Zefania1
1Juda pren kowi Amawn chapa Josia chowm mang khe Zefania tut-e CHAKRAMANG kowh laiklow uang ting khai. Zefania kowh pa dow Kusi, Kusi kowh pa dow Gedalia, Gedalia kowh pa dow Amaria, now Amaria kowh pa dow Hezekia chekhai.2CHAKRAMANG tek mih,“Lusa kowi kowh uowi mih maten kowi asaima ang napiakta kown.3Lusa maru hai asadua maten ang nachumta bowk kown,kuang kowi kowh uakling uaber hai sata kowi kowh dam maten paw ang nachumta kown.Maru ngakuüa kowi ang nauang pawla pe piakra kown;lusa kowi kowh maru maten kowi ang napiakta bowk kown.4“Juda pren hai Jerusalem marow kowi kowh uowi miuüa maten kowi ang naripah kown.Baal thurai kowi chupiiala mih uanh maten hai arup kowi chupiia mih uamowuüa maten kowi mami pren hownia asaima ang napiakah kown.5Kowmatia kimluk kowi kowpün hanow sat, krek hai lama kowi kowchupiia miuüa kowi ang napiakah kown.Nami klen kowi CHAKRAMANG kowi chupiia se kham sawi kung kowi Molek thurai ming hown plan kham sawi miuüa kowi paw ang napiakah kown.6Ang tiama hownia cham dang miuüa hai ang low iawng mang dowi miuüa kowi ang napiakta kown,now ang naukrang tuk kown nau dowi miuüa kowi paw ang napiakta kown,” pakhai.7Enni mih CHAKRAMANG Thurai pur kowi ririmma uowi büa diah.Tawngplawng kowchow panow CHAKRAMANG kowh tara chet ni dow uang tawn iawlaw khowk chekhai.CHAKRAMANG mih aia kowh maru Judauüa kowi nasaita kownkow kamrütta hüah khowk;chang phuchua iawng amatni kowi nauang saiah kownkow amatni kowh ransu-uüa kowi aia uang pawla pe khowk.8CHAKRAMANG tek mih, “Ang chet tara mih ni khe Judauüa kowh maru iukuüa kowi ang naripah kown;mang chauüa hai prenlang thuraiuüa kowi chupiia miuüa maten kowi ang naripah kown.9Nami ni khe dow arup kowi chupiia miuüa kowi ang naripah kown,now amatni kowh mang kim kowi atekma naia towla uanh kownkowkrawi chang nowng miuüa hai krawi kuan miuüa kowi paw ang naripah kown,” pakhai.10CHAKRAMANG plan tek mih, “Nami ni khe dow Dam Tapplawt hownia kar klow natarua phawnglawng kown,marow kowi kowh Arah Sar hownia dow nguk klow nata kown,now hungh hownia dow kimkrowng tim mih klow nata kown.11Jerusalem marow chi ria kowi kowh Maktesuüa low,enni mih kar büah nguk büa diah.Tawngplawng kowchow panow nakowi kowh kun chang miuüa nauowi kown nadowi bowt;nakowi kowh tangka pawisa kun chang miuüa kowi dow nakowngta bowk kown.12Nami khin khe dow Jerusalem marow kowi kowh aiiuma mih arah maten kowi maibu hown ang nakrawi towrah kown.Kowmatia luk kowi sak-ih se ‘Aiung angak chang chepaw CHAKRAMANG dow tawngpaw nachang kown nadowi’ pah tek miuüa kowi dow ang naripah kown.13Amatni kowh dawngthawnguan dow maru narupta pe kown,now amatni kowh kim üa ün dow maru napiakta pe kown.Amatni chang kim sar chepaw naka uowiah büah kown nadowi,now chang grep krum büah chepaw naka kham grep tui büah kown nadowi,” pakhai.14CHAKRAMANG kowh tara chet ni dow uang tawn khai bowt.Nami dow alenma uang ting kown chowbowt.Nami dow lainowmma krat pusara ni chekhai;nami khin khe dow akürma mih maru-uüa khowm nakar kown.15Nami ni dow CHAKRAMANG kunmarau mih ni naown kown,nami ni dow akrat pusara hai tuak kratra ni naown kown.Nami ni dow phih hai piakra ni naown kown,nami ni dow uariiu süngkuak mih ni hai uangnim aiiuma mih ni naown kown.16Nami ni dow tap tapat lut mih marow maten kowi senah mih ni naown kown,nami ni dow marow nui kowi kowh kangchawngra kim maten kowi senah mih ni naown kown,now baw tün hai nahaw tasen kown mih ni naown kown.17Maru kawmuüa dow CHAKRAMANG kowi kingküala mih angak chang khai;naiawng rakowi amatni dow mikdu miuüa iawng namang kown.Amatni kowh vi dow dinchow dawng kowi nahawrla dawi kown,now amatni kowh uak dow krawng kowi natakuakla pan kown.18CHAKRAMANG kunmarau mih ni khe dow tawng chap paw amatni kowi naia lawngah kown nadowi;amatni kowh kuh hai tai paw amatni kowi naia lawngah kown nadowi.CHAKRAMANG dow aia kowh khowrbown dawma mih maih iawnglün pluplup mih hown lusa kowi uowi mih maten asaima nakamta kown.Lusa kowi uowi mih maten kowi dow linlanma sang asaima aia nachumta kown.
The Seed Company