KOLOSE1
Beihlangnaw
1Pachia rynaw liate Khri Jesu locceihtu athuapaw kae, Paul te kae unopaw Timote nynh,2Kolosa khua um hae paw mithyaa hae te Khri kya a lungzipaw uno hae kalan ccaw kae ky oh. Ah Paaw Pachia kyate thawccinaw te daenaw tuh nae kya la um vae sah.Lungtua Sawsangnaw3Nae hanlan saw kae sang vae ze, ah Bawipaw Jesu Khri a Paaw athuapaw Pachia kalan lungtuabya zungzae kae ho,4pawccecize Khri Jesu kha na zyn oh cipaw te mithyaa hae balyn kha na sungsah oh cipaw kha kae thae zah,5vaawlang khua kya nae hanlan nungpya athuapaw ngaehoinaw keiccu nynh thua. E ngaehoinaw kong hynh nae kalan yn thuapaw byaccing bya athuapaw thehoypaw kya langmawlya phe na thae vae oh.6Tuh-e thehoypaw tuh laephi pynpi kya athae thae zah alethung hawte, nanning nynh mah tuh-e tuh na thae nin oh kyate nae kya athae thae zah Pachia thawccinaw kha hmerarih lan na thaethya oh.7E kong hynh kae sungsahpaw te rya kae lahkheihpaw Epafras kyate phe na ccangku vae oh. Aning tuh nanning hanlan Khri kya-e a lungzipaw ryalahtu nynh thua.8Muisaw liate na sungsakunaw oh paw kong kha aning nynh kaening oun hopya.9Hynh-e keiccuze kaening mah tuh-e kae thae nin te nae hanlan saw palei kae sangpah oh, te muisaw lante hawnaw te thaethyanaw balyn kyakhe Pachia rynaw nynaw khate phe na bia nawlan oh kae ngiapya oh,10tuhteze nynh ahoypaw ryalaw miakaw kya athae na thae cih oh zah Pachia nynaw kya lethungte pawpaw balyn kya amaw lungrythua lante Bawipaw te angaekuhpaw hiinnaw te na hiin cih oh.11Pawpaw kya balyn lungtua biate lungsaete na ngaesang kho nawlan oh, Pachia phu-enaw huhan kyate yn thuapaw thawzung balyn khate nae thaw ae saesah oh sah.12Awnaw kya um hae paw mithyaa hae rho kha ae neesakuh bua oh paw Paaw kalan lungtuabya ho oh.13Aning nynh aening kha mohnaw huhan kyate oun luesah zah a sungsahpaw a Ccapaw kya-e peenaw lungkhu lang oun teesah.14Ccapaw liate seingaethyanaw athuapaw shawkhawnaw kha ah mue oh. Khri Hanghuaccenaw15Ccapaw tuh muih kho leipaw Pachia muinsan nynh thua, raepaw balyn kyaze ccatawccaw nynh thua.16Pawccecize vaaw te lae kya a umpaw, muih khopaw te muih kho leipaw, bawitungkhung hae, uknaw kaw hae, uktu hae, kawhoinaw hae, pawpaw balyn tuh Ccapaw liate rae athua—pawpaw balyn tuh amaw liate rae thua zah amaw hanlan nynh thua.17Ccapaw tuh pawpaw balyn a um mawze um zah pawpaw balyn tuh amaw kya kyngkute a um hae.18Khri tuh khriccaawbuu athuapaw pyn kya-e lu nynh thua; aning tuh pawpaw balyn kya ahang huaccepaw athua nawlan, athotakawnaw thua zah a chih hae paw kyaze ccatawccaw nynh thua.19Pawccecize Pachia a ccingnaw balyn tuh Ccapaw kya a um,20a vaelantung kya-e a chiise liate rhaw kha daesah zah, laephi kya umpaw uccaw hae thuasah, vaawlang umpaw uccaw hae thuasah pawpaw balyn kha Ccapaw liate amaw te bua ccawkuthui lan Pachia nynh a ry.21Nanning tuh langmawlya ahoy leipaw rya na law oh keiccuze Pachia te na sawkuh oh zah nae tuanaw kya rhaw hae nynh na la thua oh,22tuhzemah atu tuh nanning kha athyaapaw, ccaenaw um leipaw te seinaw hoi leipaw lante Pachia malang thuakhae khylan amaw a pyn kya chinaw liate phe ae ccawsakuthui vae oh.23Na thae oh paw thehoypaw kya-e ngaehoinaw kyate nueku leite, zynnaw kya tynkaring lan na bingkuh cih oh zah po na tyn cih oh, tuh-e thehoypaw tuh vaawlui zakaw umpaw raepaw miakaw kya phy thua zah, kae, Paul tuh tuh-e thehoypaw hanlan ryalahtu nynh ka thua. Khri hanlan Paul Ryalawnaw24Nae hanlan vawsaw ka teingnaw kya atu ka lungtua, khriccaawbuu athuapaw amaw pyn hanlan Khri a teingnaw kya ahobou ungpaw kha ka pynsaw kya ka ccingsah.25Pachia bya kha phe ccing lan ho khylan nanning hanlan kamaw yn pyapaw Pachia kya-e synriatu thuanaw thyhte kae tuh khriccaawbuu kya ryalahtu lang ka tang.26Tuh-e byakhupaw tuh she hae kya te ciihan hae kya thuruh a la thua, thuasalama atu tuh a mithyaa hae kya langsahpya athua vae.27E byakhupaw a phu-enaw kya-e hoirumnaw tuh hohcihmou ale cipaw Zenta hae kha nysah khylan Pachia nynh tuh-e mithyaa hae tuh a po hae; tuh-e byakhupaw tuh phu-enaw kya-e ngaehoinaw athuapaw, nae kya a umpaw Khri kha nynh thua.28Kaening nynh ccungccaw miakaw kha Khri kya accingpaw lante kae thuakhae nawlan, ccungccaw miakaw kha raeringnaw pyate, hawnaw balyn khate ccangpyate Khri kong kha kae ho.29E ryalaw hanlan ka lungkhu kya myarya athawsae lante Khri nynh yn pyapaw thungnaw balyn khate zuakute rya ka lah.1Nanning hanlan thuasah, Laodisia khua kya um hae paw hanlan thuasah, ka mae yn muih boi leipaw balyn hanlan thuasah pawcih zuakute mou rya ka law cipaw kha nysah kae ry oh.2Minmin nynh Pachia kya-e byakhupaw athuapaw Khri amaw ccaccei kha ccaerarih lan thaethya hae zah hoyte a ny nawlan hae, sungsakunaw kya sueluakuh hae zah mih thinlung tuh thawzung pya athua nawlan ka ry,3hawnaw sisua hae te nynaw sisua hae balyn tuh Khri kya thuruh athua.4Hum ccungccaw nynh san soihpaw bya hae te nanning kha ae ling khyh nawlan oh e hynh kae hopya oh.5Pawccecize kae tuh pynsaw lante nae kya ka umbua khyh zemah muisaw lante nae kya ka um. Nanning nynh angaekuh lante na cyi oh paw te Khri kya nae zynnaw a tynpaw kha ka muih zah ka lungtua. Khri kya Accingpaw Hiinnaw6Tukeiccuze nanning nynh Khri Jesu Bawipaw kha phe na lawku vae oh hawte, amaw kya hiin ccavae oh.7Amaw kya tharui saw oh lah tynsakuh thung oh, ccangpya na thua vae oh hawte, zynnaw kya tyn oh lah lungtuabya patae ho oh.8Khri ccangpyanaw thyhte thua leite, ccungccaw phung thyhte zui zah vaawlui te laephi uktu muisaw hae thyhte a zuipaw laephi thyahawnaw te accakaepaw lingkunaw khate hum nynh sanmah ae ro khyh nawlan oh la raeringkuh oh.9Pawccecize Pachia thuanaw accingpaw balyn tuh Khri kya pynsaw lante a um.10Kawhoinaw te uktu balyn kyaze lu athuapaw amaw liate nanning tuh na ccing oh.11Khri kya-e vingdungawkunaw liate chiisaw te asekuhpaw pyn kha khahkute, kuih te rae leipaw vingdungawkunaw khate nanning mah amaw kya vingdungaw na thua oh.12Baptisma innaw kya Khri ryte uubua na thua oh. Khri kha chinaw kyate a thoosahpaw Pachia thungnaw kha zynnaw liate amaw ryte na thoothui bua oh.13Seinaw te nae pynsaw vingdungawku leinaw kya na chih oh paw nanning kha Pachia nynh Khri ryte pynkheihlan ae hiinsah oh, ah seinaw balyn kha oun ngaethya.14Aening oun rawsepaw laebah ccazing te a lungkhu umpaw phunglang hae kha vaelantung kya khiadete marya a the vae.15Uktu hae te kawhoitu hae kha vua hae zah tuh-e hae tuh zapi malang langsahte vaelantung liate a tae hae.16Tukeiccuze aenaw te nianaw, athyaapaw nin hae sungnaw, sawpaw adiapaw hae sungnaw, sabbath nin hae sungnaw te asekuh lante hum nynh san bya ae la pia nan oh sah.17Tuh-e hae tuh yn thua cih paw uccaw hae kya-e mynlyh nynh thua hae; thuasalama accaccingpaw tuh Khri nynh thua.18Ahme leipaw zakawsangsakunaw kya te vaaw hae beikpaw kya a lungrythuapaw hum nynh san thethya ae la ho nan oh sah; tuh-e paw tuh amaw a tuanaw khate accakaepaw kya a tansakuhpaw, a muihpaw vizin hae kha phang kyngkuh zah,19lu athuapaw Khri kha varyng a kyngkuh leipaw nynh thua. Lu kyate pyn balyn tuh kua thua zah rukhua atungkunaw hae kyate pynkheihlan a khelekuh hae, Pachia kya-e lethungnaw te a lethung hae. Raeringnaw Pyanaw20Nanning tuh Khri ryte vaawlui te laephi uktu atakaw e muisaw hae kyate na chi vae oh athua lanze, pawccemou laephi te asekuh hae paw hawte na hiin oh?21Pawccemou, “Hae nan, taangtua nan, ty nan,” a ci hae paw phung hae kha na zui oh?22Tuh-e phung hae balyn tuh ccungccaw kawbya hae te ccangpyanaw hae kyalya thua zah, mang lalia te a zo cih hae paw nynh thua.23E hae tuh mawtemaw raekupaw beiknaw, ahme leipaw zakawsangsakunaw te pyn kha pawlangria leinaw kya hawnaw langkunaw a hoi ccaccing; thuasalama pynsaw duaanaw sungkunaw kya ccungkianaw um khyh.
Khri kya Hiinnaw Thawpaw1Nanning tuh Khri ryte phe na thoothui bua vae oh athua ze, Pachia ranglang Khri haungnaw kya umpaw vaawlang e uccaw hae kha ccung oh.2Nae tuanaw kha vaawlang e uccaw hae kya nung oh, laephi uccaw hae kya nung nan oh.3Pawccecize nanning tuh na chih oh zah nae hiinnaw tuh Khri ryte Pachia kya thuruh athua.4Aening hiinnaw athuapaw Khri he yn langkuh te, nanning mah phu-enaw kya amaw ryte nae langkuh bua cih oh.5Tukeiccuze ohhuakunaw, nungsikunaw, sungku kho leipaw rynaw, ahoy leipaw duaanaw, zohtuh beiknaw athuapaw karankunaw cikuh hae paw, nae lungkhu umpaw laephi te asekuhpaw miakaw kha chisah oh.6Tuhcihawpaw uccaw hae keiccu nynh Pachia thinrianaw tuh kawngae lei hae paw tungvaw kya a thua.7Tuh-e hiinnaw kya na la hiin lya oh tuh nanning mah langmawlya tuh-e laanpi hae tuh na la zui oh.8Thuasalama atu hynh-e hae balyn—thinrianaw, bungpawnaw, thinlung hoy leipaw, thethya honaw, nae khalang kyate anungsikuhpaw bya hopaw kha la vua oh.9Lu kheit te lu kheit hynpakuh nan oh, pawccecize ccungccaw rynpaw te a cyisahnaw kha phe na vua vae oh.10Amaw a raetupaw muinsan thyhte, nynaw kya thawsah thui athuapaw ccungccaw thawpaw khate phe na ccaankuh vae oh.11Tuh-e thawsahthuinaw kya Grik ci um khyh, Judah ci um khyh, vingdungawkuhpaw ci um khyh, vingdungawkuh leipaw ci um khyh, angaeepaw ci um khyh, Sithian ccungccaw ci um khyh, see ci um khyh, a luepaw ci um khyh; Khri tuh pawpaw tynre thua zah pawpaw tynre kya balyn a um.12Nanning tuh Pachia nynh a popaw, athyaapaw te sungsahpaw na thua oh hawte, ngaethyaumsahnaw, thawccikunaw, zakawsangsakunaw, lungnenaw, lungsaenaw khate ccaankuh oh.13Lukhakheit nynh mingccangpaw tungvaw lungccing leinaw a hoi ze, lu kheit te lu kheit ngaesangpyakute ngaethyakuh oh; Bawipaw nynh ae ngaethya vae oh hawte, lu kheit te lu kheit ngaethyakuh oh.14Hynh-e hae balyn laelan, accingpaw lunglokunaw liate pawpaw balyn a sueluapaw sungsakunaw khate ccaankuh oh.15Khri kya-e daenaw nynh nae thinlung kha ae la uk oh sah; tuh-e daenaw elang nynh nanning kha pyn pynkheit kya um lan ko na thua oh; te lungtuabya hothya oh.16Khri bya tuh nae kya phe beih lan la um sah; lu kheit te lu kheit hawnaw tynre te ccangpyakute raeringnaw pyakuh oh; nae thinlung kyakhe lungtuanaw thinlung te sam hlaw hae, thehoynaw hlaw hae te muisaw hlaw hae kha Pachia kalan sah oh.17Na cyi oh paw miakaw kha bya na ho oh zemah, ryalaw na law oh zemah Bawipaw Jesu min liate pawpaw balyn kha cyih oh lah, amaw liate Paaw Pachia kalan lungtuabya ho oh. Innbyn hanlan Phung hae18Zu hae, Bawipaw kya angaekuhpaw athua hawte nae vawpaw hae kaw kha ngae oh.19Vawpaw hae, nae zu hae kha sungsah oh lah, minmin kya reisakuh nan oh.20Ccaaw hae, pawpaw kya balyn nae nung nae paaw hae kaw la ngae oh, pawccecize tuh-e tuh Bawipaw lungrypaw nynh thua.21Paaw hae, nae ccaaw hae kha thinriasah nan oh, mih lung oun rohsei cih.22See hae, pawpaw kya balyn laephi vaw e nae bawi hae kaw kha la ngae oh, mih lungrythuasah khylan te mit te muihbianaw kyalya thua leite Pachia rawrite, thinlung balynte mih kaw la ngae oh.23Ccungccaw hae rya a lahpaw hawte thua leite, Bawipaw rya a lahpaw hawte pawpaw na cyi oh zemah thinlung ccaccingte cyih oh.24Nae ryalaw mee rho uccaw kha Bawipaw kyate na mue cih oh cipaw kha nyh oh; pawccecize Khri Bawipaw rya nynh na law oh.25Ahoy leipaw rya a lahpaw tuh a lawpaw hoyleinaw hanlan pyaru athua cih; maedo ci um khyh.1Bawi hae, nae see hae kha dingnaw te hoyte ccuepe oh, pawccecize nanning mah vaawlang khua kya Bawi kae hoi cipaw na ny oh. Tuhlaepaw Ccangpyakunaw2Saw tyty sang oh, lungtuabya hote kyhrarih lante sawsang oh.3Khri kya-e byakhupaw kha kae ho kho nawlan, Pachia nynh a byaho khonaw thuakaw kha kaening oun hungpya nawlan saw oun la sangpah oh; tuh-e byakhupaw keiccuze kae tuh thong ka ccah,4tuh-e byakhupaw tuh ho lan ka ccan thyhte ccaerarih lan ka ho kho nawlan saw yn la sangpah oh.5Atolang e ccungccaw hae kya hawnaw te la um oh lah, accyh miakaw kha hoyte la mang oh.6Ccungccaw miakaw kha pawtemou byakhung lan cipaw na nythya nawlan oh, nae byaho tuh loi te ekhaekuh sah lah, ngae ry um zungzae sah.
Nyathya Beihlangnaw7Taikhikas nynh ka konglang balyn kha ae la hopah cih oh; aning tuh Bawipaw kya a lungzipaw ryalahtu, rya kae lahkheihpaw te sungsahpaw ka neitaw nynh thua.8Kae konglang na ny nawlan oh te aning nynh nae thinlung kha thawpya khylan amaw kha nae kalan kae saw.9Aning tuh Onesimas ryte oun cceih hae, Onesimas tuh nanning laku e lu kheit thua zah a lungzipaw te kae sungsahpaw kae neitaw nynh thua. Minmin nynh hein kya acyihkuhpaw balyn kha ae hopah cih oh.10Kae te thong kae ccahkheihpaw Aristarkhas te Barnabas a neitaw lanpaw Mark nynh nanning kha ae beihlang oh. Mark tuh nae kalan yn thua ze leh la khan oh cite amaw konglang kha bya kae tawsya vae oh.11Justas a ci hae paw Jesu nynh nanning kha ae beihlang oh. Vingdungawkuh hae paw kyaze minmin kyalya nynh Pachia peenaw hanlan rya kae lahkheihpaw te lungtangnaw yn pya hae paw athua hae.12Nanning lakuze lu kheit athuapaw, Khri seepaw Epafras nynh ae beihlang oh. Nanning nynh accingpaw lante na thadyn oh zah Pachia rynaw balyn kha phe ccing lan na zui nawlan oh aning nynh zungzae zuakute saw ae sangpah oh.13Nanning hanlan te Laodisia khua te Hierapolis khua kya um hae paw hanlan aning tuh thawte rya a lah cipaw kae nynh ccaekia ka khan.14Kae sungsahpaw sibawi Luka te Demas nynh ae beihlang oh.15Laodisia khua e uno hae te Nimfa te a inn kya umpaw khriccaawbuu kalan ka beihlangnaw hae kha yn la hopah oh.16E ccaky hynh naemaw kya he na ria kou oh te, Laodisia khriccaawbuu kya mah la riasah oh; tuhawte Laodisia kyate na mue oh paw ccaky kha mah la riabua oh.17Arkhippas kha, “Bawipaw kya na muepaw ryalaw kha na lyn nawlan pe la ki,” cite la hopah oh.18Kae, Paul nynh hynh-e beihlangnaw hynh kamaw kuih te nynh ka zei. Khiikunaw ka teingpaw hynh la liathui oh. Thawccinaw tuh nae kya la um sah. Amen.
Bible Society of Myanmar