Mark4
1พระเยซู จี ซอฺน กูย ซูย ๆ ตรัง ทเหลจืด กาลิลี เถิน. เกิด กูย โมด ผืด เจา ฮุม ตะงัด พระเยซู แนน กู ปา ตรัง. พระเยซู ซ็อฺฮ ถูห์ อึงฮาย ตรัง บีห์ ตะกาว ซอฺน โวยโซะ ตะงัด กู ปา ตรัง2พระเยซู ซอฺน ดาล ยาง เกิด มนาย ปรีบ ออฺน ตะงัด ปาย3ตะงัด เดอ เกิด กูย หมูย หนะ หล็อฺฮ จี ผรอฺฮ ซอฺ.4ผรอฺฮ กู ขัย กลอฺง หนืจ อึนเถียจ จี อึนถรุฮ กู โตน นา ฮุจ แจม ก็ ปาร เจา จอฺด จา ฉิม.5กลอฺง หนืจ อึนเถียจ จี ไกร บวน เกิด กแตห์ บีห์ กรูฮ ดาล ก็ ฮอฺน ซ็อฺฮ หวัย.6แต คัน ไกร ปูห์ ก็ ซเวด เพราะ เท็อน กแตห์ ซอล ปุ บืน.7กลอฺง หนืจ อึนเถียจ จี อึนถรุฮ ไกร โปล กเหลีย กเหลีย ก็ ฮอฺน ซ็อฺฮ แตน ปุ ออฺน บลอฺฮ.8แต กลอฺง หนืจ อึนถรุฮ ไกร กแตห์ ออฺ ฮอฺน ซ็อฺฮ หรัวะ บลอฺฮ อึงฮอฺห์ ผืด เกิด กลอฺง ตอฺห์ ซามซิบ หนืจ ฮกซิบ หนืจ หมูย หรวย หนืจ.”9แหลว พระเยซู หวาว ตอฺจี ปาย “คัน หมวง เกิด กะตอร ก็ ออฺน ตะงัด ออฺน ออฺ เดอ.”10ผัว กูย จี ฉิม แหลว กอฺนซิด ซิบซอง หนะ หนะ โม กูย กู บวน ขัย หม็อฺฮ พระเยซู ตอฺห์ มนาย ปรีบ แหน.11พระเยซู หวาว ปาย “ไฮ ออฺน โมหมวง ดิง หรืง อำดัวะ แหน เทาะ พระเจ้า เจา เกิด ซะดัจ ขุม. แต กูย โวยโซะ ขัย ไฮ จิง หวาว แต มนาย ปรีบ ออฺน หนาว ตะงัด.12เพราะ หนาว อึงเฮน ซี แต ปุ เผิห์ จิง ตะงัด แหลว แต ก็ ปุ เคาไจ อะตูง หนาว จิง หวิฮ กะฮอฺม เกิด กไม แหลว พระเจ้า จิง เหลิห์ เบียบ ค็อฺง หนาว ออฺน เผ็อน บืน.’”13แหลว พระเยซู หวาว หลึง โมหนาว ปาย “โมหมวง ปุ เคาไจ หรืง ปรีบ แหน บอ? แหลว จิง เคาไจ มนาย ปรีบ กะน็อฺฮ นะเหนีย บืน?14กูย ผรอฺฮ ขัย ก็ ปรีบ นะ กูย อึนเต มนาย ค็อฺง พระเจ้า.15กูย โม หนืจ เกิด นะ กลอฺง ซอฺ เทาะ อึนเถียจ จี อึนถรุฮ กู โตน นา ฮุจ ขัย. คัน ซ็อฺง มนาย ค็อฺง พระเจ้า มีปลัฮ ขัย อึงเคา กโมจกะซาจ ก็ เจา อึนฉีง แอ มนาย ขัย หล็อฺฮ รู กะฮอฺม.16กลอฺง เทาะ อึนเถียจ จี อึนถรุฮ ไกร บวน เกิด กรูฮ ดาล กแตห์ บีห์ ก็ มาย ตอฺห์ กูย ซ็อฺง มนาย ค็อฺง พระเจ้า แหลว หรับ แอ หวัยเหวียง ยัง เอิห์.17แต มนาย ขัย ปุ เกิด แหร็ฮ จัด อึนถรู แซง หลึง กะฮอฺม. หนาว ฉือ กู หมูย ปลัฮ แต คัน หรับ อึมเบียะ หรือ กูย อึนแตน หนืจ เพราะ หนาว ฉือ มนาย แหน หนาว ก็ ตัฮ บ็อฺฮ ยัง หวัยเหวียง.18กลอฺง เทาะ อึนเถียจ จี อึนถรุฮ ไกร บวน กเหลีย ขัย มาย ตอฺห์ กูย เทาะ ซ็อฺง มนาย ค็อฺง พระเจ้า19แต กะฮอฺม หนาว ด็อฺง ขึด แหน ขึด ถุฮ ด็อฺง เอิห์ แต หลึง หมาลๆ หลึง กแตห์ แหน ยัก แต บืน เล็ยๆ. กะฮอฺม ขึด แบบ แหน ก็ แตน มนาย ค็อฺง พระเจ้า ดัวะ ปุ ออฺน เกิด ไปล.20แต กลอฺง เทาะ อึนถรุฮ กู บวน กแตห์ ออฺ ขัย มาย ตอฺห์ กูย เทาะ ซ็อฺง มนาย ค็อฺง พระเจ้า หรับ แอ. มนายซอฺน แหน ก็ เกิด ไปล ซามซิบ ซูน หนืจ ฮกซิบ ซูน หนืจ หมูย หรวย ซูน หนืจ.”21พระเยซู หวาว เถิน ปาย “เกิด ดาย หนืจ เบ็อด ตเกียง แอ ทัง ขรูบ ดัวะ หรือ แอเจา ดะ ดัวะ กเดิบ บวนบิจ? ตเกียง หนาว ต็อฺง แอ ดะ ดัวะ บวน ถีๆ ออฺน เบรียง.22หมาล เทาะ อึนชูน ดัวะ ก็ ต็อฺง ผรึฮ ซ็อฺฮ ออฺน กูย เผิห์. แหลว หมาล เทาะ ปกปิด อำดัวะ หมูย ตไง ก็ ต็อฺง ไกร เบิห์ หล็อฺฮ.23คัน หมวง เกิด กะตอร ก็ ออฺน ตะงัด ออฺน ออฺ เดอ.”24แหลว พระเยซู หวาว ปาย “โมหมวง ออฺน ระหมัด ตะงัด ดัวะ ออฺน ออฺ เดอ. หมวง จิง เปรฺอ อึงหวัล เหนีย หวัล ออฺน โม กูย พระเจ้า ก็ จิง เปรฺอ อึงหวัล ขัย หวัล ออฺน หมวง น็อฺง ติง เติม ซ็อฺฮ ออฺน เถิน.25เพราะ กูย เทาะ เกิด กู แหลว หนาว จิง บืน หรับ เถิน. แต กูย เทาะ ปุ เกิด แมปาย หนาว เกิด บีห์ๆ ก็ จิง แอจี รู หนาว.”26พระเยซู หวาว เถิน ปาย “พระเจ้า หมูด เกิด ซะดัจ ขุม ขัย เกิด นะ กูย อึนถรุฮ หล็อฺฮ จี ผรอฺฮ ซอฺ หลึง แซ.27นา ซะดาว หนาวว ก็ บิจ นา ตไง หนาว ก็ หยูร ซอฺ ก็ โผม ซ็อฺฮ ฮอฺน เล็ยๆ. แต หนาว เอง ปุดิง ปาย ซอฺ ขัย ฮอฺน แบบ เหนีย.28กแตห์ ขัย เอง หวัว ออฺน กลอฺง ขัย โผม ซ็อฺฮ. รูกอฺ ก็ เกิด ขัล แกดๆ หญูง แหลว ตอฺเจา ก็ เกิด อึงฮอฺห์. บันเซ็อด อึงฮอฺห์ ซอฺ ขัยเกิด กลอฺง ปิฮ.29ผัว ซอฺ เกรง แหลว หนาว ก็ แอ กะวีน เจา กัจ เพราะ ตอฺห์ เหวเหลีย กัจ แหลว.”30พระเยซู หม็อฮ “ไฮ จิง ปรีบ ปาย พระเจ้า เจา เกิด ซะดัจ ขุม ปรีบ เกิด แบบ หนอฺ ออฺ?31ก็ ปรีบ เกิด นะ กลอฺง พักกาด. กลอฺง ไอ แกดๆ เหลิฮ กลอฺง พัก กะน็อฺฮๆ เทาะ แอจี อึมผอฺห์ แซง กแตห์.32แต คัน ไอ โผม ฮอฺน ซ็อฺฮ ขัล ไอ ก็ ผืด เหลิฮ ขัล กะน็อฺฮ ติง เกิด แหมห์ ผืด แบห์ หล็อฺฮ โพง แจม ก็ จิง หวัว ซโน็ฮ บืน.”33พระเยซู เถดซอฺน โวยโซะ ดาลหรืง เปรฺอ มนาย ปรีบ ซำ กูย จิง เคาไจ บืน.34คัน หนาว จิง ซอฺน โม กูย ก็ เปรฺอ แต มนาย ปรีบ. แต คัน กู หลึง โม กอฺนซิด หนาว อึนเต หรืง ออฺน ดิง.35ตไง ขัย กะบือ แหลว พระเยซู หวาว หลึง โม กอฺนซิด ปาย “เยอ ออฺน โมไฮ กะลอฺง ทเหลจืด จี มะหนีง นา ถุฮ.”36โมหนาว ก็ ตัฮ กูย ติงฉิม หนะ ดัวะ ซ็อฺฮ ถูห์ เทาะ พระเยซู ฉิฮ ขัย ดึง อึนดัว จี. เกิด ถูห์ ดาล จี หลึง น็อฺง.37มีปลัฮ เกิด กะหยุฮ ผืด หวู เจา เดียะ อึนเถิน อึนตัญ หมูด ถูห์ ด็อฺง บีห์ ถูห์ จิง หล็อฺง.38พระเยซู บิจ อึงเกฺย คเนฺย เกลอะ กู นา กรอย ถูห์. โม กอฺนซิด หม็อฺฮ พระเยซู “อาจาน ลัฮ! โมไฮ จิง แหล็ฮ แหลว หมวง ปุ ฮวง โมไฮ หนืจ ลัฮ?39พระเยซู ซเญอ ซ็อฺฮ ฮาม กะยาล หนะ คลืน หลึง ทเหล หวาว ปาย “ซะงัด!” กะหยุฮ ก็ ฉาว เดียะ ก็ หนึง.40พระเยซู หวาว หลึง โมหนาว ปาย “ เกิด หนอฺ แต อะตูง? หมวง ด็อฺง ถัน ฉือ ไฮ ลัฮ?”41โม กอฺนซิด ก็ หงึด หมัดเหม็ย หวาว อึนดัว ปาย “กูย แหน เกิด ดาย ลัฮ แต กะหยุฮ หนะ เดียะ หลึง ทเหลจืด ฉือตะงัด หนาว?”
Empower Asia Bible Translation Movement