Zefania2
1Aw rukrai uowi dowi mih Juda chenchapuüa,enni mih tarip büa diah.2Khowm bowkta mih tara chet khin uang ting dowi rawn tarip büa diah;maih iawng lün pluplup mih CHAKRAMANG kowh kunmaraura uang ting dowi rawn tarip büa diah,now aia kowh sak-hiara uang ting dowi rawn tarip büa diah.Enni che tarip dowi now li hutla chapli iawng nahutla enni kown chowbowt.3Judauüa pungmadawng kowi kowh khamsum khamdaw miuüa low,CHAKRAMANG kowi cham büa diah,now aia kowh ana pek chün büa diah.Anowm kowi cham büa diah,now khamsum khamdawma hown uowi büa diah.Nahanow CHAKRAMANG mih phih hownia natowkala enni chepaw naia,piakra ni uang ting mih khin khe aia kowh kunmaraura hownia enni nakhalat chepaw naia.4Filistinuüa kowi CHAKRAMANG ripah mih khin khe Gaza marow kowi paw naripla kown,nami khin khe Askelawn marow kowi paw aia mih naripla kown.Asdawd marowchakuüa kowi dow ni ür thüm khe naprütah kown,nakhowk khe Ekrawn marowchakuüa kowi paw naprütah kown.5Sata pang kowi uowi mih Filistin krungchak Keretuüa low,enni luk kowi piakra nauang ting kown mih dow kramra uowi lai kowbow!Kanan pren kowi uowi mih Filistinuüa low,enni luk kowi piakra nauang ting kown mih dow kramra uowi lai kowbow!Enni lawnguan kowi CHAKRAMANG tek kingküa lai mih,“Lowk iachow khowm ta sing dowi pat asaima ang napiakta enni kown,” pakhai.6Sata pang kowi kowh Filistinuüa kowh krawng bawn dow tawncher thing rah chowtaih naiung kown.Nakowi dow tawncher thing miuüa kowh te hai ruapur kim chowtaih nauowi kown.7Nami arah dow Juda chenchap ta sing miuüa napowngta kown,now nakowi dow amatni naka ruapur thing rah kown.Iak-e khe dow Askelawn marow kowi kowh akhawma mih kim kowi naiak büah kown.Tawngplawng kowchow panow amatni kowi dow CHAKRAMANG amatni kowh Thurai mih naming nakhetah kown;now amatni kowi dow auown khe kowh iawng aia naplan peah iungra iawk kown.8Lang kri lang kraing mih CHAKRAMANG Israeluüa kowh Thurai tek mih,“Ang maru-uüa kowi Moabuüa hai Amawnuüa peah rukrai mih hai prawng renah mih ang ta khowk.Nami klen kowi ang maru-uüa kowh pren nakhünta pe kown pahai chang bawri mih paw ang ta khowkNaiawng rakowi takham se ang tek khowk,Moabuüa hai Amawnuüa kowi dow Sawdawm hai Gawmawra marowchakuüa kowi iawng ang napiakah kown.Naiawngün arah dow chuh mung hai a-ikma mih krawng nachowng kown,now chowngchowng saksakma vüi apiaknama mih krawng bawn nachowng kown.Ang maru-uüa pungmadawng kowi kowh ta sing miuüa amatni kowh dawngthawnguan narupta pe kown,now amatni kowh pren napowngta pe kown,” pakhai.10Moabuüa hai Amawnuüa luk kowi naiawng ripra nauang ting kown mih dow amatni bawri rakowi chekhai,now lang kri lang kraing mih CHAKRAMANG kowh maru-uüa kowi khareah büah rakowi chekhai.11CHAKRAMANG dow amatni kowi natüng pe kram kown.Tawngplawng kowchow panow aia dow palusama kowi kowh akeng thuraiuüa maten kowi napiakta bowk kown.Nami khin khe alakma mih pren kowi kowh chenchapuüa mih chowlowkkow uowi rah hownia CHAKRAMANG kowi nachup naiiaah kown.12CHAKRAMANG tek mih, “Ethiawpiauüa low,enni paw ang kowh saidawng hown nakowng bowk kown,” pakhai.13CHAKRAMANG dow tawngphak prakowi iaw rut hanow Asuria prenchakuüa kowi napiakah kown,now Ninevi marow kowi dow asaima napiakta hanow süngrüp süngkangma iawng müakangma aia natowah kown.14Nakowi dow chia kawm, ruapur kawm hai asadua chap maten namawkla rim kown.Kimchüng kowi ün dow süngrüp süngkangma kowi kowh bungku hai kaurawng kowi kowh bungku naiak kown,now tawngpawk kowi ün krawi mown hanow nakrawi lai kown.Kim maten dow napiak bowk kown,now sidar singh hown kowh phen ün dow maru napawta kown.15Nami marow dow kramra uowi dowi hai asowrma uowi mih chowdiah.Aia tatek mih, “Ang towbowt, ang klen kowi miapaw uowi dowk,” pakhai.Nachenganchepaw kawmat dow nami marow piak khai bowt,now chowng kaurawng uaramchak hawmh uowi rah khai bowt.Nami tapiak mih marow ria iawng kowmang miuüa maten dow naprawng renah kown,now marow piak mih kowi chitah mih iawng hown natüngla rutma büah kown.
The Seed Company