Isai32
1Sünta, mang lowk ia mih anowmma nauang chowm mang kown,now pren kruitown miuüa mih anowmma nachet tara kown.2Amatni dow li hownia kowh tapetra nachowng kown,now liku uangchak hownia kowh tatung tanimra nachowng kown.Amatni dow süngrüp süngkangma kowi hawr iualua mih tui iawng nachowng kown,now sat den hown kowh kam mih krawng kowi kowh pe klim mih huamang nachowng kown.3Nakhowk khe dow mik uowi miuüa nakhi anowm bowt kown,now param uowi miuüa dow nata klow bowt kown.4Tuakah kaneu dowi kowi chang lup miuüa naka chanlaira bowt kown,now lai a-ma miuüa dow achimma natek lai bowt kown.5Bualama mih maru kowi dow maru iung pahai natek pe kown nadowi bowt,now sangching khawmma miuüa kowi paw ringkawra uowima mih maru pahai natek pe kown nadowi bowt.6Tawngplawng kowchow panow bualama mih maru dow tek sangbua lai reng chekhai,now aia kowh sak dow angak lawnguan kowi hing tuakta hüah chekhai.Aia dow suiiai kaniaima mih lup chang reng,now CHAKRAMANG lawnguan kowi uowiah parukrai mih laiklow krawi uet reng chekhai.Aia dow hawm sakkrai hown uowi miuüa kowi peah chakkham dowi,now tui sakkrai miuüa kowi peah tui dowi chekhai.7Sangching uowi dowi miuüa kowh lup dow angakma chekhai.Ngarai miuüa krawi lü khe apek taing chepawdai lai hown napiakta kownkow thawp prengia ngak reng chekhai.8Nachenganchepaw maru iunguüa dow thawp sangkrangra iung reng,now amatni dow amatni kowh lup iung hown anikma uowi reng chekhai.9Asowrma uowi mih masiuüa hawmh ow,ang kowh laiklow sünta büa diah.Tuak kawm tuak krat uowi dowi mih masiuüa hawmh ow,ang kowh laiklow kowi pe param büa diah.10Tuak kawm tuak krat uowi dowi mih masiuüa hawmh ow,paning hown ditdet kung kowi dow kram rakowi enni nachür kown.Tawngplawng kowchow panow grep uih mih natapiak kown,grep uih klek khin mih nauang ting kown nadowi bowt.11Asowrma uowi mih hai tuak kawm tuak krat uowi dowi mih masiuüa hawmh ow, kram rakowi chür büa diah.Enni kowh tawnguat klüpta büah hanow khup sala uan büa diah.12Mik towm prang mih grep krum tapiak rakowi sak nga büa diah,auih atekma mih grep ruih tapiak rakowi ti downgprang büa diah.13Ang maru-uüa kowh pren kowi piawra atekma mih kim piak khai bowt;amatni kowh how klow atekma mih marow dow tapiak khai bowt.Nakowi dow chuh singh hai chuh mung atekma uang uowi khai bowt.Naiawng rakowi sak kowi rau lai kowh ti downgprang büa diah.14Kangchawngra kim hai maru atekma mih marow kowi miapaw nauowi kown nadowi bowt,nami arah dow kawrngaramchük hai tawncher hawmh tawkra nachowng bowt kown.Nachenganchepaw akung kowi dow aluk hownia a-i luk kowi nauang hüng a-i Lümlasai kown.Nakhowk khe dow süngrüp süngkangma mih asi uowima naphaw hanow luprak ahuma naphaw kown.16Lümlasai uang uowi khe dow süngrüp süngkangma kowi tara nowm nauowi bowt kown,now asi uowima mih krawng kowi dow anowm nauowi bowt kown.17Tawngplawng kowchow panow nakowi mih maru maten anowmma nachang lup bowt kown.Nakowi dow taking tasangra hai thaulangra anikma nauowi bowt kown.18Ang maru-uüa dow taking tasangra atekma mih uowi rah kowi nauowi bowt kown,now thaulangma mih kim kowi hai pusara uowi dowi mih tanaira kowi nauowi büah bowt kown.19Ria hown kaurawng kowi kowh singh kau maten mih tapiak bowk khowk chepaw,marow mih asaima pat bawn hown alik sang phaw khowk chepaw20Thurai mih aia maru-uüa kowi napeah prasi kown;aw pang maten kowi krawi sawt liu miuüa dow naka luprak kown,now chia hown kawrngaramchük hawmh kowi thaulangma nape tawah büah kown.
The Seed Company