Plan Rui28
1“CHAKRAMANG enni kowh Thurai laiklow achima chünah büa diah. Ani kowh ang pe enni mih ana maten kaneuma chünah büa diah. Nahanow CHAKRAMANG mih palusama kowi kowh akeng chenchapuüa luk kowi natow enni kown.2CHAKRAMANG enni kowh Thurai laiklow che enni chün khai hanow maiawngün prasi enni naka reng kown:3“Enni kowh marow kowi kowh lup changra kowi enni naka prasi kown,now üa hai laih kowi kowh lup changra kowi paw enni naka prasi kown.4Enni kowh chauüa nakawmla kownkow enni naka prasi kown,üa hai laih kowi luprak naphawla kownkow enni naka prasi kown,chia, rua hai ruapur naprungla kownkow enni naka prasi kown.5Enni kowh chapam hai kawmdi towk rah kawng ün naka prasi kown.6Ni towng kowh enni changah mih lup maten kowi paw enni naka prasi kown.7“Kingküa enni mih ransu-uüa kowi dow enni tut-e sum pat CHAKRAMANG nachangah kown. Amatni dow patiachow hown nauang sen enni kown. Tawkchedow ranit tia hown amatni napowt kown.8“Enni kowh cha bawk luk kowi CHAKRAMANG kowh prasira nauowi kown, now enni changah mih lup maten kowi paw aia dow nape enni prasi kown. Naiawng hai CHAKRAMANG enni kowh Thurai mih aia pe enni mih pren kowi nape enni prasi kown.9“CHAKRAMANG kowh ana pek chün hai aia tiama kowi enni namang kown takla. Nahanow aia dow aia takhamta iawng aia lang kraah mih chenchap nachangla enni kown.10Nakhowk khe dow palusama kowi kowh chenchapuüa mih CHAKRAMANG kowh maru pami natuk enni bowt kown. Nahanow amatni dow nakram enni kown towbowt.11Nape enni kown pahai enni pipu-uüa tut-e CHAKRAMANG enni kowh Thurai khamah mih pren kowi ahuma aia nape enni prasi kown. Aia dow enni kowh kimchakuüa kowi hai enni kowh tawncher kowi ahuma nape kaah chah kown, now enni kowh üa hai laih kowi paw luprak ahuma nape phawah kown.12“Enni kowh pren kowi akhin towng nape enni uang hanow enni changah mih lup maten kowi nape enni prasi kownkow CHAKRAMANG mih mukuang kimplawt nauow enni kown. Nahanow chenchap ahuma kowi enni nanowng pe lowi kown. Nachenganchepaw enni dow mia hownia paw lowi pawk natakla kown nadowi.13Akeng chenchapuüa maten luk kowi enni nauowi reng kownkow CHAKRAMANG nachang enni kown. Tawkchedow ani kowh ang pe enni mih CHAKRAMANG enni kowh Thurai ana pek prakowi pe ching hai enni nachün kaneu kown takla. Naiawngün ana maten hownia enni nacham ia süt kown nadowi. Akeng thuraiuüa kung enni cham ia krawi kown nadowi, now amatni kowi dow chup paw enni nacham ia chup kown nadowi. Nahanow maru maten luk kowi enni nauowi kown towbowt.15“Nachenganchepaw enni che CHAKRAMANG enni kowh Thurai lai chün dowi, now ani kowh ang pe enni mih ana hai ari arow chünah kaneu dowi hanow maiawngün piati maten enni luk kowi nauang kla kown:16“Enni kowh marow kowi kowh lup changra kowi enni naka piati kown,now üa hai laih kowi kowh lup changra kowi paw enni naka piati kown.17Enni kowh chapam hai kawmdi towk rah kawng ün naka piati kown.18Enni kowh chauüa na-ela kownkow enni naka piati kown,üa hai laih kowi kowh luprak na-ela kownkow enni naka piati kown,chia, rua hai ruapur na-ela kownkow enni naka piati kown.19Ni towng kowh enni changah mih lup maten dow naka piati kown,naiawngün dow enni chang chepaw naphaw kown nadowi.20“Lup ngak chang hai CHAKRAMANG kowi enni nuata mih rakowi enni changah mih lup maten kowi aia mih nape enni piati kown, now krat pusara hai takrow takraira nauang pawla enni kown. Nahanow alenma enni napiak kown.21Enni nakowpowngah kown mih pren kowi dow CHAKRAMANG mih enni pungmadawng kowi natow enni makowng hawi kown. Enni piak bowk dowi mowr nami makowng hawi dow nauowi kown.22CHAKRAMANG mih amin uowi mih ma, krau ngak hai ting rawka aia nauang pawla enni kown, now khown hai adenma mih li hown enni kowh luprak napiakta enni kown. Now enni chum bowk dowi mowr aia mih natowk enni ngare kown.23Enni luk kowi kowh mukuang dow kri iawng, now krawng dow lawngha iawng akhawtma aia nachang enni kown. Aia dow mapaw nape enni uang kown nadowi.24CHAKRAMANG mih enni pren kowi uang takcha mukuang hownia se hai dinchow nauang pe klaah kown. Naiawngün dow enni chum bowk dowi mowr aia nauang pe klaah kown.25“CHAKRAMANG mih enni kowh ransu-uüa tut-e enni sum pat nachang enni kown. Patiachow hown enni kowsenah chepaw ransu-uüa pur hownia ranit tia hown enni napowt kown. Nami khin khe dow lusa kowi kowh akeng prenchakuüa maten khi enni hanow natakrowla enni kown.26Nami khin khe enni kowh uak dow uakling uaber hai kaurawng uaramchak hawmh kowh chakkham nachowng kown. Naiawngün uakling uaber hai kaurawng uaramchak hawmh kowi naprüt kown mih miapaw nauang kown nadowi.27CHAKRAMANG mih Aigupta pren kowi kowh rawka nauang pawla enni kown. Aia dow pawibau, tui sing ma, pik bawr hai prak ün nauang pawla enni kown. Naiawngün rawka dow miapaw nanowng iung enni kown nadowi.28Aia dow thula mih rawka ün, mikdula mih rawka ün hai sangching takümla dowi mih rawka ün nauang pawla enni kown. Aia dow naiawngün rawka hown nape ngare enni ngamlam kown.29Mikdu mih iawng enni paw sowp rutrut se ni-e enni namang kown, now tawng lup paw enni naka arak kown nadowi. Atungma maru nachang enni anowng apowng kown, now nauang khün enni uanh kown; nami hownia nalawng enni kownkow miapaw nauang kown nadowi.30“Enni kowh masi kham nauowi kown; tawkchedow nami masiuüa kowi maru napiakta pe siri kown. Enni nachang kim kown; tawkchedow nami kim kowi enni naka uowi kown nadowi. Enni nachang grep krum kown; tawkchedow enni naka cha kown nadowi.31Enni pur kowi enni kowh chia dow maru nangen enni kown; tawkchedow nami chia nga asekchow paw enni natawi ka cha kown nadowi. Enni kowh kawrngaramchük kowi kür hown maru napawla enni kown; tawkchedow nami kawrngaramchük mih nauang plan sa enni kown nadowi bowt. Enni kowh ruapur mih enni kowh ransu-uüa rut kowi nacham ting kown. Naiawngün phih hownia nauang lawng enni kownkow miapaw nauang kown nadowi.32“Enni kowh chu-uüa chauüa mih akeng chenchap rut kowi nacham ting kown. Ni towng iak towng naiawngün chauüa nauang mang kown mih kowi enni hawt mü kangowh enni kowh mik nari kown. Tawkchedow nowng changra kür tawngpaw enni kowh nauowi kown nadowi.33Enni kowh üa hai laih kowi kowh uih-ak hai enni kowh kawm rak dow enni tukah dowi mih chenchapuüa nachata enni kown. Enni sing uowi mowr dow nowng chang powng changra hai angak kangowh enni nahing khamta hüah kown.34Naiawngün piakra maten enni khita now enni nathu kown.35CHAKRAMANG dow enni kowh kungh kowi hai khawk kowi amin uowi mih bau hown natowk enni ngare kown; nami dow katpaw naiung kown nadowi. Nami bau dow enni kowh lunui hownia khawkpha mowr nakrawi uowi kown.36“Enni kowh mang hailawm nakhümla enni hanow akeng chenchapuüa pren kowi CHAKRAMANG natow enni nar kown. Nami chenchap kowi dow enni hai enni pipu-uüa khowm padow tukah dowi chekhai. Nakowi dow singh hai hua hown kowh thawpah mih arup kowi enni nacham chupiia kown.37CHAKRAMANG nacham krawi uet enni kown mih rah kowi kowh chenchap maten dow khi enni hanow lainowmma natakrowla enni kown. Amatni dow naprawng naren enni kown, now nachangla enni rensi kau kown.38“Aliu dow ahuma enni nasawt kown. Tawkche luprak dow a-echow taih enni naka kown. Tawngplawng kowchow panow enni kowh luprak dow plawng hawmh nachata bowk kown chekhai.39Enni nachang grep krum kown, now khet paw enni naming nakhetah kown. Tawkchedow enni naka cha kown nadowi; atui paw enni naka kham kown nadowi. Tawngplawng kowchow panow grep uih kowi dow dung nakrawi awt kown.40Enni kowh pren paprenma kowi kanrawn singh nauowi kown. Tawkchedow kanrawn uih mih naprua bowk kown chekhai rakowi kanrawn sau mih enni naka tawng kown nadowi.41Enni nakaah kown mih chauüa maten enni tut-e naka uowi kown nadowi. Tawngplawng kowchow panow naiawngün ngeuüa hawmh kowi dow enni kowh ransu-uüa nakhümla now nachangla nar kown.42Aphawm aphawmma plawng hawmh nauangah hanow enni kowh pren kowi kowh singh kau hai uih-ien pantawn nachata enni bowk kown.43“Enni pungmadawng kowi kowh tawi uowi mih akeng chenchapuüa dow nauang kureng ngamlam kown, now kür paw nakür ngamlam kown. Nachenganchepaw enni dow nangarai ngamlam kown, now kür paw nakhowk ngamlam kown.44Amatni dow nape enni lowi kown. Tawkche enni dow amatni kowi nanowng pe lowi kown nadowi. Amatni dow enni luk kowi nauowi kown, now enni dow amatni nimkrüa kowi nauowi kown.45“CHAKRAMANG enni kowh Thurai rirow hai ana pek enni chün dowi rakowi maiawngün piati maten enni luk kowi nauang kla kown, now enni luk kowi nahing uowi hüah kown. Maiawngün piati hown dow enni nachum kown.46Maiawngün piati dow awdara uowima mih amatra hai tarip müa amatra iawng enni hai enni kowh krungchakuüa tut-e chowngchowng saksakma nauowi kown.47Aiungma enni uowi mih khin khe awmrawmma hai apiawma hown CHAKRAMANG enni kowh Thurai kowh lup enni chang dowi chekhai. Naiawng rakowi CHAKRAMANG nauang chin enni kown mih ransu-uüa kowi akhawr a-awng hai tui sakkrai hawm sakkrai hown enni nachang pe lup kown. CHAKRAMANG dow enni tapiak dowi mowr akratma mih nar lup chang hown natowk enni ngare kown.49“Nakingküala enni kownkow prenchur nammowt hownia CHAKRAMANG nauang pawla enni chenchap lowk kown. Nami chenchap kowh lai dow enni tukta kown nadowi. Nami chenchap dow uamu cham dowk ua khe kowh iawng enni tut-e nauang ting kown.50Naiawngün chenchap dow apowm mük khowm uowiah pakram mih maru naown kown. Amatni dow lawngtang matanguüa kowi nanü naklowk kown nadowi, now ngeuüa hawmh kowi paw nasaksing sana kown nadowi.51Amatni dow enni kowh tawncher chauüa hai uih-ien pantawn nachata enni bowk kown. Amatni dow enni kowh uih-ien pantawn, grep tui sar, kanrawn sau, chia hai ruapur chah tawngpaw natow enni kown nadowi. Amatni rakowi enni khowm padow achur kowi natapiak bowk kown.52Amatni dow CHAKRAMANG enni kowh Thurai nape enni kown mih pren kowi kowh marow maten naumta enni lut kown. Now amatni dow enni lang sakowmah mih enni kowh akroma hai akhawtma mih tap ün napiakta enni kown.53“Ransu-uüa umta enni lut khe dow sakkraira hown enni nangare kown. Nami khin khe dow CHAKRAMANG enni kowh Thurai pe enni mih enni kowh chauüa nga enni nacha kown.54Nakhowk khe dow enni pungmadawng kowi kowh maru lang iung hai lang kawklaw mih khowm padow lainowmma kunma ngak hai nasip kown. Aia dow aia kowh tainau chepaw, aia lang sakrauah mih masi chepaw, aia kowh sing uowi reng tak mih chauüa kowi chepaw nasaksing sana kown nadowi.55Aia chaah mih chah nga aia dow mia kowi paw naretla pe kown nadowi. Tawngplawng kowchow panow ransu-uüa umta enni hüah khe nami chah nga klen kowi dow tawng chakkham paw nauowi kown nadowi chekhai.56Enni pungmadawng kowi kurengma mih masiuüa katpaw chawp krawng dowi mih paw nauowi kown, now aia dow maru kowi paw lainowmma sakrau chepaw naia kown. Nachenganchepaw nami khin khe dow naiawng mih masiuüa khowm padow aia lang sakrauah mih hua hai chauüa kowi mapaw nasaksing sana kown nadowi.57Aia penah mih chah hai bai dow kukpa aia nachaah kown; mia kowi paw napela kown nadowi. Naiawng enni nachang kown mih dow ransu-uüa umta enni hüah mih khin khe chekhai.58“Mami rirow bowih kowi kowh arui uowi mih maten enni chünah kaneu kown takla. Now rowsira hai kramra uowima mih CHAKRAMANG enni kowh Thurai ming ringkawma hown enni nakramah kown takla.59Naiawng nadowi hanow CHAKRAMANG mih enni hai enni kowh krungchakuüa luk kowi akraingma hai awdara uowima mih hawi ün, lainowmma ngarela mih rawka ün nauang pawla enni kown. Naiawngün hawi hai rawka dow enni tut-e akrama nauowi kown.60Aigupta pren kowi kowh enni kramah mih rawka enni luk kowi aia nauang pawla enni kown. Nami rawka dow naplawt enni kown nadowi.61Nami klen kowi mami rirow bowih kowi kowh arui uowi dowi mih hawi hai rawka chap maten paw CHAKRAMANG mih nauang pawla enni kown, now achur kowi dow enni napiak bowk kown.62Pakat khe dow enni kowh maru iun mih mukuang kowi kowh krek nowng rüaah dowi mih iawng chowdiah. Nachenganchepaw CHAKRAMANG enni kowh Thurai kowh lai enni chün dowi hanow pre sum iachow taih enni nata sing kown.63Pe enni iungra khe hai pe prung enni khe kowh aia awmrawm iawng CHAKRAMANG mih piak enni khe paw naawmrawm kown. Enni nakowpowngah kown mih pren hownia aia dow aprün hailawm nachawita enni hanow nakuakta enni kown.64“Nami kung kowi dow CHAKRAMANG mih prenchur nammowt mowr chenchap maten tut-e nakrawi uet enni kown. Nakowi dow enni hai enni kowh pipu-uüa tukah dowi mih singh hai hua hown kowh thawpah mih arup kowi enni nacham chupiia kown.65Naiawngün chenchap tut-e enni uowi mih khin khe enni dow naka thaulangra kown nadowi. Now enni natanaila kown mih arah paw enni naka kown nadowi. Nakowi enni uowi khe CHAKRAMANG dow nape enni tuak kawm tuak kratra kown, owmsakma hown enni hawt müla mih mik paw narita enni kown, now enni kowh sak dow süngürra uowi dowi iawng nachang enni kown.66Tawng chow own kown mih hai tawng chow own dowi kown mih tuak kangowh hown enni nauowi kown. Ni chut uar prowt kramring tahowrma hown sing chü, kowng chü pami tuak kangowh hown enni nauowi kown.67Rau-e khe dow enni natek kown mih, ‘Uar iiu bowt panü,’ napa kown. Now uariiu khe dow enni natek kown mih, ‘Uar thowi bowt panü,’ napa kown. Tawngplawng kowchow panow enni dow kramra atekma hown nauowi kown, now mik hown paw enni nakhi sowlow kown.68Aigupta pren kowi katpaw enni nakowkowi kown nadowi bowt padow ang tek enni khai. Nachenganchepaw nami khin khe dow CHAKRAMANG mih chawnlawng kowi nachua enni hanow Aigupta pren kowi nasa enni kown. Nakowi dow natawi uowi nar kownkow ransu-uüa tut-e enni matia kowi enni natasum kown mih enni nanau kown. Tawkchedow miapaw naran enni kown nadowi,” pakhai.
The Seed Company