Leviuüa21
1Nami kung kowi CHAKRAMANG tek pe Mosi mih, “Mami laiklow uamowuüa kowi kowtek pe diah: Amatni tasin taken miuüa kowng uak tawi kakra hownia amatni mih naia tasür talawk kown nadowi.2Nachenganchepaw amatni kowh u-pa, chauüa, tainau-uüa hai cham mang dowi tak mih tuamowuüa kowng rakowi dow naia tasür talawk büah kown taih.4Tawkche kowmatia masi kowh tasin taken miuüa kowng rakowi dow natawi ia tasür talawk büah kown nadowi.5“Natüngla uiting uangtak kownkow uamowuüa dow sam hai mawmpawi nakhai kown nadowi, now buk kowi paw nata nasawt büah kown nadowi.6Uamowuüa dow Thurai vüi kowi chimsaima nauowi ngengche kown takla. Amatni dow Thurai ming chimsaima mih naia piak kown nadowi. Tawngplawng kowchow panow amatni dow CHAKRAMANG vüi chakkham uanap chang mih chekhai. Naiawng rakowi amatni dow CHAKRAMANG vüi chimsaima nauowi kown takla.7Amatni dow chawkkrawma kowi chepaw, ming nang piak mih masiuüa kowi chepaw, now ahua khuata mih masiuüa kowi chepaw nachawng büah kown nadowi. Tawngplawng kowchow panow amatni dow amatni kowh CHAKRAMANG vüi kowi chimsaiah mih maru chekhai.8Aw Israeluüa, uamowuüa kowi dow Thurai vüi kowi kowh chimsaiah mih maru iawng enni namüah kown. Tawngplawng kowchow panow amatni dow enni kowh Thurai vüi ap enni chakkham reng mih chekhai. Amatni kowi dow chimsaima mih maru pahai enni namüah kown takla. Tawngplawng kowchow panow ang CHAKRAMANG dow chimsaima chekhai, now enni kowi paw ang matia vüi ang lang kra enni khai.9Uamowuüa kowh chama che chang chawkkrawma lup kowh tasür talawk khai hanow aia dow a-pa kowi peah rukrai mih chekhai. Naiawng rakowi nami masiuüa kowi dow maih kowi nanawmah kown takla.10“Uamow lang kri mih dow uowila uiting uangtak khe naiia sam kown nadowi, now khupdip tawngklai paw naia sek kown nadowi. Tawngplawng kowchow panow aia kowi dow nümnap müa sau phawk pe hanow uamowuüa pungmadawng kowi kowh lang kri mih arah peah mih chekhai. Aia dow uamow lang kri mih kowh tawnguat nakhup kown mih alow ka mih maru chekhai.11Aia dow uak uowi rah re-e cham ia kowi kown nadowi. Kowmatia u-pa uak khowm padow tawi kakra hownia aia mih naia tasür talawk kown nadowi.12Aia dow Taklowp taklangra te chimsaima mih hownia cham lawt hanow uak uowi rah kowi nacham ia kowi kown nadowi. Aia che cham lawt hanow Taklowp taklangra te chimsaima mih aia nasürlawkta chepaw naia. Tawngplawng kowchow panow aia kowi dow phawk pe nümnap müa sau hanow ang matia vüi ang lang kraah mih chekhai. Ang dow CHAKRAMANG chekhai.13Aia dow kachakuüa hown katpaw taphua taiua dowi tak mih malauüa kowi chowtaih naia chawng kown.14Aia dow mamaimow kowi chepaw, ahua khuata mih masiuüa kowi chepaw, chang chawkkrawma lup kowh tasür talawk mih masiuüa kowi chepaw nachawng kown nadowi. Aia dow amatni Levi chenchap kowi kowh katpaw taphua taiua dowi tak mih malauüa kowi chowtaih nachawng kown.15Naiawng nadowi now aia kowh chauüa natasür talawk kown chekhai. Uamow lang kri mih kowi dow ang matia vüi ang lang kraah mih chekhai. Ang dow CHAKRAMANG chekhai,” pakhai.16Nami kung kowi CHAKRAMANG tek pe Mosi mih,17“Arawn kowi maiawng kowtek pe diah: En krungchakuüa pungmadawng kowi kowh uaingselepama mih maten dow Thurai vüi naap chakkham kownkow phuchuara re-e nauang ia uang kown nadowi.18Uaingselepama mih maru dow naia chang uamow lup kown nadowi. Naiawngünuüa dow Mik duma mih, klowng khawn tabai mih, nakawng pema mih, rut khawk iuk sowmma mih, bawng pang klowkma mih, kawm kuima mih, atüalüa chow mih, mik piakma mih, pik rawka uowi mih, prak rawka uowi mih hai tualama mih ün chekhai. Naiawngün uaingselepama miuüa dow phuchuara re-e naia uang kown nadowi.21Arawn kowh krungchakuüa pungmadawng kowi uaingselepama mih maru dow CHAKRAMANG vüi chakkham uanap naia chang kown nadowi. Naiawngün maru dow uaingselepama rakowi CHAKRAMANG vüi phuchuara kowi nauang ia ap chakkham kown nadowi.22Nachenganchepaw Thurai vüi kowi kowh phuchuaah mih chimsaima mih hai lang chim lang sai mih chakkham maten dow naiawng mih maru-uüa paw natawi ia cha kown taih.23Tawkchedow naiawngün maru-uüa mih uaingselepama chekhai rakowi chimsaima mih arah kowi hai phuchuara kowi naia uang kown nadowi. Naiawng che chang hanow ang kowh arah chimsaima mih nasürlawkta kown chekhai. Ang dow CHAKRAMANG chekhai. Uamowuüa kowi dow ang matia vüi ang lang kraah mih chekhai,” pakhai.24Naiawngün laiklow dow Arawn hai achapauüa hown Israeluüa maten kowi Mosi kowkowiah now kowtek pe khai bowt.
The Seed Company