อ่านหนังสือ 1 THESALON 1

1 THESALON1

Beihlangnaw

¹Paul, Silas te Timote nynh Paaw Pachia te Bawipaw Jesu Khri kya a umpaw Thesalon khua e khriccaawbuu kalan ccaw kae ky oh. Thawccinaw te daenaw tuh nae kya la um sah. Thesalon hae Zynnaw te Hiinnaw

²Nanning balyn hanlan Pachia kalan lungtuabya palei kae ho zah kae sawsangnaw kya nanning kha palei kae hobia oh.³Ah Paaw Pachia malang nae zynnaw te asekuhpaw nae ryalawnaw, sungsakunaw hoite na zuakunaw oh te ah Bawipaw Jesu Khri kya atynpaw nae ngaehoinaw kha tyty kae liathui.⁴Pachia nynh a sungsahpaw uteno hae, amaw nynh nanning kha ae po vae oh cipaw kae ny.⁵Pawccecize kaening kya-e thehoypaw tuh bya kyalya te thua leite, thungnaw te Thyaa Muisaw te ny ccaccingnaw te nynh yn thua; nae kya kae um lyaze kaening tuh nanning hanlan pawcihawpaw ccungccaw hae nynh kae thua cipaw kha na ny oh.⁶Nanning tuh vawsawnaw patae na teing oh zemah Thyaa Muisaw kyate yn thuapaw lungtuanaw khate Pachia bya kha na lawkuh oh zah, kaening thydokuh hae paw te Bawipaw thydokuh hae paw nynh na thua oh.⁷Tukeiccuze Mesidonia ram te Akhai ram kya umpaw zyntu hae balyn hanlan nanning tuh dosuinku lan um hae paw nynh na thua oh.⁸Pawccecize nanning kyate Bawipaw bya roi tuh Mesidonia ram te Akhai ram kya kyalya ccae khyh, Pachia na zynnaw oh paw tuh hmin takyh kya mah pong zeihkuh vae, tukeiccuze kaening nynh paw sanmah kae ho ho vae khyh.⁹Pawccecize kaening nynh nae kalan pawcihte nynh kae tee cipaw kaening kong kha tuin ram kya-e ccungccaw hae nynh a ho hae, te a hiinpaw te ahmepaw Pachia kha ryalawpya khylan zohtuh hae kyate Pachia kalan pawcihte nynh na paleihku oh cipaw kha thuasah,¹⁰yn thua lanpaw thinrianaw kyate aening kha yn luesahtupaw Jesu, Pachia nynh chinaw kyate a thoosahpaw, vaawlang kyate yn thua cih paw a Ccapaw ngaw lanpaw kha thuasah a ho hae. Thesalon kya Paul Ryalawnaw

¹Uteno hae, nae kalan kae thuapaw hynh accakaepaw thua khyh cipaw kha naemaw ccaccei nynh na ny oh.²Na ny vae oh hawte, kaening tuh Filipi khua kya teingnaw te maethyanaw kae mue salamah, rawsenaw patae laku te Pachia thehoypaw kha nae kalan ho khylan rawhoynaw kha ah Pachia kyate kae mue.³Pawccecize kae hyynaw oh paw hynh lingkunaw, nungsikunaw te pheekunaw kyate yn pou khyh.⁴Thehoypaw kha zyn lan um lante ho lan Pachia nynh nawccawkhaepaw kae thua thyhte, ccungccaw lungrythuasah khylan thua leite, kae thinlung oun syntawpaw Pachia lungrythuasah khylan nynh kae ho.⁵Pawccecize na ny vae oh hawte, poonaw bya kha papin kae mang boi khyh, karankunawpaw vawnin bya mah kae mang khyh cipaw Pachia tuh kae ccaekia nynh thua.⁶Khri kya-e locceihtu hae kae thua hawte, a ngiakuh lanpaw kae thua salamah, nanning kya thuasah, mingccang hae kya thuasah ccungccaw hae kya-e thehoysakunaw kha kae ccungkuh khyh.⁷Nung nynh a ccaaw hae kha a do-oih hae hawte kaening tuh nae kya nebaleih lante kae um.⁸Nanning kha myarya kae sungsah oh keiccuze Pachia thehoypaw kyalya thua leite, kae hiinnaw heize neethung lan kae ry oh, pawccecize nanning tuh kaening hanlan myarya sungsah lan na um oh.

⁹Uteno hae, thawbangte zuakute rya kae lawpaw kha na ny oh; Pachia thehoypaw kae hopya lya oh kha, nanning lu kheit hanlan sanmah phuripaw kae thua khyh nawlan, khuazi khuadae rya kae lawkuh.¹⁰Nanning zyntu hae laku kya thyaararih lan, dingrarih lan, ccaenaw um lei lante nynh kae hiin cipaw nanning tuh ccaekia hae na thua oh zah Pachia mah ccaekia nynh thua.¹¹Paaw nynh a ccaaw hae a ccuepe hae hawte, nanning milu raveih kha kae ccuepe oh,¹²amaw a peenaw te a phu-enaw kalan ae ko oh paw Pachia te angaekuh lante na hiin nawlan oh nanning kha kae hyy oh zah thawzung pyate bya kae tawsya oh.

¹³Kaening kyate na thae oh paw Pachia bya na lawku lya oh kha ccungccaw bya lante lawku leite, ahme ccaccingpaw Pachia bya lante na lawku oh, tuh-e bya tuh nanning zyntu hae lungkhu kya rya a lah; tuh-e hanlan Pachia kalan apaekuh lei lan lungtuabya kae ho.¹⁴Uteno hae, nanning tuh Khri Jesu kya umpaw, Judea ram e Pachia khriccaawbuu hae nynh thydoku hae paw lang na tang oh; pawccecize minmin tuh Judah hae keiccu a teing hae hawte nanning mah naemaw ccungccaw hae keiccu tuhcihawpaw tuh na teingbua oh.¹⁵Tuh-e Judah hae nynh Bawipaw Jesu te profeh hae kha theih hae zah kaening kha mah oun tuaa oun sah hae; minmin nynh Pachia kha a lunghoysah khyh hae, te ccungccaw miakaw kha a rawse hae.¹⁶Zenta hae nynh khumnaw a muebua khyh ccaw hae cite kaening kha thehoypaw ho lan oun khee hae; tuhcite mih seinaw kha palei a biachihku hae, nyathyakou tuh mih tungvaw kya Pachia thinrianaw accah. Paul nynh Khuaccong A Ry Ki

¹⁷Uteno hae, kaening tuh nanning ryte thinlung lante thua leite, pyn lante sosoh ah phiakuh oh pawte myarya kae ngae oh zah nae mitmae muih lan myaryamaw kae ry.¹⁸Tukeiccuze nae kalan thua lan kou kae ry. Kae, Paul mah atu te atu thua lan ka ry, thuasalama Satan nynh kaening kha phe oun khee.¹⁹Ah Bawipaw Jesu Khri yn thua te, amaw malang kae ngaehoinaw, kae lungpawnaw te kae pookunawpaw bawilukhung tuh pawmou athua? Tuh-e tuh nanning na thua khyh oh tou?²⁰Pawccecize nanning tuh kae phu-enaw te lungpawnaw nynh na thua oh.

¹Tukeiccuze kaening nynh he kae ngaesang kho khyh tuh, Athen khua kya kae makhaete umhy lan bya kae paeku.²Khri thehoypaw kya rya kae lahkheihpaw, Pachia rya a lahpaw, kae neitaw Timote kha nae zynnaw kya thawzung tynsah khylan te thawpya khylan nae kalan kae saw,³hynh-e tuaasahkunaw hae keiccuze hum sanmah nulang na ki khyh nawlan oh kae saw. Thanccingte, kaening tuh hynh-e tuaasahkunaw teing khylan popaw nynh kae thua cipaw naemaw ccaccei nynh na ny oh.⁴Pawccecize nae kya kae um lyaze, tuaasahkunaw kae teing vae cih cite kae hopya ty vae oh; kae hopya oh hawte acyikupaw kha na ny oh.⁵Hynh-e keiccuze, he ka ngaesang kho khyh tuh, nae zynnaw kha ny khylan Timote kha kae saw; tuhoutu nynh nanning kha ccangkhakheit te ae tuhou cih oh zah kae ryalaw tuh alakaw lan a tangsei cih cipaw kae thinphang. Timote nynh Thawzung Pyanaw

⁶Thuasalama atu nae kyate kaening kalan Timote he yn thua tuh nae zynnaw te sungsakunaw thongpang hoypaw kha oun phupya; kaening kha ahoy lante tyty nae liathui oh zah, kaening nynh muih lan kae ry oh hawte nanning nynh mah muih lan nae ry oh cipaw kha mah oun hopya.⁷Tukeiccuze uteno hae, riathaenaw te tuaasahkunaw kae teing lyakhe nae zynnaw nynh nanning konglang lungtangnaw oun pya.⁸Pawccecize Bawipaw kya tynkaring lan na thadyn oh zetuh, atu kaening tuh kae hiin.⁹Ah Pachia malang nanning keiccuze kae lungtuanaw balyn hanlan Pachia kalan nanning elang pawtemou lungtuabya phe zaw lan kae ho kho cih?¹⁰Nae mae kae muih nawlan te nae zynnaw kya ahoboupaw kae ccingsahpya nawlan oh, khuazi khuadae thawte saw kae sangpah oh.

¹¹Ah Paaw Pachia amaw te ah Bawipaw Jesu nynh kae laanpi tuh nae kalan oun paccynpah vae sah.¹²Nae tungvaw sungsakunaw kae hoi hawte, nanning mah lu kheit te lu kheit na sungsakunaw oh te ccungccaw balyn na sungsahnaw oh kha Bawipaw nynh lesah thung sah lah ccingsah vae sah.¹³Ah Bawipaw Jesu tuh a mithyaa hae balyn ryte yn thua vae ze, ah Paaw Pachia malang nae thinlung kha thyaanaw kya ccaenaw um lei lante ae tynsah vae oh sah. Pachia Lungrypaw Hiinnaw

¹Nyathyakou, uteno hae, nanning nynh pawtemou hiin lan accan, Pachia kha pawtemou a lungrythuasah lan accan cipaw kha kae kyate na ccangku vae oh hawte, tuhcite houhouh na hiin nawlan oh, Bawipaw Jesu min te kae ngia oh zah kae hyy oh.²Pawccecize Bawipaw Jesu liate pawcihawpaw kawbya hae mou kae pya oh cipaw kha na ny oh.³Pawccecize Pachia nynh a rypaw tuh na thyaa lan oh paw kha nynh thua: nanning nynh ohhuakunaw kha na sungku nawlan oh,⁴nanning milu raveih nynh nae pyn kha athyaapaw te sawtuapaw athua nawlan pawtemou sungku lan cipaw na ny nawlan oh,⁵Pachia nyh leipaw Zenta hae hawte myarya ohhuaku rynaw thinlung kha hoi leite,⁶hynh-e kong kya hum nynh sanmah a uno kha hynpyate a sei khyh nawlan Pachia nynh a ry. Pawccecize kaening nynh kae hopah vae oh zah raeringnaw hoyte kae pya vae oh hawte, Bawipaw tuh tuhcihawpaw uccaw balyn hanlan liarutu nynh thua.⁷Pawccecize Pachia nynh aening kha athyaa leipaw kalan ko leite athyaapaw kalan nynh oun ko.⁸Tukeiccuze hynh-e ccangpyanaw a eipaw tuh ccungccaw ccangpyanaw kha a eipaw thua leite, a Thyaa Muisaw ae pyatu oh paw Pachia ccangpyanaw kha a eipaw nynh thua.

⁹Thuasalama uteno sungsakunaw konglang te lukhakheit nynh nae kalan zei ho vae khyh, pawccecize Pachia nynh naemaw ccaccei kha lu kheit te lu kheit sungsaku lan ae ccangpya vae oh.¹⁰Mesidonia ram kya umpaw uteno hae balyn kha tuhcite na sungsah ccaccing vae oh. Thuasalama uteno hae, tuhlaeze houh ahoy lante na hiin nawlan oh kae ngia oh.¹¹Kae hopya vae oh hawte, daebabi lan na umthya nawlan oh, nae ryalaw kha pekikute, nae kuih te na lawku nawlan oh kae ngia oh;¹²atolang e ccungccaw hae kya kou ngaekuh lante na hiin nawlan oh te ming hae kha na ngaehoiku khyh nawlan oh kae ngia oh. Bawipaw Rungnaw

¹³Uteno hae, ngaehoinaw a hoi leipaw mingccang hae nynh mih ngaethya hawte nae ngaethya khyh nawlan a chih hae paw konglang kha ny leite na um lan oh paw ka ry khyh.¹⁴Pawccecize Jesu tuh chih zah a thoothui cite ah zyn oh ze, tuhawte Jesu kya a chih hae paw kha amaw ryte Pachia nynh a cciakhae cih hae.¹⁵Kaening nynh Bawipaw bya liate e hynh kae hopya oh: Bawipaw yn thua cia ah hiinhy oh paw aening nynh a chih vae hae paw kha laan ah thoih lan khyh oh.¹⁶Pawccecize Bawipaw amaw tuh kawpyanaw roi, vaaw hae lakuze lupi athuapaw roi te Pachia mungkae roi ryte vaawlang te yn rungbung cih. Tetuh Khri kya a chih hae paw tuh masaty oun tho cih hae.¹⁷Tukoute ah hiinhy oh paw aening tuh vaawlang kya Bawipaw te tungku khylan minmin ryte pynkheihlan maeking kya hangthung ah thua cih oh, tetuh Bawipaw ryte zungzae umkheih lan vae.¹⁸Tukeiccuze hynh-e bya hae hynhte lu kheit te lu kheit thawzung la pyakuh oh.

¹Thuasalama uteno hae, accyh te kumvaelori kong tuh nae kalan zei ho vae khyh.²Pawccecize Bawipaw Nin tuh khuazi e miruh hawte nynh yn thua cih cipaw kha naemaw nynh ccaerarih lan na ny oh.³“Daenaw te khynnaw a um,” a ci lya hae khe, ccaaw a poipaw nopinung tungvaw neitangia nynh a thuanua hawte, minmin tungvaw ronaw nynh vaekheihmawte oun thuanua cih hae zah minmin tuh lue lan khyh hae.⁴Thuasalama uteno hae, nanning tuh mohnaw kya na um khyh oh keiccuze tuh-e Nin nynh miruh hawte yn thuapaw kha na siikuh lan khyh oh.⁵Nanning balyn tuh awnaw ccaaw hae te khuadae ccaaw hae nynh na thua oh; aening tuh khuazi ccaaw hae te mohnaw ccaaw hae ah thua khyh oh.⁶Tukeiccuze ming hae nynh a i hae hawte ih nan oh sih, aening tuh raeringkuh oh sih lah, hawrarih lan um oh sih.⁷Pawccecize a ih hae paw tuh khuazi nynh a i hae, a rui hae paw mah khuazi nynh a rui hae.⁸Thuasalama aening tuh khuadae te ah seku oh keiccuze hawrarih lan um oh sih, zynnaw te sungsakunaw kya-e bykhaw khate ccaankuh oh sih lah, khumnaw kya-e ngaehoinaw sivawlukhung kha khungkuh oh sih.⁹Pawccecize Pachia nynh a thinrianaw kha teing khylan aening kha oun paccyn khyh; ah Bawipaw Jesu Khri liate khumnaw mue khylan nynh oun paccyn.¹⁰Aening tuh ah thaeku oh zemah, ah i oh zemah, amaw ryte umkheih khylan, Khri tuh aening hanlan a chih.¹¹Tukeiccuze na cyimae oh hawte thawzung pyakuh kalang oh lah, lu kheit te lu kheit tynsakuh oh. Nyathya Hyynaw te Beihlangnaw

¹²Uteno hae, nae kya ryalahtu hae, Bawipaw kya ae cciakhae oh paw te ae thuihei oh paw kha saw la tua oh cite kae ngia oh;¹³mih ryalaw keiccuze minmin kha myarya sawtua oh lah sungsah oh. Naemaw te naemaw ccawkute la um oh.¹⁴Uteno hae, nanning kha kae ngia oh; mih thawnaw hae paw kha raeringnaw la pya oh, lungthawzya hae paw kha thawzung la pya oh, thawzya hae paw kha la bawm oh, ccungccaw miakaw kya nae lung la sae sah.¹⁵Hum nynh sanmah lukhakheit tungvaw hoyleinaw kha hoyleinaw te a liaru khyh nawlan raeringkuh sah, naemaw te naemaw kya thuasah, ccungccaw balyn kya thuasah ahoypaw kha rae lan zuakuh zungzae oh.¹⁶Zungzae nae lungtua sah.¹⁷Apaekuh lei lan sawsang oh.¹⁸Atyn-are kya lungtuabya ho oh; pawccecize tuh-e tuh Khri Jesu kya nae hanlan Pachia rynaw nynh thua.¹⁹Thyaa Muisaw kha daesah nan oh.²⁰Profehbya honaw kha pawlangria leite um nan oh.²¹Pawpaw balyn kha syntawtua oh lah, ahoypaw kha tynkaring lan kyngkuh oh;²²ahoy leipaw miakaw kha sibia oh.

²³Daenaw Pachia amaw ccaccei nynh nanning kha marya ae la thyaasah vae oh sah; ah Bawipaw Jesu Khri yn thua te, nae muisaw, nae thinlung te nae pyn kha abalynte ccaenaw um lei lan ae la nung vae oh sah.²⁴Nanning ae kotu oh paw tuh a lungzipaw thua zah, tuhcite a cyih cih.

²⁵Uteno hae, kaening hanlan saw oun la sangpah oh.

²⁶Uteno hae balyn kha athyaapaw myngkunaw khate bya la beih oh.²⁷E ccaky hynh uteno hae balyn kha la riapah oh cite Bawipaw liate kae nynh bya kae tawsya oh.

²⁸Ah Bawipaw Jesu Khri thawccinaw tuh nae kya la um vae sah.

Bible Society of Myanmar

https://app.library.bible/content/1a340f5ae072b2f4