Tara chet miuüa1
1Josua kowng kung kowi CHAKRAMANG kowi Israeluüa lüntaah mih, “Kananuüa kowi nakowsen kownkow anging pungmadawng hownia mia iawng mih krungchakuüa chow narik tarü kown?” pakhai.2Nakhowk khe CHAKRAMANG klangah mih, “Juda krungchakuüa narik tarü kown; pren dow amatni rut kowi ang apta pe mih chowbowt,” pape khai.3Nami laiklow tata hanow amatni kowh tainau Simiawn krungchakuüa kowi Juda krungchakuüa tek pe mih, “Anging kaah mih süng kowi kowh uowi mih Kananuüa hown nadowk tasen kownkow uang tawi khowng anging diah, now enni kaah mih süng kowi kowh uowi miuüa hown enni cham dowk tasen khe anging paw tawi khowng enni kown taih,” pape khai. Naiawng rakowi Simiawn krungchakuüa mih Juda krungchakuüa hown tawi tarü tasen khai.4Now Juda krungchakuüa kowdowk tasen now Kananuüa hai Perizuüa kowi mih amatni rut kowi CHAKRAMANG ap pe khai. Judauüa mih maru iun 10,000 ia mowr Bezek marow kowi saita khai.5Nakhowk khe nakowi mih Bezek marow mang Adoni-Bezek kowi paw krumla büah khai, now aia kowi paw senah büah khai. Amatni dow Kananuüa hai Perizuüa kowi nowngta khai.6Tasenra hownia Adoni-Bezek powt khe amatni dow kowkawikrawiah now uang khümla khai, now aia kowh rutma hai khawkma ün tengta pe khai.7Nakhowk khe Adoni-Bezek tek mih, “Mang 70 ia kowh rutma hai khawkma ang tengta pe khai. Amatni dow ang pawitang hownia kowh hawk mih hawm ma kan ma krawi lümah now cha büah khai. Amatni kowi kowh ang changah iawng Thurai paw kawmat chang ang mih chekhai,” pakhai. Nami kung kowi amatni dow Bezek marow mang kowi mih Jerusalem marow kowi kowpawla khai, now nakowi mih Bezek marow mang dow kowng khai.8Juda krungchakuüa dow Jerusalem marow mih kowsenah hanow kowpowngta khai. Amatni dow marowchakuüa kowi saita bowk hanow marow mih towkta pe khai.9Nami kung kowi dow amatni mih hungma mawngma süng, Negeb hai awkaw süng kowi kowh uowi mih Kananuüa kowi nakowsen kownkow tarü khai.10Amatni dow Hebrawn kowi kowh uowi mih Kananuüa kowi kowsenah hanow Sesai, Ahiman hai Talmai pami marow kowi kownowngta büah khai. Hebrawn marow kowh ming auown khe dow Kiriat-Arba chekhai.11Hebrawn marow hownia amatni mih Debir marow kowi kowdowk tasen kownkow tarü büah khai. Debir marow kowh ming auown khe dow Kiriat-Sefer chekhai.12Nakhowk khe Israeluüa kowi Kaleb tek pe mih, “Kownowng powng Kiriat-Sefer marow mih maru kowi dow ang kowh chama Aksa hown ang pe tachawngah kown,” pakhai.13Now Kaleb kowh tainau Kenaz chapa Awtniel mih Kiriat-Sefer marow kowpowngta khai. Naiawng rakowi Kaleb mih achama Aksa kowi Awtniel hown pe tachawngah khai.14Ahua tut-e tawi mang kung kowi a-pa hownia nalüla krawng parah kownkow Aksa kowi ahua chükah khai. Now nami lawnguan kowi nakowtalawp kownkow Aksa mih a-pa tut-e kowkowi khai. Kawrngaramchük hownia Aksa iu dowm khe a-pa Kaleb lüntaah mih, “Tum, tawng chow en nau?” pakhai.15Nakhowk khe Aksa tek pe a-pa mih, “Apa, ang nau mih uowi pachap tak. Süngrüp süngkangma dow en peta ang khowk. Tawkche nakowi dow tui uowi dowi chekhai. Naiawng rakowi sakrauma hown pela ang tuikuam ne diah,” pape khai. Nahanow Aluk kowi kowh tuikuam hai Adak kowi kowh tuikuam mih Aksa kowi Kaleb peah khai.16Kenuüa dow Judauüa hown Jeriko marow — Chekmarawng singh marow — hownia uang lawt khai, now amatni dow Arad marow mrawkphak pra kowh Juda süng kowi kowh süngrüp süngkangma kowi kowkowi khai. Nakowi kowh maru-uüa hown amatni dow kowtawi uowi khai. Kenuüa dow Mosi pu kowh krungchakuüa chekhai.17Juda krungchakuüa dow amatni kowh tainau Simiawn krungchakuüa hown kowkowiah now Zefat marow kowi kowh uowi mih Kananuüa kowi kowsenah khai, now amatni kowh marow mih asaima piakla pe khai. Naiawng rakowi nami marow ming dow Hawrma pahai chap pe khai. (Hawrma pami dow “Piakra” pami chekhai).18Juda krungchakuüa dow Gaza marow, Askelawn marow, Ekrawn marow hai naiawngün riaret kowi kowh uowi mih süng maten powngta büah bowk khai.19CHAKRAMANG dow Juda krungchakuüa tut-e tawi uowi reng chekhai. Amatni dow hungma mawngma süng mih krawi powngta khowk chowdiah. Nachenganchepaw dowm kowi kowh uowi miuüa kowi dow nowng prüt büah dowi chekhai. Tawngplawng kowchow panow nakowi uowi miuüa kowh dow lawngha hown kowh kawrnga kari uowi chekhai.20Now Mosi laikham uowi iawng Kaleb kowi dow Hebrawn marow mih peah khai. Nami Hebrawn marow hownia dow Anak kowh chapa sum ia kowi Kaleb prütta khai.21Nachenganchepaw Benjamin krungchakuüa dow Jerusalem marow kowi kowh uowi mih Jebusuüa kowi nowng prütta dowi chekhai. Naiawng rakowi Jebusuüa dow kawmat mowr paw Benjamin krungchakuüa hown tawi taiua uowi reng chekhai.22Josef krungchakuüa dow Bethel marow kowi kowsenah khai. CHAKRAMANG dow amatni tut-e tawi uowi reng chekhai.23Amatni dow marow mih kowrik müah kaneu kownkow kowrik chin maru ne khai. Bethel marow ming auown khe dow Luz chekhai.24Nami kowrik mü marow mih maru-uüa dow Bethel marow hownia maru uang lawt lowk ia mih khi büah khai. Now amatni dow nami maru kowi tek pe mih, “Marow kowi nakupla kown mih tiama tüng anging dit. En che tüng anging now tawngpaw anging nachang en kown nadowi,” pakhai.25Nami maru tüng pe tiama now amatni dow marow lak kowi kowkup khai bowt, now marow maten kowi kowh maru kowi krawi sai büah khai. Nachenganchepaw nami maru hai aia krungchakuüa kowi dow saila büah dowi chekhai.26Nami kung kowi dow nami maru mih Hituüa pren kowi kowkowi hanow kowthawp marow lowk khai, now nami marow ming dow Luz pahai aia chap pe khai. Kawmat mowr paw nami marow ming dow naiawng chowreng tak chekhai.27Manase krungchakuüa dow Bet-San marow, Tanak marow, Dawr marow, Ibleam marow, Megido marow hai naiawngün marow riaret kowi kowh kua kowi uowi mih maru-uüa kowi nowng prüt büah dowi chekhai. Tawngplawng kowchow panow naiawngün kua hai marow kowi kowh uowi mih Kananuüa dow naiawngün hownia napowt dowi kownkow tatang chen chekhai.28Naiawng rakowi amatni kowi dow Israeluüa prütta bowk dowi chekhai. Nachenganchepaw Israeluüa uang kür kung kowi amatni kowi mih kür hown changla nar khai.29Efraim krungchakuüa paw Gezer marow kowi kowh uowi mih Kananuüa kowi prütta bowk dowi chekhai. Naiawng rakowi Kananuüa dow nakowi kowh Efraimuüa hown tawi hing uowi khai.30Zebulun krungchakuüa paw Kitarawn hai Nahalal marow kowi kowh Kananuüa kowi prütta dowi chekhai. Amatni dow naiawngün marow kowi kowh Kananuüa tut-e tawi hing uowi khai. Nachenganchepaw amatni dow kür hown Kananuüa kowi changla nar khai.31Aser krungchakuüa paw Ako, Sidawn, Alab, Akzib, Helba, Afik hai Rehawb marow kowi kowh uowi mih Kananuüa kowi prütta bowk dowi chekhai. Naiawng rakowi amatni dow naiawngün marow kowi kowh Kananuüa pungmadawng kowi tawi hing uowi khai.33Naptali krungchakuüa paw Bet-Semes hai Bet-Anat marow kowi kowh uowi mih Kananuüa kowi prütta bowk dowi chekhai. Amatni dow naiawngün marow kowi kowh Kananuüa pungmadawng kowi tawi hing uowi khai. Nachenganchepaw amatni dow naiawngün Kananuüa kowi kür hown changla nar khai.34Dan krungchakuüa kowi dow hungma mawngma süng kowi kür hown Amawruüa pe uowiah khai; amatni kowi dow dowm kowi Amawruüa pe uangah dowi chekhai.35Amawruüa dow Aijalawn marow hai Salbim marow, now Heres hungh kowi nauowi kownkow tatang chen khai. Nachenganchepaw Josef krungchakuüa uang kür kung kowi kür hown amatni kowi Josef krungchakuüa changla nar khai.36Amawruüa kowh süng dow Akrabim pami pangchowng hownia Sela marow iawng awr pün ngamlam khai.
The Seed Company