O MATIUS6
1<<Niohi-hininga! Na'o o agama ma mau niadiai uwa niohimaiti'a. Hababu na'o niohimaiti'a, nia Dea da'u o horoga'a o hewa 'aniwi'ulawa.2Geenau ho na'o yohu-huha nio'iduhunu, uwa niohimaiti'a harage o nyawa 'ayomaelu-elu'u. 'Ona yaigo o dodoomu ma woa'a de o tapa'o'a la bali o nyawa yo'ihidaiyana. Niohi-hininga! Ona geena yama'e'au manga hewa, geena la o nyawa yo'ihidaiyana.3Ma na'o nia 'iani nio'ula o nyawa'a, geena animahibongonino la o nyawa uwa yana'o.4Mada'a la o 'iani nio'ula geena duga 'a ma Jou ma Dutu wana'o. Una aha niwihewa. Nage Wama'e 'animahibongonino.>>5<<Na'o nimadahaubayanga, geena uwa harage de o nyawa 'ayomaelu-elu'u la halingou 'a o dodoomu ma woa'a yai'a, e'ola o 'awaha manga biono'a la o nyawa nima'e. Nioihene nihidi-diai e, geenau to ona manga hewa geena la o nyawa yo'ihidaiyana.6Duga na'o la nimadahaubayanga, geena nimahidebeno'a nia ngiio'a la nia Dea ge o nyawa 'awima'e-ma'ewa wama'e 'ogeena de niwihewa.7Ho na'o nimadahaubayanga, geena ma betongo uwa 'ageena niogi-gilio harage 'ao nyawa ge ma Jou ma Dutu 'awina'o-na'owa. Ona yotemo bali na'o manga haubayanga ma betongo i'udai de i'a-'a'uli'a geena aha ma Jou ma Dutu wadawongo.8Uwa harage de ona, hababu nia Dea wana'o'au nia paraluu 'animadahaubayanguahi ena.9Ho nimadahaubayanga onane,<Mia Aba da'u o horoga'a!Tanu ngomi o nyawa moi-moi Ani ronga miapuji.10Tanu ngona noparetau o dunia'a,de tanu ani mau mianii'ineena'a harage o horoga'a.11Tanu no'ula mia inomoge miaparaluu neena ma wange.12De tanu nimiapongo mia halaharage 'angomioli mi'iapongoo nyawa manga hala ngomino.13De uwa nimimada'a mitaili,ma nimihipidili o diihano.[Ngona geena ma 'Oana, nopa-pareta, nimipuji 'ahiado-adoni'a. Amin.]>14Hababu na'o ngini ni'iapongo o nyawa'a nage yahala'au ngini'a, nia Dea o horoga'a ma niwiapongo ngini'a.15Ma na'o ngini 'ani'iapongua o nyawa'a nage yahala'au ngini'a, nia Dea o horoga'a ma niwiapongua ngini'a.>>16O Yesus wotemoli, <<Na'o niopuaha, geena uwa nia biono 'ailamaanu'u harage de o nyawa ge yomaelu-elu'u manga biono ma yangalio'a, la o nyawa yo'ina'o na'o ona yopuaha la yo'ihidaiyana. Nioda-danganono e! Geenau to ona manga hewa yama'e'au.17Ma na'o ngini niopuaha'a, geena nimamamahau'o'a de nimawuhi'a.18La o nyawa uwa yana'o na'o niopuaha'a, duga 'ania Dea ge o nyawa 'awima'e-ma'ewa Una aha niwihewa ge wama'e 'animahibongonino.>>19<<Uwa nimadolomu o arata o dunia'a, hababu o butete'e de o moo'o aha yatiiha, de yotohi-tohi'i yoboa yatohi'i ma 'arataa.20Ma 'iholoi yaowa nimadolomu o 'arataa o horoga'a ge o bute-te'e de 'aimoo'uwau, de yotohi-tohi'i 'ayatohi'uwau.21Hababu 'ia'a naga nia 'arata, nia hininga ma geena'a.>>22<<Nanga la'o geena 'aimatero de nanga roehe ma hilo. Na'o nia la'o idoto geena aha nimahima'e itiai 'o'iau hona niodi-diaio'au. Ma na'o nia la'o 'aidodonua geena ngini aha harage o daluho'a. Ho na'o nia hilo 'aidaraangua, geena aha pohironga 'italuho'au.>>24<<'Amoiwa yo'arajaanga manga baluhu yamididio'a; hababu aha womatengo iholoi widora de ge womatengo'ali wibuhulu, e'ola aha womatengo'a 'iholoi wihingounu de ge womatengo'ali. 'Ogeenali ma ngini. Na'o niowango de 'animadolomu o araata o dunia'a, marai ngini 'aidadiwa nio'arajaanga to ma Jou ma Dutu awi mau.25Hababu geena nioda-danganono! Uwa niododato mangale nia wowango, o 'iau aha niaodomo e'ola niao'ele. De ngini ma uwa niododato de tingini niaroehe, o 'iau aha nia pa'e. Ngini niana'o nia wowango 'iholoi ibaraguna de o inomo de nia roehe 'iholoi ibaraguna de o pa'eanga.26Bee'a niataila'o o namo-namo o ginita'a, ena 'oimadutudu'uwa de 'oimadugutu'uwa, de 'aimadolomuwa ma tila-tila'a, ma ma Jou ma Dutu watowo! Hongoli ngini? Ngini de o namo geena nginiohi 'iholoi niobaraguna to?27Na'o ngini niododato de nia wowango o wutu de o wange, bote 'aidadi nia umuru nia dogo ngaro 'a ma ube-ubewa ma? Maraio'au 'ai dadiwa to?28Idodoau ho niododato ma ngale nia pa'eanga? Niagelelo o huri-huri 'iwangode o godoa'a, ena 'oima'arajaangua de ma baju 'oimadidiniwa,29ma ma 'oana o Salomo awi 'aya ma awi pa'eanga 'a 'ogeenawa ma rahai harage de o huri-huri geena.30O ubutu o godoa'a neena ma wange 'iwangode de ma dewelano yatuu'o'au yaboo-booti'a, ma ma Jou ma Dutu wapaliara de wadiai 'irahai. Hongoli ngini o nyawa? Maraio'au ma Jou niwipaliara de wadiai niawowango 'irahai. Ho dodoau ho ngini i'uranga nionga'u?31Uwa niododato de uwa niotemo, o'iau aha paodomo de pao'ele, de o'iau aha pomahinoa?32'Ogeena dau geena yahali-hali'i, o nyawa gee ma Jou ma Dutu 'awinga'uwa. Ma nia Dea o horoga'a wana'o, na'o ngini nioparaluu moi-moi geena.33Ho, niatihila niadiai to ma Jou ma Dutu awi pareta la Wapareta niawowango, de nia paraluu aha wo'ula.34Hababu geenau ho, uwa niododato o dewela ma wange, hababu o dewela ma wange geena de ma enali to ena ma huha. Neena ma wange yaowa'au to ena ma huha, ho uwau niadogo.>>
The Seed Company