মথি6
1ইশুহা ন্যাসারাং ঝিপামসা জাংয়ে, “হোশিয়ার য়ুং, নাবিকো তাংজিহা দিংঙাবিহিং তিংপাকো সোতা মোজোঘ্যই। মোকোনাহা নাবিহা লোডিংবাতা নিওয়া নাবিকো সেংজা আপাকোসো হাইরে ইনাম মোমুংরোওয়া।”2“আকো সোতা নাবিহা মোতোমবিহিং হাইক্রি পিচানুওয়া দোসরা দিংঙাবিহিং মাহিংপা, এপাজিংওয়াহা তেপি দিংঙাবি মেংচে দিংঙাবিকোসো প্রশংসা মুংচাকো আসা তিংপাকো সোতা জোংসুওয়া সাবিতা আসা ন্যাতাবিতা জোমগা। আজিপ্পারাং কা নাবিহিং জাংরোওয়া, আবিহা দিংঙাবিকোসো প্রশংসা মুংচামসা আকু ইনামহা মুংচানতেমি নিও।3আদো নাবিহা মাতামবিহিং পিচানুওয়া দোসরাহা মাতিংকো। 4পিচানুওয়া নাতিহা চিচিপা পিচাপুই আসা চিচিপা পিচানু তিংওয়া সেংজা আপাহা নাতিহিংয়া ইনাম পিচারোওয়া।”5“হাত্রং নাবি পাচাই, আত্রংহা তেপিবি ত্যাবাপা মাজিং, হাংপাতানাহা আবিহা দোসরা দিংঙাবি তিংকো তামসা জোংসুওয়া সাবিতা আসা ন্যাতাকো আবেই আবেইতা জামসা পাচাইকো কেংমগা। আজিপ্পারাং কা নাবিহিং জাংরোওয়া, আবিহা দিংঙাবিকোসো প্রশংসা মুংচামসা আকু ইনামহা মুংচানতেমি নিও।6আদো নাবিহা পাচাইদাংনুওয়া সিরি নাপোতা হোমসা লাপুং গি, আসা তিমেওয়া জায়গাতা য়ুংওয়া নাকো সেংজা আপাকোতা পাচাই, আসা চেকেপা জোওয়া কামহিং তিংওয়া নাকো সেংজা আপাহা নাতিহিংয়া ইনাম পিচারোওয়া।”7আসা পাচাইনুওয়া সেংজাহিং মানাইওয়া দোসরা জ্যাবিকো জোমি ত্যাবাপা নেকো নেত্তা হাইরে অর্থ মোতোওয়া শব্দসো মাপাচাইগে। পাচাইপুনতেওয়া নুওয়াংকো সোতা ন্যাসা-ন্যাসা মাপাচাইগে।8নাবিহা আবি ত্যাবাপা মাজিং, হাংপাতানাহা য়ানুরোমা নাগাইসোরাং নাবিহিং হাং-হাং ঘ্যইকোমে তাংসা নুওয়াংহা নাবিকো সেংজা আপারাং গেমগা।9“নাবিহা এপা পাচাই:‘ও লোডিংবাতা নিওয়া কাবিকো সেংজা আপা,নাকো পবিত্র মিংহিং প্রশংসা জিংকো,10নাকো রাজ্য লেকো,নাকো ইচ্ছা লোডিংবাতা ত্যাবাপা ই বাসিমতিতারে তাংসা জিংকো।11সদাইদিন ঘ্যইওয়া চাওয়া-আংওয়াবি হিনিরে কাবিহিং পিচা,12কাবিকো জোওয়া পাপবি কাবিহিং ছমা জোপি,হেপা কাবিরে কাবিকো তোইতা পাপ জোমবিহিং ছমা জোপিমি নিমমে।13কাবিহিং পাপকো পরিকছাতা মোপুরাপি,আদো কাবিহিং দুষ্ট শয়তানসো য়োইপি।[হাংপাতানাহা রাজ্য, সে আসা প্রশংসাহা হাত্রং জিংদো নাকোরাংগা। আমেন।’]”14“নাকো তোইতা মেংতাপা পাপ জোমবিহিং ছমা পিচানাহা, লোডিংবাতা নিওয়া নাকো সেংজা আপারে নাতিহিংয়া ছমা মিচারোওয়া।15আদো নাবিমি দোসরাহিং ছমা মিচানাহা নাবিকো সেংজা আপারে নাবিকো পাপহিংয়া ছমা মিচারোওয়া।”16“হাত্রং নাবি উপাস য়ুং, আত্রংহা নাবিহা তেপিবি ত্যাবাপা নাবিকো য়ুওয়াই নাভিপা জোমসা মোয়ুং, তেপিবিহা উপাস য়ুংয়ে তামসা দোসরাহিং তিংপাকো সোতা য়ুওয়াই নাভিপা জোমসা য়ুংমগা। আজিপ্পারাং কা নাবিহিং জাংরোওয়া, আবিহা দিংঙাবিকোসো প্রশংসা মুংচামসা আকু ইনামহা মুংচানতেমি নিও।17নাবিহা উপাস য়ুংনুওয়া আতাংকো ত্যাবাপা পোরোতা চুইতি সুইমসা য়ুওয়াই মিরাচা আসা আপনিকো নামু দুচা।18এপা জোনাহা দিংঙাবি মোকো, আদো তিমেওয়া জায়গাতা য়ুংওয়া নাকো সেংজা আপা মেংচে নাকো উপাস য়ুংওয়া তিংরোওয়া আসা নাকো চেকেপা জোওয়া কামবি তিংওয়া নাকো আপাহা নাতিহিংয়া ইনাম পিচারোওয়া।19“আপনিকো সোতা বাসিমতিতা পুংজিবি মোদুংপাগে। ইতা দুংপাওয়া পুংজিবিতাহা পেতাবি প্যইরোওয়া, চা চাপুরোওয়া আসা কুইমবি কুচপুরোওয়া।20আপনিকো সোতা লোডিংবাতা পুংজিবি দুংপা। আউতাহা পেতারে মাপ্যইরোওয়া, চারে মাচারোওয়া আসা কুইওয়াবিরে মুকুচারোওয়া,21হাংপাতানাহা হাংতা নাবিকো পুংজিনি, আউতারাং নাবিকো তু্ংসিংরে নিরোওয়া।22“জুপাকো দিব্রিহা মিচোগা। মিচোমি এনতাপা নিনাহা তাংসা জুপারাং হাহাইপা জিংরোওয়া।23আদো নাকো মিচোমি মেংতাপা নিনাহা তাংসা জুপারাং নাঘিপা জিংরোওয়া। এপারাং নাকো তুংসিংতা নিওয়া হাহাইওয়াহা নাঘিপা জিংপুনুওয়া আকুহা হাসেকো নাটুংপা জিংকোগা!24“হাংসুরে নিহসো গিরিকো কাম জোমক্যইরোওয়া। মোকোনাহা আকুহা ইচোহিংয়া মেংতাপা আসা ইচোহিংয়া জেজেংপা জোরোওয়া, আকুহা ইচোকো জাংওয়া হিংরোওয়া আসা ইচোকোহা মাহিংরোওয়া। এপারাং নাবিরে সেংজা আসা বাসিমতিকো পুংজি নিহসোকোসা সেওয়া জোমক্যইরোওয়া।25“আকো সোতা কা নাবিহিং জাংরোওয়া, বাচেকো সোতা হাং চানেকোমে, হাং আংনেকোমে, আসা জুপাকো সোতা হাং লুচানেকোমে তামসা সিংদুমগ্যই, হাংপাতানাহা চাওয়া আংওয়াবিরোমা সাদি আসা লুচাওয়া আংদুংবিরোমাহা জুপাহা টেবো মোকোমগা?26ডিংবাতা ভুইওয়া জিয়া-জিপেইবিহিং কাং, আবিহা অংটিবি মামিমগা, মোইপ্যাবি মাচ্যামগা, আসা হাইরে তোপাতা দুংপাকোরে মোদুংপামগা। আদো লোডিংবাতা নিওয়া নাবিকো সেংজা আপাহা আবিহিংয়া চাকো পিচামগা। আকু জিয়া-জিপেইবিরোমা নাবিহা সিওপারাং পাংক্যইপা নিমকোতা?27নাবিতাহা হাংসু সিংদুমসা আপনিকো সাদিহিং অ্যাইংসি সিওপাকো চুকোগা?28“নাবিহা লুচাওয়া আংদুংকো সোতা হাংপা সিংদুমগা? চুংচাতা লোওয়া মাইবেবিহিং কাং, আবিহা কামরে মোজোমগা, লুচাওয়া আংদুংবিরে মাফিমগা,29আদো কা নাবিহিং জাংদিংয়ো, সোলোমন জাইপুকোরে এসে পুংজিবি নিদো, আকু মাইবেবি ত্যাবাপা তিংমক্যইতো।30হিনিকো নিংওয়া আসা জুকুংকো সেংপুমসা মেহতা চুংপুওয়া সাম্যা-সুতিবিহিংনে সেংজাহা এপা এনতাপা দিংমসা এনাহা আকুহা নাবিহিংয়া লুচাওয়া আংদুংবিহা মিচাকোগা? হানি নাবিকো দেংওয়াহা?31“আকো সোতা হাং চাকোমে, হাং আংকোমে আসা হাং লুচাকোমে তাওয়াতা নাবিহা সিংদুমঘ্যই,32হাংপাতানাহা সেংজাহিং মাদেংওয়া দোসরা জ্যাকো দিংঙাবি মেংচে এপা জিংওয়া সিংদুমগা। ই তাংসা নুওয়াংবিহা নাবিহিং ঘ্যইরোওয়া তামসা লোডিংবাতা নিওয়া নাবিকো সেংজা আপারাং গেমি নিও।33নাগাইহা সেংজাকো রাজ্যহিং মো, আসা আকো আজ্ঞাবি পালন জো, আসা আকুহা ই তাংসা নাবিহিং পিচারোওয়া।34আকো সোতা জুকুং হাং জিংকোমে তামসা সিংদুমঘ্যই, হাংপাতানাহা জুকুং হাং জিংকোমে জুকুংকো দিনরাং সিংদুরোওয়া। হিনিকো কোইচ্যাওয়াহা হিনিকো সোতাহা তেংপা নিও।”
The Seed Company