Áfuriduni13
1Aba lariñagun Bungiu lun Moisesi:2—Díreibaña ígiramaü lun heseriwidun núnrügü, ladüga sun hágiramagu Ísüraelina yúutiña nun, kéigubeirügü giñe sun hágiramagu habiñanigu.3Ábati lariñagun Moisesi houn gürigia: —Haritagua humá luagu weyu le, le lasagaragüle Bungiu hun lau óunwenbu ubafu Ehiptugiñe, le meha ñein lubéi haganawa kei idamuni. Meiga humá fein gaganatu lébini.4Uguñe weyu wáfurida lidan hati le Abibü,5Ani lídanmeme hati le, lunti wefeduhani luéyuri esefuruni, danme barǘ láadiwa Bungiu lidoun aüdü rísiti ani buiti lun ábunaguni, le hageira Kananna, Étüna, Amoruna, Eweuna hama Hebusuna, le meha füramase lubéi houn wagüchagu luagu líchugubei lan woun.6Wéigiba fein maganatu lébini luagu sedü weyu, lídanme lisedün weyu, ábame wefeduhan lidan liri Bungiu.7Lidan sun sedü weyu ligía, wéigiba fein maganatu lébini, ani moun lumuti ñein lan lébini lidan sun hageira, ni fein to gaganatu lébini.8Lídanme weyu ligía, wariñagame houn wasaanigu: “Ladügǘnbei le, luagu le ladügübei Bungiu woun dan le wáfuridunbei Ehiptugiñe.9Ani ítara kéigubeirügü hamuga anihein lan aban makü huagu luagu harüna o luagu lan herebe, laritaguagüdübadün katei le luagu lunti lan wadimurehan luagu lilurudun Wabureme súnwandan, ladüga ligía asagarubaliwa Ehiptugiñe lau ubafu wéiriti.10Ligía lunti lubéi wefeduhani fedu le sagü irumu lidan lidaani”.11—Danme barǘ laadiwa Bungiu hageiroun Kananna, danme lederegeruni fulasu woun keisi füramase lani woun luma houn wagüchagu,12gasu wederegeruniña sun furumiñetiña wasaanigu wügüriña lun, hama sun furumiñetiña animaalugu wügüriña ha hemeilihan wabiñanigu, ladüga yúutiña lun Bungiu.13Ánheinti dan le furumiñeti temeilihan aban burigü, gasu wíchugun aban mudún leweñegua tiráü burigü, anhein míchugun wamá mudún, lunti wáhalachuni ligiina burigü. Lunti giñe wíchugun aban idewesei luéigiñe kada isaani le íbugañaü,14haruga weyu danme hálügüdüniwa wasaanigu ka lan mini lan le, wariñagame houn: “Sagá lumutiwa Bungiu lau ubafu wéiriti Ehiptugiñe, le meha ñein lubéi waganawa kei idamuni.15Dan le tedererunbei lanigi urúei lun mígirun lan lun wáfuridun, aba láfaraguniña Bungiu ígiramaü hadan sun iduheñu Ehiptuna, hama sun furumiñetiña hemeilihan habiñanigu, ligía wadagaragüdünbaliña sun furumiñetiña wügüriña animaalugu emeilihóutiña lun Bungiu, ru wagía aban idewesei luéigiñe wasaani le íbugañaü.16Ítara liña lubeiti kéigubeirügü hamuga anihein lan aban makü luagu harüna o luagu lan herebe, laritaguagüdübadün fedu le luagu sagá lániwa Bungiu lau ubafu wéiriti Ehiptugiñe”.
Dúeri luma watu gemeti
17Dan le lígirunbei urúei lun háfuridun Ísüraelina Ehiptugiñe, manügün lumutiña Bungiu lídangiñe üma le lídounbei hageira Filistéana, létima yebe surubei, ladüga haritaguati luagu mabusenrunbaña lan Ísüraelina hageindagun danme lunti lan hageindagun, himei habéi lan hagiribudun Ehiptun.18Ligía legeyedaguagüdünbaliña luéigiñe lémeri fulasu mageirawati le luágunbei barana funati. Afileiheina kei súdara háfurida Ísüraelina Ehiptugiñe.19Barǘ lumuti Moisesi lúgubu finóu Hosé lúmagua, ladüga füramasetiña meha Ísüraelina lun Hosé lubaragiñe lounwen, luagu ítara luba lan hadügüni. Lariñahare meha Hosé houn: «Liábinba Bungiu íderaguaün, danme lasuseredun, lunti hanügüni núgubu yáagiñe».20Aba háfuridun Ísüraelina Sukotugiñe, aban hemeraagun Etamü, le ñein lubéi lagumesera fulasu mageirawati.21Wéyuagu, ñeinñein Bungiu hama lidan aban dúeri, lun larufuduni üma houn; áriebu, lídanñein aban watu gemeti, lun larugoungadun hau. Ítara liña gayara lan héibugun wéyuagu áriebu.22Ñeinñein dúeri ligía súnwandan habá habá wéyuagu, luma watu gemeti áriebu.Bible Society of Honduras