O MATIUS4
1Geena'a de aha, o Omaha 'Iofi-ofi wiaha o Yesus o tona'a 'i'a-'aha'a, la o To'ata ma 'oana witaili Una'a.2Geena'a ma dingii, o Yesus wopuaha o wange moruatino de o wutu moruatino . Ma baha'u, o Yesus wihawini.3Geena'a de, o To'ata ma 'oana iboa o Yesusi'a de 'itemo Una'a, <<Na'o Ngona neena 'igou-goungu ma Jou ma Dutu awi Ngoa'a, Bee'a nohulo'o o he-heleo neena 'imadadi o roti.>>4Ma o Yesus 'awoolu'u ho wotemo onane, <<O Bo'u 'Ibe-berehi ma doda'u itulihu'u onane,<'ade o rotiwa aha o nyawa 'powango,Ma de ma Jou ma Dutu awi demono moi-moi nage ma Jou ma Dutu wotemo.> >>5Geena'a de aha, o To'ata ma 'oana wiaha o Yesusi'a, o Yerusalem ma bendara 'iofi-ofio'a nage, geena'a o to'ata ma 'oana winoa'u o Yesus, o dingii 'i'a-'a'ulie ma Jou ma Dutu awi woa ma de'uo'a.6De 'itemo o Yesusi'a, <<Ngona neena ma Jou ma Dutu awi ngoa'a to, ho Bee'a noma tebulu neena'a de nau'u. Hababu o Bo'u Ibe-berehi'u ituliho'au onane,<Ma Jou ma Dutu aha wahulo'o awi ma-malai'atala nigoana de nilegono.La Ani dou ma uwa yatigi o heleo'u.> >>7De o Yesus wopaluhu, <<O Bo'u Ibe-berehi'u ituliho'au:Uwa nowitaili ma Jou ma Dutu'a, ani Jou.>>8Aha de o To'ata ma 'oana wiahali o Yesusi'a o de'u 'i'a-'a'a'ulie de wihimaiti o dunia'a ma pareta moi-moi de ma araata moi-moi.9De ma to'ata ma 'oana itemo o Yesusi'a, <<Moi-moi ge nama'e'au neena aha tonihidu'ula na'o noihuba.>>10O Yesus wopaluhu, <<Ee To'ata ma 'oana, naga o Bo'u Ibe-berehi ma doda'u ituliho'au, ngona 'iani nowihuba duga-duga 'ama Jou ma Dutu'a de nowileleani duga 'a Una'a.>>11Geena'a de aha, o To'ata ma 'oana wimada o Yesusi'a, de o ma-malai'ata 'iboa wileleani Una'a.12Wa'utu geena, o Yesus woihene, na'o o Yohanes woohi-ohi'i woohamo'au o bui'a, de Una wolio o Nazaret ma hoani'a o Galilea ma daera'a.13O Nazaret wamada de Wotagioli ho wogogele o Kapernaum ma bendaro'a nage o Galilea ma talaga ma date'o'a, o Zebulon de o Naftali ma daera'a.14Geena idadi, ho o 'iau nage ma Jou ma Dutu wotemo'au o nabi Yesaya'a idadio'au, onane:15<<O nyawa-nyawa nage yogogele o Zebulon de o Naftali ma daeraNage o Galilea ma talaga ma date'o'a, de o Yordan ma ngaili ma hononga'a,ona goona 'ao Yahudio'awa.16O nyawa ge yowango o daluho'a,yama'e'au o daraanga ma hiwa.O nyawa ge o daluhu yo'iparetano yo'iaha o honengi'a,ma yama'e'au o daraanga!>>17Ma oraha geena de o Yesus womulaenge wohingahu wotemo, <<Halingou niotoba o baradoha niodiai de nima'ilio ma Jou ma Dutu'a hababu Una woparetau mangale Wo'oana!>>18Ma oraha o Yesus wotagi-tagi o Galilea ma talaga batingo'a, de wo'ima'e o lia'a de dodoto yamididi geena la o Simon (nage wihironga o Petrus) de o Andreas. Ma oraha geena, ona o nao'o yomadohoma magigiria'a, o Galilea ma talaga'a.19O Yesus wotemo ona'a, <<Niaino nionii'i Ngoino. Ngoi aha tinidoto'o o nyawa ni'ilomu la 'inii'i Ngoino!>>20Geena'a de manga homa yamada de winii'i o Yesus'a.21Geena iduangino, o Yesus wogila-gilali, de wo'ima'eli o lia'a de dodoto yamididi, geena la o Yakobus de o Yohanes o Zebedeus awi ngoa-ngoa'a.22Geena'a de yamididi goona 'ayogila-gila yamada manga ngootili de manga dea, de winii'i o Yesusi'a.23Geena'a de, o Yesus wo'a'adagi o dingiio'a moi-moi o Galilea ma daera'a de wodoto'o o dodoomu ma woa-woa'a. Una wohingahu o Habari ma Owa mangale ma Jou ma Dutu awi pareta hababu Wo'ana. De Una ma wo'ihiai'i o nyawa yopa-panya'e de 'ayoti-tiaiwa.24O Yesus awi habari o Siria'a moi-moi yaedono'au, ho o nyawa manga lepe yoboa Una'a. Ona yo'iaha o nyawa yopa-panya'e nage manga panya'e 'iini-ini'o'a, yoha-hangihara, o to'ata yo'ido-dongohami'a, yomuhu-muhu'u de yopa-paluga, de moi-moi goona o Yesus wo'ihiai'i.25Geena de imahi'ai'a, o nyawa manga lepe winii'i o Yesusi'a: O nyawa-nyawa o Galilea ma daerano, de o Dekapolis ma daerano, o Yerusalem ma bendarino, o Yudea ma daerano, de Yordan ma ngaili do'a ma honongano.
The Seed Company