رومؔ11
1چونکہ یمہٕ کتھٕ چھےٚ پزٕ یمہِ موٚکھٕ بہٕ یہ ونان چُھس زِ خداین کٔرؠ نہٕ پٔزؠ کِنؠ پنٕنؠ یعنی بنی اسرائیلٕکؠ لوٗکھ رد۔ ہرگِز نہٕ! بہٕ چُھس زانان یہ چُھ پوٚز، تکیازِ، بتہِ چُھس بنی اسرائیل منٛز اکھ۔ بہٕ چُھس ابرہام سنٛدِ نسلہٕ منٛزٕ۔ خاص کر یہ زِ بہٕ چُھس تمہِ قبیلہٕ منٛزٕ آمُت یُس بنیمینؔ اوس۔2خداین ترٲوؠ نہٕ پنٕنؠ لوٗکھ۔ یِم چھِ تِم لوٗکھ یِم تٔمؠ گۅڈے ژٲرمٕتؠ چھِ۔ توٚہہِ آسہِ لٲزمن یہ معلوم زِ نبی ایلیاہنؔ کیاہ ووٚن صحیفن منٛز ییٚلہ تمؠ بنی اسرائیلین خلاف خدایس عرضی کٔر! 3ایلیاہنؔ ووٚن، "خداوند! بنی اسرائیلیو کٔرؠ مےٚ سِوا چٲنؠ تمام نبی قتٕل، چٲنؠ تمام قربان گاہ ژھنِکھ وُپرٲوِتھ۔ بہٕ چُھس ٲخری نبی یُس ونیُک تام زندٕ چُھ، وۅنؠ چھِ تِم میٚتہِ مارنٕچ کوشش کران۔ 4لہٰذا دیُت خداین ایلیاہسؔ یتھٕ پٲٹھؠ جواب، "مےٚ تھٲوؠ پننہِ مقصدٕ باپتھ ستھ ساس نفر زندٕ، یمو لوٗکو کٔر نہٕ اپزِس خدا بعلؔ سنٛز عبادت" 5یتھے پٲٹھؠ ٲسؠ امہِ وقتہٕ کینٛہہ وفادار بنی اسرائیلی تہِ موجود۔ یہ اوس اوٕ موٚکھٕ زِ خداین ٲسؠ تِم پننہِ فضلہٕ پتھ کُن ژٲرمٕتؠ۔6چونکہ خدا چُھ پننٮ۪ن لوٗکن یمہِ موٚکھٕ ژاران زِ سُہ کوتاہ فضلہٕ وول چھُ، خدا چُھنہٕ پننٮ۪ن لوٗکن تہنٛزِ کامہِ ہنٛدِس بُنیادس پٮ۪ٹھ ژاران۔ اگر خدا لوٗکن تہنٛدٮ۪ن اعمالن ہنٛدِس بُنیادس پٮ۪ٹھ ژارِ، تیٚلہ کوتاہ فضلہٕ وول چُھ سُہ، یقیناً آسہِ ہے نہٕ سُہ مہربان۔7تہٕ اسہِ پزِ یہ نتیجہ زانُن: اگرچہ اسرائیلی لوکھ پنُن پان راستباز بناونٕچ کوشش کران روزن مگر تِم ہیٚکن نہٕ تہِ کرِتھ۔ امہِ بجایہ یمہ خداین تِمو منٛزٕ فضلہٕ دٔسؠ ژٲرمٕتؠ چھِ تِمے بنیاے راستباز۔ مگر خداین بنٲوؠ تِم لوٗکھ سرکش یِمنہٕ تٔمؠ فضلہٕ دٔسؠ ژٲرؠ۔8یہ چُھ بلکُل تی یہ خدایہ سُنٛد مطلب اوس ییٚلہِ تمؠ صحیفن منٛز لیٚوکھ، "خداین کٔرؠ بنی اسرائیلٕکؠ لوٗکھ صحی پٲٹھؠ نہ سونچنس پٮ۪ٹھ مجبور، یوٚت تام نہٕ موجود وق ووت، توٚتام کٔرؠ خداین تِم مکمل پٲٹھؠ یہ سمجھنس منٛز ناکام زِ راستباز کِتھٕ پٲٹھؠ چھُ بنُن" 9داوودنؔ تہِ ووٚن صحیفن منٛز، "اے خدا، تہنٛز عٲشہٕ عشرتٕچ زندگی بناو تہٕ تہنٛدِ باپتھ پوٗرٕ پٲٹھؠ ۅبال یتھٕ پٲٹھؠ کانٛہہ شکٲرؠ جانورس زالس یا ٹُھپِس منٛز پھساوان چُھ! تہنٛز عٲشہٕ عشرتٕچ زندگی کرُن گناہ گٲری پٮ۪ٹھ آمادٕ تہٕ تِمن دِ پننٮ۪ن گُنہن ہُنٛد سزا۔ 10تہٕ تِم بناوُکھ ہمیشہٕ باپتھ سمجھنہٕ رنگؠ ناقٲبل، غلامن ہنٛدؠ پٲٹھؠ تُلناوُکھ ہمیشہٕ خٲطرٕ دۅکھ! 11چونکہِ یمہٕ کتھٕ چھےٚ پزٕ اوے چُھس بہٕ یہ ونان، "یہُودین کھۅت نہٕ یقیناً یہ بوزِتھ شرارتھ زِ خدا کرِ تِمن بلکل رد۔ ہرگِز نہٕ بلکہ چُھ خدا غٲر یہُودؠ لوٗکن بچاوان تکیازِ یہُودؠ لوٗکو کٔر تِہنٛز نافرمٲنی۔ یہ سپُد اوٕ موٚکھٕ زِ خدا سنٛدِ خٲطرٕ کرن یہُودؠ لوٗکھ غٲر یہُودؠ لوکن ہُنٛد حسد یِم تس زانان چھِ۔ 12اصلی کوٚر خداین یہ اوٕ کِنؠ زِ یہُودؠ لوٗکو کتھٕ کِنؠ کٔر تمسنٛز نافرمٲنی تہٕ سپدؠ پنپن پان راستباز بناونس منٛز ناکام تہٕ پورٕ دنیاہس منٛز میلہِ تمام قومہٕ کٮ۪ن لوکن انیٖکھ برکت، لہٰذا ییٚلہ وفادار یہُودؠ لوکن ہنٛز پوٗرٕ جماتھ راستباز سپدِ، تہٕ امہ تہِ گژھِ زیادے برکت۔13مگر وۅنؠ چُھس بہٕ توٚہہ سٟتؠ کتھ کران غٲر یہُودؠ لوٗکھ یِم یسوعسؔ پٮ۪ٹھ بھروسہٕ کران چھِ۔ بے شک بنونس بہٕ خداین غٲر یہُودؠ لوکن ہنٛدِ باپتھ پنُن نمایندٕ۔ اوٕ کِنؠ چُھس بہٕ ونان زِ یہ کینٛژھا بہٕ غٲر یہُودؠ لوٗکن ہنٛزِ خدمتہٕ باپتھ کران چُھس تہِ کوتاہ جان چُھ۔14اگر ممکن آسہ تہٕ بہٕ چُھس یژھان زِ یِمن سٟتؠ بہٕ جسمٲنی تعلق تھاوان چُھس تِمن یہُودٮ۪ن غٲر یہُودؠ لوٗکن سٟتؠ یِم خدایس زانان چھِ حسد کرُن تاکہ خدا بچاوِ تِمن منٛز کینٛژن۔15بے شک چُھ خدا یہُودٮ۪ن رد کرنہٕ کِس نتیجس منٛز دنیا کٮ۪ن لوٗکن سٟتؠ ملناوان۔ لہٰذا ییٚلہ خدا یہُودؠ لوٗکن قبول کران چُھ، تمہ کِس نتیجس منٛز کرِ خدا تِمن لوٗکن زندٕ یِم مۅردٕ آسن۔16بنیٲدی طور چھِ یہُودؠ لوٗکن ہنٛدؠ جدٕاجداد خدایہ سنٛدؠ، یتھٕ پٲٹھؠ مانٛڈِ متہِ آٹیُک اکھ حصہٕ خدایہ سُنٛد چُھ، تتِھےکِنؠ چھِ سٲری یہُودؠ خدایہ سنٛدؠ، بلکُل تِتھے پٲٹھؠ زِ سورےٕ مونٛڈمُت اوٹ چُھ خدایہ سُنٛد۔ لہٰذا ٲسؠ یہُودین لوکن ہنٛدؠ جدٕاجداد خدایہ سنٛدؠ، یتھ پٲٹھؠ زیتون کُلین ہنٛدؠ موٗل خدایہ سنٛدؠ چھِ، سٲری یہُودؠ لوٗکھ خدایہِ سنٛدؠ چھِ، تِتھے کنؠ چھِ زیتون کُلِکؠ شاخ تہِ خدایہ سنٛدی۔17پٔزؠ پٲٹھؠ ژھٕنؠ خداین کینٛہہ یہُودؠ پننہِ قومہٕ منٛزٕ کڈِتھ، یتھٕ پٲٹھؠ اکھ کۅمیُل زیتون کُلِس کینٛہہ شاخ ژٹان چُھ۔ مگر خداین بنٲیو توٚہؠ یسوعسؔ پٮ۪ٹھ پژھ تھاون وٲلؠ غٲر یہُودؠ لوٗکھ پننٮ۪ن لوٗکن ہنٛدؠ حصہٕ دار، یتھٕ پٲٹھؠ اکھ کۅمیُل جنگلی زیتون کُلٮ۪ن کاشت کرنہٕ آمتٮ۪ن زیتون کُلٮ۪ن ہُنٛد پیونٛد کران چُھ۔ توٚہؠ تہِ سپدیٚو خدایہ سنٛدٮ۪ن بندن سٟتؠ رلِتھ فٲیدٕ تُلنس منٛز شریک۔ یتھٕ پٲٹھؠ پیونٛد کرنہٕ آمٕتؠ شاخ زیتون کُلہِ کیٚو موٗلو نشہِ غذا حٲصل کرنس منٛز شریک سپدان چھِ۔18امہِ کِنؠ پزِنہٕ توٚہہ یِم یسوعسؔ پٮ۪ٹھ پژھ تھاوان چھِ تِمن یہُودٮ۪ن پٮ۪ٹھ فخر کرُن یِم خداین کٔڈِتھ ژھٕنؠ، یوٚدوے تمہِ ژٹنہٕ آمژن لنجن ہنٛدؠ پٲٹھؠ آسن۔ ییٚلہِ توٚہؠ فخر کٔریٚو، تہٕ توٚہہ پزِ یہ زانُن زِ توٚہؠ چھوکھ نہٕ یہُودؠ لوٗکھ قٲیِم تھٲوِتھ بلکہ چھِ تِم توٚہہ قٲیِم تھاوان، یتھٕ کنؠ موٗل شاخن غذا واتناوان چھِ!19وۅنؠ ہکیٚو توٚہؠ ونِتھ، "خداین ژھٕنؠ کینٛہہ یہُودؠ لوٗکھ پننہِ قومہٕ منٛزٕ کٔڈِتھ، یتھٕ پٲٹھؠ اکھ کۅمیُل کُلٮ۪ن شاخ ترٲشی کران چُھ۔ خداین کوٚر یہِ تاکہِ سُہ ہیٚکہِ مےٚ پننٮ۪ن لوٗکن سٟتؠ جورِتھ یِتھٕ پ ٹھؠ اکھ کمیُل اکِس کُلِس منٛز اکھ شاخ پیوند کران چھُ۔20بہٕ دمہٕ یہ ونِتھ جواب زِ تُہنٛد ونُن چُھ صحی۔ خداین ژھٕنؠ یہُودیٚو منٛزٕ کینٛہہ نفر پننہِ جمٲژ منٛزٕ کٔڈِتھ، یتھٕ پٲٹھؠ اکھ کۅمیُل پننٮ۪ن کُلٮ۪ن بےٚ پھل لنجہٕ ژٔٹِتھ نِوان چُھ تکیازِ تِم ٲسؠ بے وفا۔ تاہم چھِ غٲر یہُودؠ لوکھ یمہٕ یسوعسؔ پٮ۪ٹھ پژھ تھاوان چھِ، تس پٮ۪ٹھ بھروسہٕ کٔرِتھ خدایہ سنٛدین لوٗکن ہنٛدِ حصہٕ بنان چھِ۔ تکبُری خیال مہٕ أنیٚو ذہنس منٛز زِ أسؠ چھِ بے ایمان یہُودؠ لوکو کھۅتہٕ بہتر! بلکہِ کھوژیٚو خدایس۔21توٚہہ پزیٚو خدایس کھۅژُن تکیازِ تٔمؠ کوٚڑ نہٕ بےوفا یہُودؠ لوٗکن پٮ۪ٹھ رحم یِم قدرتی شاخن ہنٛدؠ پٲٹھؠ ٲسؠ۔ لہٰذا کرِنہٕ سُہ توٚہہ غٲر یہُودؠ لوٗکن پٮ۪ٹھ رحم اگر توٚہؠ یسُوعؔ ہس پٮ۪ٹھ پژھ کرٕنؠ ترٲیو۔22چونکہ یہ چُھ پوٚز، اوٕ کِنؠ سونٛچِو زِ خدا کوتاہ مہربان تہٕ سخت ہیٚکہ ٲسِتھ۔ خدا چُھ تِمن لوٗکن سٟتؠ سختی سان پیش یوان یمہٕ تِمس پٮ۪ٹھ پژھ کرٕنؠ تراوان چھِ۔ تاہم کرِ خدا توٚہہ غٲر یہُودؠ لوٗکن پٮ۪ٹھ مہربٲنی یمہٕ یسوعسؔ پٮ۪ٹھ پژھ تھاوان چھِ۔ اگر توٚہؠ یہ مانان روزیو زِ سُہ کوتاہ مہربان چُھ۔ وۅنؠ اگر توٚہؠ تہِ کٔریٚو نہٕ تہٕ خدا تہِ کریٚو توٚہہِ رد۔ یتھٕ پٲٹھؠ اکھ کۅمیُل کُلِس بے پھل لٔنٛڈ ژٹان چُھ۔23تاہم اگر تِم بے وفا یہُودؠ یسوعسؔ پٮ۪ٹھ ایمان تھاوان چھِ، تہٕ خدا دییہِ تِمن پننٮ۪ن لوٗکن منٛز دُبارٕ شٲمِل گژھنُک اجازت۔ یتھٕ پٲٹھؠ اکھ کۅمیُل کُلِس لنجہِ پیوند کران چُھ۔ یہ چُھ اوٕ موٚکھٕ زِ خدایس چُھ تیوت طاقت زِ سُہ ہیٚکہ یہُودٮ۪ن پننٮ۪ن لوٗکن منٛز شٲمِل کٔرِتھ۔24بنیٲدی کٔڈؠ نو توٚہؠ خداین غٲر یہُودؠ قومہٕ منٛزٕ یمہٕ یسوعسؔ پٮ۪ٹھ پژھ تھاوان ٲسؠ تہٕ وۅنؠ کٔرؠ نو توٚہؠ پننِس قومس منٛز شٲمِل۔ یتھٕ پٲٹھؠ اکھ کۅمیُل کاشت کرنہٕ آمٕتؠ زیتون کُلٮ۪ن ہنٛدؠ شاخ جنٛگلی کُلٮ۪ن پیونٛد کٲری ذریعہ لاگان چُھ، یودوے زن یہِ قدرتی چھُنہٕ۔ چونکہ یہِ چھُ پوٚز، توے کرِ خدا یقیناً خدا اسرائیل کیٚن لوٗکن پننٮ۪ن لوٗکن منٛز شٲمِل۔ یتھٕ پٲٹھؠ اکھ کۅمیُل کاشت کرنہٕ آمٕتؠ زیتون کُلٮ۪ن ہنٛدؠ شاخ پننٮ۪ن کُلٮ۪ن پیونٛد پیوند چھُ کران۔25بہٕ چُھس یہ ونان، تکیازِ بہٕ چُھسو توٚہؠ پٔزؠ کِنؠ یژھان، میانیٚو غٲر یہُودؠ ایماندارو، زٲنیٚو زِ خداین کیاہ تھوو گۅڈ ژوٗرِ، تاکہ توٚہہ کٔریٚو نہٕ کِبر۔ خداین تھٲو گۅڈٕ لوٗکن نشہٕ یہ حقیقت ژوٗرِ زِ بنی اسرائیل منٛزٕ کرن کینٛہہ لوٗکھ تۅتام تس مخالفت یۅتام خدایہ سنٛدؠ منتخب کٔرمٕتؠ تمام غٲر یہُودؠ لوٗکھ تمسنٛدِس قومس منٛز شٲمِل سپدن نہٕ۔26پتہٕ بچاوِ خدا یتھے پٲٹھؠ اسرائیل کٮ۪ن تمام لوٗکن۔ یسعیاہسؔ اوس یوٚہے مطلب ییٚلہ تٔمؠ صحیفن منٛز لیٚوکھ، "خدا سوزِ یروشلمہ پٮ۪ٹھٕ کانٛسہِ پنٕنؠ لوٗکھ بچاونہٕ باپتھ، سُہ شخص رُکاوِ یعقوب سنٛدٮ۪ن اولادن بے دین سپدنہٕ نشہٕ" 27خدا چُھ ونان، "یہ چُھ سُہ مہادٕ یُس بہ یعقوب سنٛدین اولادن سٟتؠ کرٕ، ییٚلہ بہٕ تِمن گناہ معاف کرٕ یمہٕ تِمو کٔرمٕتؠ چھِ۔ 28رٕژ شیٚچھ رد کرن والیٚن یہُودٮ۪ن متعلق، یمہٕ تُہنٛدِ فٲیدٕ باپتھ خدایہ سنٛدؠ دشمن چھِ۔ تاہم خدایہ سنٛدِ یہُودؠ لوٗکھ ژارنہٕ کِس سلسِلس منٛز چُھ خدا تِمن تہٕ تہنٛدٮ۪ن جدٕاجدادن سٟتؠ وعدٕ کرِمتہِ موجُب لول کران۔29یہ چُھ پزر تکیازِ خدا چُھنہٕ تِم چیز واپس نِوان یِم سُہ فضلہٕ دسؠ عنایت کران چُھ۔ سُہ چُھنہٕ تِمن لوٗکن تہِ تراوان یِمن سُہ پنٕنؠ لوکھ زٲنِتھ سمبراوان چُھ۔30پٔزؠ پٲٹھؠ چُھ یہ بلکُل تِتھُے ہیٚوٗ یتھٕ کنؠ توٚہؠ غٲر یہُودؠ لوٗکھ یمہٕ یسُوعؔ ہس پٮ۪ٹھ پژھ تھاوان چھِ خدایہ سنٛز نافرمٲنی کران ٲسؠ، مگر ووٚن سپُد خدا توٚہہ پٮ۪ٹھ مہربان تکیازِ یہُودیٚو کٔر تمسنٛز نافرمٲنی۔31یتھے کنؠ چھِ وۅنؠ یہُودؠ تہِ خدایہ سنٛز نافرمٲنی کران تکیازِ خدا چُھ توٚہہ غٲر یہُودؠ لوکن پٮ۪ٹھ مہربان۔ یہ سپُد اوٕ موٚکھٕ زِ خدا تہِ کرِ وۅنؠ تِمن پٮ۪ٹھ رحم۔32اصلی دِژ خداین پرٛتھ اکِس تمسنٛز نافرمٲنی کرنُک اِجازت تاکہ سُہ کرِ تِمن پٮ۪ٹھ رحم۔33خدا چُھ سیٚٹھاہ غنی، حکیم تہٕ علمہٕ وول! کانٛہہ تہِ ہیٚکہ نہٕ پوٗرٕ پٲٹھؠ سمجھِتھ زِ سُہ کیاہ چُھ کران!34پٔزؠ پٲٹھؠ یتھٕ کنؠ زن یسعیاہنؔ لیٚوکھ، "کانٛہہ تہِ ہیٚکہ نہٕ یہ سمجِھتھ زِ خداوند کیاہ چُھ سونٛچان یا کیاہ چُھ تمِس ونان" 35امہِ علاوٕ یتہِ زِ کانٛہہ تہِ ہیٚکہِ نہٕ خدایس کینٛہہ تہِ دِتھ یمہِ سٟتؠ خدا تمسُنٛد قرضدار سپدِ" 36یِم کامہِ ہیٚکہِ نہٕ کانہٛہ تہِ کٔرِتھ، تکیازِ پرٛتھ کانٛہہ چیز آو خدایہِ سنٛدِ پٮ۪ٹھٕ، خدایہِ سنٛدؠ ذریعہٕ چھِ موجود تہٕ خدایہِ سنٛدِ خٲطرٕ چُھ موجود۔ بہٕ چُھس خدایس منٛگان زِ پرٛتھ کانٛہہ کٔرِن ہمیشہٕ باپتھ تمسنٛدؠ تعریف۔ یی سپدِن پوٚز!
Bridge Connectivity Solutions Pvt. Ltd.