Uown Thawp33
Jakawb hai Esau iüah takrum mih
1Jakawb dow krawi tang mü hanow 400 ia maru hown aia prakowi ataimow Esau uang haimang mih khita khai. Naiawng rakowi aia dow Leah hai achauüa kowi athum, Rahel hai Josef iüah kowi athum, now anarma pre ia hai amatchi kowh chauüa kowi changah pre thum khai.2Aia dow auown kowi anarma pre ia hai achauüa kowi rik pe mangah khai. Nami kung kowi dow Leah hai achauüa kowi towah khai. Achur kowi dow Rahel hai Josef iüah kowi towah khai.3Now aia dow amatni pur kowi rik mang khai. Aia dow mang se mang se krawng kowi tabawk krawm se chupla khai. Naiawng hai chupla ranit kat kung kowi aia dow ataimow re-e kowtowm khai.4Nakhowk khe Esau mih uang haiiowm hanow Jakawb kowi uang dawiah khai, now namah khai. Nahanow amatchi pre ia dow kar khai.5Nami kung kowi dow Esau mih krawi tang mü hanow masiuüa hawmh hai ngeuüa hawmh kowi khi khai. Now aia dow Jakawb kowi lüntaah mih, “En hown katsang uang tawi mih iu iawngünuüa mia chow?” pakhai.Jakawb tek pe mih, “Naiawngün chauüa dow en nar kowi Thurai saksing sanaah kowh peah mih chowbowt,” pape khai.6Auown kowi dow narma pre ia mih achauüa hailawm uang tatawn hanow Esau kowi uang chupah khai.7Nami kung kowi Leah paw achauüa hailawm uang tatawn hanow uang chupah khai. Achur kowi Rahel hai Josef iüah paw uang tatawn hanow uang chupah khai.8Now Esau tek pe Jakawb mih, “Tiama rawng kowi kowh ang krumla mih tawncher hawmh tawng rakowi chow?” pakhai.
Jakawb tek pe Esau mih, “Chakramang, naiawngün dow en hownia kala sakraura kownkow chekhai,” pape khai.9Nakhowk khe Esau tek pe mih, “Ang kowh paw ahuma uowi khowk chow le. En kowh uowi mih srui dow en tut-e pacham uowi lah towbowt,” pakhai.10Nachenganchepaw Jakawb tek pe mih, “Naiawng e nadowi iow, ang chup en, en che sana ang khai hanow ang kowh awmrawm sung paw ang diah. Achi takrum mih khin khe en awmrawm ang mih ang khi mih dow ang khi Thurai lumowr iawng chekhai.11Ang uang pawla en mih awmrawm sung sakrauma hown paw ang diah. Thurai saksing sana ang rakowi ang kowh paw ahuma uowi khowk,” pape khai.
Now naiawng Jakawb tek pe rengreng rakowi Esau dow paw pe khai.12Nami kung kowi Esau tek mih, “Chu, khaleng dow a-i mang bowt lah. En hown katsang ang tawi mang kown,” pakhai.13Nachenganchepaw Jakawb tek pe Esau mih, “Chakramang, maiawngün ngeuüa hawmh dow asowmchow uowi ne tak mih en tuk. Nami klen kowi iawn cha mih chiama hai ruapurma hawmh kowi paw atuak takla. Naiawngünuüa kowi dow lenlenma che mangla hanow pani sang khowm padow nakowng bowk kown chekhai.14Naiawng rakowi ang kowh chakramang, sakrauma hown en nar dowi rawn rik mang diah. Ang kowh ngeuüa hawmh hai tawncher chauüa nowngia mang mowrchow chi naurawng naurachow ang uang mangla kown chekhai. Seir pami arah kowi en hown ang uang takrum kown taih,” pape khai.15Nami khin khe Esau tek pe mih, “Naiawng now ang hown kowh uang tawi mih maru-uüa kowi ang ta towla en ne kown towbowt,” pakhai.
Jakawb tek pe mih, “Naiawng pat paw lakke dowi tham. En kowh sakraura ang ka mih ang tut-e lang iuk chekhai,” pakhai.16Naiawng rakowi Esau dow nami ni khe Seir pami arah prakowi kutplan mang khai.17Nachenganchepaw Jakawb dow akeng prakowi cham lang mang hanow Sukawt marow kowi kowtowm khai. Nakowi aia dow aiamat vüi kowi thawp te lowk khai, now aia kowh tawncher hawmh vüi paw thawp pe rum pre sum buk khai. Naiawng rakowi nami arah ming dow Sukawt pahai chap pe khai. (Nami auan dow “te” pami chekhai).18Akung kowi dow Jakawb mih Sukawt marow hownia kutplan lawt hanow Kanan pren kowi kowh Sekem marow kowi kowkowi khai. Naiawng hai Padan-aram pren hownia aia uang mang mih dow thaulangma hown uang ting khai. Now aia dow nami marow uat kowi khup tangbung khai.19Akung kowi nami krawng dow Hamawr krungchakuüa hownia tai akawm hown Jakawb hing ranta khai. Hamawr dow Sekem büah kowh pa chekhai.20Nakowi dow Jakawb mih thawp phuchuara lowk hanow aming El-Elawhe-Israel pahai chap pe khai. (Nami auan dow “Israel kowh Thurai chowtaih Thurai” pami chekhai).
The Seed Company