Isai33
1Aw Asuria, en dow krawi piak maru reng chekhai,en luk kowi piakra nauang ting kown mih dow kramra uowi lai kowbow!En kowi dow katpaw maru piak en dowi tak chowdiah.Tawkche en dow krawi piak maru khai.En kowi dow miapaw kaah sakowm dowi iawng chang en dowi chowdiah.Tawkche en dow maru kowi kaah sakowm dowi iawng krawi chang khai.Nachenganchepaw piakra lup en churta khe dow en kowi paw napiakta en kown;kaah sakowm dowi iawng mih lup en ki changta khe dow en kowi paw kaah sakowm dowi iawng nachang en kown.2Aw CHAKRAMANG, saksing sana anging diah;anging hawt chawng en reng chekhai.Rau towng ang maru-uüa vüi uang chowng kür diah,now akrat pusa mih khin khe uang chowng anging kowh lawng miia diah.3En kowh kraw tün hown dow ransu-uüa powt reng chekhai;en che rü hanow chenchapuüa taset plawt reng chekhai.4Krawi piak maru reng miuüa low, luprak kowi plawng hawm krawi piakta iawng en kowh uanh paw narupta en kown.En kowh uanh luk kowi maru kawmuüa mih plawng hawm iawng nauang taluk khup kown.5CHAKRAMANG dow kri kraingma chekhai!Aia dow mukuang kowi uowi khai.Aia dow Zaiawn kowi tara nowm hai anowm atekma changah khai.6Aia dow chowngchowng saksakma aia maru-uüa kowh thaulangra nachowng kown,now lawngra, chanlaira hai tukra pek mih nachowng kown.CHAKRAMANG kowi ringkaw mih lak-e aia maru-uüa tut-e asung lang uowi mih lup uowi dowi bowt chekhai.7Nachenganchepaw kawmat dow sam mü madiah,Jerusalem kowi kowh tasen kiakma miuüa tiama towng kowi karla sawm khai,now nathawp taking tasangra kownkow cham chinah mih ria mang miuüa dow sak kowi rau lai kowh kar khai bowt.8Tiama chungh dow akhaw aklaima towbowt;tiama chungh iawng miapaw mang mih uowi dowi bowt chekhai.Amatni hown kowh tatowah mih sangbowk laitawm dow Asuriauüa piakta khai bowt;marow kowi miapaw towah asung dowi bowt chekhai,now mia kowi paw ringkawah dowi bowt chekhai.9Pren mih dow uowila uiting uangtak khai,now tama iawlaw khowk chekhai.Lebanawn dow ka rukrai khai bowt,now rüprapma phaw khai bowt.Sarawn dow süngrüp süngkangma iawng phaw khai bowt,now Basan hai Karmel kowi kowh singh ram maten dow prua bowk khowk chekhai.10CHAKRAMANG tek mih, “Khaleng dow ang narü bowt kown,khaleng dow ang kowh kür hai ang kowh kraingra mih ang natüngah bowt kown.11Enni Asuriauüa dow kaah atawng akeng dowi mih singh chowtaih enni chowk khai,now enni changah mih lup maten dow tawngpaw kaah atawng akeng dowi chekhai.Ang kowh lümla mih maih iawng napiakta enni kown.12Enni kowi dow enni kowh hut chowng thundi dowi mowr natowk enni kown,now kripta mih chuh mung maih kowi kowh nawmah mih iawng enni nachowng kown,” pakhai.13Alakma kowi enni uowi miuüa tawng chow ang chang mih sünta büah;atawnchow kowi kowh enni uowi miuüa ang kowh kür kowi chünah büa diah.14Zaiawn kowi uowi mih maru ngakuüa lainowmma kram khai;Thurai kowi ringkaw dowi miuüa chür khai bowt.Amatni tek mih, “A-i pungmadawng kowi krawi kam mih maih hown mia chow nowng uowi kown?Chowngchowng saksakma lün pluplup mih maih hown mia chow nowng uowi kown?” pakhai.15Achinawmma uowi mih hai anowm tek mih chowtaih nanowng uowi kown;kür hown krawi khün mih kowi sui mih hai paw bümsua dowi mih chowtaih nanowng uowi kown.Sai sak kown mih laiklow nauta dowi mih chowtaih nanowng uowi kown,now chang lup ngak mih kowi khi kown nau dowi mih chowtaih nanowng uowi kown.16Aia dow thaulangma nauowi kown,now aia kowh tatung tanimra dow süng kowi kowh akhawtma mih kangchawngra kim nachowng kown.Aia kowi dow nakram pe chakkham kown,now aia dow naka tui ngengche kown.17En kowh mik dow mang kowh klangiungra nakhi kown,now sünghi aphiama mih pren paw en nakhi kown.18En kowh sak dow alai kowh lainowmma kramra uowi mih laiklow natuak kown.En ka tuak kown mih, “Asuriauüa kowh chang ingsap reng mih maru tawng kowi chow?Krawi kawk mu reng mih maru tawng kowi chow?Akhawtma mih kangchawng rah kim rüa mih maru tawng kowi chow ?” napa kown.19Naiawngün owrowma mih maru-uüa kowi en nakhi kown nadowi bowt.Awdara uowima hai tuktaah dowi mih laiklow tek miuüa kowi en nakhi kown nadowi bowt.20Pawi maten anging sunla mih marow Zaiawn prakowi tang mü madiah.Thaulangma mih uowi rah Jerusalem kowi en nakhi kown.Nami marow dow akhawtma mih tangbung iawng naown kown;nami tangbung tükra chung dow katpaw nahowkah kown nadowi,now atük müa leng paw lowkchow khowm natarai kown nadowi.21Nakowi dow akürma mih CHAKRAMANG anging iung müa kowi nauowi kown.Aia dow taka müa aiukma mih aw iawng naown kown.Nami aw dow tawng iawng mih ransu-uüa paw nanowng pown kown nadowi,now ransu-uüa kowh akürma mih chawnlawng paw nanowng pown kown nadowi.22Anging kowh tara nowm chet mih hai anging kowh ari aiang pek mih dow CHAKRAMANG chowtaih.Anging kowh mang dow CHAKRAMANG chowtaih,anging kowh lawng miia dow aia chowtaih.23Kawmat dow ransu-uüa chawnlawng kowi kowh uaniang tük müa leng tahaw khai bowt;now amatni kowh chawnlawng sanh müa uaniang paw ia teah dowi bowt chekhai.Maru hownia kowh amatni cham khünah mih uanh dow anging nataret bowt kown;naiawngün uanh dow klowng khawn tabai miuüa khowm natawi paw kown.24Nakhowk khe dow Zaiawn kowi kowh uowi miuüa,“Ang arau uowi khai,” pami miapaw natek kown nadowi bowt.Nakowi kowh uowi miuüa maten kowi amatni kowh angak mih nalawtta pe bowt kown.
The Seed Company