YAKOBI2
Ka muswasikisanga ko
1Mpangi zani, yeno lukwe sanga kiminu mu Yesu-Klisto, Mfumu eto yi nkembo, luswasikisangandi bantu ko.2Yinduleeno eti, tala ti muntu wumosi wumvwama wizi kota ha lukutukunu lweno na wuu wulwata binkutu bintalu na kimpambula ki wola mu mulembo, mpe muntu wumosi wumputu wizi kota na binkutu bimvindu.3Tala ti kitalulu kyeno nkyezi ku yondowo lweti binkutu bintalu, na lumuteedidi ti: «Yiza wuzakala ha kibuka ki buzitu», na luteedi ku mputu ti: «Ngeye, telama ehaha», hoti «Zakala ha nsi, ha nsye malu mani»,4luna yena ko ti ha kati dyeno diswasani luna sa e? Nga lukitukidi mimfundisi mikwe fundisanga mu mbanzulu awu zimbi ko e?5Mpangi zani zizola, yuweeno: Nzambi wusoola bamputu mu nza beyiyi, mwanki bakituka zimvwama mu kiminu, na babyadila Kimfumu ki mazulu ki kasiila nsilulu ku yobobo bakwe mu tyanga.6Kansi yeno, lukwe vwezanga bamputu! Ka bamvwama ko bakwe luyenisanga mpasi na bakwe lunatanga mu zinzo zi lufundusu e?7Ka yawu ko bakwe safulanga nkumbu yi mbote yi baluhaana e?8Tala ti luna vumina musiku wu Kimfumu ki Nzambi bonso bu wuu wusonama ti: «Zola mfinangani aku bonso nge bende», buna bumbote luna sa.9Kansi tala ti luna swasikisa bantu, masumu luna sadila, mpe musiku wuna lubedisi mu dyambu ti luna vumina wo ko.10Tala ti muntu wuna vumina Misiku mimvimba, mboki sumuni musiku wakwa wumosi, waabedoso mu Misiku mimvimba.11Mu dyambu ti, yondowo wuta ti: «Kusadilandi kinsuza ko», wuta mpe ti: «Kuhondandi ko.» Kansi, tala ti kwe sadilanga kinsuza ko, kansi hondidi muntu, ngeye vumini Misiku mimvimba ko.12Ni hahoho, zonzangeeno, mpe dyatilangeeno bonso bantu bebobo baafundusu mu musiku wu kimpwanza.13Mu dyambu ti, Nzambi bu kaafundisa bantu, kaafwila nkenda ko ku yobobo bakwe lembolo fwilanga banawu nkenda. Kansi kufwila nkenda kukwe nungisanga muntu ha lufundusu.Kiminu na mavanga
14Mpangi zani, nkye mfunu ku muntu mu ta ti: «Kiminu ki nani», tala ti kalendi kye lonka mu mavanga ko e? Nganunu, kiminu ki bobobo kilendi mu vuukisa e?15Tala ti mpangi eno yi bakala hoti yi mukento lembolo ba na binkutu bye lwata na bindya bi kadi kilumbu,16na wumosi ha kati dyeno wubateedidi ti: «Yendeeno mu kiyenge! lwateeno binkutu bi kyozi na Yendeeno ludya bumbote!» Kansi lubaheeni bima bi nawu mfunu ko, nkye mfunu mu myo mi lubateedidi e?17Bwabobo mpe kiminu kidi: tala ti kii na mavanga ko, buna kifwa kidi.18Kansi muntu mbo kata ti: «Ngeye kiminu ki naku, meno mavanga ma nani.» Ndongisa kiminu kyaku kilembolo ba na mavanga, mpe meno, mu mavanga mani naakulonkila kiminu kyani.19Ngeye kwe kwikilanga ti Nzambi yimosi kwandi yidi e? Bumbote kwe sanga: mpeve zimbi mpe zikwe kwikilanga bobo, na zikwe zakamanga mu bunkunta.20Ngeye lembolo ba na madyela! Tiidi mu zaba ti kiminu kilembolo mavanga kifwa kidi e?21Nganunu Nzambi kabongila Abalahami, mukulu eto, bonso muntu wu lunungu mu dyambu di mavanga mandi ko e? Bu kahaana mwana andi Isaaki bonso munkayulu ha ziku di bakwe yokilanga minkayulu.22Wuna yena ti kiminu kyandi kyedi yenika mu mavanga, mpe kiminu kyandi kilungusu mu mavanga.23Bwabobo Masonama mayendila detila ti: «Abalahami wukwikila Nzambi, na Nzambi ni kamubongila bonso muntu wu lunungu.» Nzambi ni kamutumisina ti nkayi ani.24Luyeni ti, muntu bakwe mu bikanga, muntu wu lunungu, mu mavanga mandi, kansi ka mu kiminu kaka ko.25Bwabobo mpe Lahabi, mukento wunsuza, wubiku bonso muntu wulunungu mu mavanga mandi, mu dyambu ti wubwana minketi mi Isaeli, na wubatinisa mu nzila yi hiika .26Bwabobo mpe nitu yi lembolo ba na mwela yifwa yidi, bwabobo mpe kiminu kilembolo ba na mavanga kifwa kidi.Wycliffe Bible Translators, Inc.