মথি4
1আকো নোইতাহা শয়তানহা ইশুহিং পরিকছা জোকো তামসা পবিত্র লাংবেহা ইশুহিং চিচ্চোওয়া জায়গাতা পুরায়ে।2আউতা ইশুহা নিহকাইয়ু জেইসুং লিসুং হাইরে মাচাতো। আকো সোতা আকুহা সিওপারাং লোবোসুংপুমি নিমি।3আত্রংরাং শয়তানহা আকোতা ওয়াংমসা জাংয়ে, “আজিপ্পারাং নাতিহা সেংজাকো চেংওয়া বেনাহা ই লুংটুইহিং কোব্রেং জিংপুকো তামসা জাং।”4ইশুহা জাংয়ে, “তাংজিকো হিগাতাহা এপা জাংমি নিও, ‘দিংঙাহা চাওয়া-আংওয়াসোদাং মাবাচেমগা, আদো সেংজাকো নামুসো নোওয়া তাংসা য়্যইদিসো বাচেমগা’।”5আকো নোইতাহা শয়তানহা ইশুহিংয়া পবিত্র শহর য়রুশালেমতা পুরায়ে আসা দেমসাকো হানিরোমা তোইতা সামসা জাংয়ে,6“আজিপ্পারাং নাতিহা সেংজাকো চেংওয়া বেনাহা ইসো লিতা তোইং। তাংজিকো হিগাতা এপা লামি নিও, ‘সেংজাহা নাকো সোতা আপনিকো লোডিংবাকো পোইংবিহিং নিংপুরোওয়া, আসা নাকো কোকোইবি লুংটুইতা মাতাত্যাচাকো তামসা আবিহা নাতিহিংয়া খুইবিসোরাং প্যইপিরোওয়া’।”7ইশুহা জাংয়ে, “তাংজিকো হিগাতাহা এপারে লামি নিও, ‘নাতিহা আপনিকো সেংজাহিং পরিক্ছা মোজো’।”8ন্যাসারাং শয়তানহা ইশুহিংয়া ইচো উচুংওয়া য়্যাগ্যইতা পুরায়ে আসা বাসিমতিকো তাংসা লোইকো টেরবো টেরবো রাজ্যবি আসা আউতা নিওয়া এনতা-এনতাওয়া সোংসাবি তিংপামসা জাংয়ে,9“কাহিংমি চুনুইমসা নোংনাহা কা ই তাংসা নাতিহিং পিচারোওয়া।”10ইশুহা জাংয়ে, “ও শয়তান, নাতিহা ইসো হ্যাপুই! তাংজিকো হিগাতা এপা লামি নিও ‘নাতিহা নাকো সেংজাহিং মেংচে চুনুইমসা নোং, আসা আকো মেংচে সেওয়া জো’।”11শয়তানহা ইশুহিং হুইতেমসা হোপুইয়ে, আসা লোডিংবাকো পোইংবিহা লেমসা ইশুহিং য়ুজ্রুয়ে।12য়হুন্নাহা জেলতা নিনা তাওয়া হিংমসা ইশুহা গালীল লুংবিতা লাকাপুয়ে।13আদো আকুহা নাসরত লোইহিং হুইতেমসা কোফর্নহুম শহরতা য়ুংয়াকো হোপুয়ে। কোর্ফরনহুম শহরহা গালীল দাব্রিকো আবেইতা জবুলুন আসা নোপতালি লুংবিতা নিমি।14এপারাং এশাইয়া অগমবক্তাকো জাংওয়া য়্যইদিহা পুরা জিংয়ো:15“য়র্দন জোরা নুব্যা গালীল দাব্রিতা হ্যাওয়া ন্যাতাতা নিওয়া জবুলুন আসা নোপতালি জায়গাকো দিংঙাবাই,আসা গালীলতা য়ুংওয়া দোসরা জ্যাকো দিংঙাবাই!16নাঘিওয়াতা য়ুংওয়াবিহা টেবো হাহাইওয়া তিংরোওয়া।সিদিংকো নামুতা আসা নাঘিওয়াতা নিমবিহাআবিকো তোইতা টেবো হাহাইপা তাত্রাইরোওয়া।”17আত্রংসোরাং ইশুহা দেরেং হিংপামসা এপা জাংয়ে, “আপনি আপনিকো পাপহিং কাবিহা পাপ জোমরাংগা তামসা পাপহিং ল্যাতে, হাংপাতানাহা সেংজাকো রাজ্যহা আবেইতা দেয়োংতেয়ো।”18সাইয়ুহা গালীল দাব্রিকো আরি-আরিতা তেইদিংনুওয়া ইশুহা নিহসো জেরে তিওয়াবিহিং জেরে তিদিংওয়া তিংয়ে। আবিহা পত্রস তাওয়া সিমোন আসা আকো এ আন্দ্রিয়াস নিমি।19ইশুহা আবিহিং জাংয়ে, “কুং নুনুই হুইপা, নাবিহা নায়া প্যইমেপা কা নাবিহিংয়া দিংঙা প্যইওয়া বানাইরোওয়া।”20ই হিংতানি আবিহা আপনিকো জেরেবি হুইতেমসা ইশুকো নুনুই হুইপুয়ে।21আকো নোইতাহা আস্যই নাগাই হ্যানুওয়া আকুহা জোব্দিকো নিহসো চেংওয়া য়াকুব আসা য়হুন্নাহিং দোসুয়ে। আবিহা আপনিকো আপা জোব্দিহিংপা নোওয়াইতা গামসা জেরে তোদিংমি। ইশুহা আবিহিংনে মোউয়ে।22আত্রংহা আবিহা আপনিকো আপাহিংয়া নোওয়াইতা হুইতেমসা ইশুকো নুনুই হুইপুয়ে।23ইশুহা গালীলকো তাংসা লুংবিবিতা কোইয়ে। আকুহা জায়গা-জায়গাতা নিওয়া য়হুদিবিকো জোংসুওয়া সাবিতা হোয়ে আসা দিংঙাবিহিং ঝিপামসা সেংজাকো রাজ্য আবেইতা দেয়োংতেয়ো তাওয়া এনতাওয়া দেরেং হিংপায়ে। আকুহা দোসুওয়া সেই য়োংন্যা দ্যইংচপুওয়া হাইমবিহিং সাংপায়ে।24এপা জিংপুনুওয়া গালীলকো আবেইতা নিওয়া সিরিয়া লোইবিতারে আকো নুওয়াং হিংয়ায়ে। দিংঙাবিহা তাংসা য়োংন্যা আসা মাসাংওয়া হাইমবিহিং আকোতা পারায়ে। আউতা উইসে জেসাং দ্যইংচপুওয়া দিংঙাবি, লেরাহিংয়া জ্যানা পেইওয়া, আসা লেরাহা কোকোই খুই চোংচপুওয়া হাইওয়া নিমি। ইশুহা আবি তাংসাহিংনাং সাংপায়ে।25উইসে দিংঙাবিহা আকো নুনুই হুইয়ে। আকু দিংঙাবিহা গালীল লুংবিকো, ত্যাচো শহরকো লুংবিসো, য়রুশালেম শহর, য়হুদিয়া লুংবি আসা য়র্দন জোরাকো নুব্যাসো ওয়াংওয়া নিমি।
The Seed Company