Zefania3
1Sürlawkma mih Jerusalem marow luk kowi piakra nauang ting kown mih dow kramra uowi lai kowbow!Nami marow dow kingküa dawma miuüa hai tasai sak miuüa tek khai bowt.2Amatni dow CHAKRAMANG kowh laiklow sünta dowi,now aia kowh pringhawi laiklow paw chün dowi.Amatni dow CHAKRAMANG luk kowi neplawng nesak dowi,now amatni kowh Thurai tut-e tatawn kown paw nau dowi.3Nakowi kowh aluchowuüa dow hek rangrang mih krangsi iawng,now nakowi kowh tara chet miuüa dow uariiu rü khe kowh krawi lim chak mih sui iawng chekhai.Amatni dow arangpranma panow lawphama kangowh chekhai;amatni kaah mih srui dow auai rau vüi towah dowi bowt kowi chata bowk reng chekhai.4Jerusalem kowi kowh risiuüa dow bawrima hai dailama chekhai,amatni dow kaah sakowm dowi mih maru chekhai.Uamowuüa dow Thurai kowh ana pek kowi kingküa khai;naiawng hown amatni dow Thurai chup kim sürlawkta reng.5Nachenganchepaw amatni tut-e kowh tawi uowi mih CHAKRAMANG dow anowmma;aia dow tawngpaw anowm nadowi mih chang dowi chekhai,now aia dow rau towng tamata dowi kowi chet tara nowm reng.Tawkche lup ngak chang miuüa dow tuk rukrai dowi chekhai.6CHAKRAMANG tek mih, “Chenchapuüa kowi ang chumta bowk khowk;amatni kowh kangchawngra kimkrowng ang piakta pe bowk khowk.Amatni kowh tiama ün akhaw aklaima towbowt;naiawngün tiama kowi miapaw mang dowi bowt.Amatni kowh marow maten asaima piak bowk khowk;nakowi dow miapaw uowi dowi bowt.7Nakhowk khe ang tatuak mih, ‘Khaleng dow ang maru-uüa nakram ang ngengche bowt,now ang kowh pringhawi laiklow nachün bowt,’ pakhai.Naiawng che chang büah e dow amatni kowh uowi rah ang napiak pe kown nadowi diah,now ang kowh ripra maten paw amatni luk kowi ang nauang pe tingah kown nadowi diah.Nachenganchepaw amatni dow süngürma hown chang lup ngak reng chekhai.8Aw Jerusalem marowchakuüa, ang vüi kowi hawt chawng diah.Chenchapuüa kowi napeah aprek kown mih lai natek kownkow ang narü kown;nami ni vüi hawt chawng diah.Chenchapuüa kowi nakua nalawmah kownkow ang khowm bowkta khowk,pren ün kowi ang nakua nalawmah kown.Amatni luk kowi mapaw ang sak-ih dowi mih ang nakhük pe kown;ang kowh kunmarau lün pluplup mih ang nauang hüng pe kown.Ang kowh kunmaraura maih hown palusama napiak kown.9Nami kung kowi dow maru kawmuüa kowh laiklow ang nachimsai pe kown.Nahanow amatni dow naia kiowri ang kown towbowt,now akrüp angi sang naia chupiia ang büah kown towbowt.10Ethiawpia pren kowi kowh aw paipra pown hownia chupiia ang miuüa nauang pawla ang uanap kown;cham taset plawt mih ang kowh maru-uüa ang vüi nauang pawla uanap kown.11Nami ni khe dow alai kowh en kingküa ang mih rakowi en narukrai kown nadowi bowt.Tawngplawng kowchow panow mami marow hownia mih chang bawri miuüa hai chang owrow miuüa kowi ang naprütta bowt kown.Nakowi kowh ang kowh chimsaima mih hungh luk kowi miapaw nachang bawri kown nadowi bowt.12CHAKRAMANG ming kowi neplawng nesak miuüa kowi dow en lak kowi ang natowah kown;anemchow tanü mih hai khamsum khamdawma miuüa kowi dow en lak kowi ang natowah kown.13Israel kowi kowh ta sing uowi miuüa dow nachang lup ngak kown nadowi;amatni dow nadai kown nadowi,now natakuan büah kown nadowi.Amatni dow ki chata chakkham kung kowi thaulangma namüi kown;amatni kowi miapaw nakrawkah kown nadowi,” pakhai.14Aw Zaiawn chama, tek meng diah,aw Israel, how diah.Aw Jerusalem, awmrawm büa diah,now saktuak maten hown piaw büa diah.15CHAKRAMANG dow enni kowh ripra taingta enni khowk,now aia dow enni kowh ransu-uüa kowi prütta bowk khowk.Israel pren mang CHAKRAMANG dow enni pungmadawng kowi tawi uowi reng chekhai.Naiawng rakowi angak kowi katpaw enni nakram kown nadowi bowt.16Nami khin khe Jerusalem kowi maru natek pe kown mih,“Aw Jerusalem, hangkow kram diah,now hangkow sak nen diah.17Tawngplawng kowchow panow CHAKRAMANG enni kowh Thurai mih enni pungmadawng kowi tawi uowi reng,aia tut-e dow nalawng enni kown mih kür uowi chekhai.Aia dow enni rakowi nowm nowm naawmrawm kown,now kramra takcha thaulangra aia nape enni kown.Aia dow enni lawnguan kowi atünma natek meng kown.18 “Pawi khe kowh maru piaw iawng Thurai mih napiaw hai natek meng kown;enni kowh taprüa taiia khin chur khowk, kawmat dow enni naia piaw bowt kown.19Nami khin khe dow chang enni nowng miuüa maten kowi ang naripah kown.Akawm akrat hown uowi miuüa kowi dow ang nalawngah kown,now cham tauet plawt miuüa kowi dow ang nakuaah kown.Amatni ka rukrai mih takcha ang napeah kiowrira kown,now palusama kowi amatni kowi ang napeah ringkawra kown.20Aw Jerusalem, nami khin khe dow akeng pren kowi kowh uowi mih en maru-uüa kowi ang nauang pawla kown,now amatni kowh uowi rah kowi ang naplan pe uowiah iawk kown.Ang pe iuksown enni iawk mih dow chenchap maten nakhi kown,now amatni dow naringkaw enni hai nakiowri enni kown.Ang CHAKRAMANG mami laiklow ang tek khowk,” pakhai.
The Seed Company