Isai44
1CHAKRAMANG tek mih,“Aw ang kowh nar Jakawb, ang ruiah mih Israel,kawmat mih sünta diah.2Thawp en mih CHAKRAMANG, en u mu lak kowi thawp en mih hai nakhowng en kown mih CHAKRAMANG tek mih:Aw ang kowh nar Jakawb, ang ruiah mih Jesurun, hangkow kram diah.3Tawngplawng kowchow panow tui sakkrai mih krawng kowi ang nakhük pe tui kown,now akang khawngma mih süng kowi tui hawr klunglung ang nachangah kown.En kowh chauüa luk kowi ang kowh lümla ang nahüng pe kown,now en kowh krungchakuüa kowi ang napeah prasi kown.4Amatni dow aw pang kowi kowh pram iuksown iawng naiuk nasown kown.Amatni dow tui ria kowi kowh awilaw singh iuksown iawng naiuk nasown kown.5Nakhowk khe tawngbak mih natek kown mih, ‘Ang dow CHAKRAMANG maru,’ napa kown.Now tawngbak mih dow, ‘Ang dow Jakawb krungchak,’ napa kown.Tawngbak mih dow amatni rut kowi narui CHAKRAMANG ming hanow natek kown mih, ‘Ang dow Israel chenchap,’ napa kown,” pakhai.6Israel kowh mang hai lawng miia CHAKRAMANG,aia dow mukuang siphaiuüa kowh CHAKRAMANG chekhai.Aia tek mih, “Ang dow auown hai achur;ang klen kowi dow tawng Thurai paw uowi dowi bowt.7Ang iawng mih mia chow uowi?Uowi khai hanow aia mih pacham phuangah lah.Achük alai kowh thawp maru mih kung kowi tawng chow phaw mih aia pacham tek ang lah,now pur prakowi tawng chow naphaw kown mih aia pacham tek ang lah.8Hangkow chür hai hangkow kram büa diah.Maiawngün maten naphaw kown mih alai hownia ang tek khowk.Nami dow alai hownia enni tuk khowk chekhai,now naiawngün saksi dow enni chekhai.Ang klen kowi Thurai uowi khai tak bow?Uowi dowi, tawng iawng mih tatung tanimra hungh uowi dowi bowt chekhai,now uowi mih paw ang tuk dowi bowt,” pakhai.9Arup aren thawp miuüa dow asung uowi dowi chekhai. Amatni kowh naiawngün asung khakma mih uanh dow tawngpaw mrawkra uowi dowi chekhai. Naiawngün arup aren kowi chupiia miuüa dow mik duma; amatni dow tawngpaw tuk dowi chekhai. Naiawng rakowi amatni dow narukrai kown.10Asung uowi dowi mih arup aren thawp mih dow bualama mih maru chekhai.11Arup aren kowi chupiia miuüa kowi dow rukrai rakowi nakuakah kown. Arup aren thawp miuüa dow lusa maru klen kowi miapaw nadowi chekhai. Amatni dow tara chetra kowi pacham uang iowng lah; amatni dow kram kowh nachür kown, now naka rukrai kown.12Lawngha uanh thawp mih dow paw lawngha pasek hanow nami hown mairing dawng kowi chang lup reng. Aia dow aia kowh rut kür hown nami lawngha bawpah hanow thawp arup aren reng chekhai. Nahanow aia dow sakkrai hai kür khowk reng; aia dow tui sakkrai hown kow uak reng chekhai.13Singh hown kowh uanh thawp sara dow leng hown khaiah hanow kawlawm hown thawp pung reng, now aher müa hown herah hanow apowm mih krawi thawpah reng chekhai. Nami arup aren dow kim kowi natowah kownkow maru powm iawng aia thawpah reng chekhai.14Aia dow krawi tu sidar singh reng, nadowi now sasua singh krawi tu reng. Aia dow kaurawng kowi krawi chowk painglang singh hanow pe iukah reng chekhai.15Naiawngün singh dow akung kowi aia changla sawp dawnglang khai, now dawnglang mih dow aia thawpla arup aren khai. Dawnglang mih dow changla maih hanow aia khawmla maih reng, now engla chakkham reng chekhai. Now uowi dawnglang tak mih hown dow aia thawpla arup aren hanow krawng kowi tabawk krawm se aia chupah reng chekhai.16Aia changla sawp mih maih kowi dow aia krengla chaknga hanow du pat aia chaah reng chekhai. Now khawm maih se aia tek mih, “Uh, maih klangiung lai kowbow! Ang khawm maih mih sowr uowi lai kowbow!” pakhai.17Ta lat mih singh dung hown dow aia thawpla arup aren hanow krawng kowi tabawk krawm se aia chupiiaah khai. Aia dow nami arup aren tut-e lü prasi mih, “Lawng ang diah; en dow ang kowh thurai chekhai,” pakhai.18Naiawngün maru-uüa dow tawngpaw tuk dowi chekhai. Amatni kowh dow mik duma rakowi tawngpaw khi dowi chekhai, now sak paw aduma rakowi tawngpaw tuk büah dowi chekhai.19“Pabak mih singh dung dow ang changla maih hanow ang krengla chaknga khai, now nami chaknga mih ang chaah khai. Now ta lat mih singh dung hown dow suiiai kaniaima mih uanh ang nathawpla kown bow? Sawp dung kowi krawng kowi tabawk krawm se ang nachupiiaah kown bow?” pahai miapaw tek dowi chekhai. Tawngplawng kowchow panow amatni dow ditchow khowm sangching hai chanlaira uowi dowi chekhai.20Tikah hanow chowng plawi mih kowi amatni chupiia mih dow lainowmma buala kowh chekhai. Amatni dow amatni kowi nowng lawngah dowi mih kowi owmah khai. Amatni dow, “Ang rut kowi kowh mami arup dow Thurai nadowi,” pami nau tek dowi chekhai.21CHAKRAMANG tek mih,“Aw Jakawb, en dow ang kowh nar pami ka tuakah diah.En kowi dow ang thawp en mih chekhai; en dow ang kowh nar chekhai.Aw Israel, en kowi dow ang natamata kown nadowi.22En kowh atawi ama maten uangnim iawng ang henta en khowk,now en kowh angak maten dow rau-e kowh mai iawng ang mata en khowk.Ang tut-e uang plan diah.Tawngplawng kowchow panow ang klanta en khowk chekhai,” pakhai.23Aw mukuang, tek piaw meng diah.Tawngplawng kowchow panow CHAKRAMANG dow mami awdara lup chang khai.Aw lusa kowi kowh arah büpma mih maten,tüng awng klow büa diah.Aw hungma mawngma, aw kaurawng hai nakowi kowh singh kau maten,enni mih atünma tek piaw meng büa diah.Tawngplawng kowchow panow CHAKRAMANG mih aia maru-uüa kowi lawngah khai,now aia dow Israel kowi naka rowsira kown.24Lawng en mih hai mu lak hownia thawp en mih CHAKRAMANG tek mih,“Ang CHAKRAMANG; lowra sia thawp mih dow ang chowtaih.Krawi phat mukuang mih dow ang chowtaih,now krawi phat lusa mih paw ang chowtaih.25Risi iuauüa kowh amatra dow ang piakta pe reng,now hawra sarauüa kowi dow bualama ang changah reng.Chanlaima miuüa kowh tüngsangra ang piakta pe reng,now amatni kowh chanlaira dow bualama ang changta pe reng.26Nachenganchepaw ang kowh risiuüa laiklow dow ang pe tachiah reng.Amatni hownia Jerusalem lawnguan kowi ang tek mih, ‘Aia lak kowi maru nauowi kown,’ pakhai.Amatni hownia Juda marow lawnguan kowi ang tek mih, ‘Amatni kowi dow naplan thawpah iawk kown,now piak khowk mih hownia naplan rü iawk kown,’ pakhai.Pren kowi kowh apiaknama mih arah maten dow ang naplan rawah iawk kown mih ang tek pe khai.27Tui abüpma mih aw kowi, ‘Kang diah,’ pahaiang tek pe hanow tui kang reng chekhai.28Mang Sairus lawnguan kowi ang tek mih, ‘Aia dow ang kowh ruapur thing mih chekhai;ang naawmrawmla kownkow ang tek mih srui aia nachang kown.Jerusalem marow mih naplan rawah iawk kownkow aia nape ana kown.Now Thurai chup kim vüi naphük kimchüng kownkow aia nalawt ana kown,’ pakhai,” pape khai.
The Seed Company