O MATIUS5
1Wa'utu o Yesus wo'ima'e o nyawa manga lepe goona, Una wohawu o de'ude. Wogogelu'u, de awi ni-nii'i yo'ai'a yomahidutu'u Una'a.2Geena'a de, o Yesus womulaenge wo'idoto'o. Wotemo onane,3<<Duru hara yohanaanga o nyawa-nyawa nage yomao'u o yadaenua ma Jou ma Dutu awi biono'a,Hababu onau goona yodadi ma Jou ma Dutu awi nyawa nage ma Jou ma Dutu awi pareta'a.4Duru yohanaango'a o nyawa-nyawa ge manga hininga 'ihuha,hababu ma Jou ma Dutu aha wo'ilalu.5Duru yohanaango'a o nyawa-nyawa ge 'a yoerewa,hababu ma Jou ma Dutu aha wo'i'ula ona'a o dunia neena.6Duru yohanaango'a o nyawa-nyawa ge yodahawini yodiai o haala yaowa-owa,hababu ma Jou ma Dutu aha wo'i'ula hiadono yo'iduga.7Duru yohanaango'a o nyawa-nyawa ge yohimaiti manga dora o nyawa ma homoa'a,hababu ma Jou ma Dutu aha wohimaiti awi dora ona'a.8Duru yohanaango'a o nyawa-nyawa ge manga hininga iberehi ma Jou ma Dutu awi biono'a,hababu ona aha wima'e ma Jou ma Dutu.9Duru yohanaango'a o nyawa-nyawa ge yo'ihi'adame o nyawa ma homoa'a,hababu ma Jou ma Dutu aha wotemo ona goona Awi ngoa-ngoa'a.10Duru yohanaango'a o nyawa-nyawa ge yama'e o hangihara o nyawano hababu yodiai o haala yaowa-owa,hababu onau goona yodadi ma Jou ma Dutu awi 'awaha nage ma Jou ma Dutu awi pareta'a.11Duru niohanaango'a ngini ge mangale nionii'i Ngoino,nihohedu,nihangihara,de nironga madiiha.12Niohanaanga de nimagaragou,hababu ma Jou ma Dutu wohidiaio'au nia hewa ma amo'o o horoga'a. Hababu, o nabi-nabi ma hila ma itihila'au yohangihara harage de ngini niaohana.>>13O Yesus wotemoli, <<Ngini geena harage de 'ao gahi o dunia'a. Na'o o gahi de 'apamaowau 'igahi, de o 'iahi done pohigahi? Geena 'ai baragunawau, ma 'ayaumo de yado'o-do'o.14Ngini ma harage de o daraanga o dunia'a. O bendara da'u o de'u ma tubuo'a 'aidadiwa yohidutulu'u.15'Amoiwa o hilo yatuu'i'a de yohitamunu'u de o tampayanga, ma maraio'au yohitodengu'u ma ngiio'a la moi-moi o nyawa o woa ma doda'a ge yo'idararono.16'Ogeenali ma nia daraanga geena halingou ihiwa o nyawa'a, la ona yama'e o'iau hona niodiaio'au yaowa-owa geena, de wipuji nia Dea o horoga'a.>>17<<Uwa niotemo, na'o Ngoi taino neena tayoihanga o Musa awi Hu'umu de o nabi-nabi manga do-doto'o. Ngoi taino 'a taihangua, ma 'ena tohimaiti ma mangariti ma gou-goungu.18Nioihene nihidi-diai e! Na'o o diwanga de o tona'a 'ademaenahi, geena 'a ma ube-ubewa ma 'aiihangua ma hu'umu geena, na'o moi-moi ge ma hu'umo'a geena 'oidadiwahi.19Hababu geena, nagoonau yapalene o do-doto'o geena ngaro 'a ma ube-ubewa ma, de yohidoto'o o nyawa'a la ona ma 'ogeena, ona geena aha iholoi yoete'e ma Jou ma Dutu awi 'awaha'a. Ma nage yodinii'i ma dodoto'o geena de yohidoto'o o nyawa'a 'ogeenali, ona geena aha yoamo'o ma Jou ma Dutu awi awaha'a.20Ho nioihene nihidi-diai! Na'o ngini niomau niodadi ma Jou ma Dutu awi 'awaha, geena halingou ngini 'iholoide niodiai ma Jou ma Dutu awi mau de nage o Yahudio'a manga agama'a yodoto-doto'o de o Farisio'a.>>21<<Ngini niana'o'au nanga edete de nanga dotumu yo'ihidoto'o onane: <Uwa niotooma. Nagoonau yotooma aha yo'ihu'umu.>22Ma neena Ngoi tinihidemo e, nagoonau bato ngaro yongamo duga 'ao nyawa'a, ona aha yo'ihu'umu. De nagoonau yodoana o nyawa'a, ona aha o agama'a ma baluhu yo'ihu'umu. De nagoonau yotemo o nyawa'a yohuma, ona aha yo'ihu'umu o u'u o naraka'a nage 'ito'a-to'ara.23Ho, na'o nia hu-huba nio'ula ma Jou ma Dutu'a de niodanganono na'o naga o nyawa manga hininga 'ihau'u nginino,24geena halingou nianoa'ohi nia hu-huba geena o hu-huba 'idu-dutuu'u ma date'o'a, la niotagi nima'adame'ahi nage manga hininga niahau-hau'o'a. Geena'a de aha nima'ilio nio'ula niahu-huba geena ma Jou ma Dutu'a.25Na'o naga o nyawa yotemo niahala, de yomau niaha o ha'imi'a, ngini halingou itai-taiti nimahi'alooahohi wa'utu 'a o nge'ominohi. Hababu, na'o 'anima'adamewa, maraio'au niaha o ha'imi'a. De ona aha nihigiama ma hoata o hurudado'a de nihiohama o bui'a.26Nioda-danganono e, maraio'au ngini 'aidadiwahi niohupu o buino na'o nia nagimi oniabootuahi niohangu.>>27<<Ngini niana'o'au o do-doto'o harage oneena: <Uwa niohowono.>28Ma neena Ngoi tinitemo e, naguunau o naulu womatengo mima'e o ngewe'a awi hininga'a midanyahihuu, geena ma nyawa guuna wohowono'au de ma ngewe'a guumuna awi hininga'a.29Na'o nia la'o ma hononga nidiai hiadono niobaradoha, nia'uapeti'au de niaumo'au ma nia la'o geena! Iholoi yaowa nia la'o ma hononga 'iihanga de 'anihu'umua, uwa hiadono de nia la'o modidio'a ma nia roehe ma ngodumu niumo o naraka'a.30Na'o nia giama ma hononga nidiai hiadono niobaradoha, niaoto'au de niaumo ma nia giama geena! 'Iholoi yaowa nia giama ma hononga 'iihanga, uwa hiadono de nia giama modidihona ma nia roehe ma ngodumu 'iohama o naraka'a.>>31O Yesus wotemoli, <<Demaenali ma o do-doto'o harage onane: <Nagoonau manga we'ata yo'iolu'u, halingou o ngo-ngolu'u ma hurata yo'ula manga we'ati'a.>32Duga neena Ngoi tinitemo ngini'a e, o naulu 'aidadi awi we'ata miolu'u na'o ma we'ata mohowono'au. Ma na'o 'ouwa, de ma naulu guuna awi we'ata miolu'u, geena wodiaio'au ma we'ata mohala ma Jou ma Dutu awi biono'a. Hababu, na'o ma ngewe'a nage miolu'o'au momodo'ali de o nyawa ma homoa, geena harage de o ngewe'a nage mohowo-howono, de o nyawa ge mimo-modo'a ma wahala'au ma Jou ma Dutu awi biono'a, hababu ma nyawa guuna ma harage wohowono'au.>>33<<Ngini niana'o'au nanga edete de nanga dotumu manga do-doto'o onane: <Uwa niapalene nia gogoboto, o'iau naga nio'oboto'au ma Jou ma Dutu awi biono'a, halingou niadiai.>34Ma neena ngoi tinitemo ngini'a: 'A ma ube-ubewa ma uwa nio'oboto, ngaro de o diwanga ma, hababu geena ma Jou ma Dutu awi ngii mangale wopareta;35de o tona'a ma ronga, hababu o tona'a geena ma Jou ma Dutu awi dou ma angi. Ngini ma uwa nio'oboto de o Yerusalem ma bendara ma ronga, hababu o bendara geena to ma Jou ma Dutu, Una geena ma 'Oana woamo-amo'o.36Ngini ma uwa nio'oboto de tingini mahirete nia hae'e, hababu ngini 'aniadadiwa niadiai nia utu 'iarehe e'ola 'ibiihi ngaro 'ao lia moi ma.37Ngaro 'aniotemo, <'Iyolo> e'ola <'Ouwa> Na'o 'iholoi de geena 'ao to'ata ma 'oanino.>>38O Yesus wotemoli, <<Ngini ma niana'o'au o do-doto'o harage de onane: <Na'o o nyawa manga la'o niatiiha, tingini ma yatiiha. Na'o o nyawa manga ilingi niaota'a, tingini ma yaota'a.>39Ma Ngoi tinitemo e, uwa niobalaha o tingi'ai o nyawa'a, nage yoti-tingi'ai ngini'a. Ma nagoonau yapo'a nia niagotoa'a ma guida'a geena ya owa ma gubalioli nihida'unu.40De na'o o nyawa niaha o ha'imi'a hababu yomau yaehe nia baju, geena nio'i'ulali nia baju 'i'a-'a'ulu'u.41De na'o naga o nyawa nipa'iha niamo'u manga gina ma ga'ulu o kilo moi'a, ge'ena halingou niamo'uou o kilo modidi'a.42Na'o o nyawa yomagaaho'o nia 'iani ngini'a, nio'i'ula'a. De na'o yomadabau nia 'iani, uwa 'anio'i'ulawa.>>43<<Ngini nioiheno'au o dodoto'o onane ma demo: <Nio'idora nia ma-manai, de nio'ibuhulu ge nia haturuu.>44Ma Ngoi tinitemo e, nio'idora nia haturuu, de nio'idahaubayanga ona ge nihangihara ngini'a,45la ngini aha niodadi nia Dea o horoga'a awi ngoa-ngoa'a. Hababu ma Jou ma Dutu awi wange ma la'o wohipuda mangale o nyawa ma owa de o nyawa ma diiha ma. Una ma wohiguti o beha'a, mangale o nyawa manga wowango yaowa-owa de iti-tiiha ma.46Hababu na'o nio'ihibohono duga 'a nyawa'a nage nihibohono ngini'a, o 'iau done aha niama'e? Uwa nionganono o hewa ma Jou ma Dutuno. Hababu o balahiteenge yoga-gaaho'o ma 'ogeena yodiai.47De na'o nio'itabea duga ge 'ania nyawa'a, o 'iau ma holoi de o nyawa ma homoa? O nyawa ge 'awina'owa ma Jou ma Dutu ma yodiai 'ogeena!48Ania Dea o horoga'a wohigou-goungu wo'idora o nyawa'a moi-moi. Ho ngini ma halingou 'ogeena.>>
The Seed Company