Read 2 THESALON 1

2 THESALON1

Beihlangnaw

¹Paul, Silas te Timote nynh ah Paaw Pachia te Bawipaw Jesu Khri kya um hae paw Thesalon khriccaawbuu kalan ccaw kae ky oh.

²Ah Paaw Pachia te Bawipaw Jesu Khri kyate thawccinaw te daenaw tuh nae kya la um vae sah. Lungtuabya Honaw

³Uteno hae, nae zynnaw tuh myarya lethung zah nanning milu raveih nynh lu kheit te lu kheit na sungsakunaw oh mah alethung keiccuze cyi lan accan hawte nanning hanlan Pachia kha zungzae kae luung.⁴Tukeiccuze nanning nynh tuaasahkunaw te vawsawnaw balyn kha na ngaesang oh zah teing khonaw te zynnaw na hoi oh keiccuze Pachia khriccaawbuu hae kya nanning hanlan kae pookuh. Khri Thuanaw te Byapianaw

⁵E hynh Pachia kya-e adingpaw byapianaw kha a langsakuhpaw nynh thua, nanning tuh Pachia peenaw hanlan na teing oh keiccuze tuh-e peenaw te angaekuh hae paw nynh na thua oh.⁶Nanning vawsaw ae pya oh paw ccungccaw hae kha vawsawnaw pyaru lanpaw tuh Pachia hanlan atazaepaw nynh thua,⁷Bawipaw Jesu tuh athungpaw a vaaw hae ryte aruapaw maee khate vaawlang te he yn langkuh te, vawsaw na teing oh paw nanning kha kaening ryte haeungnaw ae pya cih oh,⁸Pachia nynh amaw a nyh lei hae paw te ah Bawipaw Jesu Khri thehoypaw a ngae lei hae paw kha a liaru cih hae.⁹Minmin tuh zungzae ronaw detahnaw kha a teing cih hae zah Bawipaw malang kyate thuasah, a thungnaw kya-e phu-enaw kyate thuasah phia athua cih hae,¹⁰amaw he yn thua te a mithyaa hae liate phu-esah athua cih zah, nanning kalan ccaekia kae khanpaw kha na zyn oh keiccuze a zyn hae paw balyn laku kya ngaeang thehoysah athua cih.¹¹Tukeiccuze Pachia nynh nanning kha amaw konaw te angaekuhpaw lang ae tangsah oh zah, ahoypaw rynaw balyn te zynnaw kya-e ryalaw tuh a thungnaw liate a ccingsah nawlan nanning hanlan zungzae saw kae sang.¹²Tuhcite ah Pachia te Bawipaw Jesu Khri thawccinaw thyhte, ah Bawipaw Jesu min tuh nae kya phu-esah athua cih zah nanning mah amaw kya phu-esah na thua cih oh. Mihoy leipaw¹Atu uteno hae, ah Bawipaw Jesu Khri yn thuanaw konglang te thuasah, amaw kya pynkheihlan ah sueluakunaw oh konglang te thuasah,²Bawipaw Nin tuh phe a thua vae paw hawte muisaw te thuasah, bya te thuasah, kaening kyate yn thuapaw ccaky o-ang lante thuasah oun ho hae ze, bungzounaw te siikunaw palou na hoi khyh nawlan oh kae ngia oh.³Hum nynh zemah pawpawte sanmah ae la ling nan oh sah; pawccecize tuh-e Nin a thua maw, zynnaw kyate khuliakunaw a umty cih, te seinaw ccungccapaw athuapaw ronaw ccapaw kha yn langkuh cih.⁴Tuh-e paw nynh pachia cite ko athuapaw miakaw te beik athuapaw uccaw hae kha yn rawse cih, amaw te amaw kha tuh-e hae balyn laeze hangthungkute Pachia beikinn kya yn haung cih zah Pachia nynh ka thua cite yn hokuh cih.⁵Nae kya ka um lyaze tuh-e kong tuh kae hopya vae oh paw thua zah na syntaw vae khyh oh tou?⁶Aning tuh amaw ccyh yn zaw te a langku nawlan, atu tuh a kheepaw a um ung cipaw na ny oh.⁷Pawccecize kawbya pawlangria leinaw kya-e byakhupaw tuh rya a lah cciamang vae, thuasalama atu a kheetupaw kha nuepya athua makhia po a khee ung cih.⁸Tuh-e mihoy leipaw tuh yn langkuh cih, tuh-e paw tuh Bawipaw Jesu nynh a khalang kya-e hy te a maemih cih zah amaw yn thuanaw kya-e a akpaw khate a roh cih.⁹Tuh-e mihoy leipaw tuh Satan ryalawnaw liate yn thua cih zah thungnaw, muihsahnaw, ngaeang lan umpaw hynpyakunaw balyn khate thuasah,¹⁰ronaw a tung cih hae paw kyakhe ahoy leipaw lingnaw aphuinphuin khate thuasah yn thua cih; pawccecize minmin nynh khumnaw mue khylan byaccing kha lawkuh ry khyh hae.¹¹Tukeiccuze minmin nynh hynbya kha a zyn ccaw hae cite Pachia nynh athungpaw zynseinaw kha a sawnua cih hae.¹²Tuhteze nynh byaccing kha zyn leite dingleinaw kya a lungrythuapaw balyn tuh seibe athua cih hae. Khumnaw Mue khylan Ponaw

¹³Thuasalama Bawipaw nynh a sungsah hae paw uteno hae, nanning hanlan Pachia tuh kae luung zungzae cih; pawccecize Muisaw nynh thyaasahnaw liate thuasah, byaccing kha zynnaw liate thuasah nanning tuh khumnaw mue khylan Pachia nynh atakaw lya mawte phe ae po vae oh.¹⁴Ah Bawipaw Jesu Khri phu-enaw kha na ccoubua nawlan oh, kae kya-e thehoypaw liate Pachia nynh tuh-e khumnaw kalan ae ko oh.¹⁵Tukeiccuze uteno hae, tynkaring lan thadyn oh lah kae bya te thuasah, kae ccaw te thuasah kae ccangpya oh paw phung hae kha varyng kyngkuh oh.

¹⁶Aening kha oun sungsah zah thawccinaw liate zungzae ngaengannaw te ahoypaw ngaehoinaw oun pyatupaw, ah Paaw Pachia te ah Bawipaw Jesu Khri amaw ccaccei nynh,¹⁷nae thinlung kya ngaengannaw ae la pya oh sah lah, ahoypaw ryalaw te bya miakaw kya thawzung ae la pya vae oh sah. Sawsang Ngianaw

¹Nyathyakou kya uteno hae, Bawipaw bya tuh nanning kya acyiku hawte, teitei balyn pong pazaekuh kangmaw zah phu-esah athua nawlan kae hanlan saw oun la sangpah oh.²Ccungccaw hoyleipaw te ccungccaw thya hae kuih kyate kaening hynh oun luesah nawlan saw oun la sangpah oh; pawccecize ccungccaw balyn nynh zynnaw hoi khyh hae.³Thuasalama Bawipaw tuh a lungzipaw nynh thua; aning nynh thawzung ae pya cih oh zah ccungccaw hoyleipaw kyate ae thungkhaw cih oh.⁴Kaw kae pya oh paw kha na cyih oh zah po na la cyih cih oh cite nanning konglang te Bawipaw kya zynkunaw kae hoi.⁵Bawipaw nynh nae thinlung kha Pachia sungsahnaw te Khri kya-e lungsaenaw kalan ae la cciakhae vae oh sah. A Thawnawpaw Raeringnaw Pyanaw

⁶Uteno hae, kaening kyate a mue hae paw phung thyhte hiin leite, a thawnawpaw zyntu hae kha la sibia oh cite ah Bawipaw Jesu Khri min te kaw kae pya oh.⁷Pawccecize naemaw ccaccei nynh kaening kha pawtemou dosuinku lan hae cipaw na ny oh; pawccecize nae kya kae um lya kae thawnaw khyh.⁸Ccungccaw lukhakheit looh kha amee pya leite kae ae khyh; nanning lukhakheit kya phuripaw kae thua khyh nawlan, khuazi khuadae thawbangte zuakute rya kae lawkuh.⁹Tuhte rya kae lawkupaw tuh nae kya-e lawku lan kaw kae hoi khyh keiccu thua leite, nanning nynh kae thydokute na dosuinku oh ccaw cite nynh thua.¹⁰Pawccecize nanning ryte ah umkheih oh lya kha, lukhakheit nynh rya a law ry khyh ze, aepaw mah ae nan sah cite kaw kae pya vae oh.¹¹Pawccecize nanning kyaze ccungccaw abang tuh mih thawnaw zah ryalaw kharouh law leite ming hae byathan kya palei a ccukuh bua hae cite kae thae.¹²Tuhcihawpaw ccungccaw hae tuh daebabi lan ryalawkuh hae sah lah mimaw vue kha kuakuh hae sah cite Bawipaw Jesu Khri liate kaw kae pya hae zah kae hyy hae.¹³Uteno hae, nanning tuh ahoypaw ryalawnaw kya nae lungthawthang nan sah.

¹⁴E ccaky kya-e kae bya hynh lukhakheit nynh a zui khyh ze, tuh-e paw tuh la syntaw oh lah a maethya nawlan la mungkuh nan oh.¹⁵Thuasalama rhaw hawte tua leite, uno hawte raeringnaw la pya oh. Nyathya Beihlangnaw

¹⁶Daenaw Bawipaw amaw ccaccei nynh daenaw kha ccyh takyh kya aphuinphuin te zungzae ae la pya vae oh sah. Bawipaw tuh nae balyn kya la um sah.

¹⁷Kae, Paul nynh kae beihlangnaw oh paw hynh kamaw ka kuih ccaccei te nynh ka zei; tuh-e tuh ka ccaky miakaw kya syntawnaw nynh thua.¹⁸Ah Bawipaw Jesu Khri thawccinaw tuh nae balyn kya la um vae sah.

Bible Society of Myanmar

https://app.library.bible/content/1a340f5ae072b2f4