Uown Thawp34
1Akat khe Dina mih nakowi kowh masiuüa hawmh hown tawi taiua kownkow kowkowi khai. Dina dow Leah hown kowh Jakawb kaah mih chama chekhai.2Nami khin khe Hiv chenchap aluchow Hamawr kowh chapa Sekem mih Dina kowi khita khai. Now Sekem mih aia kowi townah hanow piakta pe siri khai.3Sekem mih Dina kowi hing tuakta hüah chekhai. Aia dow Dina kowi naukhita khai, now Dina kowi aia naukhi-ah mih lawnguan tek pe khai.4Nami kung kowi Sekem tek pe a-pa Hamawr mih, “Paimi malauüa kowi kowlo ang; aia hown tachawng kown ang nau,” pakhai.5Jakawb mih achama Dina kowi Sekem piakta pe siri mih lawnguan tukta khai bowt. Nachenganchepaw achapauüa dow nami khin khe dowm kowi cham thing tawncher hawmh reng tak chekhai. Naiawng rakowi aia mih achapauüa uang mang dowi mowr tawngpaw lai dowi chekhai.6Now Sekem pa Hamawr mih Jakawb hown nauang tatek kownkow uang khai bowt.7Nami khin khe Jakawb chapauüa paw dowm hownia uang mang kowh nami satang uang tawi tata khai. Nami satang tata hanow amatni dow lainowmma saktuak kawm hai kunmarau khai. Tawngplawng kowchow panow Jakawb kowh chama kowi Sekem piakta pe siri mih dow Israel chenchap kowi peah rukrai mih chekhai. Naiawng Sekem nachang kown mih mapaw taka dowi chowdiah.8Jakawb hai achapauüa kowi Hamawr tek pe mih, “En chama Dina kowi ang kowh chapa Sekem lainowmma naukhi. Naiawng rakowi sakrauma hown en chama kowi ang kowh chapa hown pe tachawngah diah.9Tachawng talang lawnguan kowi a-i talawp talai diah sik. Enni kowh chamauüa kowi pe paw anging, now anging kowh chamauüa kowi paw paw büa diah.10Anging hown tawi taiua uowi büa diah. Pren dow enni pur kowi uowi hüah khowk. Makowi enni nau rah re-e krawi uowi büa diah, now krawng paw enni nau rah re-e krawi ran büa diah,” pakhai.11Now Dina pa hai arakuüa kowi Sekem tek pe mih, “Enni che saksing sana ang khai hanow enni kük ang mih ang nape enni kown taih.12Enni kowh chama hown pe tachawng ang büa diah, now buk sung hai akeng mih sia enni kük ang iawng ang nape enni kown taih,” pakhai.13Amatni kowh tuamow Dina kowi Sekem piakta pe siri khai rakowi Jakawb chapauüa mih Hamawr iüah pachowh kowi kuanah khai.14Amatni tek pe mih, “Hiah khampha uanh pik dowi mih maru tut-e anging kowh tuamow kowi anging nowngia pe dowi. Naiawng che anging chang hanow anging kowh chenchap ming napiak kown chekhai.15Tawkchedow anging tek iawng enni che chang now anging nauta chepaw naia kown. Nami dow enni pren kowi kowh kachakuüa maten anging iawng hiata khampha uanh pik kown takla.16Naiawng che enni chang hanow anging kowh chamauüa kowi enni nowngia paw kown taih, now enni kowh chamauüa kowi paw anging napaw kown. Naiawng khe chiang enni hown achap sang iawng anging tawi ia taiua uowi kown.17Tawkchedow anging tek iawng enni che hiah khampha uanh pik dowi now anging kowh tuamow kowi pawla now mami hownia anging powt kown taih,” pakhai.18Nami laiklow dow Hamawr iüah pachowh mih nauta khai.19Sekem mih Jakawb chama kowi lainowmma naukhi khai. Naiawng rakowi aia dow Jakawb chapauüa laiklow chün khai. Aia dow amatni kimchak kowi kowh aring akaw lang uowi mih maru chekhai.20Now Hamawr hai Sekem iüah pachowh dow marow tapplawt re-e kowkowiah hanow marowchakuüa kowi kowtek pe khai.21Amatchi dow tek pe mih, “Sünta büa diah, paimi maru-uüa mih a-i kowh auiua chekhai. A-i pren kowi amatni nauowila kown mih arah paw ahuma chekhai. Naiawng rakowi amatni nau rah re-e makowi pacham uowi büah lah towbowt. Amatni kowh chamauüa kowi a-i paw pe lah, now a-i kowh chamauüa kowi paw a-i pe pawah lah.22Tawkchedow amatni tek iawng a-i chang pe lup achap kown takla. Amatni iawng a-i kachakuüa maten mih nahiahta khampha uanh pik kown takla. Naiawng che a-i chang pe hanow a-i hown achap sang iawng tawi taiua uowi büah kown mih nauta chekhai.23Nami lup che a-i chang pe hanow amatni kowh chia tawn, rua hai ruapur tawn, dawngthawnguan hai akeng mih tawncher hawmh maten a-i kowh nachowng bowk kown towbowt. Naiawng rakowi chu, amatni tek iawng a-i chang diah sik, now amatni dow a-i hown natawi uowi kown towbowt,” pakhai.24Nahanow marow kowi kowh kachakuüa maten dow Hamawr hai achapa Sekem iüah tek iawng nauta khai. Amatni bowkbowk dow hiah khampha uanpik khai bowt.25Tawkchedow nami sum ni kowh ni khe kachakuüa kowh khampha uanpik hiah lawi rau reng tak khe Dina kowh rakmow sin Simiawn hai Levi iüah mih pawla saidawng now marow kowi kowkup khai, now marow kowi kowh kachakuüa maten kowi krawi saita bowk iüah khai. Naiawng naown kown mih marowchakuüa dow miapaw owm dowi chowdiah.26Amatchi dow Hamawr hai achapa Sekem kowi paw saila khai. Now Sekem kim hownia Dina kowi mih uang pawla iüah khai.27Jakawb kowh akeng mih chapauüa dow atuamow kowi piak pe siri mih marow kowi kowkup khai. Amatni dow kowng mih uak ün khila büah khai, now nami marow kowi uowi mih maten pawla büah bowk khai.28Amatni dow marow lak kowi kowh hai uat kowi kowh chia ün, rua hai ruapur ün, kawrngaramchük ün, tawncher uowi mih maten pawla büah bowk khai.29Nami klen kowi nami marow kowi kowh masiuüa hai ngeuüa maten kowi paw khümla büah khai, now dawngthawnguan hai kim kowi kowh uowi mih maten paw pawla bowk khai.30Nami kung kowi Simiawn hai Levi iüah kowi Jakawb tek pe mih, “Enchi rakowi mami pren kowi kowh Kananuüa hai Perizuüa nasui ang kown towbowt. Enchi uang pawla ang phih mih chekhai. A-i dow maru iun a-echow taih. Amatni takrüpah hanow uang sen a-i mih khin khe pakimma a-i nakowng kown towbowt,” pakhai.31Nachenganchepaw Simiawn hai Levi iüah tek pe a-pa mih, “Anging kowh tuamow kowi maru nanüla chawkkrawma kown mih iung khai bow?” pape khai.
The Seed Company