Leviuüa19
Akeng mih rirow
1CHAKRAMANG tek pe Mosi mih, “Mami laiklow Israeluüa maten kowi kowtek pe diah: Ang dow CHAKRAMANG enni kowh Thurai chekhai. Ang dow chimsaima rakowi enni paw chimsaima nauowi kown takla.3Enni kowh u-pa kowi enni naring nakawah kown takla. Ang kowh Tanai Ni mih enni nasunah reng kown takla. Ang dow CHAKRAMANG enni kowh Thurai chekhai.4Ang kowi towta now akeng thuraiuüa kowi enni nachup kown nadowi. Enni nachupah kownkow arup aren paw enni nathawp kown nadowi. Ang chowtaih CHAKRAMANG enni kowh Thurai.5“CHAKRAMANG hown taking tasangra nauowila kownkow taking tasangra uanap enni ap khe CHAKRAMANG nasak-ihla kownkow ari kowi uowi iawng enni naap-ah kown takla.6Enni ap-ah mih ngar dow enni ap-ah mih ni hai auai ni mowr kowi enni nachata bowk kown takla. Nami chaknga che sum ni mowr ta lat khai tak hanow nami dow asür alawkma khowk chekhai. Naiawng rakowi nami ta lat mih dow enni natikta bowk kown takla. Sum ni mowr nami chaknga cha rengreng hanow nami uanap dow CHAKRAMANG napaw enni kown nadowi bowt.8Sum ni mowr cha rengreng mih maru dow ang kowh uanh chimsaima mih kowi sürlawk mih chekhai. Naiawng rakowi nami maru dow aia kowh angak rakowi naka aprek kown. Aia kowi dow aiamat chenchap hownia nabatta kown takla.9“Üa kowi hai laih kowi enni kua luprak khe aria aret kowi kowh luprak dow enni nakuala kown nadowi, now ta dowh mih paw enni nakrawi plan lüm kown nadowi bowt.10Grep krum hownia ki klekta grep uih akat khowk hanow enni nakrawi ia plan klek iawk kown nadowk, now grep uih dowh mih paw enni nakrawi lümla kown nadowi. Naiawngün dow ngarai miuüa hai akeng chenchapuüa vüi enni nata towla kown takla. Ang dow CHAKRAMANG enni kowh Thurai chekhai.11“Enni naia ku kown nadowi, now amia kowi paw enni naia kuan kown nadowi. Enni naia tek dai lai kown nadowi.12Ang ming hown enni naia kham dai lai sawi kown nadowi. Ang ming hown kham dai lai sawi mih dow ang kowh ming chimsaima mih piak mih chekhai. Ang dow enni kowh CHAKRAMANG chekhai.13“Kowmatia klowkchakuüa kowi enni naia kuan kown nadowi, kowmatia klowkchakuüa kowh uanh paw kür hown enni napaw kown nadowi. Sukkri kha dow ngaah mih ni khe napeta kown takla; auai rau mowr natowah kown nadowi.14“Param pangma miuüa kowi enni nape piati kown nadowi, now mik duma miuüa kowi paw nape tatheuah kownkow tiama kowi tawng chap paw enni natow pe kown nadowi; CHAKRAMANG enni kowh Thurai kowi ringkawma hown enni nakramah kown takla. Ang dow enni kowh CHAKRAMANG chekhai.15“Tara nowm nadowi iawng enni nachet tara kown nadowi. Tara chetra kowi maru iuk maru sowm enni namüah kown nadowi; aiuk asowm bowkbowk kowi anowmma enni nachet pe tara kown.16Mia iawng mih lawnguan kowi paw enni nakrawi küa dai kown nadowi. Maru kowh chownglawng napiakla dowi kownkow enni nathuak saksi kown takla; rarimma enni nauowi kown nadowi. Ang dow CHAKRAMANG chekhai.17“Maru kowi suiah mih saktuak sak kowi enni natow kown nadowi. Maru kowh lup tawi mih aprek enni natawi kala dowi kownkow lup tawi mih enni natüng pe ngengche kown takla.18“Enni natapaw lu klai kown nadowi. Mia iawng mih hown paw enni natatow irsi kown nadowi. Maru maten kowi kowmatia tasakrau iawng enni nasakrauah kown takla. Ang dow CHAKRAMANG chekhai.19“Ang kowh rirow enni nachün kown takla. Pachapsang nadowi mih tawncher kowi enni nape tapawah hau kown nadowi. Lowkchow mih laih kowi aliu pre chap enni nasawt kown nadowi. Pre chap mih la hown kowh kawngah mih uan paw enni nakhup kown nadowi.20“Ahua kham uowi mih narma, kim iah lawtah dowi tak mih, now klan paw klanah dowi tak mih narma hown miapaw naia taphua taiua kown nadowi. Taphua taiua khai chepaw nami narma kowi hai aia kowi kowh phua iuaah mih kachakuüa kowi enni naia kowngta kown nadowi. Tawngplawng kowchow panow nami narma kowi mih klanah dowi tak chekhai. Nachenganchepaw nami kachakuüa mih narma kowh kim iah kowi napeah aiawk kown takla.21Nami klen kowi aia kowh aprek sung uanap CHAKRAMANG vüi aia nachang kown. Aia dow taklowp taklangra te plawt re-e nauang pawla ruapurla papum kown takla.22Nami ruapurla hown CHAKRAMANG pur kowi nami kachakuüa kowh aprek sung uanap uamow nachang pe kown. Nahanow nami kachakuüa kowh angak mih nalawtta pe kown towbowt.23“Enni nakowuowiah kown mih Kanan pren kowi enni kowting kung kowi uih-ien pantawn singh enni nakowchowk kown. Nachenganchepaw uown uih mih ning hownia sum ning mowr mih uih-ak dow asür alawkma chowreng tak pahai enni nadowkah kown takla. Nami sum ning mowr dow naiawngün uih enni nacha kown nadowi tak.24Now tali ning mih ning khe dow naiawngün singh kowi kowh uih maten CHAKRAMANG rowsi müa kowi CHAKRAMANG vüi enni naap-ah kown takla.25Nachenganchepaw tanga ning mih ning hownia dow nami singh uih enni naiung cha kown towbowt. Naiawng che enni chang hanow enni kowh uih-ien pantawn ahuma nauih kown. Ang dow CHAKRAMANG enni kowh Thurai chekhai.26“Tawng iawng mih chaknga paw hawkta pe avi dowi matchang enni nacha kown nadowi.“Hawra mük hai mantan paw enni natawngkeng kown nadowi.27“Kowng miuüa vüi uowila uiting uangtak khe ngeupa sam enni naia kep kown nadowi, now mawmpawi paw enni naia khai kown nadowi. Nami klen kowi enni matia buk kowi enni natata tangen kown nadowi. Now tawng iawng mih arup paw buk kowi enni nasawt kown nadowi. Ang dow CHAKRAMANG chekhai.29“Kowmatia chama kowi enni nape changah chawkkrawma lup kown nadowi. Naiawng chang mih dow kowmatia chama kowi peah rukrai mih chekhai. Naiawng che enni chang hanow pren kowi chawkkrawma naprung kown, now angak paw naprung kown chekhai.30“Ang kowh Tanai Ni kowi enni nakhangah reng kown takla, now ang kowh taklowp taklangra te kowi paw enni naring nakawah reng kown takla. Ang dow CHAKRAMANG chekhai.31“Enni nacham paw prengia kownkow süngnam hai lümla ngak hown taklawp taiua mih maru tut-e enni nakowkowi kown nadowi. Naiawng mih maru tut-e cham kowi hanow enni natasür talawk kown chekhai. Ang dow CHAKRAMANG enni kowh Thurai chekhai.32“Enni pur kowi lawngtang matanguüa uang khe enni nahawt iowng kown. Naiawng hai lawngtang matanguüa kowi enni naring nakawah kown takla. Enni kowh Thurai kowi ringkawma hown enni nakramah kown. Ang dow CHAKRAMANG chekhai.33“Enni pren kowi kowh tawi uowi mih akeng chenchapuüa kowi enni nachang nowng kown nadowi.34Prenlang maru-uüa kowi paw kowmatia chenchapuüa kowi iawng enni namüla kown. Prenlang maru-uüa kowi paw kowmatia tasakrau iawng enni nasakrauah kown takla. Aigupta prenchakuüa tut-e enni paw prenlang maru iawng hai enni uowila akat mih enni natuakla reng kown takla. Ang dow CHAKRAMANG enni kowh Thurai chekhai.35“Chet tara mih khin khe achi anawmma enni nachetah kown. Chang kun khe paw atown aklang khai müa hown khai uanh khe lah, adik ahowp khai müa hown khai uanh khe lah achima enni nakhaiah kown takla.36Enni kowh set hai akeng mih uanh khai müa ün athikma enni nachangah kown. Ang dow CHAKRAMANG enni kowh Thurai chekhai. Aigupta pren hownia kowh uang lawtla enni mih dow ang chekhai.37Ang kowh ari arow maten hai ang kowh ari aiang maten enni nachünah kaneu kown takla. Ang dow CHAKRAMANG chekhai,” pakhai.
The Seed Company