Isai43
1Aw Jakawb, aw Israel, kawmat thawp en miia CHAKRAMANG tek mih,“Hangkow kram diah, tawngplawng kowchow panow ang lawng en khowk chekhai.Rük en ming khükhü ang haw en khowk, en dow ang kowh chekhai.2Tui iawng en mang mih khin khe ang natawi uowila en kown,aw iawng en mang khe aw tui mih nalimla en kown nadowi.Maih dawng iawng en mang khe en nakam kown nadowi,maih lün bia laplap mih dow en buk kowi nakak kown nadowi.3Tawngplawng kowchow panow ang dow CHAKRAMANG en kowh Thurai chekhai,ang dow en kowh lawng miia hai Israel kowh chimsaima mih Thurai chekhai.En klan müa dow Aigupta pren ang napeah kown,en takcha kowi Ethiawpia hai Seba pren ang napeah kown.4En takcha kowi akeng mih maru kowi ang napeah kown,en kowh asak takcha kowi akeng chenchapuüa kowi ang napeah kown.Tawngplawng kowchow panow en dow ang mik kowi asung khakma chekhai,now ang sakrau en hai ang pe en ringkawra mih chekhai.5“Hangkow kram diah,ang tawi uowila en reng chekhai.Satlawt hownia en kowh krungchak kowi ang nauang pawla kown,now satkup hownia ang nakua nalawm en kown.6Tawngphak pra kowh pren kowi ang natek pe kown mih,‘Kowbüah kowi lawtta diah,’ napape kown.Now mrawkphak pra kowh pren kowi ang natek pe kown mih,‘Kowbüah kowi hangkow town diah,’ napape kown.Amatni kowi dow ang natek pe kown mih,‘Alakma hownia ang chapauüa kowi uang pawla büa diah,now prenchur nammowt hownia ang chamauüa kowi uang pawla büa diah.7Ang ming hown kowh hawah miuüa kowi,ang kri kraing müa ang thawpah miuüa kowi,now ang thawpah miuüa maten kowi uang pawla büa diah,’ napape kown,” pakhai.8Mik uowi chepaw mik duma iawng miuüa pauang lawt lah,now param uowi chepaw param pangma iawng miuüa pauang lawt lah.9Chenchap maten pacham takua talawm lah,now maru-uüa mih arasang pacham uowi lah.Amatni pungmadawng kowi pur pra naphaw kown mih mia chow nowng tek?Now achük alai kowh lawnguan mia chow ia tek?Amatni kowh laiklow na nowm pami nathuak saksi kownkow pauang pawla maru büah lah,nahanow saksi thuak miuüa kowh laiklow ta hanow, “Lainowm,” pami nowng tek kown towbowt.10Israeluüa kowi CHAKRAMANG tek pe mih,“Ang chowtaih Thurai pami enni natukla kownkow hai ang luk kowi enni naia owmla kownkowenni dow ang kowh saksi thuak mih hai ang ruiah mih nar chekhai.Ang dowi rawn dow tawng iawng mih Thurai paw uowi dowi tak chekhai,now ang kung kowi paw tawng iawng mih Thurai paw nauowi kown nadowi bowt.11“Ang, ang chowtaih CHAKRAMANG,ang klen kowi dow lawng miia uowi dowi bowt chekhai.12Ang dow pur prakowi naphaw kown mih lawnguan kowi uang phuang khai,now nami kung kowi dow ang uang lawng enni khai.Nakhowk khe enni pungmadawng kowi tawng mih thurai paw uowi dowi chekhai,nami lawnguan kowi kowh ang kowh saksi thuak mih enni chekhai.Ang CHAKRAMANG mami laiklow ang tek khowk, ang chowtaih Thurai.13Auown hownia achowngma pat ang chowtaih Thurai;ang rut hownia miapaw nanowng powt kown nadowi,now ang chang lup khe miapaw nowng hang ang dowi chekhai,” pakhai.14CHAKRAMANG enni kowh lawng miia,Israel kowh chimsaima mih Thurai tek mih,“Nalawng enni kownkow Babulawn pren kowi ang kowchin siphaiuüa kown,now Babulawnuüa kowi amatni changla bawri mih chawnlawng hown ang nauang pawla kown.Amatni kowi dow cham powt mih maru-uüa iawng ang nauang pawla kown.15Ang chowtaih CHAKRAMANG, enni kowh chimsaima mih Thurai;ang chowtaih Israel kowh thawp miia hai enni kowh mang,” pakhai.16CHAKRAMANG mih sata iawng thawp tiama khai,aia dow tui ahuma mih iawng thawp tiama khai.17Aia mih kawrnga kari, kawrnga hai akürma mih siphaiuüa kowi hawah khai.Amatni dow akrowksang nakowi tim khai, now nowng rü dowi bowt chekhai.Amatni dow maibu iawng hing mit bowk khai.18Aia tek mih, “Achük alai kowh lawnguan hangkow krawi tuak büah tham;prim khowk mih lawnguan kowi hangkow krawi lawp büah tham bowt.19Sünta, ang chang lup sar lowk khowk.Nami dow kawmat tarowng thüm khowk.Nami enni khi dowi bow?Süngrüp süngkangma iawng ang nathawp tiama kown,now süngrüp süngkangma kowi ang nathawp pe aw kown.20Kaurawng uaramchak, brenkhui hai ut uakling hawmh narowsi ang kown.Tawngplawng kowchow panow ang lang kloah mih maru-uüa kowi napeah tui kown,süngrüp süngkangma kowi amatni nakhamah kownkow ang nakamrüt pe tui kown.21Ang kowh rowsira naphuangla kownkowamatni kowi dow ang matia maru iawng ang thawpah mih chekhai.22“Tawkchedow aw Jakawb, en haw ang dowi chekhai;aw Israel, nachupiia ang kown mih en bowm tüng khowk chekhai.23Nachangla tikah mih uanap kownkow en uang pawla ruapur dowk,now tawng iawng mih uanap hown paw en tüng ang ringkawra dowk chekhai.Nachang ang kawmdi uanap kown mih kurdik ang tang en dowi,now natowk ang nam iungma mih maikhük kownkow ang pe bowm en dowi chekhai.24Tawng iawng mih nam iungma mih chap paw ang vüi en uang ranla dowi chekhai,now tawncher uanap chang müa sau hown paw en pe awmrawm ang dowi chekhai.Nami takcha kowi en kowh angak kurdik ang luk kowi en tang ang khai,now en kowh angak maten hown en towk ang kawm khai.25“Ang, ang matia vüi en kowh angak mih ang iawtta en khai;en kowh angak mih ang naka tuakah kown nadowi bowt.26En lawnguan kowi pe ka tuak ang diah;uang diah, nami lawnguan kowi achi taüa diah sik.En kowh angak uowi dowi mih amatra nakhila kownkowen matia vüi kowi tek lai diah.27En kowh pipu-uüa dow chang angak khai;en kowh aluchowuüa dow kingküala ang mih angak chang khai.28Naiawng rakowi enni kowh Thurai chup kim kowi kowh uamowuüa kowi ang napeah rukrai kown;Jakawb kowi napiak kown mih piati krüa kowi ang natowah kown,now Israel kowi maru rensi küakau ang nachangla kown,” pakhai.
The Seed Company