Mark5
1พระเยซู หนะ โม กอฺนซิด ก็ กะลอง จี ตอฺห์ มะหนีง นา ถุฮ ค็อฺง ทเหลจืด ปา เทิน เกราซา.2ผัว หนาว ซ็อฺฮ โขห์ เกิด กูย หมาลหมูด หมูย หนะ หล็อฺฮ รู พโนร เจา บวย พระเยซู.3กูย ขัย หนาว กู แต หลึง ผร็อฺงถำ ปา พโนร ปุ เกิด ดาย แอ หนาว ดัวะ บืน เซอ โซ ดัวะ ก็ ปุ เถะ.4แอ โซ เหลียม ดัวะ แอ กแจ เซอ ดาล ดวง แหลว หนาว ก็ แก็ฮ โซ บ็อฺฮ หวัว กแจ ตะขิฮ. ดาย จิง แอ หนาว ดัวะ ก็ ปุ กู.5หนาว กู แต ปา ปรง ตบ กโมจ โตน บรู ติง ซะดาว ตาง เบรียง ตไง ตอฺห์ กะบือ โกก เซง โซล แอ กเมา หมิญ ปัจ จะเอง.6ผัว หนาว ซีเผิห์ พระเยซู รู อึงฮาย หนาว อึมปรอญ เจา ผอด นา มแหนห์ พระเยซู7เตรห์ เซง คลัง ปาย “หมวง เจา หวัวหนอฺ ไฮ พระเยซู กอฺน หมูย ค็อฺง พระเจ้ากูยอึมผืด? ไฮ เถียร หมวง มแหนห์ พระเจ้า จิ หวัว เบียบ ไฮ เดอ!”8เทาะ ไอ เตรห์ หวาว นะแหน ก็ เพราะ พระเยซู ซัง ออฺน หมาล คลัง เทาะ หมูด กู หล็อฺฮ จี รู กูย ขัย หวัย.9พระเยซู หม็อฺฮ หนาว ปาย “หมวง กะหมึฮ หนอ?” หนาว อึนเต “ไฮ กะหมึฮ ‘ซูผูห์ ซันผัน’ เพราะ โมไฮ เกิด โมด ดาล หลึง อึนดัว.”10กูย ขัย เถียร พระเยซู ปุ ออฺน ผูย โม หมาลหมูด หล็อฺฮ จี รู เทิน แหน.11อึนฉัลๆ บวน บรู ขัย เกิด อะหลีห์ โพง ผืด บวยจา กู.12โมด หมาลหมูด ขัย อึงคม พระเยซู หวาว ปาย “ออฺน โมไฮ หมูด กู หลึง โพง อะหลีห์ ขัย เดอ!”13พระเยซู ก็ ญอฺม. นะขัย หมาลหมูด ก็ หล็อฺฮ รู กูย อึนถรุฮ ขัย จี หมูด กู หลึง โพง อะหลีห์. อะหลีห์. อะหลีห์ ติง โพง (หนับ ราว อเบีย ผัน) ก็ อึมปรอญ แซง รู บรู อึนจอด แซง เดียะ ทเหล กเลาะ แหล็ฮ ติงฉิม.14กูย ซีน อะหลีห์ เผิห์ นะขัย ก็ หงัจ จี หวาว หรืง เทาะ เกิด ซ็อฺฮ โตน โซะแซ. กูย ดาล หนะ ก็ หล็อฺฮ เจา แหม.15ผัว เจา ตอฺห์ พระเยซู แหลว ก็ เผิห์ กูย เทาะ เขย เกิด หมาลหมูด กู รูหนัว หนาว ดิง จูด อึนฉิจ ตะกาว กู กะออฺบ อึม เบียย. โมหนาว ก็ อะตูง คลัง.16แหลว โม กูย เทาะ เผิห์ หมาล เทาะ เกิด ซ็อฺฮ หลึง กูย หมาลหมูด หนะ หลึง อะหลีห์ หนาว ก็ อึนเต ออฺน กูย กะน็อฺฮ ดิง.17ซาแหน กูย โม แหน เถียร พระเยซู ออฺน หล็อฺฮ จี ออฺน เผ็อน รู เทิน ค็อฺง หนาว.18พระเยซู ซ็อฺฮ ถูห์ จิง จี แหลว กูย เทาะ เขย เกิด หมาลหมูด เถียร จี หลึง.19แต พระเยซู ปุ ออฺน จี หวาว ปาย “ออฺน หมวง จี บวย โม ค็อฺง หมวง ปา ดุง หวาว หรืง เทาะ พระเจ้า บืน ฉูย หมวง ติง เหฺยาะเหฺยียล ขัย.”20กูย เทาะ เขย หมาล หมูด ก็ หล็อฺฮ จี ปา เทิน อึนเจ็อด โซะ อึนเต หรืง เทาะ พระเยซู โป หนาว. กูย ตะงัด ก็ หงึด หมัดเหม็ย.21พระเยซู ซ็อฺฮ ถูห์ กะลอฺง ทเหลจืด กาลิลี จี มะหนีง ถุฮ เถิน.ผัว ตอฺห์ ตรัง เกิด กูย ดาล เจา ฮุม.22เกิด กูย อึนถรุฮ หมูย หนะ กะหมึฮ ไยรัซ เกิด ทายก ซีแหม ฮอง+กะฉุม อึมผาฮ พระเจ้า. ผัว เผิห์ พระเยซู ไยรัซ ก็ ผอด23อึงคม เถียร พระเยซู ปาย “กอฺน กะมอร ค็อฺง ไฮ ตโก็ฮ จิง แหล็ฮ. เถียร จี ดะ เต ปอฺง หนาว หนาว ก็ จิง ออฺ.”24พระเยซู ก็ จี หลึง ไยรัซ. เกิด กูย ฮุม มแหนห์ ฮุม กรอย โตน พระเยซู จี แนน กู.25เกิด กูย กไป หมูย หนะ เกิด โหรก อึนถรุฮ อึงฮาม เจา ซิบซอง กะมอฺ แหลว.26หนาว อึมเบียะ ดาล จี บวย แพด ดาล หนะ เจา โป แต โหรก ก็ ปุ ออฺ อึงเฮ็ง แต เกิด คลัง จน หนอฺๆ เทาะ เกิด กู ก็ ตัจ โป ปุ ด็อฺง.27ยะกไป แหน ซ็อฺง หรืง พระเยซู โป โหรก บืน ก็ กะหญู หมูดเจา นา กรอย พระเยซู กะลอ เต ดุฮ เฉียย ฮับผืด28ขึด หลึง กะฮอฺม ปาย “คัน ดุฮ แต เฉียย ฮับ พระเยซู มัฮขัย ก็ จิง ออฺ.”29ผัว หนาว ดุฮ มีปลัฮ ขัย เอง อึงฮาม อึนถรุฮ ก็ ฉาว หนาว ก็ ดิงจะ ปาย ออฺ แหลว.30พระเยซู ก็ ดิง หวัยเหวียง เพราะ ริด โป โหรก ซาญ หล็อฺฮ จี รู จะ. หนาว หวิฮ ซี โวยโซะ หม็อฺฮ ปาย “ดาย ดุฮ เฉียบ ฮับ ไฮ?”31โม กอฺนซิด ค็อฺง พระเยซู หวาว ปาย “เถ อาจาน ก็ กูย แนน อึนนีด กู เหนีย แต หม็อฺฮ ปาย ดาย เจา ดุฮ ฮับ?”32แต พระเยซู ด็อฺง หวิฮ ซี บวย นา โวยโซะ แหม ปาย ดาย ดุฮ หนาว.33ยะกไป แหน ดิง ตอฺห์ จะ ก็ อะตูง กโตจ ผัว กะปรับ ผอด บวน หฺยืง ค็อฺง พระเยซู หวาว หรืง ติงฉิม ออฺน พระเยซู ตะงัด.34พระเยซู หวาว โหญม หนาว ปาย “กอฺน ลัฮ กะฮอฺมฉือ ค็อฺง หมวง หวัว ออฺน ออฺซำ แหลว. ออฺน ลบจี แบร็ฮ บืน กู กะออฺบ กะฮอฺม เดอ.”35พระเยซู ด็อฺง หวาว กู ขัย เกิด โม กูย เจา รู ดุง ค็อฺง ทายก ซีแหม ฮอง กะฉุม อึมผาฮ พระเจ้า เจา อึนเต ปาย “กอฺน ค็อฺง เหนียย แหล็ฮ แหลว. จิ จี หวัว ออฺน อาจาน อึมเบียะ เล็ย.”36พระเยซู ซ็อฺง ก็ ปุ อีอูล แต อึนเต ไยรัซ ปาย “จิ โต็ฮซัจ เลย ออฺน แต ฉือ มัฮขัย.”37พระเยซู ปุ ออฺน ดาย โตน จี ออฺน แต เปโตร ยากอบ หนะ ยอน แซม อึนถรุฮ ค็อฺง ยากอบ.38เจา ตอฺห์ ดุง ค็อฺง ไยรัซ ก็ เผิห์ โม กูย หวุนๆ เหญียม ซะน็อฺฮ น็อฺง.39พระเยซู หมูดจี หวาว ปาย “ เกิด หนอฺ แต หวุนๆ นะแหน? โมหมวง เหญียม หวัว หนอฺ? อีนาง แหน ปุ แหล็ฮ เอ็อฮ หนาว บิจ เกลอะ กู มัฮขัย.”40กูย โม ขัย ก็ กะจัง พระเยซู. ซาแหน พระเยซู ผูย หนาว หล็อฺฮ จี ออฺน ฉิม กู แต เหมห์ หนะ หนุ ค็อฺง กอฺนแนน หนะ กอฺนซิด อไป หนะ แหลว หมูดจี หลึง ลแหวง เทาะ กอฺนแนน แหล็ฮ กู.41หนาว กอบ เต กอฺนแนน ขัย หวาว ปาย “ตาลิทา กูมิ” (แปล ปาย “อีนาง ไฮ ซัง ออฺน หฺยูร ซ็อฺฮ.”)42กอฺนแนน อาหญุ ซิบซอง กะมอฺ ก็ หฺยูร ซ็อฺฮ ฮุจ จีเจา. ขูหนะ หงึด ดาล.43แต พระเยซู อึนชัด เหมห์ หนุ ปุ ออฺน อึนเต ดาย แหลว ซัง ออฺน จี บวย โดย เจา ออฺน กอฺนแนน จา.
Empower Asia Bible Translation Movement