YAKOBI3
Ludimi
1Mpangi zani, lubandi babingi mu ba milongisi, mu dyambu ti yeto milongisi twaatambula mfundusu yi hyokidi kitezo.2Yeto bamvimba tukwe sanga masumu. Tala ti muntu kasumukanga mu nzonzolo ko, buna yandi wulunga kadi, na lenda yaala nitu andi yimvimba.3Bu tukwe tulanga mwa kisengo mu munwa wu zimpunda, mwanki ba tutumimina, tukwe twadisanga mpe nitu awu yimvimba.4Tubongeeno kifwani ki masuwa: nkatika mamanene madi mpe bitembo bingolo bikwe natanga mo, kansi mwa kima kifyoti kwandi kikwe twadisanga mo, na makwe tadisanga kuma ni kuma kutiidi kinati mu twadisa mo.5Bumosi mpe ludimi, mwa kinama kifyoti kinitu kidi, kansi lukwe kitumpidikanga mu misamu miminene. Taleeno bonso buu mwa tiya tufyoti, tukwe lenda mu yoka kibiti kikinene ki mukobo.6Ludimi mpe tiya tudi. Lwalolo mpe ludi kibuka ki misamu mimbi mu kati di nitu eto. Lukwe sumunanga nitu eto yimvimba, mpe lukwe yokanga luzingu lweto lumvimba, mboki lwabende lukwe hyanga ku tiya tu mbungulu.7Muntu wuu na lulendo mu lemvola makanda mamvimba ma bibulu bi nsye mpanda, zinuni, mwa bibulu bikwe kwe syelomokingi ha nsi, na mbizi zi mamba, muntu bya kakwe lemvolanga.8Kansi kunaani muntu kwe lendanga mu yaala ludimi, mu dyambu ti kima kimbi kidi na ki bakwe lembolo simbanga, mpe luu lufuluka mu miswa mikwe hondanga.9Mu yandi tukwe sakumuninanga Nzambi, Tata eto. Mpe mu yandi tukwe singilanga bantu ba hidika Nzambi mu kifwani kyandi.10Mu munwa wumosi kwandi tukwe duukisilanga mpova zi lusakumunu na zinsingulu. Mpangi zani, ka bufweni ko ti bubela bobo.11Mukelo wumosi wulenda duukisa mamba madoda na ma ndudi e?12Mpangi zani, muti wu fike wulenda buta mbutu zi olive, hoti muti wu vinu wulenda buta mbutu zi fike e? Bumosi mpe, mukelo wumosi wulendi duukisa mamba ma mungwa na mamba madoda ko.Ndwenga zi fumini ku yulu
13Nani ha kati dyeno wuu na ndwenga na madyela e? Kalonka bo mu nkadulu andi yimbote, mu mavanga mandi mana sadulu mu lembami, na mu ndwenga.14Kansi tala ti mutima aku wufulukidi mu musoki wuhita na mu mpeve yi kimpala, kusandi mayama ko mu kilonka ti muntu wuu ndwenga na ku bebisandi kedika mu luvunu ko.15Ndwenga zibobo zikwe fumanga ku yulu ko, kansi zi ki nza, zi kimuntu, mpe zi nkadyampemba.16Mu dyambu ti huuma ha musoki na mpeve yi kimpala, mvwanzi na misamu mimvimba mimbi milendi kondo ko.17Kansi ndwenga zikwe fumanga ku yulu ntetete zi zivedila, mboki zikwe twalanga kiyenge, kizunu, kintwadi, nkenda mpe na mimbutu mimbote. Zikwe swasikisanga bantu ko mpe zi na diisu ku nsye lukaya ko.18Bantu bakwe tukisanga kiyenge ha kati dyawu, bakwe kunanga na bakwe yonzikanga mu kiyenge, luzingu lukwe tyanga Nzambi.Wycliffe Bible Translators, Inc.