Mark16
1शनिवार के साँझ के जखनी यहूदियन के सब्त खतम हो गेल, तऽ मगदला के रहे वाली मगदलीनी मरियम, छोटा याकूब के माय मरियम, आउर सलोमी यीशु के लाश के अभिषेक करे लागी सुगन्धित लेप मोल लेलन। ई औरतियन यहूदियन के ई गाड़ल जाय के प्रथा के पालन करे लागी चाहऽ हलन।2सप्ताह के पहिला दिन एतवार के भोर में, सूरज निकलला के तुरन्त बाद, ऊ औरतियन सुगन्धित लेप लेके कब्र पर गेलन। 3राह में ऊ एक दोसरा से पूछ रहलन हल, '“कब्र के ऊ भारी पत्थर के लोंघड़ावे में हमर मदत कौन करतन, जेकरा से कब्र के प्रवेशद्वार बंद हे?”4ऊहाँ पहुँच के ऊ नजर उठईलन आउर ऊ ई देख के हैरान रहऽ गेलन कि कोई ऊ पत्थर के लोंघड़ा देलन हल, काहेकि ऊ ढेर बड़ा हल।5ऊ औरतियन कब्र में घूँस के एगो जवान आदमी के देखलन। ऊ उजला कपड़ा पेहेनले हल आउर ऊ गुफा में दहिना तरफ बईठल हलन। ई नजारा देख के उनका डर लग गेल!6ऊ जवान आदमी उनका से कहलन, ''मत डरऽ! हम जानऽ ही कि तूँ नासरत के रहे वाला आदमी यीशु के खोज रहलऽ हे, जिनका ओखनी क्रूस पर काँटी से ठोक देलक हल। बाकि ऊ फिन से जिन्दा हो गेलन हे! ऊ ईहाँ नऽ हथन! देखऽ! ई ओही जगह हे जहाँ ओखनी उनकर लाश रखलन हल।7बाकि ईहाँ रुके के बदले, जा के उनकर चेलवन के बतावऽ! खास तौर पर, जरुर ही तूँ पतरस के बतईहऽ। उनका से कहिहऽ, “यीशु तोरा से पहिले गलील जा रहलन हे। आउर जईसन ऊ तोरा से पहिले ही आज्ञा देलन हल, कि तूँ उनका से ऊहाँ मिलवऽ।”8ऊ औरतियन बाहरसी निकस के जल्दी से कब्र पर से भाग गेलन। ऊ काँप रहलन हल काहेकि ऊ डरल हलन, आउर ऊ घबरायेल हलन। बाकि ओखनी ई बारे में पतरस आउर उनकर साथी चेला के छोड़ के आउर कोई से कुछ येहिसे नऽ कहलन, काहेकि ऊ सच में डरल हलन।9सप्ताह के पहिला दिन, एतवार के बिहने भोर में, जखनी यीशु फिन से जिन्दा हो गेलन, तऽ ऊ सभे से पहिले मगदला नगर के रहे वाली मगदलीनी मरियम के देखाई देलन। ई ओही औरत हथन जेकरा में से ऊ पिछला बार सातगो दुष्टात्मा के निकासलन हल।10मरियम मगदलीनी ओखनी चेलवन भीर गेलन जे यीशु के साथे हलन, ऊ घड़ी ओखनी विलाप कर रहलन हल आउर रो रहलन हल। जे ऊ देखलन हल ऊ उनका बता देलन।11बाकि जब ऊ उनका बतईलन कि यीशु फिन से जिन्दा हो गेलन हे आउर ऊ उनका देखलन हे, तऽ जे उनका से कहलन हल ओखनी ऊ बात पर विश्वास नऽ करलन।12ओही दिन, यीशु अपन दूगो चेलवन के देखाई देलन, जब ऊ यरूशलेम से अपन घरे के बगल में पड़ोसी वाला जगह में जा रहलन हल। ऊ उनका हाली से पछान नऽ पईलन काहेकि ऊ बड़ी अलग जना रहलन हल।13जब ऊ उनका पछान गेलन, तऽ ऊ यरूशलेम लौट गेलन। जे कुछ घटित होल हल ऊ ओखनी उनकर दोसर अनुयायी के बतईलन, बाकि जे बात ओखनी सुनलन उनका पर विश्वास नऽ करलन।14बाद में यीशु ऊ ग्यारह चेलवन के ओही घड़ी देखाई देलन जखनी ओखनी भोजन कर रहलन हल। ऊ ओखनी के अविश्वाश आउर मन कठोरता पर बड़ी जोर से डाँटलन, काहेकि ओखनी ऊ सभे के बात पर विश्वास नऽ करलन हल, जे उनका फिन से जिन्दा होवे के बाद देखलन हल।15ऊ उनका से कहलन, “तूँ पूरा दुनियाँ भर में जा के सभे लोगवन के शुभ समाचार के प्रचार करऽ!16जे कोई तोहर संदेश पर विश्वास करतन आउर बपतिस्मा लेतन, परमेश्वर ऊ सभे के उद्धार करतन। बाकि जे कोई भी तोहर संदेश पर विश्वास नऽ करतन, परमेश्वर उनका दोषी ठहरईतन।17जे कोई शुभ संदेश पर विश्वास करऽ हथन ऊ चिन्ह पईतन। खास तौर पर, हमर नाम से ऊ लोगवन में से दुष्टात्मा के बाहरसी निकासतन। ऊ अईसन भाषा में बात करतन जे ओखनी नऽ सिखलन हे।18जब ऊ कोई साँप के उठा लेतन चाहे कोई जहरीला तरल चीज पी लेतन, तईयो उनका हानि नऽ होत। जौन बेमार लोगवन पर ऊ हाथ रखतन उनका परमेश्वर चंगा करतन।”19जब प्रभु यीशु अपन चेलवन से ई बात कह चुकलन, ओकर बाद परमेश्वर उनका स्वर्ग में उठा लेलन। तऽ यीशु परमेश्वर के दहिना पट्टी अपन सिंहासन पर बईठ गेलन, जे उनका जौरे राज करे लागी सभे से ऊँचा सम्मान वाला जगह हे। 20आउर चेलवन यरूशलेम से निकल के सभे जगह में प्रचार करे लगलन। जहाँ कहूँ भी ऊ गेलन, प्रभु उनका चिन्ह देखावे के काबिल बनईलन। अईसन कर के ऊ लोगवन पर प्रकट करलन कि परमेश्वर के संदेश सच्चा हे।
Bridge Connectivity Solutions Pvt. Ltd.