ဆလားလာပ်သယ် သပေါက်တီမ် ခွင့်အီရီယိုး။35နောက်သယ်ကာ မာန်းရာပ်သယ်လည် စောဆီ ဟလာမ်းအလားကြီစ်သယ် ကိုယ်တော်ကော တီတ်ဆာလာပ် အပေါ်ကာကာ့ အရပ်လာ လာမ်ကဲ့အယ် ဆုစိမ်မာ့။36အင်းမာနောက်သယ် ရှိမုန်နောက် တပည့်ဖူမ်ငေါ ကိုယ်တော်လည် အယူပ်မူရယ်လင်းကယ် လိုက်သောကဲ့ သမ်ညာပ်ချီမာ့။37ကိုယ်တော်လည် ဟော့ပ်တောကားအချိန်နယ် “ တီတ်ဆာတိုင်းငေါ ကိုယ်တော်လည် သမ်ကဲ့လင်းဟီးကား” ငေါကဲ့အယ် လျှောက်တင်နော်မာ့။38အင်းမာအချိန်နယ် ကိုယ်တော်ကော ဟီမ်နာပ်သယ် “ငါကော ဘုရားရှင်ငါ မင်္ဂလာသတင်းကလန်ဖူမ်နယ် ဟောပြောလောရင်တီမ် အင်းကာနေရာနောက် ထံငါးကာ့ ထိန်ဖူမ်ပါအာ လာမ်ဟီးမယ်။ မဟာအောမ်ကယ်လိုးငေါနော ငါကော အင်းကာအတွက်ကြောင့်နယ် လီကားထာမာ့” ငေါကဲ့အယ် မိန့်နောမာ့။39အင်းမာစီးရာပ်သော် ကိုယ်တော်ယေရှုနောက် ဟီမ်ငါတပည့်ဖူမ်ငေါ် ဂါလိလဲပြည်ပါအာမာ့ နေရာတိုင်းငါး လာမ်ကဲ့အယ် ဓမ္မာရုံဖူမ်ပါအာ တီတ်ဆာဖူမ်နယ် ဟောပြောသွန်သင်နောကဲ့အယ် စိတ်ဆလားဖူမ်နယ်ရီး ငါပ်ပူရီမာ့။40ရာပ်အာလည် အနာတုန်ရောဂါသည်ဟော်ဝါကော ကိုယ်တော်ယေရှုပါအာ ထုတ်အီကဲ့အယ် ဒူးထောက်သောကဲ့အယ် “ကိုယ်တော်အလိုငါဝမ်းနော ငါဆူကာ ရောဂါလည် သန့်ရှင်းနောကွန်းနယ် ကုလောကဲ့အယ် အီရင်နာ့” ငေါကဲ့အယ် စိမ်မာ့။41အင်းမာအချိန်နယ် ကိုယ်တော်ကော ဟီမ်နယ် တအားစာန်ကယ်မာ့ ထော်လည် လာရာမ်းကဲ့အယ် အင်းမာဟီမ်နယ် ထာဝါမ်ကဲ့အယ် “ငါအလိုငါမာ့။ မီမ်ဟာမ်းငါမ်နိတ်” ငေါကဲ့အယ် အမိန့်အီရာမ်ငါးနောက်42ချက်ချင်း အင်းမာဟီမ်ငါအနာတုန်ရောဂါကော် မီမ်ဟာမ်းကဲ့အယ် သန့်ရှင်းနောဟာမ်းမာ့။43အင်းမာနောက်သယ် ကိုယ်တော်ကော အင်းမာ တီတ်ဆာလည် အားကြီစ်ရယ် သတိအီမာ့။44ကိုယ်တော်ကော “အင်းကာ အဖြစ်ပျက်သယ် ဟင်နယ်ဟာမ်း ဆောမ်းနာန်ငါ့။ အင်းညယ်ငေါရီး တီတ်ဆာအားလုံးနယ် နာန်ငါရောဂါ မီမ်ဟာမ်းပါပ် ငေါကားလည် သက်သေပြလောတီမ် ဗိမာန်တော်ပါအာ ငါကားကာ ဂျူးပုရောဟိတ်ပါအာ လာမ်ကဲ့အယ် နာန်နောက်နာန် ပြလောကဲ့အယ် မောရှေကာ့ ပညတ်ကျမ်း နား ရေးလောပေးကားအတိုင်း ပူဇော်လောကားလည် အောမ်နိတ်” ရယ် မိန့်နောစီးကဲ့အယ် သာပ်ထာမ်းငါမ်မာ့။45အင်းညယ်ငေါဝမ်ညီ အင်းမာတီတ်ဆာကော အင်းမာနေရားအယ် ပူဟာမ်းစီးရာမ်စန်နော် အင်းမာထာရီကားဖူမ်နယ် တီတ်ဆာတိုင်းနယ် ဆောမ်းကဲ့အယ် ကိုယ်တော်ယေရှုနောက် ပတ်သက်သောကား သတင်းနယ် ပျံ့နှံ့နောစီမ်းကယ်မာ့ ကိုယ်တော်ကော အင်းမာမြို့နားမာ့ တီတ်ဆာဖူမ် ဟီမ်နယ် ယူပ်မူရင်ငါးကာ အချိန်နယ် မြို့နား အဆာမ်ရင်ညယ် မြို့ပြာန်ငါကာ ဆီမ်ရှင်းရှင်းညယ် လင်းငါးကာအရပ်လာ လင်းမာရီ အခြားအရပ်လားမာ့ တီတ်ဆာလာပ်ကော ကိုယ်တော်ငါကာ နေရား ထုတ်အာပ်ချီးရီမာ့။
Empower Asia Bible Translation Movement