Mark8

1မေဝမ်းဟောန့်လေန ကွန်းဖွန်မကျေးမလေန ရာစောင့်ယေရှု နောက်လောင်ဟာနိမ် ထီန်စူးဟင်းမားဝိုက်။ ရာကွန်းဟောန့်လေ စနီးကျဉ်းခေါင်ကျဉ်းမရောင်းညော့ မွန်းစောင့်န အောင်းတပဲ့မွန်းစောင့်လေ ဟောင့်ဆီ2“အောင်းကွန်းဟိုက်လေ ကောအီနူ။ ဟေဟောင်းဆီပေါဝါလော့် မနော်လေန ဆမ်ဝမ်းလုံးလုံး တောင်းကောတောင်းရောင်းဟင်းဆီ အစောင်လော့် ရာမနော် ခေါင်ကျဉ်းအဟောင်းကော့်မရောင်းကော့်။3အောင်းစမနော် ခေါင်ကျဉ်းလေ မလိမ့်ဆီ ဟောင်ပေါပွယ်ပေါက်ဟုန်းကော်လော့် မနော်လေန ရာခွန်တန်း အားတမိုဟင်း။ ဟေဟောင်းဆီပေါဝါလော့် မနော်လေန ဆီမေခရီးကိုင်း မားဟင်းညော့ဝိုက်” ဆီ ဝါကော်ဝိုက်။
4တပဲ့လေကော့် “အောင်းကွန်းဟိုက်လေ ဟပေါနယ့်လိမ့် ခေါင်ကျဉ်းလေတော်ပေါပေါ ရာတီတောင်းကွန်းလေတောင်းကိုင်းဟိုက် နောင်နူးဆီတနွိုက်ပဲ့” ဆီ ဝါပေါက်ဟင်းကော်ဝိုက်။
5မေနယ်လော့် မွန်းစောင့်ကော့် အောင်းစမနော် “ရာမဆူ ခေါင့်ဝ်မွန်းခလောရောင်း” ဆီ ထန်မ်ကော်လော့်
မနော်လေန “ခေါင့်ဝ်မွန်းစေဟွေရောင်း” ဆီ ဖြေပေါက်ဟင်းကော်ဝိုက်။
6မေနယ့်လော့် စောင့်ယေရှုန အောင်းကွန်းဖွန် ဟပေါနယ့်နှောင်ခနေနောင်နဉ်း ဟောင့်ဝ်အမိန့်ကော်ဝိုက်။ နောက်လောင်နော့် အောင်းခေါင့်ဝ်မွန်းစေဟွေ အောင်းဝ်ဆီ အောင်းစောင့်ဖလား အောင်းစခေါင့်ဝ်မွန်း ကျေးဇူးတန်ဆီ အောင်းခေါင့်ဝ်မွန်းလေ မိုင်ဆီ အောင်းကွန်းလေ ဟပေါနယ့်ဖယ်ဟောင့်ဝ် အောင်းတပဲ့လေ ဟောင့်ဝ်ကော်ဝိုက်။ တပဲ့လေကော့် အောင်းကွန်းဖွန် မိုင်ဟောင့်ဝ်ကော်ဝိုက်။7ရာမနော် ပါးဆေးအင်စောင်နိန်ရောင်းညော့ မွန်းစောင့်န အောင်းစောင့်ဖလား အောင်းစပါးဟောန့်လေ ကျေးဇူးတန်ဆီ အောင်းပါးဟောန့်လေကော့် အောင်းကွန်းဖွန်လေ ဟပေါနယ့်မိုင်ဟောင့်ဝ် အောင်းတပဲ့မွန်းစောင့်လေ ဝါကော်ဝိုက်။8ကွန်းဖွန်လေန အဉ်မ်အဉ်မ်တေးမ်တေးမ် ကျဉ်းဟင်းရောင့်ဝ် အောင်းခေါင့်ဝ်မွန်းအောင်းပိုလေ တပဲ့လေ ကျေပ်ဆီ ဆိဉ်းဟင်းကော်လော့် မွန်းစေမွန်း တော်ပေါတေးမ် နွိုက်ဟင်းဝိုက်။9ရာတီဟောန့် ကွန်းဟူကော့်မွန်း ဆီဟိန်တရောင်းဝိုက်။ မနော်ကျဉ်းဟင်းရောင့်ဝ်ကော်လော့် မွန်းစောင့်န အောင်းစမနော် ပွယ်ပေါက်ဟုန်းကော်ဝိုက်။10နောက်လောင်နော့် စောင့်ယေရှုန တောင်းတပဲ့လေတောင်း ခနေဟေး ချရှ်ချန်း ခွန့်ဆီ ကြွကွာရာအွန်းဒါလမနုသ ကော်ဝိုက်။
11မေနယ့်လော့် ဖာရိရှဲမောင်းဖောင်န ရာစောင့်ယေရှု ထီန်ဟင်းမားဆီ တောင်းမွန်းစောင့်တောင်း စဆီထီန်တော်ဟင်းကော်ဝိုက်။ မနော်လေန အောင်းမွန်းစောင့် ခစမ်းဟင်းညော့ စောင့်ဖလားန အောင်းမောစောင့် အခွင့်အာဏာမွန်း အကြောင်းဟောင့်ဝ်ဝိုက် တောင်းနိမိတ်လက္ခဏာအောင်းခနီးအမ်းလေတောင်း ဟပေါနယ့်ပြား ရောန်းဟင်းဝိုက်။12မွန်းစောင့်န စောဝ်ပျတ်ဆီ ထွေ့စောဝ်ရောင်ဝ်ဆီ “ကွန်းမျိုးဆတ်ဟိုက်လေန ဟေဟောင်းဆီ အောင်းနိမိတ်လက္ခဏာလေ နယ့်ရောန်းဟင်းန။ ကောဟောင်တနယ့်ဝါအောင်းစော်ပေါဝါလော့် အောင်းကွန်းဟိုက်လေ နိမိတ်လက္ခဏာအောင်းထောကော့် တပြားမစော်” ဆီ ဝါကော်ဝိုက်။13နောက်လောင်နော့် စောင့်ယေရှုန အောင်းဖာရိရှဲလေ ဝိုက်ဝိုက်ဆီ ခနေဟေး နောက်လောင်ဟာနိမ် ခွန့်ဆီ ခမ့်ကော်တောင်းဖတ်နောင်ဂါလိလဲဟွန်းကော်ဝိုက်။
14တပဲ့လေန အောင်းခေါင့်ဝ်မွန်းလေ ဟပေါနယ့်အောင်းဝ်မား လိဉ်းမ်ဟင်းမားကော်ဝိုက်။ ခနေဟေး ရာမနော် ခေါင့်ဝ်မွန်းဟွေနိမ်နဲဟော် ရောင်းဟောဝိုက်။15မွန်းစောင့်န အောင်းစမနော်လေ “အောင်းတဆေး ဟေရုဒ်တောင်း အောင်းတဆေးဖာရိရှဲလေ ဟေအလေးဟင်း” ဆီ ဟောင့်ဝ်ဆတိကော်ဝိုက်။
16မေနယ့်လော့် တပဲ့လေကော့် “ရာဟော ခေါင့်ဝ်မွန်းမပါညော့ နောင်နယ့်ဆီနယ့်ဝါလ” ဆီ အချန်းချန်း တိုင်ပန်ဆီ တန့်ဟင်းကော်ဝိုက်။17စောင့်ယေရှုကော့် အောင်းအကြောင်းဟောန့် ဟုကော်လော့် အောင်းတပဲ့လေ “မဆူလေန အကြောင်းခေါင့်ဝ်မွန်း မထိန်ဟင်းသင့်။ မဆူလေန အောင်းကောဆောန်လေ မဟုထောင်မ်ဟင်းအွန်။ မဆူလေန ဆောန်ဆီကော့် အောင်းတနွိုက်မစော်။18မဆူလေန ဟွေတားရောင်းရတ်ရတ် မဟောန်ဟင်းလေး။ ပဉ်ဟူရောင်းရတ်ရတ် မနယ့်ဟဉ်းဟင်းလေး။ မဆူလေန ကာအောင်းပေးမားလေ မမှတ်ဟင်းလေး။
19အောင်းခေါင့်ဝ်မွန်းဟာ့ဟွေ ရာဆီ အောင်းကွန်းဟာ့ဟိန် မေလိမ့်မားလ အောင်းခေါင့်ဝ်မွန်းအောင်းပိုလေ မေမဆူကျေပ်မားလ မွန်းခလောမွန်းနွိုက်မား” ဆီ ထန်မ်ကော်လော့်
တပဲ့လေန “ဆစ်ပ်ဆောင်န်မွန်း” ဆီ တန်ပြားဟင်းကော်ဝိုက်။
20မေနယ့်လော့် မွန်းစောင့်န “ကော အောင်းခေါင့်ဝ်မွန်းစေဟွေ ရာဆီ မေလိမ့်မားကော့် အောင်းခေါင့်ဝ်မွန်းအောင်းပိုလေ မေမဆူကျေပ်မားလ မွန်းခလောမွန်းနွိုက်မား” ဆီ ထန်မ်ကော်လော့်
တပဲ့လေန “စေမွန်း” ဆီ တန်ပြားဟင်းကော်ဝိုက်။
21မေနယ့်လော့် မွန်းစောင့်န အောင်းစမနော် “မဆူ တော်အစောင်ပွန့် မဟုထောင်မ်ဟင်းအွန်လေး” ဆီ ဝါကော်ဝိုက်။
22စောင့်ယေရှုတောင်းတပဲ့လေန ရာမန့်ဗက်ဇဲဒ ထီန်ဟင်းမားကော်ဝိုက်။ မေနယ့်လော့် ကွန်းကန့်ဖောင်န အောင်းကွန်းဟွေတားမဟောန်ကော်နိမ် ရာစောင့်ယေရှု ဟောင့်ဟင်းမားဆီ အောင်းမွန်းစောင့် အောင်းကွန်းဟောန့် ဟပေါနယ့်ထိ တောင်းပန်ဟင်းကော်ဝိုက်။23မွန်းစောင့်န အောင်းမေးကွန်းဟွေတားမဟောန်ဟောန့် ဆွဲဆီ ဟောင့်အောက်ခနောက်မန့်ကော်ဝိုက်။ နောက်လောင်နော့် မွန်းစောင့်န အောင်းဟွေတားကွန်းဟောန့် တောင်းနမ့်လိုင်းတောင်း စွတ်ပ်ဆီ ခနေတိုးကွန်းဟောန့် တောင်းမေးတောင်း တန်ဆီ “တူးနိမ်မတူးနိမ် နယ့်ဟောန်လေး” ဆီ ထန်မ်ကော်ဝိုက်။
24ကွန်းဟောန့်ကော့် တွဲခွန့်တွဲလောင်ဆီ “အောင်းကွန်းလေ နယ့်ဟောန်စောင့်။ တော်နယ်ကော့် ချန်းချန်းလန်းလန်း မနယ့်ဟောန်။ မနော်လေန နောင်တိန့်မိုက်လေပိုင်းတန်းညော့ ပေးဟင်း” ဆီ တန်ပြားကော်ဝိုက်။
25နောက်လောင်နော့် စောင့်ယေရှုန ခနေဟွေတားကွန်းဟောန့် တောင်းမေးတောင်း နောက်လောင်ဟာနိမ် တန်ဟွန်းကော်ဝိုက်။ မေနယ့်လော့် ကွန်းဟောန့် အောင်းဟွေတားမွန်း ပွတ်တွဲကော်လော့် အာရုံအောင်းဟောန်န နီးပေါက်ဟွန်းကော်ဆီ တောင်းလုန် ချန်းချန်းလန်းလန်း နယ့်ဟောန်ကော်ဝိုက်။26စောင့်ယေရှုန အောင်းကွန်းဟောန့် “ခနောဝ်မန့် ပီခေါင့်ဝ်ကော်” ဆီ ဝါကော်ဆီ ဟပေါက်ဟုန်းကော်ဝိုက်။
27နောက်လောင်နော့် စောင့်ယေရှုတောင်းတပဲ့မွန်းလေန ရာမန့်အောင်းရောင်းရာခန့်မှိန်းကဲသရိဖိလိပ္ပိလေနဲဟော် ကွာဟင်းကော်ဝိုက်။ ရာခွန်တန်းကွာဟောန့် မွန်းစောင့်န အောင်းတပဲ့လေ “ကွန်းလေန အောင်းကော ဖောဆီ ဝါဟင်း” ဆီ ထန်မ်ကော်ဝိုက်။
28တပဲ့လေကော့် ကွန်းကန့်ဖောင်န အောင်းမောစောင့် “ရေနှစ်မင်္ဂလာဆရာယောဟန်၊ အောင်းကန့်ဖောင်ပေါဝါလော့် ပရောဖက်ဧလိယဆီ တန့်ဟင်းဆီ အောင်းကန့်ဖောင်ပေါဝါလော့် ဆီမေခနောဝ်ပရောဖက်မေတန်ဟာလေန ပါးနိမ်ဆီ ဝါဟင်း” ဆီ တန်ပြားဟင်းကော်ဝိုက်။
29မေနယ့်လော့် မွန်းစောင့်န အောင်းစမနော် “မဆူလေပဲ အောင်းစကော ဖောဆီထန်ဟင်း” ဆီ ထန်မ်ကော်လော့်
ပေတရုန “မောစောင့်န ပေးမေရှိယ” ဆီ တန်ပြားကော်ဝိုက်။
30နောက်လောင်နော့် မွန်းစောင့်န အောင်းစမနော် အောင်းအကြောင်းမွန်း အောင်းဖောကော့် ဟပေါမလောင်ဝ် ဟောင့်ဝ်အမိန့်ကော်ဝိုက်။
31နောက်လောင်နော့် စောင့်ယေရှုန “ကော လူ့သားတော်န အောင်းဒုက္ခဝေဒနာလေ နယ့်ခံစားဆီ ကောန အောင်းကွန်းဂျူးအောင်းရောင်ဝ်လေ၊ အောင်းပုရောဟိတ်အောင်းရောင်ဝ်လေတောင်း အောင်းဆရာကျမ်းစန်လေငြင်း နယ့်ခမ်ဆီ အောင်းအောင်းဝ်သိုင်းကော့် တနယ့်ခမ်ဝိုက်။ ဆမ်ဝမ်းဟောင်ပေါထိန့်လော့် အဆတ်တခွန်းပေါက်” ဆီ အောင်းတပဲ့လေ စဆီ ဆောန်ဟောင့်ဝ်ကော်ဝိုက်။32စောင့်ယေရှုန ချန်းချန်းလန်းလန်း ဝါညော့ ပေတရုန အောင်းမွန်းစောင့် ဟောင့်ကွာတောင်းပါ့ဟဉ်းကော်ဆီ နောင်နယ့်ဆီဟပေါမတန့် ဝါကော်ဝိုက်။
33တော်နယ်ကော့် စောင့်ယေရှုန လှည့်ဆီ အောင်းတပဲ့မွန်းစောင့်လေ တွဲကော်ဆီ အောင်းပေတရု “မာရ်နတ်၊ ဆီမေခန့်ကော အောက်ကော်။ မောန အောင်းတောင်းစောင့်ဖလားတောင်းဆိုင်လေ ခနောဝ်စောဝ် မဝိုက်ဆီ အောင်းတောင်းကွန်းလေတောင်းဆိုင်လေနဲဟော် ခနောဝ်စောဝ် ဝိုက်ဟော” ဆီ ဆုံးမဆီ ဝါကော်ဝိုက်။
34နောက်လောင်နော့် စောင့်ယေရှုန အောင်းကွန်းဖွန်လေတောင်း အောင်းတပဲ့လေ ဟောင့်ဆီ “ဖောကော့်ခရောင့်ဝ် ကွန်းခပေးတပဲ့ကောလေန အောင်းအကျိုးစောင့်ကောင်ဝ် ဝေဆီ အောင်းလက်ဝါးကပ်တိုင်စောင့်ကောင်ဝ် အောင်းစောင့်ကောင်ဝ်တောင်းကောင်ဝ် ဟပ်ဆီ တနယ့်စောင်းမ်ခလောင်ကော။ 35ဟေဟောင်းဆီပေါဝါလော့် အောင်းအဆတ်စောင့်ကောင်ဝ် ကွန်းစောင့်ခကယ်န အောင်းအဆတ်တနယ့်ဆွန်းမ်။ ကောပ့်အောင်းစကောတောင်း အောင်းစနှုတ်ကပတ်တော်စောင့်ဖလား ကွန်းအဆတ်ခမ်ဆွန်းမ်န အောင်းအဆတ်ထာဝရတနွိုက်ဝိုက်။36ကွန်းန အောင်ကမ္ဘာလောကဟိုက်တောင်းဟွေဟွေ နွိုက်ဝိုက်မေကော့် မွန်းန တောင်းစောင့်ဖလားတောင်း အဆတ်ထာဝရအောင်းတနွိုက် အောင်းအခွင့် ဟောင်ပေါနယ့်ဆွန်းမ်ကော်လော့် အကျိုးဟောင်းတရောင်း။37ကွန်းကော်နိမ်န အောင်းအဆတ်ထာဝရဟပေါနွိုက် အောင်းစောင့်ဖလား အောင်းဟောင့်ဝ်ပဲ့ ရောင်းလေး။38အောင်းစောင့်ဖလား မယွန်မ်ဆီ အောင်းကွန်းဟေအပြစ် ခေတ်အစောင်လ ကောပ့်ကောတောင်း ကောပ့်အောင်းကောဆောန်လေ ဟောင်ပေါနီးအိုင်းလော့် လူ့သားတော်ကော့် တောင်းဖီဒေဝါအောင်းမြတ်လေတောင်း အောင်းဘုန်းတော်စောင့်ဖလား အောင်းဝ်ဆီ ဟောင်ပေါကြွပေါက်မားလော့် အောင်းစကွန်းဟောန့်လေ တနီးအိုင်း” ဆီ ဝါကော်ဝိုက်။

Empower Asia Bible Translation Movement

https://app.library.bible/content/7792a4a28d3449d6