মথি5
1উইসে য়ায়া-য়ুয়ুপা দিংঙাবি চিত্তা তিংমসা ইশুহা য়্যাগ্যইকো তোইতা হোমসা গায়ে আসা য়োংতোংবিরে লেমসা আকো হুরাপা গায়ে।2আসা আকুহা আবিহিং ঝিপামসা এপা জাংয়ে:3“আশিষিত নিও, আপনিহিং সেংজাকো নাগাইতা জোরোংওয়া নোমবিহা!হাংপাতানাহা সেংজাকো রাজ্যহা আবিকোরাংগা।4আশিষিত নিও, তুংসিংতা কাইমবিহা!হাংপাতানাহা আবিকো তুংসিংতাহা সেংজাকোসো তিমেওয়া মুংরোওয়া।5আশিষিত নিও, আপনিহিং আপেচাপা নোমবিহা!হাংপাতানাহা আবিহা বাসিমতিতা অধিকার জোকো মুংচারোওয়া।6আশিষিত নিও, সেংজাকো জোকো কেংওয়া কামতা নাগাই গ্যহকো ইচ্ছা জোমবিহা!হাংপাতানাহা সেংজাহা আবিহিংয়া আকু কাম জোকো য়ুজ্রুরোওয়া।7আশিষিত নিও, লামতুপা জোমবিহা!হাংপাতানাহা আবিহা লামতুওয়া মুংচারোওয়া।8আশিষিত নিও, তুংসিংতা চোসোওয়াবিহা!হাংপাতানাহা আবিরাং সেংজাহিং তিংরোওয়া।9আশিষিত নিও, চাংসপামবিহিংয়া!হাংপাতানাহা সেংজাহা আবিহিংয়া কুং চেংবিগা তামসা জাংরোওয়া।10আশিষিত নিও, সেংজাকো তাংজিকো সোতা কোইচ্যাওয়াবিহা!হাংপাতানাহা সেংজাকো রাজ্যহা আবিকোরাংগা।”11“আশিষিত নিও, কাহিং দেংওয়াকো সোতা দিংঙাবিহা হাত্রং নাবিহিং নিন্দা জো, আসা দুঃখ, আসা নাবিকো তোইতা তাংসা মেংতাওয়া নুওয়াংবি য়্যইসু।12আত্রংহা নাবিহা গাগ্রুমসা য়াংতা, হাংপাতানাহা লোডিংবাতা নাবিহিংয়া টেবো ইনাম এমি নিও। এপারাং নাবিরোমা নাগাইকো অগমবক্তাবিহিংয়া দিংঙাবিহা দুঃখ পিচামি নিমগা।”13“নাবিহা বাসিমতিকো নী বেপাগা। আদো নীরাং মাজেংনাহা হাংসো জেংপাকোগা? আকুহা হাইরে কামতারাং মালাগেমসা বাডোইনেরোওয়া আসা দিংঙাবিহা হুইংদ্যাপুরোওয়া।”14“নাবিহা বাসিমতিকো হাহাইওয়া বেপাগা। য়্যাগ্যইকো তোইতা নিওয়া শহরহা গুংমসা য়ুংমক্যইমগা।15আসা হাংসুরে দিব্রি লারাইপামসা তোপাসো মাতুংমগা, আদো সাতা নিওয়া তাংসাহিং হাহাইপা জিংকো তামসা দিব্রিহিংয়া তোলোংওয়া তিরাতা ওইমসা এমগা।16এপারাং নাবিকো হাহাইওয়ারে দোসরা দিংঙাবিকো নাগাইতা হাহাইপা জিংকো আসা দোসরাবিরে নাবিকো জোওয়া এনতাওয়া কামবি তিংরোওয়া আসা লোডিংবাতা নিওয়া নাবিকো সেংজা আপাকো মহিমা জোরোওয়া।”17“কাহা মোসাকো পিচাওয়া লিংপাং আসা অগমবক্তাবিকো জাংওয়া নুওয়াংবিহিং য়োইকো লেমগা তামসা মোনোগে, আদো কাহা আকু নুওয়াংহিং পুরা জোকো তামসা লেমগা।18হাংপাতানাহা আজিপ্পারাং কা নাবিহিং জাংরোওয়া, হাত্রং চোইপা ডিংবাসো বাসিমতি মায়াং, আত্রং চোইপা সেংজাকো লিংপাংতা লামি নিওয়া আত্যইচোওয়া নুওয়াংবি পুরা মাজিংনু চোইপা ইহা মায়াংরোওয়া।19লিংপাংকো হানিরোমা আত্যইচোওয়া নুওয়াংবিহিং হিংমসা মোজোওয়া আসা মোজোকো তামসা ঝিপাওয়া দিংঙাহা সেংজাকো রাজ্যতা হাংসুরোমা চিয়োপা জিংরোওয়া। আদো লিংপাংকো নুওয়াংহিং আপনিরে হিংমসা জোওয়া আসা দোসরাবিহিংনে জোকো ঝিপাওয়াহা সেংজাকো রাজ্যতা টেবো জিংরোওয়া।”20আকো সোতা কা নাবিহিংয়া জাংরোওয়া, সেংজাকো জাংওয়া নুওয়াংবিহিং তাংজিকো উটকেওয়াবি আসা ফরিসিবিরোমা এনতাপা হিংমসা মোজোনাহা নাবিহা সেংজাকো রাজ্যতা হোচা মোমুংরোওয়া।21“নাগাইকো দিংঙাবিহিংয়া মোসাকো লিংপাংতাহা এপা জাংমি নিমগা, ‘দিংঙা মাস্যাকো, স্যানাহা দন্ড মুংরোওয়া’ তামসা জাংওয়া নিমগা। ইহা নাবিরাং গেমি নিও।22আদো কা নাবিহিং জাংরোওয়া, আপনিকো এহিংপা সেদ্রাংপাওয়াবিহা দন্ড মুংরোওয়া। হাংসু আপনিকো এহিং হাইরে মেগেমগা তামসামি জাংনাহা, আকুহা হানিরোমা টেবো য়হুদি ন্যায় জোমবিকো আবেইতা জাকানেরোওয়া। আপনিকো এহিং তৌজিগা তামসা জাংওয়াবিহা নরককো মেতা দেকাকো ছুরোওয়া।23“আকো সোতা দেমসাতা ভেটি পিচাদাংনুরোমা নাগাই নাকো এ নাতিহিংপা সেদ্রাংপামি নিও তাওয়া সিদা চ্যইনাহা24আপনিকো ভেটি ভেদিকো আবেইতা এতেমসা নাগাইহা হোমসা আপনিকো এহিংপা চাংসুতু। আকো নোইতা মেংচে ওয়াংমসা আপনিকো ভেটি সেংজাহিং পিচা।25“ন্যায় জোওয়া জায়গাতা দেকানুরোমা নাগাই, মৌকা নিনুরাং স্যাসুওয়া দিংঙাহিংপা নাত্যাতারাং চাংসুপুই। মেনাহা আকুহা নাকো তোইতা মেংতাপা জোমসা হাংসুরোমা টেবো ন্যায় জোওয়াকোতা ত্যইপুরোওয়া আসা ন্যায় জোওয়াহা নাতিহিংয়া সিপাইবিকোতা ত্যইপুরোওয়া আসা নাতিহিংয়া জেলতা সুংপুরোওয়া।26আজিপ্পারাং কা নাবিহিং জাংরোওয়া, আত্রংহা তাংসা ন্যাস্যা মাতানু চোইপা নাতিহা আকু জেলসোহা নোচা মোমুংরোওয়া।27“মোসাকো লিংপাংতাহা ‘নুংনাংসুমতুরোওয়া’ তামসা লামি নিও তাওয়া নুওয়াংহা নাবিহা হিংমি নিও।28আদো কা জাংরোওয়া, হাংসু ইচো মেমেহিং মেংতাওয়া নোচেংসো ন্যই, আকুহা তুংসিং নাপোসো আকু মেমেহিংপা নুংনাংসপুনতেওয়া নিমগা।29নাকো দাংক্রেং মিচোহা নাতিহিং পাপতা চোইপানাহা আকুহিংয়া য়োমসা বাডোইপুই। নাকো তাংসা জুপা নরকতা বাডোইচাপুওয়ারোমা নাকো ইচো মিচো মাতাওয়ারাং নাকো সোতাহা এনতাওয়াগা।30এপারাং নাতিহা নাকো দাংক্রেং খুইকো সোতা পাপতাবেমি দেকানাহা আকুহিংয়া ঠেমসা বাডোইপুই। নাকো তাংসা জুপা নরকতা বাডোইচপুমরোমাহা, আকু খুই মাতোওয়ারাং নাকো সোতা এনতাওয়াগা।31“মোসাকো লিংপাংতাহা ‘মে পেইমবিহা সোকুতা লেখা-পরি জোমসা পেইকো’ তামসা জাংমি নিও।32আদো কা জাংরোওয়া, মেকো নুংনাংসুওয়াকো দোষ মাতাপা মেহিং পেইওয়াহা আকুহিং নুংনাংপামগা আসা এপারাং পেইপুওয়া মেহিং বিয়ৌ জোওয়ারে নুংনাংসুওয়ারাংগা।33“ন্যাসারাং মোসাকো লিংপাংতাহা নাগাইকো দিংঙাবিহিংয়া জাংমি নিও, ‘অ্যাজাপা মানাপোই, আদো সেংজাকো নাগাইতা নাপোইপুনতেওয়া নুওয়াংবি তাংসা জোকো’ তাওয়াহা নাবিহা গেমিরাং নিও।34আদো কা নাবিহিং জাংরোওয়া, হাই নুওয়াংতারে নাবিহা মানাপোইগে। লোডিংবাকো মিং লাংমসা নাপোইমতুমগা, হাংপাতানাহা আকুহা সেংজাকো গাদিংগা।35বাসিমতিকো মিং লাংমসারে নাপোইমতুমগা, ইহা সেংজাকো তাংবা এওয়া জায়গাগা। আসা য়রুশালেমকো মিং লাংমসারে নাপোইমতুমগা, আকুহা টেবো জাইপু সেংজাকো শহরগা।36এপারাং আপনিকো পোরো সুমসারে নাপোইমতুমগা, হাংপাতানাহা নাবিহা আপনিকো পোরোকো ইগে পুরিংরে হাংপাপা আসা দাসিপা জোমক্যইমগা।37আকো সোতা নাবিরে মানাপোইগ্যই কোওয়াবেনাহা ‘কোওয়ারাং’ কিতা মোকোওয়াবেনাহা ‘মোকোওয়ারাং’ তামসা জাংপুই। ইরোমা সিওপা জিংপুওয়াহা শয়তানসো লেওয়াগা।38“নাবিহা লিংপাংতা হিংমি নিও, ‘মিচোকো বদলা মিচো, সেতাংকো বদলা সেতাং।’39আদো কা জাংরোওয়া, নাবিহিং মেংতাপা জোমবিহিং বদলা মালাং। হাংসু নাকো দাংক্রেং য়ুওয়াইতা ত্যাচোং, আকুহিংয়া নাকো কেক্রেং য়ুওয়াইতারে ত্যাচোংকো পিচা।40হাংসু নাকো লুচাওয়া লাসু গিংচাকো সোতা ন্যায় জোমবিকোতা পুরাকো কেং, আকুহিংয়া নাকো জেকেটরে পিচাপুই।41হাংসু নাতিহিং ইবাং চোইপা ব্যা সাজ্রুকো হেহেং, আকুহিংপা নিহবাং চোইপা সাজ্রুতু।42আসা নাতিহিংপা য়াওয়াহিং পিচা, আসা খিকো য়াংমবিহিংনে খিকো পিচা।43“নাবিহা মোসাকো লিংপাংতা এপা লাওয়াহা গেমিরাং নিও, ‘আপনিকো সাবেইবিহিং জেজেংপা জো’ আসা নাতিহিং মোসোংপা জোমবিহিংয়া আচকাপা জো।44আদো কা নাবিহিংয়া জাংরোওয়া, নাতিহিং মাসোংপা জোমবিহিংনে জেজেংপা জো। আসা আপনিহিং মাসুংপা জোমবিকো সোতারে পাচাইপি।45এপা জোনাহা নাবিহা লোডিংবাতা নিওয়া সেংজা আপাকো চেংওয়া-চেমে জিংরোওয়া, হাংপাতানাহা সেংজাহা মেংতাওয়া আসা এনতাওয়া নিহসোকো সোতারাং সিনি ভ্যহপামগা, এপারাং পাপি আসা তাংজি নিহসোকো সোতারাং ওয়্যাইতি ওয়্যাপামগা।46আপনিহিং জেজেংপা জোওয়াবিহিং মেংচে জেজেংপা জোনাহা নাবিহা হাং ইনাম মুংচাকো চুকোগা? এপাহা তোংক্যা জুমবিরে জোমগা।47নাবিমি আপনিকো দিংঙাবিহিং মেংচে অভিবাদন জোনাহা, নাবিহা দোসরারোমা হানি টেবো কাম জোমি নিংগাসা? সেংজাহিং মানাইমবিরে এপা জিংওয়া কামহা জোমগা।48আকো সোতা লোডিংবাতা নিওয়া নাবিকো সেংজা আপা তাংসা নুওয়াংতা এনতাপা নিমি ত্যাবাপা নাবিরে তাংসা নুওয়াংতা এনতাপা জিং।”
The Seed Company