Mark6
1พระเยซู หล็อฺฮ รูขัย จี โซะ ตี ค็อฺง หนาว โม กอฺนซิด ก็ จี โตน น็อฺง.2ตอฺห์ ตไงฉาว+ พระเยซู ซอฺน กู หลึง ฮอง+ กะฉุม อึมผาฮ พระเจ้า. กูย ดาล หนะ ตะงัด พระเยซู ซอฺน ขัย ก็ หงึด ดาล หวาว อึนดัว ปาย “หนาว ซอน แบบ แหน เกิด เจา รู เหนีย?3แหมน หนาว เกิด แต เฉียง อะหลวง? เหมห์ หนาว มารี แซม หนาว ก็ ยากอบ โยเซฟ ยูดาซ หนะ ซีโมน โม ขัย เฮย. โม แซม กะมอร ค็อฺง หนาว ก็ กู โซะ หมูย หลึง โมไฮ.” โมหนาว แหน ปัดบ็อฺฮ พระเยซู.4พระเยซู หวาว หลึง โมหนาว แหน ปาย “กูย+ หวาว มนาย ค็อฺง พระเจ้า เกิด กูย ออฺน เกียด หลึง ถู บวน. เกิด แต โซะ เทาะ หนาว กู ขัย หนะ โม แซมซาย ค็อฺง หนาว เทาะ ปุ ออฺน เกียด หนาว.”5พระเยซู ปุ บืน หวัว อัดซะจัน หนอฺ บวน ขัย บืน แต แอ ดะ ปอฺง กูย ตโก็ฮ บีห์ หนะ โป ออฺน ออฺ โหรก.6พระเยซู หงึด เทาะ โวยโซะ ปุ ฉือ หนาว. ตอฺเจา ขัย พระเยซู หล็อฺฮ จี ถีว ซอฺน โตน โซะ ปา เทิน ขัย.7หนาว กะเหฺยีย กอฺนซิด ซิบซอง หนะ เปรฺอ ออฺน หล็อฺฮ จี เกิด ขูๆ ออฺน หนาว เกิด อำนาด ผูย หมาลหมูด บืน8แหลว อึนเต หนาว ปาย “จิ แอ หนอฺ เต็อด จะ จี แอ แต ตอฺงราด. จิ แอ โดย เดียะ กเหฺยียว หรือ ประตาง จี แต อึนฉิจ กับ จะ แหลว ผาห์ แบห์เฉิง.”9แหลว อึนเต หนาว ปาย “จิ แอ หนอฺ เต็อด จะ จี แอ แต ตอฺงราด. จิ แอ โดย เดียะ กเหฺยียว หรือ ประตาง จี แต อึนฉิจ กับ จะ แหลว ผาห์ แบห์เฉิง.”10แหลว ฉำ มนาย เถิน ปาย “คัน จี ตอฺห์ ดุง เหนีย ก็ ออฺน พัก กู หลึง หนาว จน ปาย หมวง จิง หล็อฺฮ รู โซะ ขัย จี.11คัน กูย บวน เหนีย ปุ หรับ ตะงัด หมวง ออฺน หล็อฺฮ จี รูขัย กะถุฮ กแตห์ เต็อด หฺยืง หล็อฺฮ ออฺน ซมปิงปลอ ไอ.”12โม กอฺนซิด ก็ หล็อฺฮ จีเถดซอฺน ออฺน โวยโซะ ตัฮ บ็อฺฮ เบียบ หวิฮ กะฮอฺม เกิด กไม.13หนาว ผูย หมาลหมูด ดาล เถรง ออฺน หล็อฺฮ รู จะ กูย แหลว แอ อึนแชง กแฉว+ แปด กูย ตโก็ฮ โป โหรก ออฺน ออฺ.14ซาแหน ซะดัจ เฮโรด หนาว ซอฺง คาว หรืง พระเยซู เพราะ โม โวยโซะ หลือ อึนดัว ถู โซะแซ ตอฺห์ หรืง พระเยซู. กูย หนืจ หนาว หวาว ปาย “กูย แหน เกิด ยอน เทาะ หวัว เซ็น อึมหระเดียะ+ เทาะ หมอฮ ซ็อฺฮเจา รู แหล็ฮ แต หนาว หวัว อัดซะจัน บืน.”15กูย กะน็อฺฮ หวาว ปาย “หนาว เกิด เอลียา.” กูย หนืจ หวาว ปาย “หนาว เกิด กูย หวาว มนาย ค็อฺง พระเจ้า รูขัย.”16แต เฮโรด ซ็อฺง ก็ หวาว ปาย “หนาว เกิด ยอน ขัย เอง เทาะ ไฮ หรัจ ปลอฺ แต หนาว หมอฮ เจา เถิน.”17เพราะ บัน ขัย ซะดัจ เฮโรด หนาว ซัง จี กอบ ยอน เจา เหลียม โซ คัง ดัวะ หลึง ขุก เพราะ หนาว ยัก แอกะฮอฺม เฮโรเดียซ. เฮโรเดียซ กูย แหน เขย เกิด อึนแดล ค็อฺง ฟีลิป แซม ค็อฺง เฮโรด เจา หญูง รูหนัว เฮโรด แอ เกิด อึนเดล ค็อฺง หนาว เอง.18ยอน เขย หวาว หลึง เฮโรด เล็ยๆ ปาย “หมวง หวัว ปุ ไกร เทาะ แอ อึนแดล ค็อฺง แซม.”19นะขัย เฮโรเดียซ กะอาร ยอน ยัก จิง กแจด แต กแจด ปุ บืน เพราะ ซะดัจ เฮโรด.20เฮโรด อะตูง ยอน เพราะ หนาว ดิง ปาย ยอน เกิด กูย ตรง ปอฺด ออฺ. เฮโรด ก็ หมูด นา ยอน. เฮโรด หมัก ตะงัด ยอน เถดซอฺน แมปาย หนาว ด็อฺง ขึด ถู กรูง ถู กแตห์.21หมูย ตไง เฮโรเดียซ เกิด ทา ออฺ. หลึง ตไง เกิด ค็อฺง เฮโรด เฮโรด หนาว เฉิน โม เถรงเหนียย โม เหนียย ทะฮาน หนะ กูย อึมผืด ติงฉิม หนะ ถู ปา เทิน กาลิลี ขัย ออฺน เจา จาเลียง.22กอฺน กะมอร ค็อฺง เฮโรเดียซ หล็อฺฮ เจา หรำ. เฮโรด หนะ กูย เฉิน เจา ผัวกะฮอฺม ดาล. ซะดัจ เฮโรด ก็ หลัน กะนอฮ ดัวะ หลึง กะมอร ขัย ปาย ยัก บืน หนอฺ หนาว จิง ออฺน.23หนาว หวาว ดัวะ ยัง เด็ดคาด น็อฺง ปาย “อีนาง เถียร หนอฺ ไฮ ก็ จิง ออฺน หมัดเหม็ย แมแต อำนาด ค็อฺง ไฮ ขุม ตอฺห์ มะหนี.”24ยะขัย ก็ หล็อฺฮ จี หม็อฺฮ เหมห์ หนาว “จิง เถียร หนอฺ ออฺ?”เหมห์ ก็ อึนเต “เถียร ปลอฺ ค็อฺง ยอน เทาะ หวัว เซ็น อึมหระเดียะ.”25ยะกะมอร เผียว หมูดจี บวย ซะดัจ หวาว ปาย “ไฮ แอ ปลอฺ ค็อฺง ยอน เทาะ หวัว เซ็น อึมหระเดียะ เซอ ทาด เจา ออฺน ไฮ รูหนัว เอง.”26ซะดัจ เฮโรด ซ็อฺง นะขัย ก็ อึนถรุฮ กะฮอฺม หมัดเหม็ย. แต หนาว คัด ปุ บืน เพราะ บืน หลัน กะนอฮ ดัวะ หลึง ยะขัย แหลว ติง เผิห์ แก กูย หนาว เฉิน27ก็ ซัง กูยขุม ออฺน จี หรัจ ปลอฺ ยอน. ทะฮาน ก็ จี หรัจ ปลอฺ ยอน หลึง ขุก ขัย28แหลว แอ ปลอฺ ค็อฺง ยอน เซอ ทาด เจา ออฺน ยะ กะมอร. ยะ แหน ก็ แอจี ออฺน เหมห์.29ผัว โม กอฺนซิด ค็อฺง ยอน ดิง หรืง หนาว ดึง อึนดัว เจา แอ จะ ค็อฺง ยอน จี ตบ ดัวะ.30โม กอฺนซิด ค็อฺง พระเยซู เทาะ หล็อฺฮ จี เถดซอฺน ก็ ลบเจา บวย พระเยซู หวาว หรืง ขูยาง เทาะ หนาว หวัว ติง ซอฺน ออฺน พระเยซู ตะงัด.31เกิด กูย ดาล หนะ จีๆ เจาๆ จน พระเยซู หนะ โม กอฺนซิด ปุ เกิด เหวเหลีย จิง จา โดย. ซาแหน พระเยซู หวาว หลึง โม กอฺนซิด ปาย “ออฺน โมไฮ หล็อฺฮ จี บวย บวน กแหวน ฉาว กู แต โมไฮ หมูย เขรียว ออฺน เกิด อึมลัง บีห์.”32พระเยซู หนะ โม กอฺนซิด ก็ ซ็อฺฮ ถูห์ จี บวย บวน ซะงัดๆ ฉาว แต โมหนาว.33แต เกิด กูย ดาล หนะ เผิห์ พระเยซู รู อึงฮาย ก็ เจอ บืน จึง เผียว จี นา โขห์ จี ตอฺห์ หญูง พระเยซู เถิน.34ผัว พระเยซู ซอฺฮ รู ถูห์ ก็ เผิห์ กูย ยัง ดาล เจา จำ กู ก็ เหยาะเหฺยียล หนาว เพราะ หนาว เกิด นะ โพง แกะ เทาะ ปุ เกิด กะหมะ ซีน. พระเยซู ก็ เถดซอฺน หนาว ดาล ยาง.35ตอฺห์ กะบือ คลัง แหลว โม กอฺนซิด หมูดเจา บวย พระเยซู หวาว ปาย “กะบือ แหลว ติง ปา แหน โซะ ก็ ปุ เกิด.36หมวง อึนเต ออฺน โมหนาว แหน จี โตน โซะ บวย โตล โดย จา เดอ.”37พระเยซู หวาว ปาย “โมหมวง บวย ออฺน หนาว จา ยะ.” โม กอฺนซิด หวาว ปาย “ผุย อาจาน! จิง ออฺน โมไฮ จี โตล หมาลจา ซำ เหรียน ประ* อเบีย หรวย ซีน หนาว เถ?”38พระเยซู หวาว ปาย “จี บวย แหม ปาย ดาย แอ หมาล เจา จา หนืจ.” เผิห์ แหลว โมหนาว ก็ ลบ เจา อึนเต พระเยซู ปาย “เกิด คะนมปัง กู อเซิง กอน หนะ อะกา อเบีย.”39พระเยซู ซัง โวยโซะ ออฺน ตะกาว โตน บวน เกิด บาด เกิด โมดๆ.40โวยโซะ กธ ตะกาว เกิด โมด หมูย โมด หมูย หรวย หนะ หนืจ ฮาซิบ หนะ หนืจ.41แหลว พระเยซู เซฺาะ แอ คะนมปัง อเซิง กอน หนะ อะกา อเบีย เจา เหงย หมัด ซ็อฺฮ ผราฮ คอบคุน พระเจ้า แหลว แป็ฮ อะกา หล็อฺฮ อึนแจห์ ออฺน ขูหนะ น็อฺง.42ขูหนะ ก็ จา พไซ.43แหลว โม กอฺนซิด ตอจ คะนมปัง หนะ อะกา เทาะ ลือ บืน ซิบซอง อึนต็อฺฮ ปิฮ.44กูย เทาะ จา ตไง ขัย เกิด ตอฺห์ อเซิง ผัน หนะ หนับ แต กูย อึนถรุฮ.45ผัว โวยโซะ จาโดย แหลวๆ พระเยซู ออฺน โม กอฺนซิด ซ็อฺฮ ถูห์ กโฮด จี หญูง จำ กู ปา โซะ เบทไซดา มะหนีง นา ถุฮ ค็อฺง ทเหลจืด กาลิลี. แหลว พระเยซู ก็ อึนเต ออฺน โวยโซะ ลบ จี ดุง.46กรอย กูย ลบ จี ฉิม แหลว พระเยซู ซ็อฺฮ จี หลึง บรู เผียวะเหนีย กู มะหนะเอง.47กะบือ แซง คลัง แหลว ถูห์ กู อึนดี ทเหลจืด กาลิลี. แต พระซู ด็อฺง กู หลึง โขห์ ขัย มะหนะเอง48ก็ เผิห์ ปาย โม กอฺนซิด ต็อฺง เผียย ถูห์ อึมเบียะ คลัง เพราะ กะยาล อึนตัญ. อึงคอฺน จิง เบรียง พระเยซู ฮุจ ปอฺง เดียะ จี บวย โม กอฺนซิด เพะ จิง กโฮด จี เล็ย.49ผัว โม กอฺนซิด ซีเผิห์ ก็ ขึ ปาย แต กโมจ ก็ เตรห์ ซะนัน.50แต มีปลัฮ ขัย พระเยซู หวาว หลึง โมหนาว ปาย “หนอฺๆ โม แหน ไฮ เอง! จิ อะตูง เล็ย!”51พระเยซู ซ็อฺฮ ถูห์ กะหยุฮ ก็ ซะงัด แซง. โม กอฺนซิด ก็ หงึด หมัดเหม็ย52เพราะ หนาว ปุ เคาไจ ตอฺห์ ริดอำนาด ค็อฺง พระเยซู เทาะ ซีน โวยโซะ ยัง ดาล ขัย หลึง คะนมปัง อเซิง กอน หนะ อะกา อเบีย. แต กะฮอฺม ค็อฺง หนาว ด็อฺง คะญัง กู.53พระเยซู หนะ โม กอฺนซิด กะลอฺง ถูห์ จี ตอฺห์ เทิน เยเนซาเร็ท จอด ถูห์ ดัวะ ปา ตรัง ขัย.54ผัว โม พระเยซู หล็อฺฮ รู ถูห์ โวยโซะ เผิห์ ก็ เจอ พระเยซู บืน.55หนาว จี อึนเต อึนดัว ถูๆ ออฺน อึงกราง กูย อี เจา ออฺน พระเยซู โป.56นะขัย ปุ ปาย พระเยซู จิง หล็อฺฮ จี นา เทิน เหนีย โซะ เหนีย ตลาด เหนีย เกิด กูย แอ กูย ตโก็ฮ เจา เถียร ดุฮ แต เฉียย ฮับ ค็อฺง พระเยซู. แหลว ขู หนะ เทาะ ดุฮ ก็ ออฺซำ.
Empower Asia Bible Translation Movement