Mark7
1ဝမ်းနိမ်လော့် ဖာရိရှဲတောင်း ဆီမေမှိန်းဂျေရုဆလင်အောင်းမား ဆရာကျမ်းစန်မောင်းဖောင်န အောင်းစောင့်ယေရှုဆောန်ပြားလေ ဟပေါနယ့်ထောင်မ် စူးဆီ ထီန်ဟင်းမားဝိုက်။2မေအချီန်ဟောန့် တပဲ့စောင့်ယေရှုလေန အနေစလေ့ထွုံးစံဂျူးလေတောင်း အောင်းမေးမနော်လေ မဆွတ်ဆီ တောင်းမေးပတ်ဆတ်လေတောင်း ကျဉ်းအောင်းခေါင်ကျဉ်းလေန မနော်ဟောန်ဟင်းမားဝိုက်။3ဟေဟောင်းဆီပေါဝါလော့် ဖာရိရှဲလေတောင်း ကွန်းဂျူးလေတောင်းလုန်န အနေထွုံးစံပူလဉ်ရာလဉ်မနော်တောင်း အောင်းမေးမနော်လေ နီးနီးငမ်းငမ်း မဆွတ်ဆီ အောင်းခေါင်ကျဉ်းလေ မကျဉ်းဟင်းညော့ဝိုက်။4မနော်လေန ဆီမေဈေးဟောင်ပေါပေါက်မားကော့် အနေစလေ့ထွုံးစံတောင်း အောင်းမနော်တောင်းမနော် မဆွတ်ဆီ အောင်းခေါင်ကျဉ်းလေ မကျဉ်းဟင်းဝိုက်။ နောင်နယ့်မကားအွန် အောင်းမော့်၊ အောင်းကလောက်၊ အောင်းပကန် လေ နောင်လန့်ညော့ ထွုံးစံအောင်းတန်းတီလေကော့် မနော်လေန စောင်းမ်ဟေဟင်းဝိုက်။5ကောပ့်နယ့်ညော့ ဖာရိရှဲလေတောင်းဆရာကျမ်းစန်လေန အောင်းစောင့်ယေရှု “ဟေဟောင်းဆီ တပဲ့မောစောင့်လေန အောင်းထွုံးစံပူလဉ်ရာလဉ်လေ မစောင်းမ်ဟေဆီ တောင်းမေးအောင်းပတ်ဆတ်တောင်း အောင်းခေါင်ကျဉ်းလေ ကျဉ်းဟင်းန” ဆီ ထန်မ်ဟင်းကော်ဝိုက်။6မွန်းစောင့်ကော့် အောင်းစမနော် “ကွန်းယောင်ဆောင်ကွန်းနီးလေ အောင်းအကြောင်းမဆူ ပရောဖက်ဟေရှာယဟောဝိုက်လ စော်။‘ကွန်းဟိုက်လေန အောင်းစကော တောင်းဆိုပ်တောင်းနဲဟော် ရိုသေဟင်း။တော်နယ်ကော့် စောဝ်မနော်ပေါဝါလော့် တောင်းကောတောင်း ကိုင်း။7မနော်လေန အစားပညတ်တော်ကောလေန အောင်းကွန်းချားဝိုက် အောင်းပညတ်တလားလေ ဆောန်ဟင်းညော့အောင်းဝိုင်ယ်အောင်းကောန အဟောင်းကော့်မစမ်ပေါင်’ဆီ ရာခနောဝ်လိကျမ်း နောင်တင့်မ်ဝိုက်ညော့8မဆူလေန အောင်းပညတ်တော်စောင့်ဖလားလေ ဝေဆီ အောင်းထွုံးစံကွန်းလေနဲဟော် စောင်းမ်ကျန်းဟင်း” ဆီ ဝါကော်ဝိုက်။9နောက်လောင်နော့် စောင့်ယေရှုန ဆက်ဆီ အောင်းစမနော်လေ “မဆူလေန အောင်းထွုံးစံမဆူလေ ဟပေါနယ့်ထီန်း အောင်းပညတ်တော်စောင့်ဖလား လေ နီးနီးငမ်းငမ်းကိုးဟွတ်ဝေဟင်းမား။10ဟေဟောင်းဆီပေါဝါလော့် ရာပညတ်ကျမ်းမောရှေန ‘အောင်းပေါ်မယ်လေ ရိုသေဟင်းဝါလတောင်း အောင်းပေါ်မယ်လေ ကွန်းစော်ကားလေန ဒဏ်အောင်းသိုင်း တနယ့်ခမ်’ ဆီ ဝါဝိုက်။11တော်နယ်ကော့် မဆူလေန အောင်းကွန်းလေ ‘ပစ္စည်းအောင်းတထောက်ပံ့အောင်းပေါ်မယ်လေ ရောင်းမေကော့် အောင်းစောင့်ဖလား ဟောင်ပေါလှူရောင့်ဝ်ကော် လော့် အောင်းပေါ်မယ်လေ စနီးထောက်ပံ့မလိုကော့်’ ဆီ ဆောန်ဟင်း။12နောင်တန်းဟိုက်ညော့ အောင်းပေါ်မယ်လေ အကြောင်းစနီးထောက်ပံ့မလိုလ မဆူလေန အောင်းကွန်းလေ ဆောန်ဟောင့်ဝ်ဟင်း။13နောင်နယ့်ဆီ မဆူလေန အောင်းထွုံးစံမဆူလေကပ်မေးမားဆီ အောင်းပညတ်တော်စောင့်ဖလားလေ ဝေဟင်း။ နောင်နယ့်ကျဉ်းနော့် မဆူလေန အောင်းကျန်အောင်းတန်းတီလေကော့် ဟေဟင်း” ဆီ ဝါကော်ဝိုက်။14နောက်လောင်နော့် စောင့်ယေရှုန အောင်းကွန်းဖွန် နောက်လောင်ဟာနိမ် ဟောင့်ဟွန်းဆီ “မဆူတောင်းလုန် အောင်းခွမ်းကော ထောင်မ်ဟင်းဆီ ဟုထောင်မ်ဟင်းမေ။15ဆီမေခနောက်ကွန်းလေ အောင်းခေါင့်ဝ်န အနေစလေ့ထွုံးစံတောင်း အောင်းကွန်းလေ မဟပတ်ဆတ်။ ဆီမေခနောဝ်ကွန်းလေ အောင်းအောက်လေနဲဟော် အနေစလေ့ထွုံးစံတောင်း အောင်းကွန်းလေ ဟပတ်ဆတ်ပဲ့။16(ကွန်းပဉ်ဟူပါန နယ့်ဟဉ်းဆီ ဟဟုထောင်မ်အီ့အွန်” ဆီ ဝါကော်ဝိုက်) 17နောက်လောင်နော့် မွန်းစောင့်န ဆီမေကွန်းဖွန်လေ အောက်မားကော်ဆီ ရာဟုန်းဟုန်းနိမ် ခေါင့်ဝ်ကော်လော့် တပဲ့လေန အောင်းမွန်းစောင့် အောင်းအကြောင်းပွန်ဥပမာဟိုက် ထန်မ်ဟင်းကော်ဝိုက်။18မွန်းစောင့်န “မဆူလေကော့် တော်အစောင်ပွန့်ကိုးသကော့် မဟုထောင်မ်ဟင်းပဲ့အွန်လေး။ ဆီမေခနောက်ကွန်းလေ ကာအောင်းခေါင့်ဝ်လေတောင်းလုန်န အောင်းကွန်း အကြောင်းမဟပတ်ဆတ်န မဆူမဟုထောင်မ်ဟင်းအွန်လေး။19ဟေဟောင်းဆီပေါဝါလော့် ခေါင်ကျဉ်းန ခနောဝ်စောဝ်မဆူ မခေါင့်ဝ်။ ခနောဝ်တောင့်နဲဟော် ခေါင့်ဝ်ဆီ တောင်းပါ့ခနောက်တိုး ထီန်ကော်” ဆီ ဝါကော်ဝိုက်။ နောင့်နယ့်ဆီ ဝါကော်ညော့ စောင့်ယေရှုန ခေါင်ကျဉ်းလေတောင်းလုန်န သန့်ရှင်းဆီ ခဝါဝိုက်။20နောက်လောင်နော့် စောင့်ယေရှုန ဆက်ဆီ “ဆီမေခနောဝ်စောဝ်မဆူ အောင်းအောက်လေနဲဟော် အောင်းစမဆူ ဟပတ်ဆတ်န။21ဟေဟောင်းဆီပေါဝါလော့် အကြမ်အောင်းမနီးမငမ်းလေ၊ အောင်းစော်ကားအောင်းပရပွန်လေ၊ အောင်းလောက်၊ အောင်းအောင်းဝ်သိုင်းကွန်း၊22အောင်းဖောက်ပြန်ကွန်းဟုန်း၊ အောင်းလောဖား၊ အောင်းမနီး၊ အောင်းလိဉ်၊ အောင်းရိုင်း၊ အောင်းမနာလို၊ အောင်းတန့်မစော်မစီ၊ အောင်းမာနရောင်ဝ်၊ အောင်းမိုင့်လေန ဆီမေခနောဝ်ကွန်းလေ အောက်ဟင်းမား။23အောင်းမနီးဟိုက်လေတောင်းလုန်န ဆီမေခနောဝ်ကွန်းလေ အောက်မားဆီ အောင်းကွန်း ဟပတ်ဆတ်” ဆီ ဝါကော်ဝိုက်။24နောက်လောင်နော့် စောင့်ယေရှုတောင်းတပဲ့မွန်းလေန ဆီမေတီဟောန့် အောက်မားဆီ ထီန်ရာခန့်မှိန်းတုရုတောင်း ရာခန့်မှိန်းဇိဒုန်ကော်ဝိုက်။ ရာဟုန်းမွန်းစောင့်ဆောင်းဝ်လ အောင်းကွန်းလေ မခဟဟုဝိုက်။ တော်နယ်ကော့် မဟူခွေတ် ကွန်းလေန ရာဟုန်းဟောန့် မွန်းစောင့်ရောင်းဝါလ ဟုဟင်းကော်ဝိုက်။25မယ်ကော့်ယဉ်းအင်အောင်းဖီမနီးပူးနယ့်ခမ်ကော်နိမ်န အကြောင်းစောင့်ယေရှု နယ့်ဟဉ်းကော်လော့် ချရှ်ချန်း ထီန်မားဆီ ရာတောင့်ဝ်တဉ်းစောင့်ယေရှု တောင့်ဝ်ခေါင်ဝ်ကော်ဝိုက်။26ကော့်ယဉ်းဟောန့်န ရာမှိန်းဆီးရီးယား ရာအွန်းဖိုနီးရှား အောင်းလိမ့်မား ပေးကွန်းမှိန်းတန်းတီဝိုက်။ မွန်းန အောင်းဖီမနီးအောင်းပူးဝိုက် ရာလုဆောင်ဝ်မွန်း ဟပေါနယ့်ဟော့်အောက် အောင်းစောင့်ယေရှု တောင်းပန်ကော်ဝိုက်။27မေနယ့်လော့် စောင့်ယေရှုန အောင်းစမွန်း “အောင်းကွန်းမှိန်းတန်းတီလေ မစွယ်ခွေတ် အောင်းကွန်းအမျိုးကော အောင်းကွန်းအစ္စရေးလေ တနယ့်စွယ်အောင်းတန်း။ နောင့်နယ့်ပေါမစော်လော့် ခေါင့်ဝ်မွန်းအောင်းရာလအောင်အင်လေ အောင်းဝ်ဆီ နောင်အွယ်အောင်းမာလေညော့ တပေး” ဆီ ဝါကော်ဝိုက်။28မေနယ့်လော့် ကော့်ယဉ်းဟောန့်န “စော်စောင့်။ တော်နယ်ကော့် မာအောင်းရောင်းခတောင့်ဝ်စပွဲလေကိုးသကော့် အောင်းလအောင်အင်လေကျဉ်းကျန်လေ နယ့်ကျဉ်းအွန်စောင့်” ဆီ ဖြေပေါက်ဟွန်းကော်ဝိုက်။29မေနယ့်လော့် မွန်းစောင့်န အောင်းကော့်ယဉ်းဟောန့် “ကောပ့်ခွမ်းအဖြေဟိုက်ညော့ မောပေါက်ကွာမေ။ ဖီမနီးန ဆီမေလုဆောင်ဝ်မော အောက်ကော်” ဆီ ဝါကော်ဝိုက်။30ကော့်ယဉ်းဟောန့်န ထီန်ပေါက်ဟုန်းမားကော်လော့် ဖီမနီးန အောက်ကော်ဆီ လုဆောင်ဝ်မွန်းကော့် ရာခနောဝ်စနွမ်း ဆတ်ဆာဆီ ပင်ဆီအူဝါလ နယ့်ခေါက်ပ်ကော်ဝိုက်။31နောက်လောင်နော့် စောင့်ယေရှုတောင်းတပဲ့မွန်းစောင့်လေန ဆီမေမှိန်းတုရု အောက်ရောင့်ဝ် အောင်းမှိန်းဇိဒုန် ခမ့်ကော်ဆီ အောင်းရောင်းရာခနောဝ်မှိန်းဒေကာပေါလိ ထီန်ကော်ရာမန့်အောင်းရောင်း ရာခန့်နောင်ဂါလိလဲကော်ဝိုက်။32မေနယ့်လော့် ကွန်းကန့်ဖောင်န အောင်းကွန်းဟူနုတ်ဆီ အောင်ကွန်းအာကော်နိမ် ရာမွန်းစောင့် ဟောင့်မားဆီ အောင်းကွန်းဟောန့် ဟပေါနယ့်ရား ခနေကွန်းဟောန့် အောင်းမေးမွန်းစောင့် ဟပေါနယ့်တန်ဟောင့်ဝ် တောင်းပန်ဟင်းကော်ဝိုက်။33ကောပ့်နယ့်ညော့ မွန်းစောင့်န ဆီမေခနောဝ်ကွန်းဖွန် အောင်းကွန်းဟောန့်ကော်နိမ်နဲဟော် ဟောင့်ကော်ဆီ အောင်းရုမေးမွန်းစောင့် ခနောဝ်ပဉ်ဟူကွန်းဟောန့် တိုင်းခေါင့်ဝ်ကော်ဝိုက်။ နောက်လောင်နော့် မွန်းစောင့်လ ခနေမေးမွန်း တောင်းနမ့်လိုင်းတောင်း ထွီဆီ အောင်းလဉ့်ကွန်းဟောန့် ထိကော်ဝိုက်။34နောက်လောင်နော့် စောင့်ယေရှုန အောင်းတောင့်ဖ ဟင်ခွန့်ဆီ ထွေ့စောဝ်လုန်ဆီ “ဧဖသ” ဆီ ဝါကော်ဝိုက်။ အဓိပ္ပါယ်ဧဖသန “ပွတ်ကော်” ဆီ ပေးဝိုက်။35စောင့်ယေရှုဝါကော်နောင်နယ့်နွေ့ဆတ် ချရှ်ချန်း ပဉ်ဟူကွန်းဟောန့်န နယ့်ဟဉ်းပေါက်မားပဲ့ကော်ဆီ လဉ့်န နီးနီးငမ်းငမ်း ယွန်းယန်ပဲ့မားကော်ဆီ ခွမ်းတော်ပေါပီ တန့်ပဲ့မားကော်ဝိုက်။36မွန်းစောင့်န အောင်းအကြောင်းဟိုက် ဟပေါမတန့် အောင်းကွန်းဖွန် ဆောင်ဝိုက်ကော်ဝိုက်။ တော်နယ်ကော့် နောင်နယ့်ဆီဟပေါမတန့် ရီဆောင်လ ကွန်းတောင်းလုန်န ဆာဆီတန့်ဟင်းဝိုက်။37ကွန်းဖွန်လေန အိုက်အမ်းဟင်းဆီ “မွန်းန ကာအောင်းရောင်းတောင်းလုန် နီးနီးငမ်းငမ်း ဟေမား။ အောင်းကွန်းဟူနုတ်လေကိုးသကော့် ဟနယ့်ဟဉ်းမားကော်ဆီ အောင်းကွန်းအာကော့် ခွမ်းဟတန့်ပေါက်ပဲ့မားကော်” ဆီ ဝါဟင်းကော်ဝိုက်။
Empower Asia Bible Translation Movement