Tara chet miuüa2
1CHAKRAMANG kowh kramamu dow Gilgal pami arah hownia Bokim pami arah kowi uangah hanow tek pe Israeluüa mih, “Aigupta pren hownia ang uang lawtla enni khai. Now enni pipu-uüa tut-e ang khamah mih pren kowi ang uang pawla enni khai. Ang tek enni mih, ‘Enni hown kowh ang towah mih sangbowk laitawm katpaw ang napiakta kown nadowi.2Mami prenchakuüa hown enni natatow sangbowk laitawm kown nadowi; amatni kowh phuchuara ün enni napiakta pe kown,’ pakhai. Tawkchedow ang laiklow enni chün dowi chekhai. Tawngplawng kowchow naiawng enni tuk chang khai?3Naiawng rakowi mami maru-uüa kowi enni pur hownia ang naprütta enni kown nadowk pami kawmat ang tek enni khowk. Amatni dow enni kow kowi chuh hown kowh takru mih iawng naown kown, now amatni kowh thuraiuüa kowi enni tawi chupiia mih dow leng kowi kowh tasowk iawng naown kown,” pakhai.4Maiawngün laiklow Israeluüa kowi CHAKRAMANG kowh kramamu tek pe kung kowi amatni dow atün atünma kar büah khai.5Naiawng rakowi nami arah ming dow Bokim pahai chap pe khai. (Bokim pami dow “Kar rah” pami chekhai). Amatni dow nami arah re-e CHAKRAMANG vüi tawncher hown chang phuchua khai.6Nami kung kowi dow maru kawmuüa kowi Josua pe mangta khai bowt. Now amatni dow amatni chowlowkkow kaah mih krawng bawn napowng kownkow mang büah khai bowt.7Josua sing uowi mowr dow Israeluüa mih CHAKRAMANG kowi chupiia büah khai. Now Josua kowng kung kowi paw lawngtang aluchowuüa sing uowi mowr dow maru kawmuüa mih CHAKRAMANG kowi chupiia reng tak chekhai. Naiawngün aluchowuüa dow Israeluüa vüi kowi kowh CHAKRAMANG chang pe mih maten khi miuüa chekhai.8CHAKRAMANG kowh nar Josua dow 110 ning singla now kowng khai bowt. Josua dow Nun kowh chapa chekhai.9Now maru kawmuüa dow aia kowh uak mih Timnat-Sera marow kowi kowh aia kowh krawng bawn kowi dupah khai. Nami marow dow Efraim krungchakuüa kowh hungma mawngma süng kowi kowh Gas hungh tawngphak prakowi chekhai.10Josua chowng kowi kowh maru kowng bowk kung kowi awr ta iuksown mih Israeluüa dow CHAKRAMANG kowi tuk dowi chekhai. Now Israeluüa vüi kowi kowh CHAKRAMANG chang pe mih paw tawi tuk büah dowi chekhai.11Amatni dow CHAKRAMANG mik kowi angakma mih lup chang büah khai. Amatni dow Baal pami thuraiuüa kowi cham chupiia büah khai.12Amatni dow Aigupta pren hownia amatni kowi kowh uang lawtla mih CHAKRAMANG amatni pipu-uüa kowh Thurai kowi nuata büah khai. Amatni dow amatni riaret kowi kowh akeng mih chenchapuüa kowh thuraiuüa kung kowi cham tawi krawi büah khai, now cham tawi chupiia büah khai. Naiawng hai amatni dow CHAKRAMANG kowi towkah kunmarau khai.13Amatni dow CHAKRAMANG kowi nuata hanow Baal hai Astarte pami thuraiuüa kowi cham tawi chupiia büah khai.14Naiawng rakowi CHAKRAMANG dow Israeluüa luk kowi kunmarauah khai. Amatni kowi dow ransu-uüa rut kowi aia ap-ah khai. Naiawngün maru-uüa dow amatni kowi pawla pe dawngthawnguan khai. Amatni kowi dow amatni riaret kowi kowh ransu-uüa rut kowi CHAKRAMANG ap-ah khai. Naiawng rakowi amatni dow ransu-uüa pur kowi nowng iowng dowi bowt chekhai.15Israeluüa cham dowk tasen towng CHAKRAMANG mih aia tekta khowk iawng amatni kowi krawi kingküaah reng chekhai. Naiawng rakowi amatni dow ransu-uüa kowi mapaw nowng büah dowi chekhai. Now amatni luk kowi dow phih kraingma chekhai.16Nami khin khe CHAKRAMANG mih amatni vüi tow pe aluchowuüa reng chekhai. Naiawngün aluchowuüa dow tara chet miuüa chekhai. Naiawngün tara chet miuüa dow ransu-uüa rut hownia Israeluüa kowi lawngah reng chekhai.17Nachenganchepaw Israeluüa dow naiawngün tara chet miuüa kowh laiklow sünta büah dowi. Amatni dow CHAKRAMANG kaah sakowm dowi iawng akeng mih thuraiuüa kung cham tawi krawi hanow cham tawi chupiia büah khai. Amatni kowh pipu-uüa dow CHAKRAMANG ana pek chün reng chowdiah. Tawkche kawmat kowh Israeluüa dow naiawngün ana pek lenlenma tamata büah khai.18Israeluüa vüi CHAKRAMANG tow pe mih tara chet miuüa tut-e dow aia tawi uowi reng chekhai. Naiawngün tara chet miuüa sing uowi mowr ransu-uüa rut hownia Israeluüa kowi CHAKRAMANG lawngah reng chekhai. Tawngplawng kowchow panow ransu-uüa rut kowi Israeluüa kham ngare hai kawmkrat mih khin khe naiawngün tara chet miuüa dow CHAKRAMANG tut-e awr kar reng chekhai. Nahanow CHAKRAMANG dow Israeluüa kowi plan saksing sanaah reng chekhai.19Nachenganchepaw naiawngün tara chet miuüa kowng kung kowi dow maru kawmuüa mih amatni pipu-uüa lak-e lang suiiai kaniai mih tiama kowi plan mang büah khai. Amatni dow akeng mih thuraiuüa kung plan krawi büah khai, akeng mih thuraiuüa kowi tabawk krawm se tawi chupiia büah khai. Amatni kowh chowm krang uowi krang angakma mih hai lai üa kürma mih dow mapaw hing towta büah dowi chekhai.20Naiawng rakowi CHAKRAMANG dow Israeluüa luk kowi kunmarauah khai. Aia tek mih, “Maiawngün maru-uüa dow amatni pipu-uüa hown kowh ang towah mih sangbowk laitawm chün dowi, now ang kowh ana pek paw sünta büah dowi chekhai.21Naiawng rakowi Josua kowng khe pren kowi kowh ta uowi ne tak mih akeng chenchapuüa kowi Israeluüa pur hownia ang naprütta pe kown nadowi bowt.22Amatni kowi dow naiawngün chenchapuüa ang tawngah hanow ang nachaingah kown. Tawngplawng kowchow panow amatni pipu-uüa iawng kawmat kowh Israeluüa mih ang tiama kowi namang tak chünchü pami ang tuk kown nau kowh chekhai,” pakhai.23Naiawng rakowi CHAKRAMANG dow naiawngün chenchapuüa kowi pren kowi towta hüah khai; aia dow Josua rut kowi paw apta dowi chekhai, now pren hownia paw amaisang prütta bowk dowi chekhai.
The Seed Company