Mark15
1बड़ी भोरिये महायाजक आउर यहूदी महासभा के सदस्य प्रधान याजक, पुरनिया, शास्त्री ई बात के तय करे लागी एक साथे जमा होलन हल कि रोमी राजपाल के सामने यीशु पर कईसे दोष लगावल जाय। उनकर पहरदारवन यीशु के हाथ बाँध देलक। ऊ उनका पिलातुस रोमी राजपाल के निवास पर ले गेलक।2पिलातुस यीशु से पूछलन, “का तूँ अईसन कहऽ हऽ कि तूँ यहूदियन के राजा हऽ?” यीशु उनका जबाब देलन, “तूँ खुद ही अईसन कह रहलऽ हे।”3तऽ महायाजक दावा करलन कि यीशु बड़ी मनी बुरा काम करलन हे।4येहिगुने पिलातुस उनका से फिन से पूछलन, “का तोरा कुछ नऽ बोले के हे? सुनऽ ऊ आदमी तोहर द्वारा करल गेल बड़ी सा बुरा काम के बारे में बोल रहलन हे!”5बाकि भले ही यीशु दोषी नऽ हलन, ऊ आउर कुछ भी नऽ कहलन। जेकर नतीजा ई होल कि पिलातुस के बड़ी अचरज होल।6अब राजपाल के ई रीति हल कि ऊ हर साल फसह के परव के समय में बंदीगृह में से एगो अादमी के आजाद करऽ हलन। ऊ रीति के मुताबिक ऊ बंदी के स्वतंत्र कर दे हलन जेकरा लागी लोग निवेदन करऽ हलन।7ऊ घड़ी ऊहाँ एगो बरअब्बा नाम के आदमी हल जिनका सिपाहियन थोड़ा आउर आदमियन के साथे जेल में डालले हलन। ऊ लोग रोमी सरकार के खिलाफ बगावत के दौरान कुछ सिपाहियन के मार देलक हल।8एगो भीड़ पिलातुस भीर जा के उनका से कोई आदमी के आजाद करे के विनती करलन, ठीक ओही तरह जईसे ऊ पहिले भी फसह के परव के दौरान उनका लागी ई रीति के मुताबिक करलन हल।9पिलातुस उनका जबाब देलन, “का तूँ चाहऽ हऽ कि हम तोरा लागी ऊ आदमी के आजाद कर देम, जिनका तूँ यहूदी लोग अपन राजा कहऽ हऽ?”10ऊ अईसन येहिगुने पूछलन काहेकि ऊ जान गेलन हल कि महायाजक का करे लागी चाह रहलन हल। ओखनी यीशु पर आरोप लगा रहलन हल काहेकि ओखनी उनका से जलन रखऽ हलन काहेकि ढेरमनी लोग उनकर चेला बन रहलन हल11बाकि महायाजक भीड़ से निबेदन करलन कि ओखनी पिलातुस से निवेदन करतन कि ऊ यीशु के बदले बरअब्बा के आजाद कर देतन।12एक बार फिन से, पिलातुस उनका से कहलन, “जदि हम बरअब्बा के आजाद करम, तऽ तूँ का चाहऽ हऽ जे हम ई आदमी के साथे करूँ, जेकरा तोहनी में से कुछ यहूदी अपन राजा कहऽ हऽ?”13तऽ ओखनी फिन से चिल्लाय लगलन, “अपन सिपाहियन के उनका क्रूस पर चढ़ावे के आज्ञा दऽ!”14तऽ पिलातुस उनका कहलन, “का? ऊ का अपराध करलन हे?” बाकि ओखनी आउर जोर-जोर से चिल्लाय लगलन, “अपन सिपाहियन के उनका क्रूस पर चढ़ावे के आज्ञा दऽ!”15काहेकि पिलातुस भीड़ के खुश करे ला चाहऽ हल, येहिगुने ऊ उनका लागी बरअब्बा के आजाद कर देलक। ओकर बाद, सिपाहियन यीशु के चमड़ा के बनल पट्टियन से कोड़ा मारलन जेकरा पर ओखनी धातु आउर हड्डी के टुकड़वन बाँधले हल। पिलातुस सिपाहियन के आदेश देलन कि ऊ यीशु के क्रूस पर चढ़ावे लागी ले जईतन।16पिलातुस के सिपाही यीशु के ऊ महल के अँगना में ले गेलन जहाँ पिलातुस रहऽ हलन। ऊ जगह सरकारी मुख्यालय हल। तऽ ओखनी सिपाहियन के पूरा दल के बोला लेलन जौन ऊहाँ तैनात हल।17जब सभे सिपाही एक साथ जमा हो गेलन, तऽ ऊ यीशु के एगो बैंगनी पोशाक पेहना देलन। ओकर बाद ओखनी उनकर माथा पर एगो ताज रखलन, जेकरा ओखनी कँटीली झाड़ी के डालियन से बनईलन हल। ओखनी ई काम कर के उनका मजाक उड़ईलन आउर ई बात के ढोंग करलन कि ऊ उनका राजा समझऽ हथन।18तब फिन से ओकरा मजाक करे ला ऊ ओकरा ई कह के अईसे नमस्कार करलक जईसे ऊ कोई राजा के नमस्कार करऽ हे “ऊ राजा के जय हो, जौन यहूदियन पर शासन कर हथन!”19ओखनी एगो भारी सरकण्डा से उनकर माथा पर बार-बार मारऽ हलक, आउर उनका पर थूकऽ हलक। उनका सम्मान करे के ढोंग करे लागी ऊ उनकर सामने घुटना टेक के प्रणाम करलक।20जब ऊ उनका मजाक उड़ावेला खतम कर चुकलन, तऽ ओखनी ऊ उनका बैंगनी पोशाक उतार लेलन। ओखनी ऊ उनकर ही कपड़ा पेहना देलन, आउर फिन ऊ उनका ऊ क्रूस पर चढ़ावे ला नगर के बाहर तक गेलन।21जब यीशु अपन क्रूस उठ के थोड़ा दूर गेलन, तऽ कुरेने नगर के रहे वाला शमौन नाम के एगो अादमी अईलन। ऊ सिकन्दर आउर रूफुस के पिता हलन। जब ऊ अपन घरे लौट रहलन हल तऽ ऊ नगर के बाहर से होके जा रहलन हल। सिपाहियन शमौन के यीशु के सहायता करे लागी क्रूस उठावे लागी विवश करलन, काहेकि यीशु के साथे उनकर द्वारा करल गेल सभे बुरा बर्ताव से ऊ थक गेलन हल। 22रोमी सिपाहियन ऊ दूनो के एक जगह पर लेके गेलन जेकरा ऊ गुलगुता कहऽ हलन। ऊ नाम के मतलब हे, “खोपड़ी के जगह।”23फिन ऊ यीशु के गंधरस नाम के सिरका मिलल दाखरस देवे के कोशिश करलन, बाकि ऊ पिये से मना कर देलन।24कुछ सिपाहियन उनकर कपड़ा ले लेलक। फिन ओखनी उनका क्रूस पर ठोक देलक। ओकर बाद, ओखनी उनकर कपड़ा लागी पासा जईसन कोई समान से जुआ खेल के अपने में उनकर कपड़ा के बाँट लेलन ओखनी अईसन ई बात के तय करे लागी करलन कि कौन आदमी के कपड़ा के कौन टुकड़ा मिलऽ हे। 25जखनी ओखनी उनका क्रूस पर चढ़ईलन तऽ सवेरे के एक पहर दिन चढ़ल हल।26ओखनी क्रूस पर यीशु के माथा के ऊपर क्रूस पर एगो दोषपत्र लगईलन जेकरा पर एगो आदमी ई लिखलन हल कि ऊ उनका क्रूस पर काहे चढ़ा रहलन हे। ओकरा पर लिखल हल “यहूदियन के राजा।”27रोमन सिपाहियन ओखनी दूगो कैदियन के जौन डाकू हलक, दोसरका क्रूस पर ठोक देलन। ओखनी एगो के यीशु के दहिना तरफ क्रूस पर आउर एगो के यीशु के बामा तरफ क्रूस पर काँटी से ठोक देलन।28आउर उनका डाकू के साथे क्रूस पर चढ़ा के ओखनी पवित्रशास्त्र के ऊ भाग के पूरा कर देलन, जे कहऽ हल, आउर ओखनी उनका दुष्ट आदमियन में समझलन। 29ऊहाँ से आवे जाय वाला लोग उनका पर अपन मुड़ी हिला-हिला के उनका निन्दा करलन। ओखनी कहलन “वाह! तूँ तऽ कहऽ हल कि मन्दिर के ढाह के ओकरा तीन दिन में बना देम।” 30जदि तूँ अईसन कर सकऽ हऽ, “तऽ क्रूस पर से उतर के अपने आप के बचा लऽ!”31यहूदी व्यवस्था के शास्त्री लोगवन के साथे महायाजक भी यीशु के उपहास करे लागी चाहऽ हलन। येहिगुने ऊ एक दोसरा से कहे लगलन, “लोग दावा करऽ हथन कि ई दोसरा के समस्या से छोड़ईलन हल, बाकि ई तऽ खुद के नऽ बचा सकऽ हथन!32ई मसीह होवे के आउर इस्राएली लोग पर राजा होवे के दावा करलन हल। जदि इनकर बात सच होत, तऽ इनका अब क्रूस पर से उतर आवे के चाही! तऽ हम देखके इनका पर विश्वास करम!” उनकर साथे क्रूस पर दूनो तरफ जे दूगो आदमी के ठोकल गेल हल। ओखनी भी उनका अपमानित करलन।33दूपहर होला पर पूरा प्रदेश में अंधार छा गेल, आउर दूपहर से लेके तिसरका पहर तक अंधार छायेल रहल।34तिसरका पहर यीशु पुकार के कहलन, “इलोई, इलोई, लम्बा शबक्तनी?” जेकर मतलब हे, हे हमर परमेश्वर, हे हमर परमेश्वर, तूँ हमरा काहे छोड़ देलऽ?35ऊहाँ खड़ा लोगवन में से कुछ जब 'इलोई' शब्द के सुनलन, तऽ ओखनी ओकरा गलत समझलन आउर अपने में कहलन, “सुनऽ! ऊ एलिय्याह भविष्यद्वक्ता के पुकार रहलन हे!”36ओखनी में से एगो दौड़ के गेलन आउर पनसोख्ता के सिरका मिलल दाखरस से एगो जूफा के भर लेलन। ओकरा ऊ सरकण्डा के नोखी पर रखलन, आउर फिन ओकरा ऊपरे उठईलन जेकरा से यीशु के ओकरा में से दाखरस चुसावे के कोशिश करे लागी कहलन। जौन घड़ी ऊ अईसन करही रहलन हल, कोई उनका कहलन, “इंतजार करऽ! देखऽ ही कि एलिय्याह उनका क्रूस पर से उतारे लागी आवऽ हथन कि नऽ!” 37आउर फिन, यीशु ऊँचा आवाज में चिल्लईला के बाद, साँस लेवे लागी बंद कर देलन आउर मर गेलन।38ओही घड़ी, ऊ भारी, मोटा परदा, जे मन्दिर के परमपवित्र जगह के बंद करऽ हल, ऊपर से निचे तक दू टुकड़ा में फट गेल।39ऊ सूबेदार यीशु के सामने ही खड़ा हलन जे यीशु के क्रूस पर ठोकेवाला सिपाहियन के निगरानी करऽ हलन। जब ऊ देखलन कि यीशु कईसे मरलन हल। तऽ ऊ कहलन, “सच में, ई यीशु परमेश्वर के बेटा हीं हलन!”40ऊहाँ कुछ औरतियन भी हल, जे ई घटे वाला घटना के दूर से ही देख रहल हल। ओखनी ऊ घड़ी यीशु के साथे ही हल, जहिया ऊ गलील प्रदेश में हलन, आउर जे सेवा के उनका जरुरत हल, ऊ ओखनिये ओकरा पूरा करवावऽ हल। ओखनी आउर दोसरा ढेरमनी औरतियन, उनका साथे यरूशलेम नगर अईलन हल। ओही औरतियन में से एगो मगदला नगर के रहे वाली मगदलीनी मरियम भी हल। एगो आउर मरियम हल, जे छोटा याकूब आउर योसेस के माय हल। ऊहाँ सलोमी भी हल।42जखनी साँझ होवे लागी करीब हल, तऽ अरिमतियाह नाम के नगर के रहे वाला यूसुफ नाम के एगो आदमी ऊहाँ अईलन। ऊ यहूदी महासभा के एगो अईसन सदस्य हलन, जिनका सभे आदमी आदर करऽ हलन। ऊ, ऊ लोगवन में से भी हलन जे खुशी से ऊ घड़ी के इंतजार कर रहलन हल जब परमेश्वर अपन राजा के राज करे ला शुरु करे लागी भेजतन। ऊ जानऽ हलन कि यहूदी व्यवस्था के मुताबिक, जौन दिन कोई आदमी के मौत होवऽ हल, तऽ ओकर लाश के ओही दिन गाड़ देवल जाय के चाही। उनका ई भी पता हल कि ई तईयारी के दिन हल, जेकरा में लोग यहूदी विश्रामदिन लागी सामानवन के तईयार करऽ हलन, आउर ई कि सूरज के डूबते ही यहूदियन के विश्रामदिन शुरु हो जायेत। अखनी साँझ होवे वाला हल। येहिगुने हिम्मत कर के ऊ पिलातुस भीर गेलन, आउर उनका से यीशु के लाश के क्रूस से नीचे उतार के ऊ तुरन्त गाड़े के अनुमति माँगलन। 44जखनी पिलातुस ई सुनलन कि यीशु मर गेलन हे, तऽ ऊ हैरान हो गेलन। येहिसे ऊ, ऊ सूबेदार के बोलईलन जे यीशु के क्रूस पर चढ़ावे वाला सिपाहियन के ऊपर अधिकारी हलन, आउर ऊ उनका से पूछलन का यीशु मर गेलन हे।45जब ऊ सूबेदार पिलातुस के बतईलन कि यीशु मर गेलन हे, तब पिलातुस यूसुफ के लाश ले जाय ला अनुमति दे देलन।46जखनी यूसुफ एगो सनी के कपड़ा मोल ले लेलन, तऽ ऊ आउर दोसरा आदमियन यीशु के क्रूस पर से उतार लेलन। ओखनी उनका सनी के कपड़ा में लपेट लेलन आउर एगो कब्र में रख देलन जेकर पहिले से ही एगो चट्टान के काट के बनावल गेल हल। ओकर बाद ओखनी ऊ कब्र में हेले वाला प्रवेशद्वार के सामने एगो बड़का चिकना पत्थर लोंघड़ा देलन।47मगदला के रहे वाली मगदलीनी मरियम आउर योसेस के माय मरियम देख रहलन हल कि ओखनी यीशु के लाश कहाँ रखलन हे।
Bridge Connectivity Solutions Pvt. Ltd.