Leviuüa20
1CHAKRAMANG tek pe Mosi mih, “Israeluüa kowi maiawng kowtek pe diah: Enni Israeluüa lah, enni pungmadawng kowi kowh tawi uowi mih akeng chenchapuüa lah amia iawng mih paw Molek pami arup kowi kowmatia kowh chauüa hown enni naphuchua kown nadowi. Phuchua mih maru kowi dow enni nakowngta kown takla. Aia kowi dow maru maten huaklu hown kowng pat nakuakah kown.3Molek pami arup kowi kowmatia chah hown phuchua mih maru dow ang kowh ming chimsaima mih hai ang kowh arah chimsaima mih sürlawk ang mih chekhai. Naiawng rakowi nami maru kowi dow ang nakingküaah kown, now aia kowi dow aiamat chenchap hownia ang nabatta kown.4Molek pami arup kowi maru kowphuchua chah mih khin khe prenchakuüa khi khowk chepaw khi dowi iawng uowi khai, now kowng paw kowngta dowi hanow nami maru hai aia kimchakuüa kowi dow ang nakingküaah kown. Akeng mih maru-uüa paw kaah sakowm dowi iawng Molek pami arup kowi tawi phuchua khai hanow naiawngünuüa kowi paw Israel chenchap hownia ang nabatta kown.6“Ang kaah sakowm dowi iawng süngnam hai lümla ngak hown taklawp taiua mih maru tut-e cham paw prengia mih maru kowi dow ang nakingküaah kown, now aia kowi dow aiamat chenchap hownia ang nabatta kown.7Naiawng rakowi ang vüi kowi lang takra büah hanow chimsaima uowiah büa diah. Tawngplawng kowchow panow ang dow CHAKRAMANG enni kowh Thurai chekhai.8Ang kowh rirow mih sak kowi towah büa diah, now nami dow chünah büa diah. Ang dow CHAKRAMANG chekhai; ang vüi kowi kowh chimsai enni mih dow ang chowtaih.9“U-pa kowi pe piati mih maru kowi dow nakowngta ngengche kown takla. U-pa kowi pe piati rakowi aia kowng mih dow aiamat rakowi chowtaih.10“Masi uowi mih maru che akeng mih maru kowh masi hown chang iang khai hanow amatchi pre ia trui kowi nakowngta ngengche kown takla.11“U-uai hown taphua taiua mih maru dow a-pa kowi pe rukrai mih chekhai. Naiawng chang mih maru che uowi khai hanow nami maru hai a-u uai kowi dow nakowngta ngengche kown takla. Amatchi kowng mih dow amatchi rakowi chowtaih.12“Iaumow hown taphua taiua mih maru che uowi khai hanow nami maru hai aiaumow kowi dow nakowngta kown takla. Naiawng amatchi chang mih dow suiiai kaniaima mih lup chekhai. Amatchi kowng mih dow amatchi rakowi chowtaih.13“Masiuüa hown taphua taiua khe kowh iawng kachakuüa lala taphua taiua mih dow suiiai kaniaima mih lup chekhai. Naiawng chang mih kachakuüa kowi dow pre ia trui kowi nakowngta ngengche kown takla. Amatchi kowng mih dow amatchi rakowi chowtaih.14“Achama hailawm a-u kowi chawng mih dow suiiai kaniaima mih lup chekhai. Naiawng rakowi naiawng mih lup enni pungmadawng kowi naphawla dowi bowt kownkow naiawng chang miuüa kowi dow amatni sum ia trui kowi maih kowi nanawmah kown takla.15“Masiuüa chepaw, kachakuüa chepaw tawncher hown taphua taiua mih che uowi khai hanow tawncher hailawm nami maru kowi nakowngta ngengche kown takla. Amatni kowng mih dow amatni rakowi chowtaih.17“Apa uai kowh chama hown chepaw, a-u uai kowh chama hown chepaw, tuamow sin hown chepaw natachawng kown nadowi; tuamow hown taphua taiua mih dow uowiah parukrai mih lup chekhai. Naiawng mih maru kowi dow amatni chenchapuüa pur hownia nalawtta kown takla. Naiawng atuamow kowi peah rukrai khai rakowi aia dow naka ripra kown.18“Uisawng uowi khe kowh taphua taiua mih maru kowi dow amatchi pre ia trui kowi chenchap hownia nabatta kown takla. Tawngplawng kowchow panow amatchi dow uisawng uowi khe kowh tachim tasai rirow chün iüah dowi chekhai.19“Nawkaw hown lah, pama hown lah mia iawng mih hown paw enni naia taphua taiua kown nadowi. Naiawng che taphua taiua khai hanow tasin taken mih masiuüa kowi enni peah rukrai mih chekhai. Naiawng chang mih rakowi amatchi dow naka ripra kown.20“Urammow hown chepaw, pama hown chepaw taphua taiua khai hanow nami dow pahi hai pama kowi peah rukrai mih chekhai. Naiawng rakowi nami kachakuüa hai masiuüa dow amatchi kowh aprek amatchi nakur kown. Amatchi dow kala chah dowi kowi nakowng kown .21“Atainau sing uowi reng tak khe atainau kowh masi kowi chawngta pe mih dow suiiai kaniaima mih lup chekhai. Naiawng chang mih maru dow atainau kowi peah rukrai mih chekhai. Naiawng rakowi amatchi dow kala chah dowi kowi nakowng kown.22“Ang kowh ana pek hai ang kowh rirow maten chünah büa diah. Nami che enni chün khai hanow enni nakowuowiah kownkow ang nakowpawla enni kown mih pren mih nahükta enni kown nadowi.23Enni nakowuowiah kown mih prenchakuüa kowh chowm krang uowi krang enni natawi iua kown nadowi. Naiawngün maru-uüa kowh chowm krang uowi krang dow suiiai kaniaima rakowi lainowmma ang suiah chekhai.24Naiawngün maru-uüa uowiah mih pren dow ang nape powng enni kown padow ang kham enni khai. Nakowi dow iawn tui, kuai tui hai tawng chap paw akhawr uowi dowi. Nami pren dow dawngthawnguan iawng hai ang nape enni kown mih ang tek enni khai. Ang dow CHAKRAMANG enni kowh Thurai chekhai. Akeng chenchap hownia kowh lang klo enni mih dow ang chowtaih.25Naiawng rakowi tawncher hai uakling uaber pungmadawng kowi kowh tawng mih chow sürlawkma mih, sürlawk dowi mih enni nalang kraah kown takla. Tawncher lah, uakling uaber lah, krawng luk kowi kam hai sowr mih chili chalachow mih asadua chap lah asürlawk mih chap maten dow ang lang krata enni khowk. Naiawngün chakra hownia dow enni natasür talawk kown nadowi.26Ang CHAKRAMANG achimsaima rakowi enni paw achimsaima nauowi kown takla. Ang matia kowh maru nachangla enni kownkow akeng chenchap hownia ang lang klo enni mih chekhai.27“Kachakuüa lah, masiuüa lah süngnam hai lümla ngak hown taklawp taiua mih maru maten kowi dow nakowngta kown takla. Naiawngünuüa kowi dow huaklu hown kowng pat nakuakah kown. Amatni kowng mih aprek dow amatni nakur kown,” pakhai.
The Seed Company