Plan Rui29
1CHAKRAMANG dow Sinai hungh kowi Israeluüa vüi Mosi kowi peah sangbowk laitawm akat khowk chekhai. Now mami sangbowk laitawm laiklow dow Moab pren kowi amatni uowi reng tak khe Israeluüa kowi natek pe kownkow Mosi kowi CHAKRAMANG ta plan bawng pe mih chekhai.2Mosi dow Israeluüa maten kowi hawah now tek pe mih, “Aigupta pren kowi kowh Faraw luk kowi, aia kowh maru iukuüa luk kowi hai aia pren luk kowi kowh CHAKRAMANG changah mih maten enni khi khowk chekhai.3Amatni luk kowi kowh ngare towk rah, amatra hai awdara kraingma CHAKRAMANG chang pe mih dow enni khi bowk khowk.4Nachenganchepaw naiawngün enni khi-ah mih hai enni taah mih auan dow kawmat mowr kowi CHAKRAMANG pe tuk enni dowi tak chekhai.5CHAKRAMANG dow süngrüp süngkangma iawng 40 ning mowr uang pawla enni khai. Nami likawm ning takra kowi enni kowh tawnguat hai phanaikhawk dow piak dowi chekhai.6Kawm ün, grep tui hai arak ün tawngpaw enni ka cha ka kham dowi chekhai. Nachenganchepaw enni lakke mih srui dow CHAKRAMANG pe enni reng chekhai. Naiawng aia chang enni mih dow CHAKRAMANG chowtaih enni kowh Thurai pami enni natukla kownkow chekhai.7“Mami arah kowi a-i uang ting mih khin khe Hisbawn marow mang Sihun hai Basan pren mang Awk dow uang dowk a-i tasen khai. Nachenganchepaw amatni kowi dow a-i nowngta khai.8Now amatni kowh pren dow a-i powngta pe khai. Naiawngün pren dow nachangla dawngthawnguan kownkow Reuben krungchak maten, Gad krungchak maten, now Manase krungchak dawnglang kowi a-i peah khai.9Naiawng rakowi mami sangbowk laitawm kowi kowh ana pek maten dow kaneuma chünah büa diah. Nahanow enni changah mih lup srui dow naiung kown.10“Ani dow CHAKRAMANG enni kowh Thurai pur kowi enni bowkbowk mih uang iowng khai. Enni Israeluüa maten dow enni krungchakuüa kowh aluchow, enni kowh maru iukuüa hai enni kowh lawngtang aluchowuüa hown uang iowng khai.11Now enni kowh chauüa hai enni kowh masi hawmh paw enni hown uang tawi khowk. Nami klen kowi enni kowh singh tuk miuüa hai tui towng miuüa paw tawi uowi khowk; naiawngün maru-uüa dow enni pungmadawng kowi kowh tawi uowi mih akeng chenchapuüa chekhai.12CHAKRAMANG enni kowh Thurai dow ani mih enni hown tatow sangbowk laitawm khai. Nami sangbowk laitawm nachünla kownkow mami re-e enni uang iowng mih chekhai.13Ani kowh mami sangbowk laitawm hownia enni dow aia kowh maru chowng khai bowt, now aia dow enni kowh Thurai na khai bowt. Nami dow enni kowh pipu Abraham, Isak, Jakawb hai enni tut-e kowh aia takhamta mih iawng aia chang mih chekhai.14Mami sangbowk laitawm dow ani kowh CHAKRAMANG a-i kowh Thurai pur kowi kowh uang iowng miuüa vüi krowngchow nadowi. Mami dow kawmat kowh uang dia dowi tak mih a-i kowh chuprek chaprekuüa vüi paw na chekhai.16“Aigupta pren kowi tawng iawng chow a-i uowi mih enni tuk khowk chekhai. Now akeng pren iawng cham mangla hanow mami pren kowi tawng iawng chow a-i uang ting mih paw enni tuk chekhai.17Naiawngün prenchakuüa pungmadawng kowi dow suiiai kaniaima mih arup ün enni khi khowk chekhai. Naiawngün dow singh hown, hua hown, kuh hai tai hown kowh thawpah mih arup chekhai.18Ani kowh mami re-e enni uowi mih pungmadawng kowi kachakuüa chepaw, masiuüa chepaw, lowra mih chenchap chepaw, lowra mih krungchakuüa chepaw CHAKRAMANG enni kowh Thurai hownia miapaw naia powt kown nadowi, now akeng chenchapuüa kowh thuraiuüa kowi natawi chupiia kown nadowi. Naiawng akeng thuraiuüa kowi tawi chupiia mih maru dow akhakma hai akru uowima mih uih thawp mih singh prün iawng naphaw kown.19Naiawng mih maru dow CHAKRAMANG kowh sangbowk laitawm laiklow ta khowk hanow kowmatia kowi maiawng natape sak khawt kown. Aia natuak kown mih, ‘Ang nau iawng ang uowi chepaw aiungma ang nauowi kown taih,’ napa kown. Naiawng mih maru dow enni Israeluüa pachenma luk kowi nauang pawla piakra kown chekhai.20Naiawng mih maru kowi dow mapaw CHAKRAMANG nalawtah kown nadowi. Aia kowi dow lainowmma CHAKRAMANG nakunmarauah kown, now aia kowi dow CHAKRAMANG nalang krata kown. Mami rirow bowih kowi kowh piati laiklow arui uowi mih maten dow aia luk kowi CHAKRAMANG nauang pe klaah kown, now aia kowh ming dow lusa hownia CHAKRAMANG namata kown.22“Naiawng hai nami pren kowi dow ngare towk rah maten hai rawka maiow CHAKRAMANG nauang pawla kown. Naiawngün lawnguan kowi enni kowh krungchakuüa hai alakma hownia kowh uang mih prenlang maru-uüa dow maiawng nakhi kown:23Paprenma kowi kowh krawng bawn dow awisa hai napawksi hown piak bowk khai. Nakowi dow tawng liu paw sawt dowi bowt, ru paw ru dowi bowt, bawrchak paw awm dowi bowt, now pram mung paw uowi dowi bowt. Nami pren dow CHAKRAMANG kowh kunmaraura maih iawng lün pluplup mih hown kowh piakta mih iawng chekhai. Nami pren dow CHAKRAMANG piakta mih Sawdawm, Gawmawra, Adma hai Zebawim marow iawng chekhai.24Nami khita hanow akeng chenchapuüa nalünta kown mih, ‘Tawngplawng kowchow mami pren kowi maiawng CHAKRAMANG tuk changah khai? Tawng rakowi chow naiawng khowt pat CHAKRAMANG tuk kunmarau khai?’ napa büah kown.25“Nakhowk khe maru natek kown mih, ‘Tawngplawng kowchow panow Aigupta pren hownia uang lawtla kung kowi CHAKRAMANG amatni pipu-uüa kowh Thurai dow amatni hown tatow sangbowk laitawm khowk chowdiah. Nachenganchepaw amatni dow naiawngün sangbowk laitawm mih nuata büah khai.26Amatni kowi dow akeng thuraiuüa kowi CHAKRAMANG pe chupiiaah dowi chowdiah. Nachenganchepaw CHAKRAMANG kowi towta hanow katpaw amatni tukah dowi mih thuraiuüa kowi cham chupiia büah khai, now naiawngün thuraiuüa pur kowi cham tabawk büah khai.27Naiawng rakowi CHAKRAMANG kowh kunmaraura maih iawng lün pluplup mih dow mami pren luk kowi uang kla mih chekhai. Mami chabowih kowi kowh arui uowi mih piati maten dow mami pren luk kowi uang pe klaah mih chekhai.28CHAKRAMANG dow aia kowh kunmaraura akraingma mih hai kramra uowima mih kunmaraura hown Israeluüa kowi kunmarauah khai. Naiawng rakowi Israeluüa kowi dow amatni pren hownia akeng pren kowi aia prütah khai. Amatni dow kawmat pat paw akeng pren kowi uowi reng tak chekhai,’ napa büah kown.29“Tawngbak mih lawnguan dow CHAKRAMANG a-i kowh Thurai pe tuk a-i dowi. Nachenganchepaw aia kowh rirow dow aia phuang a-i khai. Naiawngün rirow laiklow dow a-i hai a-i kowh chu chauüa mih chowngchowng saksakma nachünah kown takla,” pakhai. Naiawngün laiklow maten dow Mosi tekah mih chekhai.
The Seed Company